Балаға да, қарияға да ұнайтын он бір ел. Aviasales.kz топтамасы
Әр елдің артық тұсын жазып шықтық.
Үй ішімен шетелге шығарда көпшілік бірден Түркия, Дубай не Египетті таңдап жатады. Оның себебін жақсы түсінеміз. Бірақ балаға да, үлкенге де жайлы болатын бұдан басқа бағыт аз емес. Біз он бір елден тұратын топтама әзірлеп, әрбірінің артық-кем тұсын түгендеп шықтық. Бір елдің жағажайы жайлы, енді бірінің табиғаты тұмса. Ал тағы бірінде озық медицинаға жүгініп, демалыс пен денсаулыққа қатар көңіл бөле аласыз.
Тез жетесіз, көп құртпайсыз
Бұл бөлімдегі елдер алысқа ұшпай-ақ, отбасымен жайлы демалып қайтқысы келетіндерге ұнауы мүмкін. Көп шығындалмай-ақ жаңа мәдениетпен танысқанға таптырмас нұсқалар. Қазақстандықтар бұл елдерге визасыз барады.
Грузия (Батуми, Тбилиси)
Виза: 1 жылға дейін визасыз жүруге рұқсат.
Жол: Астана, Алматы, Ақтау, Атырау қалаларынан тіке рейстер бар. Атырау мен Ақтаудан бір жарым сағатта, Алматы мен Астанадан 3-4 сағатта жетесіз.
Грузия — табиғат пен теңіз демалысын қатар ұсынатын ел. Отбасымен саяхаттайтындар Тбилисидегі Мтацминда паркіне фуникулермен көтеріліп, аттракциондарға мініп, қаланы биіктен тамашалай алады. Бірақ Тбилисидің көшелері тастан төселген әрі еңіс болғандықтан, бала арбасымен жүрген аса ыңғайлы емес. Жазда Батумидегі дельфинарийдің шоуын көріп, үлкен Ботаника бағында велосипед тебуге болады. Батумидің өзіндегі жағажайлар тасты, ал құмды жағажай іздесеңіз, Уреки мен Шекветили ауылдары қолайлырақ. Мектеп жасындағы балаларға Кутаиси маңындағы Прометей үңгірі ерекше әсер қалдырады. Оның ішімен өзен ағып жатыр, ал түрлі-түсті жарықтармен безендірілген үңгірді қайықпен аралауға болады.
Қашан барған дұрыс: Егер жағажайдан басқа да қызықтар көремін десеңіз, Грузияға көктемнің аяғында барған жақсы. Бұл кезде күн әлі қатты ысып кетпейді. Тағы бір қолайлы уақыт — қазан айы. Осы кезде Тбилисиде жыл сайын қала мен егін жинау маусымына арналған Тбилисоба мерекесі өтеді.
Армения (Ереван)
Виза: Қазақстандықтар үшін визасыз режим жұмыс істейді. 180 күнге дейін төлқұжатсыз жүруге рұқсат.
Жол: Алматы мен Астанадан Ереванға тікелей не ыңғайлы транзиттік рейстер бар. Шамамен 4-5 сағат ұшады.
Ереван — тыныш әрі жайлы қала. Қала орталығында кең жаяу жүргіншілер аймақтары мен жасыл саябақтар көп болғандықтан, балалармен де, үлкен кісілермен де асықпай серуендегенге ыңғайлы. Ал орталықтан алыстаған сайын еңіс көшелер көбейеді, сондықтан бала арбасымен жүрген қиындау. Ереванда Каскад кешенін, субұрқақтар мен заманауи мүсіндерді аралап, хайуанаттар бағы мен Экзотариумға баруға болады. Кешке орталық алаңдағы «Ән салатын субұрқақтар» шоуы балаларға да, ересектерге де ұнайды. Жаздың ыстық күндері қала сыртындағы Севан көліне барып, қайықпен серуендеген, жағасында демалған жақсы. Ереванға барып-қайту билетін бір адамға 100 мың теңгеге табуға болады.
Қашан барған дұрыс: Ереванда жаз өте ыстық. Шілде-тамызда күн +40°C-тан асып кетуі мүмкін. Сондықтан қаланы жаяу аралау үшін мамырдан маусымның басына дейін не қыркүйек-қазан айларында барған жөн.
