Ыстықкөлдегі бес демалыс орны
Сонымен қатар, Ыстықкөлге қалай жетуге болатыны туралы да айтып береміз.
Ыстықкөл — Қырғызстандағы ең танымал курорттардың бірі әрі көлемі жағынан әлемдегі екінші орындағы тұзды көл. Тереңдігі бойынша да ол Жер шарындағы ең терең жеті көлдің қатарына кіреді. Бұл демалыс орны Қырғызстанмен шектелмей, алыс-жақын шетелде де кеңінен танымал. Көл суы жыл бойы қатпайтындықтан, кез келген маусымда Ыстықкөлге баруға мүмкіндік бар. Жұмсақ климат, қылқан жапырақты ормандардың шипалы ауасы, жылы бұлақтар мен көркем табиғат көріністері мұнда келген әр саяхатшының жүрегін баурап алады.
Бұл мақалада біз Ыстықкөл маңындағы демалыс орындарын таныстырып қана қоймай, демалысыңызды қалай әсерлі әрі есте қаларлық етуге болатыны жайлы сөз қозғаймыз.
Қазақстаннан Ыстықкөлге қалай жетуге болады?
Ұшақпен. Алматы немесе Астана қалаларынан Қырғызстан астанасы Бішкекке тікелей рейстер бар. Астана — Бішкек бағыты бойынша FlyArystan әуе компаниясы ұшады, билет бағасы шамамен 50 мың теңге болса, ұшу уақыты — 1 сағат 35 минут. Алматы — Бішкек бағытында Air Astana компаниясының рейстері барі, ұшу уақыты — 50 минут, билет бағасы — 80 мың теңге. Сондай-ақ бұл бағытта FlyArystan да ұшады: ұшу уақыты — 55 минут, билет бағасы 45 мың теңгеден басталады. Ұшақпен жолға шығу үшін міндетті түрде шетелдік паспортыңыз болуы керек, себебі кедендік бақылаудан өтесіз.
Пойызбен. Алматы — Бішкек бағытындағы пойыз күн сайын қатынайды, жол шамамен 15 сағатқа созылады. Плацкарт үшін билет бағасы — 18 мың теңге, купе үшін — 30 мың теңге шамасында. Астана — Бішкек бағыты бойынша да пойыз бар, бірақ ол аптасына бір рет жүреді. Бұл сапарға шамамен 1 күн 1 сағат уақыт кетеді. Билет құны плацкартта — 38 мың теңге, купеде — 57 мың теңге көлемінде. Пойызбен жүру — үлкен жүгі бар немесе отбасымен жолға шығатын жолаушылар үшін қолайлы нұсқа.
Автобуспен. Алматы, Тараз және Шымкент қалаларынан Бішкекке немесе тікелей Шолпан атаға қатынайтын халықаралық автобустар мен шағын автобустар тұрақты түрде қатынайды. Алматыдан шыққан автобустар Қордай шекара бекеті арқылы өтіп, шамамен 4 сағатта Бішкекке жетеді. Жол ақысы — шамамен 3 500 теңге. Бішкектен Ыстықкөл жағалауына күн сайын жүретін автобустар бар. Бұл бағыттағы жол 4–5 сағатты алады.
Автокөлікпен. Ыстықкөлге апаратын жолдардың сапасы жақсы, ал шекаралық бақылау бекеттерінен өту — салыстырмалы түрде қолайлы. Мысалы, Алматыдан шыққан көліктер Қордай шекара бекеті арқылы өтіп, алдымен Бішкекке, одан әрі Шолпан атаға жете алады. Жалпы жол ұзындығы шамамен 450–500 шақырымға жетеді, бұл — орта есеппен 8–10 сағаттық жол. Шолпан атаға дейінгі такси құны бір көлікке — шамамен 80 мың теңге (бір бағыт). Дегенмен жүргізушімен жеке келісіп, арзанырақ нұсқаларды да табуға болады. Тұрақты такси қызметтері бар, оларды InDrive қосымшасы арқылы тауып, алдын ала келісіп алуға болады.
Бішкекке жеткен соң әрі қарай Ыстықкөл жағалауына көлік, автобус немесе такси арқылы баруға болады. Бішкек қаласынан Шолпан атаға дейінгі жол шамамен 4–5 сағатты алады.
