Қазақстандықтар баруға қорқатын 12 мемлекет
Алғашқы саяхатқа ең қолайсыздау бағыттар.
Көпшілік Rixos Aktau мен Анталияның жағажайларына асығып жатқанда, соңғы үш жылда Қазақстаннан бар-жоғы бір адам ғана барған елдер бар. Иә, дәл естідіңіз — үш жылда бар болғаны бір билет қана сатылған.
Aviasales.kz ең сирек броньдарды талдап, осындай бағыттардың тізімін жасады. Олардың қатарында Джибути, Намибия, Мозамбик, Зимбабве, Мьянма, Гамбия, Реюньон, Боливия, Панама, Суринам, Эфиопия және Замбия бар. Солардың үшеуімен жақынырақ таныстырамыз.
Намибия: бизнес-класпен шөлге
Намибияға сапар — бұл тізімдегі ең қымбат ұшу. Қазақстаннан барған жалғыз саяхатшы бизнес-класты таңдап, орташа чек бойынша рекорд орнатқан. Әбден орынды: Намибия — Жер бетіндегі ғарыш іспеттес ел. Мұнда саяхатшылар Дэдвлей алқабындағы қызғылт дюналардың аясындағы қураған ағаштарды көру үшін, құм басқан тастанды қалаларды зерттеу үшін және, әрине, Этоша ұлттық паркінде сафариге шығу үшін келеді.
Егер бұл бағыт сізді де қызықтырса, дайын болыңыз: Қазақстаннан Намибияға жол алыс. Бір немесе екі ауысып міну қажет болады. Ең қолайлы бағыттар — Франкфурт арқылы (Lufthansa) немесе Аддис-Абеба арқылы (Ethiopian Airlines). Жалпы жолға кететін уақыт 15 сағаттай.
Мадагаскар: Джулиан патшаның отаны
Мадагаскар — сирек бағыттардың ішінде ең көп қызығушылық тудыратын елдердің бірі. Бірақ, байқасақ, көбісі бұл сапарды тек арман деңгейінде қалдырады. Ал шын мәнінде, бұл арал — өзіңді мультфильм кейіпкеріндей сезінуге болатын нағыз ғажайып әлем (тек ән айтатын сусиырлар жоқ).
Лемурлар мен алып баобабтардың отанына саяхатшылар көбіне ерекше табиғатты тамашалау, ұлттық парктерде трекинг жасау және Нуси-Бе сияқты жұмақтай аралдарда демалу үшін барады. Мұнда жету үшін ірі транзиттік хабтар арқылы ұшу қажет. Мысалы, Париж (Air France), Стамбул (Turkish Airlines) немесе Аддис-Абеба (Ethiopian Airlines). Осы қалалардан ел астанасы Антананаривуға тікелей рейстер бар.
Джибути: туристер назарынан тыс қалған ел
Егер Мадагаскар — арман елі болса, ал Джибути — соған тура қарама-қарсы ұғым. Бұл бағытты адамдар іздемейді деуге де болады, және бұған себеп те бар. Джибути — жағажайда демалғанды ұнататындарға емес, нағыз зерттеушілерге арналған ел. Мұнда пальмалар мен түрлі-түсті коктейльдер жоқ, бірақ көздің жауын алатын ерекше пейзаждар бар. Мысалы, мұнда әлемдегі ең тұзды көлдердің бірі — Ассаль орналасқан, оның жағалауы тұз кристалдарымен көмкерілген. Сондай-ақ бұл жерде алып кит-акулалармен бірге жүзіп көруге болады. Мұндай мүмкіндік жер бетінде сирек кездеседі.
Қазақстаннан Джибутиге жету ойлағаннан оңайырақ: ыңғайлы рейстер Дубай (Flydubai) және Стамбул (Turkish Airlines) арқылы қатынайды.
Саяхат — әрдайым жайлылық пен бес жұлдызды қонақүйлер туралы бола бермейді. Кейде ол өз аймағыңнан шығып, әлемді өзінің нағыз бейнесінде — таңғаларлық, жұмбақ әрі сол қалпында әдемі күйінде тану туралы.