Өзбекстан (Ташкент, Самарқанд, Бұхара)
Виза: Қазақстандықтар үшін визасыз режим.
Жол: Алматыдан Ташкентке ұшақпен бір жарым сағатта жетесіз, Астана мен Алматыдан пойыздар мен көлік қатынайды.
Өзбекстан — тарих пен заманауи демалысты қатар ұсынатын бағыт. Ташкенттегі Magic City саябағында алып қамал, Орталық Азиядағы ең үлкен аквариумдардың бірі және балаларға арналған көптеген ойын-сауық бар. Күндіз тарихи ғимараттар мен мешіттерді аралап, кешке Tashkent City Park-тағы лазер шоуын тамашалауға болады. Жақында ашылған Ислам өркениеті орталығы үлкендерге қызық болса, жаңартылған қуыршақ театры балаларға ұнайды. Кейінгі жылдары Өзбекстанда әлемге танымал әртістер жиі концерт береді. Сондықтан сапар алдында қандай мәдени іс-шаралар өтетінін қарап шыққан жөн. «Афрасиаб» жүрдек пойызына билетті онлайн сатып алуға болады. Билет сатылымы сапарға үш ай қалғанда ашылады.
Қашан барған дұрыс: Өзбекстанда жаз өте ыстық. Сондықтан сәуір-мамыр не қыркүйек-қазан айларында барыңыз.
Қырғызстан (Ыстықкөл, Қарақол)
Виза: Қазақстан азаматтары кеденнен жеке куәлікпен-ақ өте алады.
Жол: Алматы мен Астанадан Бішкекке тікелей рейстер бар. Ұшу уақыты — 50 минуттан 2 сағатқа дейін. Алматыдан Ыстықкөлге маусымдық тікелей рейстер ұшады, жолға шамамен бір сағат кетеді.
Қырғызстан табиғат аясында демалғанды ұнататын отбасыларға қолайлы. Таза көл, тау ауасы мен жұмсақ климат үлкендерге де, балаларға да жайлы. Ыстықкөл жағасындағы Бостери ауылында аквапарктерге барып, шолу дөңгелегіне мініп немесе көлде теплоходпен серуендеуге болады. Қарақол маңында термалды ыстық бұлақтарға түсіп, Тянь-Шань шыршалары өскен шатқалдарды аралауға болады. Сондай-ақ шегесіз салынған көне ағаш шіркеу мен дүнген мешітін көріңіздер. Ал Григорьев пен Семенов шатқалдарында киіз үйлерге кіріп, атқа мініп, бүркітшілермен суретке түсуге мүмкіндік бар. Чолпон-Атадағы Рух Ордо ашық аспан астындағы мұражайы да қызық жәдігерге бай. Көл суы шілде-тамыз айларында жақсы жылынады. Кішкентай балалармен барғанда суы жылытылатын бассейні бар пансионаттарды таңдаған жөн.
Қашан барған дұрыс: Қаланы аралағыңыз келсе, көктем мен күз қолайлы. Көктемде қала жандана бастайды, ал күзде, қазанның ортасына дейін, күн қатты ыстық болмайды әрі базарларда арзан жеміс-жидек көбейеді.
Тәжікстан (Душанбе)
Виза: Визасыз режим. Шектеу жоқ.
Жол: Астана мен Алматыдан Душанбеге тікелей рейстер бар. 1,5–2 сағатта ұшып барасыз.
Душанбе — асықпай серуендеп, қаланы баяу аралағанды ұнататындарға қолайлы қала. Орталық көшелері кең, жасыл саябағы көп. Қала ішінде такси табу оңай, олардың бәрінде есептеуіш болғандықтан жолақысы да қолжетімді. Таксиді Jura қосымшасы арқылы да шақырасыз. Бірақ мамырдан қыркүйектің ортасына дейін күн өте ыстық болады. Сондықтан Душанбеге көктемде не күздің басында барған дұрыс. Қалада Самани ескерткішін, Парламент ғимаратын, жаңа үлкен мешітті, «Кохи Навруз» сарайын және «Мехргон» базарын аралауға болады. Ал қала сыртындағы Искандеркөл, Ходжа-Сангхок шатқалы мен тарихи Гисар бекінісі — үй ішімен бір күндік саяхат жасауға жақсы орындар.