Chaika Resort
Бағасы: екі адамға арналған бөлме 42 мың теңгеден басталады
Кімге арналған: отбасымен келгендерге, кез келген жастағы адамдарға
Chaika демалыс орны – Сарыой ауылындағы бұл демалыс орны Ыстықкөлдің солтүстік жағалауында, Шолпан ата қаласынан небәрі 14 шақырым жерде орналасқан. Мұнда стандартты, супер-стандартты және кіші люкс санатындағы жайлы нөмірлер бар. Сонымен қатар, отбасылық бөлмелер, таунхаустар мен пәтерлер қажетті барлық жабдықпен қамтамасыз етілген. Демалыс орнының аумағында мейрамхана, бар және балаларға арналған ойын алаңы бар. Сондай-ақ, Social Coffee – Breeze мейрамханалар желісі күніне үш мезгіл тамақ береді.
Достарымыз бұл жерді ұсынған еді — көлге жақын орналасқан, салыстырмалы түрде жаңа демалыс орны екен. Фотолар мен сипаттамалар шынайы, сәйкес келді. Бағаға тек жағажай барып-келу кіреді. Азық-түлікті өзімізбен ала бардық, өзіміз тамақ әзірледік. Себебі мұндағы кафелер қымбат — сондықтан ұзақ уақытқа демалыс жоспарласаңыз, тамақты өзіңізбен ала барған әлдеқайда тиімді. Балаларға арналған алаңдардың көптігі — отбасымен келетіндер үшін үлкен артықшылық. Біз екі жатын бөлмесі мен үлкен қонақ бөлмесі (диваны бар) бар коттеджде тұрдық. Тазалық жақсы сақталған, тіпті кір жуғыш машина да бар екен. Ыстық су болды, бірақ душтағы су жиі тоқтап қалып отырды. Өкінішке қарай, бассейн жоқ. Айналаның табиғаты өте әдемі, тыныш. Дегенмен, кейбір келеңсіздіктер де кездесті. Қонақүй маңындағы интернет байланысы нашар — бұл кей сәттерде ыңғайсыздық тудырды. Сонымен қатар, ресепшнмен байланыс әлсіз, қажетті ақпаратты уақытылы алу қиын болды. Душтағы судың дұрыс кетпеуі де қолайсыздық әкелді. Бастапқыда төсек-орын жабдықтарын бірден әкелмегені де көңілге қонбады. Қауіпсіздік қызметкерлерінің қарым-қатынасы сәл дөрекілеу көрінді. Соған қарамастан, біз тұрған коттедж кең әрі тыныш — отбасыларға да, жастарға да, жасы үлкен демалушыларға да ыңғайлы. Жалпы, табиғаты көркем, жайлы тынығуға жақсы жер.
Ololo Akjol
Бағасы: екі адамға арналған бөлме 70 000 теңгеден басталады
Кімге арналған: жұмыс пен демалысты біріктіргісі келетіндер үшін тамаша шешім
Ololo Akjol — IT-мамандарға, фрилансерлер мен цифрлық көшпенділерге арналған ерекше резорт. Ololo — Қырғызстандағы коворкингтер мен креативті кеңістіктер желісі, ал Akjol — осы желінің арнайы демалыс орны. Мұнда демалып қана қоймай, жұмыс істеуге де барлық жағдай жасалған: тыныш орта, жайлы жағдай және табиғаты көз тартар әсем мекен — тимбилдинг үшін таптырмас таңдау. Тұру құнына екі адамға арналған нөмір мен күніне үш реттік тамақтану кіреді. Тасымал қызметі бөлек төленеді. Сонымен қатар, қонақтарға арналған тегін медитациялар мен дәрістер ұйымдастырылады. Жағажайға кіру де тегін.
