Венада бала-шағамен қайда баруға болады?

Былтыр Қазақстаннан достарымыз қонаққа келген. Олар жеті жасар ұлына Диснейлендке баратын билет сыйлапты. Парижге бара жатқан жолда Венада бірнеше күн аялдады. Сол кезде ойланып қалдым: Диснейленд жарнамасы әр бала Микки Маустың қолын алғанды, америкалық төбешік сырғанағына екі сағат кезекте тұруды армандайды дегенге сендіріп тастаған сияқты. Ал біз Венаның өз Диснейленді — Пратер бар екенін көрсеттік. Онда дәл сондай адреналин алуға болады, бірақ ол әлдеқайда арзан әрі ұзын-сонар кезек те жоқ. Осылайша, қызы­мызды жиі апаратын және қонақтарды апаруға болатын орындарды топтап, осындай мақала жазу идеясы туды.

Бұдан да көп жақсы бағыттар мен күшті орындар — әлеуметтік желілерімізде

Telegram

Instagram

Пратер

Пратер бір кездері ақсүйектерге арналған императорлық аң аулайтын орман болған. Қазір көпшілікке арналған ойын-сауық саябағы. Мұнда екі жастан асқан балаларға арналған баяу әткеншектерден бастап жасөспірімдерге арналған экстремал сырғанақтарға дейін түрлі аттракцион бар. Саябаққа кіру тегін, ал аттракциондар билетін сол жерден сатып аласыз. Бір аттракционның бағасы — 3–8 еуро (1 740–4 640 теңге).

Пратердегі Вена шолу дөңгелегі (Wiener Riesenrad) — қала символдарының бірі. Біз бұл аттракционға жазда да, қыста да міндік. Қыста кабиналар жайлырақ екен (жазда желдетудің нашарлығынан ішінде қапырық болуы мүмкін). Ересектер билеті — 14 еуро (8 120 теңге), балалар билеті (3–14 жас) 6,5 еуро (3 770 теңге) тұрады, ал 3 жасқа дейінгі балаларға кіру тегін.

Не ішеміз, не жейміз деп алаңдамасаңыз болады: аумақта кафе, дәмхана мен дәстүрлі киоскі — вурстльштанд (Würstelstand) көп (онда қуырылған шұжық пен картоп фриі сатылады). Австрияда картоп фриін французша pommes frites деген атауы бойынша «поммес» деп атайды. Шұжықтар көбіне шошқа етінен (Schweinefleisch) жасалады, бірақ күркетауық («путэнфляйш») не сиыр етінен («риндфляйш») жасалған шұжықтары да бар. Сатушыдан нақтылап алыңыз.

Балаларға арналған опера

Неміс тілді елдерде балаларды операға ерте жастан ертіп барады. Моцарттың «Сиқырлы флейтасын» (Die Zauberflöte) қазақтың Алдар көсесімен салыстыруға болады — бұл кейіпкер жайлы хикаяны балалар жақсы біледі. Операға бару Аустрия мен Германиядағы көп баланың балалық шағының маңызды бөлігіне айналған. Сондықтан қапы қалмаңыз, билет іздеңіз!

Балаларға арналған қойылымдар әдеттегі операдан қысқа әрі мазмұны кішкентайларға бейімделген болып келеді. 40–60 минутқа созылады. Кейбір сахналарда қойылым басталардан бұрын балаларға оқиға не туралы екені қысқаша баяндалады. Мысалы, Киелі Петр шіркеуінде жүргізуші қойылымнан бұрын оның мазмұнын түсіндіріп берді. Ата-ана да баланы алдын ала дайындағаны дұрыс. Мәселен, сюжетін ертегі ретінде айтып беріңіз, YouTube-тан бірнеше ария тыңдатыңыз — сонда музыкасы да оған таңсық көрінбейді. 

Моцарттың операсы немісше шырқалады, бірақ тіл білу міндетті емес. Музыкаға, сахна көріністеріне, таныс арияларға, мысалы, Түн патшайымының ариясына немесе Памина мен Папагено дуэтіне тамсанып қайтса да керемет емес пе?

Балаларға арналған опера қойылымдарына билетті Вена халық операсы (Volksoper) мен Вена мемлекеттік операсының (Staatsoper) сайттарынан алуға болады. Киелі Петр шіркеуіндегі Криптадағы опера (Oper in der Krypta) сайтында тікелей брондау жоқ. Сондықтан TicketGretchen қосымшасын қолданыңыз. Онда кейде ерекше ұсыныстар мен алдын ала сатылымдар да болады. Сондай-ақ мына сайттарда билеттер сатылып жатады: www.wien-ticket.at, www.oeticket.com, www.viennaticketoffice.com.