Мұражайларда, базарлар мен қала сыртында жүргенде картамен төлей алмауыңыз мүмкін. Сондықтан азын-аулақ қолма-қол ақша болғаны дұрыс.
Қашан барған дұрыс: Мамыр-қыркүйек арасында Тәжікстанда күн шыжып тұрады. Мұндайда үй ішімен серуендеген қиын. Сондықтан көктемнің ортасында не күздің басында барған дұрыс.
Экзотика мен қызық іздегендерге
Қонақүй мен жағажайдан бөлек, балаларыңызға өзгеше табиғат пен жаңа мәдениетті көрсеткіңіз келсе, төмендегі елдерге назар аударыңыз. Бұл елдерде тропикалық табиғатты тамашалап, жергілікті тағамдардан дәм татып, ерекше әсер ала аласыз. Оның үстіне, бұл бағыттарға визасыз бара аласыздар.
Тайланд (Пхукет, Бангкок, Самуи)
Виза: Қазақстандықтар үшін 60 күндік визасыз режим енгізілген.
Жол: Алматы мен Астанадан Пхукет пен Бангкокқа бір ауысып отырумен рейстер бар. Ал Шымкент-Бангкок бағытында тікелей ұшатын рейс бар. 6 сағатта жетесіз.
Тайланд — нағыз тропикалық экзотика. Жергілікті халық балаларды ерекше жақсы көреді. Пхукет — өте жайлы бағыт, әсіресе, Ката мен Карон жағажайлары майда құмымен, толқынсыз таяз суымен отбасыларға өте ыңғайлы. Турист көп, қала соған бейімделген. Балаларға пілдерді тамақтандыру қызық болады, маймылдар аралы мен алып аквапарктер ұмытылмас әсер қалдырады. Ал үлкен кісілер Будда ғибадатханасы мен алып Будда мүсініне тамсанып қайтады.
Тек тай тағамдары өте ащы болатынын ескеріңіз. Балаларға, үлкен кісілерге тамақ аларда міндетті түрде No spicy деп ескертіңіз. Не болмаса бірден араб, түрік, орыс тағамдары бар мейрамханаларға тартыңыз. Ондай жерлер Пхукетте көп-ақ.
Қашан барған дұрыс: Пхукет пен Бангкокқа қарашадан сәуірге дейін барған жайлы. Бұл кезде жаңбыр маусымы аяқталып, теңіз тынышталады. Ал Самуидің климаты бөлек: құрғақ маусымға тап болғыңыз келсе, ақпаннан тамызға дейін барған дұрыс.
Катар (Доха)
Виза: 30 күнге дейін визасыз жүруге болады.
Жол: Алматы мен Астанадан Доха қаласына тікелей рейстер жұмыс істейді. Шамамен 5-6 сағат ұшасыз. Көбіне Qatar Airways ұшақ компаниясы жолаушыларды тікелей тасымалдайды. Бұл ұшақ компаниясының өте ыңғайлы екенін айта кеткен жөн: борты кең, қызметі жоғары деңгейде, мәзірі халал.
Катар — отбасымен, әсіресе жасы үлкен адамдармен демалғанға қолайлы ел. Парсы шығанағындағы жағажайлардың суы таяз, толқыны аз, құмы майда болғандықтан, кішкентай балалармен шомылуға өте ыңғайлы. Қала үлкен болғандықтан, көрікті жерлерге көбіне метро не таксимен жетесіз. Жүргізушісіз жүретін метроның ең алдыңғы вагонынан қала көрінісін тамашалауға болады. Сондай-ақ метрода балалар мен әйелдерге арналған бөлек вагондар бар.
Дохада Таяу Шығыстағы ең үлкен Desert Falls аквапаркі, Doha Quest жабық аттракциондар орталығы және 3D интерактивті экспозициялары бар Ұлттық мұражай орналасқан. Ал үлкендерге шығыс үлгісіндегі Сук Вакиф базарын аралап, Katara Cultural Village кешеніндегі мешіт пен амфитеатрды көру қызық болады. Катарға баруға ең қолайлы уақыт — наурыз, сәуір, қазан-қараша айлары. Жазда мұнда күн өте ыстық болады. Бірақ Катар мұсылман елі екенін ұмытпаңыз. Ашық-шашық киінбеген дұрыс.
