
Еуропадағы Жаңа жыл мен Рождествоны көріңіз. Ертегі әлеміне гид
Атмосферасы ерекше жәрмеңкелер мен пірәндік үйшіктер бойынша гайд. Жеке тәжірибемнен түйгенім.
Еуропа қараша айының ортасынан бастап-ақ Рождество мерекесін тойлауды бастап кетеді. Қалалардың орталық алаңдары мен негізгі көшелерінде шырша құрылып, Рождество мен Жаңа жыл атмосферасы салтанат құрады. Еуропада қыстың әдемі мерекелеріне куә боламын десеңіз, сізге жолнұсқау дайындап қойдық.


Прага, Чехия

Жеті жылдан бері Чехия астанасы Прага қаласында тұрып жатырмын. Еуропадағы Жаңа жыл Рождество мерекесінің атмосферасын дәл осы қалада алғаш рет сезіндім. Праганың орталығындағы басты көшелерге гирляндалар ілініп, трамвайлар да безендіріледі. Ал Праганың бас шыршасы қаланың Ескі алаңына (Staroměstská) тігіледі.
Қазір қала билігі бүкіл Чехия бойынша бас шыршаға конкурс жариялап, алаңға қойылатын шыршаны іздеп жатыр. Таңдалған шыршаны сәндеп, шамын 30 қарашада салтанатпен жағады. Прагада Рождество мен Жаңа жылды тойлау 6 қаңтарға дейін жалғасады. Сол күні шырша жиналып, кесілген ағаш балабақшаларға я мектептерге жиһаз жасауға жіберіледі.

Ескі алаңдағы бас шыршаның маңына Рождество базары (кейбірі жәрмеңке дейді) жайылып, күні бойы ашық болады. Жәрмеңкеде чехтардың ұлттық тәттісі — трдельниктің дәмін татып, алкоголь мөлшері аз ыстық вино (svařák) ішуге болады. Праганың Рождество базары — Еуропадағы әдемі базардың бірі. Күні бойы шырша маңында Рождество музыкасы ойнап, мерекенің сәнін кіргізеді. Қаланың басқа аудандарында да шыршалар тігіліп, базарлар ашылады.
Прагаға арзан билеттерді Aviasales.kz сайтынан оңай таба аласыз. Астанадан Прагаға тікелей рейс те бар. Түркияның Pegasus компаниясы да Қазақстаннан Стамбул арқылы Прагаға ұшатын рейстеріне жиі жеңілдік жариялайды. Ал Прагада қонақүй, тамақ, қоғамдық көлік Еуропаның біраз қаласымен салыстырғанда арзан.
Страсбург пен Кольмар, Франция

Францияның Эльзас аймағындағы Страсбург қаласын «Рождествоның астанасы» («Capitale de Noël») деп атайды. Себебі бұл қалада Рожество жәрмеңкесі 1570 жылдан бері өтеді. Шынымен, Страсбургты «Рожество астанасы» дейтіндей-ақ. Қала орталығына шырша тігіліп, Christkindelsmärik (атын оқу қиын, Кришткиндельсмерик) базары жайылады. Қолыңызға жылы шай я глинтвейн (бұл да ыстық шарап) алып, Страсбургтың безендірілген көшелерін аралап, Жаңа жылды күткен ертегі әлеміне саяхат жасай аласыз.
Сәл суық ауа райында (Еуропада әдетте -8-10 градус суық болады), жап-жарық көшелердегі орта ғасырда салынған үйлер арасын асықпай аралап, мерекелік атмосфераны сезінесіз. Страсбургтан шығып, Эльзас аймағындағы Кольмар не Мюлуз қалаларына барып келсеңіз болады. Страсбургтен Кольмарға пойызбен жарты сағатта, Мюлузге бір сағатта жетесіз. Кольмар мен Мюлузге барсаңыз, шап-шағын қалалардағы қысқы думанның ерекше бейнесін көресіз.
Вена, Аустрия

Вена да Рожествоның әдемі атмосферасы жағынан Прагадан, Страсбургтен қалыспайды. 2024 жылдың желтоқсанында Венаның Рождествосын көру үшін достарыммен арнайы барған едім. Вена ратушасының алдына әдемі шырша бой көтеріп, мерекелік базар ашылады. Венада бас шырша дәл орталықта тігілетіндіктен, қаланың әдемі жерлерін жаяу аралауға болады. Негізгі шыршаның тура жанында үлкен мұз айдын да ашылады.
Аустриялықтардың глинтвейні мен тәтті печеньелерінен дәм тату керек. Венаның Рождество алаңында Моцарттың музыкалары ойнап тұрады. Шырша маңында да мерекелік концерттер жиі болады.
Вена ратушасының алдына Рождество қақпасы қойылып, безендіріледі. Дәл осы қақпадан кірсеңіз, ертегі әлеміне тап боласыз: жаңа піскен тамақ пен ыстық шараптың иісі мұрын жарады, ал базардан шыққан бу майда-майда шамдардың жарығына билеп жүргендей көрінеді. Ғажап көрініс.
Будапешт, Венгрия