ZOOM балалар мұражайы (ZOOM Kindermuseum)

• 

  ZOOM Ocean
• 

  ZOOM Ocean

ZOOM — 14 жасқа толмаған балалар ойын арқылы әлем танитын интерактив алаң. Мұражайда бес түрлі аймақ бар. ZOOM Ocean — 8 айдан 6 жасқа дейінгі балақайларға арналған, теңізге ұқсатып жасалған ойын аймағы. Екі қабатты алаңда бала еркін жүгіріп, кеңістікті зерттеп, экспонаттармен ойнап, ойыншық кеменің рөлін айналдырып, алаңсыз көңіл көтереді. Шынымды айтсам, алты жасар балаларға бұл жер қызық болмауы мүмкін. Алаң көбіне сәбилерге, тоддлерлерге арналған.

Ал 3 жастан 14 жасқа дейінгі балаларға ZOOM Atelier мен ZOOM Mobile бөлімдерінде шығармашылық шеберлік сабақтары мен Mitmach-Ausstellung интерактив көрмелері өтеді. Жасы үлкен балалар TrickFilm студиясында мультфильм жасап көре алады. Сабақтың бәрі неміс және ағылшын тілдерінде сөйлейтін қызметкерлер өткізеді. Балаңыз ағылшынша білсе, еш қиналмайды.

Билеттер музей сайтында онлайн сатылады, келуге 10 күн қалғанда сатып ала аласыз. Бағасы — 6,5–8,5 еуро (шамамен 3 770–4 930 теңге).

Шёнбрунн хайуанаттар бағы (Tiergarten Schönbrunn)

Хайуанаттар бағы туралы алуан түрлі пікір бар. Бірақ Венаға келгенде балаңызды әлемдегі ең көне бақтың бірі — Шёнбрунн хайуанаттар бағына алып бармасаңыз, дұрыс болмас. Ол — жануарлар торда тұратын жай парк емес, тарихи маңызы зор, салтанатты сәулеті бар сарай кешенінің бір бөлігі. Мұнда серуендеудің өзі бір ғанибет. Тынығып алатын орындық көп, балалар алаңдары, демалыс орындары мен кафелер де жетерлік.

Кіру билеті шамамен 27 еуро (15 660 теңге) тұрады. Иә, арзан емес, бірақ бұл жануарларға жағдай жасауға жұмсалатынын ойласаңыз, көңіліңіз жайланады. 

Хайуанаттар бағына қарсымын десеңіз, жай ғана сарай аумағындағы саябақты аралап, Шёнбрунн балалар мұражайына (Kindermuseum Schloss Schönbrunn) соғып кетсеңіз болады. Онда Габсбургтер әулетінің ханзадалары мен ханшайымдары қалай өмір сүргені, немен ойнағаны, қалай дастарқан жайғаны және не киінгені жайлы баяндап береді. Киімдерді киіп көруге де болады. Билет шамамен 9,5 еуро (5 510 теңге) тұрады.

Венадағы Ратуша алдындағы мұз айдыны

Қыста балалармен Венада естен кетпестей демалудың ең ғажап жолы — Ратуша алдындағы мұз айдынында сырғанақ тебу. Елестетіп көріңізші: қаланың қақ ортасы, айналаңызда көне ғимараттар, жарқыраған шам, шырша мен рождестволық безендірулер, глинтвейннің хош иісі аңқып тұр. Синатраның әні баяу тербеп, балаларыңыз Еуропадағы ең үлкен мұз айдындарының сырғанап жүр. Ғажап па? 

Бұл мұз айдыны әдетте қаңтар мен наурыз аралығында жұмыс істейді. Кішкентай балаларға оңтүстік жағында арнайы аймақ қарастырылған. Ол жерге кіру тегін. Мұнда ата-аналар баласымен бірге сырғанаса болады. Екі жолақты балалар конькиін де тегін бере тұрады. 

Жаратылыстану мұражайы (Naturhistorisches Museum Wien)

Венаны танымал туристік маршрут бойынша аралап жүрсеңіз, Мария Тереза алаңын (Мария-Терезиен-Платц) көрген боларсыз. Мұнда бір-біріне қарама-қарсы екі бірдей ғимарат тұр. Олар — Өнер тарихы мұражайы және Жаратылыстану мұражайы. Екеуі де қызық, бірақ балалармен екіншісіне барған дұрыс.

Шынымды айтайын: балалармен саяхаттап жүргенде Венаның барлық мұражайын айналып шығу мүмкін емес. Сондықтан міндетті түрде көруіміз керек дегендерін таңдап аламыз. 

Жаратылыстану мұражайы табалдырығын аттай сала таңырқатады… XIX ғасыр стиліндегі ғимараттың өзі-ақ көне жәдігердей көрінеді. Ішінде динозаврлар, қаңқалар, жанартау мен метеорит залдары, түрлі жануарлар және антропология бөлімі бар. Балалардың іші пыспайтыны анық. Олар найзағай жарқылдатып, жанартау атқылатып көре алады, метеориттің көлемін өзгертіп, оның Жерге құлағанын бақылайды. Бәрін өз қолымен жасайды.

Бонус — 19 жасқа толмаған балаларға кіру тегін. Ересектер билеті шамамен 18 еуро (шамамен 10 440 теңге) тұрады. Бірінші қабатта 5 еуроға (2 900 теңге) аудиогид алуға болады, оның ішінде орыс тіліндегі нұсқасы бар.