Қашан барған дұрыс: наурызда, сәуірде, қазан мен қарашада күн өте жайлы болады.
Вьетнам (Фукуок аралы)
Виза: 30 күнге дейін визасыз режим. Одан артық қалатындарға алдын ала электронды виза (e-Visa) рәсімдеу қажет
Жол: Алматы, Шымкент, Астанадан Фукуок аралына ауысып отырып жететін рейстер бар. Жол ұзақтығы — 7-8 сағат.
Фукуок — үй ішімен демалғанға әбден жайлы тропикалық арал. Мұнда жасыл желекке көмкерілген тыныш қонақүйлер көп. Балалар әлемдегі ең ірі сафари-парктердің бірі саналатын Vinpearl Safari-ге барып, жануарларды арнайы автобуспен жақыннан көре алады. Сонымен қатар VinWonders аттракциондар паркі, үлкен аквариум мен әлемдегі ең ұзын аспалы жолдардың бірі осында орналасқан. Аралдың жағажайлары ақ құмды, суы жылы, таяз әрі толқыны аз болғандықтан, кішкентай балалармен демалуға өте қолайлы. Арал ішінде таксимен жүрген ыңғайлы. Сапар алдында Grab қосымшасын жүктеп алған жөн.
Қашан барған дұрыс: Фукуокта құрғақ маусым қарашадан сәуірге дейін созылады. Бұл кезде теңіз таза, жаңбыр сирек жауады, ал ауа ылғалдылығы жеңілірек сезіледі.
Денсаулығымды сақайтып қайтам дегендерге
Отбасыңызбен демалып қана қоймай, денсаулыққа да көңіл бөлгіңіз келсе, мына бағыттарды қарастырып көріңіз. Бұл елдерде әлемдік деңгейдегі клиникалар, емдік шипажайлар мен термалды бұлақтар бар. Үлкендер ем-дом жасатып алса болады, ал балалар ойын-сауық саябақтары мен интерактив орталықтарда қызыққа қарық болады.
Қытай (Хайнань аралы)
Виза: 30 күнге дейін визасыз режим.
Жол: Алматы мен Астанадан Санья (Хайнань) қаласына тікелей рейстер ұшады. Ұшу уақыты — 6-7 сағат.
Хайнань аралы тропикалық табиғаты, емдік курорттары мен жайлы жағажайларымен танымал. Мұнда дәстүрлі қытай медицинасы орталықтарында емдік шаралардан өтіп, Наньтянь термалды ыстық бұлақтарында демалуға болады. Оңтүстік Қытай теңізінің жағажайлары алтын түсті құмды, суы таяз болғандықтан балалармен демалуға қолайлы. Сонымен қатар «Маймылдар аралына» аспалы жолмен барып, Atlantis Sanya қонақүйіндегі аквапарк пен үлкен аквариумды аралауға болады.
Аралда Visa және Mastercard карталары барлық жерде қабылдана бермейді. Сондықтан алдын ала қолма-қол юань дайындап алыңыз не WeChat Pay қолданбасын орнатып қойыңыз.
Қашан барған дұрыс: Хайнаньға қарашадан сәуірге дейін барған қолайлы. Жазда ауа тым ыстық әрі ылғалды болады, ал күздің басында кейде тайфун соғады.
Оңтүстік Корея (Сеул, Чеджу аралы)
Виза: Виза керек емес, бірақ сапар алдында онлайн түрде K-ETA рұқсатын алу міндетті.
Жол: Алматыдан да, Астанадан да Сеулге тікелей рейстер бар. Шамамен 5-6 сағатта жетесіз.
Оңтүстік Корея — заманауи медицинасы мен ойын-сауық орындары қатар дамыған ел. Мұнда ата-аналар әлемдік деңгейдегі клиникаларда Check-up тексерісінен өтіп, денсаулығын толық тексерте алады. Ал балалар Сеулдегі Lotte World жабық аттракциондар паркіне, Everland ойын-сауық кешеніне, Coex Aquarium аквариумына және интерактив мұражайларға барып, ойынға әбден тойып қайтады.