2023 жылы желтоқсанда жол түсіп Будапешт қаласына барғанымда Рождество базарында лангоштан (майға қуырылатын нан, біздің шелпекке қатты ұқсайды) дәм татқаным бар. Қала ортасындағы Қасиетті Иштван базиликасы алдында құрылған бас шыршаны көріп, базар араладым. Бұл жерде мұз айдыны да ашылады.
Будапештегі Парламенттің маңайы да безендіріліп, үлкен шырша құрылып, жарқырай түседі. Дунай өзеніндегі кемелерге отырып, сұп-суық өзен бойымен серуендесеңіз болады.
Будапешт Рождествоға дайындықты қазан айының соңынан бастап кетеді. Ал нағыз қызатын шағы — желтоқсан айы. Қалада бірнеше жерде үлкен жәрмеңке базарлар ашылады. Ең үлкен базардың бірі — туристер көп шоғырланатын Fashion Street Budapest көшесіндегі Вёрёшмарти (Vörösmarty tér) алаңында. Көше шырша, жарықтармен безендіріледі. Базарда аспаздар, сатушылар жиналып, тағамдарын, қолдан жасаған дүниелерін сатады. Бұл базардан Еуропа жұртына танымал лангош пен гуляш жеуге болады.
Қазір Scat әуе компаниясы Шымкенттен Будапештке тікелей ұшады. Aviasales.kz-тен билет алып, бұл қалаға қараша мен желтоқсанда саяхаттап қайтуға мүмкіндігіңіз бар.
Париж, Франция

Париждегі Елисей алаңы Рождествода шамдар көмкеріліп, Триумф аркасына дейін жарқырап кетеді. Қаладағы бас шырша Galeries Lafayette (Лафает галереясы) жанында тігіледі. Эйфель мұнарасының маңайы, Сена өзенінің бойы, Нотр-Дам-де-Пари шіркеуінің айналасы да Рождество атмосферасына енеді. Елестетіп көріңізші, бәріміз бір барсақ деп армандайтын Париж қаласы қарашаның ортасынан бастап, 6 қаңтарға дейін Жаңа жыл атмосферасына еніп, басты туристік орындар жарқырай түседі.
Еуропада Рождество мен Жаңа жыл — екі бөлек мереке. Еуропалықтар Рождествоға көп көңіл бөледі. Қазақстаннан келетін туристер осыны ескергені жөн. Желтоқсанда Парижде адам көп болады. Сондықтан ұрылардан өте сақ болу керек. Эйфель маңында заттарымды ұрлатып алған едім. Рождество мен Жаңа жылда негізгі атмосфера Эйфельде емес, Триумф аркасы маңында болады. Лафает галереясының жаны да өте әдемі безендіріледі.
Берлин не Мюнхен, Германия

Германия — Рождествоны дүркіретіп тойлайтын елдің бірі. Кез келген қаласындағы орталық алаңдарда зәулім шырша бой көтеріп, жайма базар ашылады. Қалалар шырша мен көшені безендіруден жарысып жатқандай: бәрі әсем де сән-салтанатқа толы.
Мюнхенде бас шырша мен жәрмеңке қаланың орталығындағы Marienplatz алаңында құрылады. 2023 жылы Мюнхенге барғанда көргенім — базарларда көп дүңгіршек ашылып, ағаш ойыншықтардың, мерекелік тағамдардың, глинтвейннің саудасы қызады. Мюнхеннің бірнеше жерінде ашық мұз айдындар да ашылады.
Ал бір ғана Берлиннің өзінде елуден астам базар ашылады. Бас жәрмеңке қаланың қақ ортасындағы Gendarmenmarkt (Жандарменмаркт) алаңында жайылады. Бірақ қаладағы басқа базарлар да бұл алаңдағы базардан қалыспайды.
Берлинде Рождество базарлар мен шырша өте көп болады. Қаланың әр жерін безендіруге көп күш салады. Рождество жәрмеңкелері тегін және ақылы деп екіге бөлінеді. Ақылы базарға 10-20 еуро төлеп кіресіз. Ақылы базарларда шоулар, концерттер, конкурстар көп болады. Ішің пыспайды. Тегін базарда көбіне тамақ пен естелік заттар алуға болады.
Бір кеңес
Рождество мен Жаңа жыл атмосферасы көру үшін Еуропаға келіп жатсаңыз, бірнеше қалаға барып қайтыңыз. Мәселен, Прага мен Венаның арасы, Берлин мен Прага арасы, Прага мен Мюнхеннің арасы автобус я пойызбен 4-5 сағат болады. Еуропаның ішінде Ryanair, EasyJet, Vueling, Eurowings сынды лоукостерлермен де ұшуға болады.
Желтоқсанда Еуропадағы қай қалаға барсаңыз да, мерекелік көңіл-күймен жылы қарсы алады. Тек жылы киініп алыңыз, тоңып қалмаңыз.