Бөлмелері кең емес, бірақ таза және ыңғайлы. Резорт кеңестік дәуіріндегі ғимаратта орналасқанымен, толық жөндеуден өткен. Ішінде ыстық су, балкон, барлық қажетті жабдық бар. Бағасына үш мезгіл тамақ кіреді. Үй жағдайындағы, дәмді және пайдалы ас мәзірі ұсынылады. Кафе мен барлар да бар — қосымша тағам алғыңыз келсе, тапсырыс беруге болады. Жасыл желекке толы кең аумақ, тыныш серуендеуге, оқуға, медитация жасауға қолайлы. Жағажайы таза, күтімі жақсы. Жағалаудағы орналасқан барда күндіз кофе ішіп жұмыс істеуге, ал кешке диджей сеттер мен отырыстарға қатысуға болады. Кемшіліктер қатарында тек ғимараттың сыртқы көрінісін атап өтуге болады — ескілеу, сәл ұсқынсыз көрінуі мүмкін. Алайда ішкі жағдайы өте жақсы. Wi-Fi тұрақты жұмыс істеді, ресепшнмен немесе қызметкерлермен байланыста ешқандай қиындық туындаған жоқ.
Vzmorie Resort
Бағасы: екі адамға арналған бөлме 46 000 теңгеден басталады
Кімге арналған: орта жастағы адамдар мен отбасымен келіп демалатындар үшін лайық. Жастар үшін тым тыныш болуы мүмкін.
Vzmorie Resort — Бостери қаласының бірінші жағалау шебінде орналасқан төрт жұлдызды қонақ үй. Көлге дейінгі қашықтық небәрі 100 метр болғандықтан, бөлмеден ашылатын көл көрінісі — бұл жердің басты артықшылықтарының бірі. Тұру бағасына күніне үш реттік тамақтану, жабық бассейн, спортзал және тұзды бөлменің қызметтері кіреді. Нөмірлердің интерьері заманауи әрі таза. Әр бөлмеде ауа кондиционері бар, тазалыққа қатысты ешқандай шағым болмады. Алайда бір кемшілігі — дыбыс оқшаулауы нашар. Көрші бөлмеден шыққан әр дыбыс анық естіліп тұрды, бұл тынығуға аздап кедергі келтіруі мүмкін.
Vzmorie Resort-те 18–20 маусым аралығында демалдым. Қонақ үй сыртында жасыл аллея бар, әдемі жер. Көл айналасында жағалау жайластырылмаған — не шатыр, не шезлонг жоқ, тек екі киім ауыстыратын кабина бар. Көл түбінде үлкен тастар кездеседі. Бассейн кірлеу, душ және таза әжетхана жоқ, ал киім ауыстыратын бөлме тіпті қараусыз қалғандай көрінді. Дыбыс оқшаулауы әлсіз, құрылыс жұмыстары жүріп жатқан еді, сондықтан бассейн мен оның айналасы таза емес. Ас мәзіріне келсек, жалпы дәмді әрі тойымды, алайда бұл жер мейрамхана емес — кәдімгі санаторийдегі асхана стилінде қызмет көрсетеді. Бір рет кешкі асқа форель берілді, бірақ кейде ет тым қатты болып шықты. Біз барған уақытта қонақүйде конференция өтіп жатты, адам көп болғандықтан, ортада шу басым болды. Жалпы, қонақүй бағасы орта деңгейден сәл жоғары көрінді. Сол себепті «баға мен сапа сәйкестігі» мәселесі еріксіз ойға оралады.
Raduga Resort
Бағасы: екі адамға арналған бөлме 75 000 теңгеден басталады
Кімге арналған: жастар және көңіл көтеруді қалайтындар үшін тамаша жер
Raduga Resort – Ыстықкөлдің солтүстік жағалауында, Шолпан ата қаласынан 14 шақырым жерде орналасқан Сарыой ауылындағы бұл қонақ үй кешені — қысы-жазы үздіксіз жұмыс істейтін нысандардың бірі. Мұнда балалар мен отбасылық демалыс үшін барлық қажетті жағдай жасалған: ашық және жабық бассейндер, балалар бөлмелері, аниматорлар, арнайы мәзір, жағажай мен серуенге арналған кең аумақтар бар. Сондай-ақ бұл — заманауи инфрақұрылымы бар, жастар арасында аса танымал резорттардың бірі. Кешен аумағында түрлі кафелер, барлар және көңіл көтеретін орындар жеткілікті. Жағажайы жақсы жабдықталған, ал джет-ски, катамаран секілді судағы ойын-сауық түрлері демалысты жандандыра түседі. Тамақтану мен трансфер қызметтері бөлек төленеді. Алайда пәтер ішінде асүй, қажетті жиһаз, ыстық су сияқты тұрмысқа қажетті барлық жағдай қарастырылған.