Қазақстандықтарға Оңтүстік Кореяға виза қажет емес. Бірақ сапар алдында ресми сайт арқылы K-ETA (кіруге электронды рұқсат) рәсімдеп, мақұлдау алу міндетті. Онсыз ұшаққа жіберілмейді. Ал 17 жасқа дейінгі балалар мен 65 жастан асқан адамдарға K-ETA рәсімдеудің қажеті жоқ.
Қашан барған дұрыс: Оңтүстік Кореяға сәуір-мамырда, сакура гүлдеген кезде не қыркүйек-қазанда барған жақсы. Күзде ағаштар қызыл түске боялады. Жаз жаңбырлы, ал қыста суық жел жиі соғады.
Әзербайжан
Виза: 90 күнге дейін визасыз режим.
Жол: Алматы мен Астанадан Баку қаласына тікелей рейстер жиі ұшады. 3-4 сағатта жетесіз. Ақтаудан тіптен жақын, бір-ақ сағатта Каспийдің ар жағына жетесіз.
Әзербайжан — емдік шипажайларымен танымал ел. Мұнда Нафталан курортында буын, омыртқа және тері ауруларын емдеуге қолданылатын әлемдегі жалғыз шипалы мұнай ванналарына түсуге болады. Ал Үлкен Кавказ тауының баурайындағы Галаалты шипажайында «Нафсу» минералды суымен бүйрек пен асқазан-ішек жолдарына арналған емдік шаралар ұсынылады. Бакуде Каспий теңізінің жағалауында серуендеп, теңіз ауасымен тыныстау да үлкендерге де, балаларға да жақсы демалыс сыйлайды.
Нафталандағы мұнай ванналарының әсері күшті болғандықтан, онкологиялық немесе ауыр жүрек аурулары бар адамдарға жарамауы мүмкін. Сондықтан шипажайға барар алдында дәрігермен кеңесіп алған дұрыс.
Қашан барған дұрыс: Нафталанға емделуге көктемде не күздің басында барған қолайлы. Бакуді аралау үшін де мамыр немесе қыркүйек-қазан айлары жақсы — бұл кезде жаздың аптап ыстығы басылады.
Бірер ақыл-кеңес
Егде жастағы әке-шешеңізбен, кішкентай балаларыңызбен алғаш рет шетелге шыққалы жатсаңыз, мынаны ескеріңіз:
- Балаңыз 2 жасқа толмаған болса, ұшуға кемі 48 сағат қалғанда әуе компаниясына арнайы бесік керек деп тапсырыс беріп қойыңыз. Ұшақ көтеріліп, қонғанда баланың құлағы бітелмес үшін су, шырын не емізік берген дұрыс.
- Адам көп жерлерде баланың қолына ата-анасының байланыс нөмірі мен қонақүй атауы жазылған су өткізбейтін білезік тағыңыз. Ал үлкен кісілерге карта қолдануды не роуминг қосуды алдын ала үйретіп қойған жөн.
- Үлкен кісілерге телефоннан картаны қалай қолдану керегін алдын ала көрсетіп, қонақүйдің деректерін қағазға бөлек жазып берген дұрыс.
- Үлкен кісілермен саяхаттасаңыз, созылмалы аурулардың асқынуын да қамтитын сақтандыру рәсімдеген дұрыс. Шетелде медициналық көмек қымбат болуы мүмкін.
- Қызу түсіретін, аллергияға қарсы, іш өткенге арналған дәрілерді, антисептик пен жәндіктерге қарсы спрейді Қазақстаннан ала шығыңыз. Кей елдерде мұндай дәрілер рецептсіз сатылмайды.
- Жолға бұзылмайтын жеңіл тіскебасар алып жүрген дұрыс. Ол ұшақта да, сапар кезінде де қажет болуы мүмкін.
- Сапар алдында отбасыңыздағы әр адамның төлқұжатының жарамдылық мерзімін тексеріңіз. Көп ел төлқұжаттың мерзімі аяқталуына кемінде алты ай қалғанын талап етеді.