Біз өткен жылы тамыз айында осы жерге бардық. Шомылу уақытының қызған шағы болғандықтан, бос орын табу қиын болды, әсіресе жұма-жексенбі аралығында орын табу қиын еді. Төленетін бағаға тамақтану кірмейтіндіктен, азық-түлікті өзіміз апарып, таңғы ас пісіріп, қалғанын кездегі тамақтануды демалыс орны аумағындағы кафелерде ұйымдастырған едік. Бұл жерде кафелердің таңдауы өте көп: азиялық, еуропалық, дәстүрлі тағамдар, кофеханалар бар. Бірақ бағасы қымбат, күніне екі рет ас ішу біраз шығын тудырды. Ең басты нашар тұсы — баға. Тек пәтерге ақы төлеп, барлық басқа қызметке бөлек қаражат жұмсауға тура келеді. Сондай-ақ, жаздың қызған шағында бұл жер өте шулы, жастар тым көп. Сондықтан тыныштық іздеген отбасылар үшін бұл жер онша сәйкес келмеуі мүмкін.
«Париж» пансионаты
Бағасы: бір коттеджге 50 мың теңгеден басталады
Кімге арналған: бұл орын достар мен жас жұптарға өте ыңғайлы. Алайда, отбасылық демалыс үшін, әсіресе кішкентай балалары бар жандарған бұл жер аса сәйкес келмейді. Жағажайы терең, түбі қауіпті және балалар үшін арнайы аймақ қарастырылмаған.
«Париж» пансионаты – Шоқ-Тал елдімекенінде орналасқан пәтерлер мен коттедждер желісі. Пансионат аумағында жеке автотұрақ бар, ал коттедждердің бір бөлігі көлдің бірінші жағалау шебінде орналасқан. Коттеджде үш жатын бөлме, асүйі бар студия типтегі қонақ бөлме, кең террассалар және барбекю алаңы бар. Барлық коттедж кең, таза әрі қажетті тұрмыстық жабдықтармен толық қамтамасыз етілген. Асүйде барлық керек ыдыс-аяқ пен құрал-жабдық бар. Кешкі уақытты жазғы террасада өткізсеңіз болады — тыныш әрі жайлы орта. Барлық бөлмеде төсек-орын, қосымша жамылғылар мен көрпелер болады. Коттедждердің тазалығы мен жайлылығы жоғары деңгейде. Жақын маңда, жаяу шамамен 30 минуттық жерде орналасқан басқа пансионат аумағында ыстық бұлақтар бар. Кіру құны — адам басына шамамен 1200 теңге. Коттедж жағажайға өте жақын — шамамен 200–250 метр қашықтықта орналасқан. Бағасына коттеджде тұру, пансионат аумағына және жағажайға кіру мүмкіндігі кіреді. Ал тамақтану, трансфер және өзге қосымша қызметтер бөлек төленеді.
Біз он адамнан тұратын топ болып, өзімізге ыңғайлы коттедж іздедік. Басты талаптарымыз — жағажайға жақын орналасуы, ішінде асүйдің болуы және, әрине, қолжетімді баға. Таңдаған нұсқамызда тамақтану қызметі қарастырылмағандықтан, асымызды өзіміз әзірледік. Балықшы қаласынан үш күнге жететін азық-түлікті алдын ала алып бардық. Кейінірек керек-жарақтар таусылғанда, достарымыздың бір тобы Шолпан ата қаласындағы «Глобус» супермаркетіне барып, қажетті заттарды сатып әкелді. Пансионат маңында екі шағын дүкен бар, алайда ондағы тауар таңдауы шектеулі, ал кейбір азық-түлік өнімдерінің жарамдылық мерзімі өтіп кеткен болып шықты. Бұл жердің басты кемшілігі — жағажайының жағдайы. Пансионат ыңғайлы жерде орналасқанымен, негізгі жағажай аймағынан сәл алыста, сондықтан суы лайлы, жағалау тазалығы көңіл көншітпеді. Суға түсу сәл қорқынышты көрінді. Дегенмен, бұл коттедж — баға мен жайлылық жағынан өте жақсы нұсқа. Егер сіз үшін жағажайдың сапасы бірінші орында тұрмаса, бұл жерде тоқтауға әбден болады.
