Алакөлдегі демалыс: жайлы базалар мен курорттар топтамасы
Ыңғайлық, табиғат және керемет атмосфераны ұнататындарған арналған.
Алакөл — жазда жер-жерден туристер ағылып келетін танымал демалыс орны. 2024 жылы Алакөл жағасында 1 миллион 725 мың адам демалған. Суы тұзды әрі шипалы, жағажайы қара таспен көмкерілген бұл көл маңайында 312 туристік нысан жұмыс істеп тұр. Ресми деректерге сүйенсек, биыл тағы 10 демалыс орны ашылады деген жоспар бар. Маусым мен қыркүйек арасы — Алакөлде суға түсу маусымы. Судың орташа температурасы 24-26°C ал ауа температурасы 25-35°C аралығында болады. Бұл кезде көл айналасында тізілген ондаған демалыс орны мен қонақүйлер қызу жұмыс істейді. Ұсынатын қызметтері мен ыңғайлылығына қарай ұнағанын таңдап аласыз. Туристер дәл осы кезеңде жер-жерден ағылып, көлге түсіп, күн нұрына шомылуға келеді.
Алакөлдің аты айтып тұрғандай, оның суы ауа райына байланысты түсін өзгертіп тұрады: жылы күні ақшыл көк, салқын кезде сұр, жаңбырда қоңырқай, ал дауыл болғанда қара боп кетеді. Бұл кереметтің бәрін көріп, сезіну үшін демалуды жоспарласаңыз, қонып қалатын жақсы қонақүй тапқан маңызды. Осы материалда тек тексерілген әрі өзгелер ұсынған қонақүйлер мен демалыс базаларын жинап қойдық.
Алакөлге қалай жетуге болады?
Ұшақпен. Алматы мен Астанадан Scat әуе компаниясы Үржар мен Үшаралға ұшады. Арасы 1–1,5 сағат. Билет бағасы 15–20 мың арасында. Үшарал әуежайынан Ақшиға 50 минутта, Көктумаға 1 сағат 20 минутта баруға болады. Ал Абай облысына қарасты Үржар әуежайына Қабанбай ауылы жақынырақ — 1,5 сағатта жетесіз.
Пойызбен. Алматы 2 — Достық бағытында жүретін пойызға отырып, Ақши немесе Көктума станциясынан түсіп қалуға болады. Жолға 16-17 сағат кетеді, билет құны 4500–7000 теңге арасында. Астаданадан Нұрлы жол — Достық бағытында жүретін пойызға отырсаңыз, Ақши не Көктумаға 22-23 сағатта жетесіз. Билет бағасы — 9500 теңге.
Автобуспен немесе жеңіл көлікпен. Алматы — Алакөл бағытында жатын орындары бар автобустар күнде жүреді. 9-10 сағатта Ақши, Көктума ауылдарына апарады. Бағасы адам басына барып-келуге 23 мың теңге тұрады. Одан бөлек, жеңіл көлікпен де Алакөлге жете аласыз. Арасы 650 шақырым, бұған дейін нашар болған жолы биыл жөндеуден өткен. Өзіңіз көлікпен шыққыңыз келмесе, OLX, InDrive қосымшаларынан апаруға таксист таба аласыз.
Оңтүстік жағалау (Жетісу облысы)
Алакөлдің оңтүстік-батыс бөлігі Жетісу облысына, солтүстік-шығыс бөлігі Абай облысына қарасты. Сондықтан демалатын базалар мен қонақүйлер де сол облыстарға байланысты әртүрлі ауылда орналасқан. Мысалы, Ақши, Көктума ауылдары Алматы облысына жатады, Ал Абай облысына Қарабұлақ, Қабанбай ауылдары қарайды.
Alakol Resort
Бағасы: күніне адам басына 15 мың теңгеден басталады
Ақши ауылында орналасқан Alakol Resort — қонақүйі, коттедждері бар демалыс базасы. Жағажайдың бірінші шебінде тұр, яғни көл жағасынан 150–200 метр жерде. Аумағы үлкен әрі жасыл желекке оранған. Ауласында бассейні мен тапшандары бар. Одан бөлек бильярд, жаттығу залы, тіпті мини-маркет жұмыс істейді. Таза ауада отырып, кино көруге алаңқай жасалған. Ескеретін нәрсе: бөлме бағасына тамақтану кірмейді, бірақ базаның ішінде мейрамханасы бар. Дайын тамақтар арасынан ұнағанын таңдап, кассадан төлеп аласыз.
Былтыр тамызда біз Alakol Resort-та отбасымызбен демалдық. Бұл жердің бөлмелері таза әрі кең болғаны ұнады. Қызметкерлер күнде жинап тұратын. Ішіндегі бассейні балаларға ыңғайлы. Қонақүй жағажайға жап-жақын, 5 минутта баратынбыз. Бірақ тамақ сапасы көңілімізден шыққан жоқ, олар мықты аспазшылар маусым-шілдеде ғана болады деп ақталды. Жалпы қонып қалуға, тұрақтауға кеңес беремін, алайда өзге жерден тамақтанған жөн.
AQUAMARINE resort
Бағасы: күніне адам басына 12 мың теңгеден басталады
Бұл аймақ ондаған көгілдір шатырлы үйшігімен ерекшеленеді. Әр үйшіктегі бөлме мен жатын орын саны әртүрлі. Бағасы қай кезеңде келгеніңізге байланысты, сұраныстың артуына байланысты өсе береді. Одан бөлек қонақүйінен бөлме жалдап та қонақтауға болады. AQUAMARINE resort Алакөлдегі шығанақтың бойында тұр. Сондықтан суға түсетін жағажайға базаның паромына отырып бару керек. База аймағында мейрамхана, кофехана, балалар ойын алаңы, бассейн, SPA, монша, жазғы кинотеатр, паркинг, обсерватория бар. Қонақтарға арналған Wi-Fi жұмыс істейді. Алайда мұнда да үйшік бағасына тамақ кірмейді, базаның мейрамханасынан не өзге жерден тамақтануға тура келеді.
Пеликан
Бағасы: күніне адам басына 4000 теңгеден басталады
Ақши ауылындағы «Пеликан» демалыс орны жасыл ауласымен, ағаш үйлерімен танымал. Оның аумағында әртүрлі бөлме жалдауға болатын қонақүй, ағаш үйшіктер, бассейн аймағы, балалар ойын алаңы, сауна, асхана, паркинг бар. Бөлме не үйшік жалдау бағасына тамақ кірмейді, мейрамханадан бөлек аласыз. Ашық аспан астында кино көрсетіп, фестивальдер де жиі ұйымдастырылады. Бұл база да Алакөлдің шығанағына жақын орналасқан. Суға түсетін жағажайға паромға отырып жетуге болады. Не болмаса шығанақты жаяу айналып өтіп, жағажайға 15–20 минутта барасыз.
Мен үшін «Пеликан» — ең тиімді бағаларды ұсынатын демалыс орны. Бұл жерде кез келген соммаға бөлме не үйшік жалдауға болады. Мейрамханасының асы өте дәмді, бағасы қалтаны қақпайды. Өзге қонақүйлердің тұрғындары толып жүретіні содан болар. База аумағы өте үлкен, таза әрі әдемі. Ағаш мен жасыл желек көп. Бал, кәдесый сияқты жергілікті тауарлар сататын магазин аз емес. Бассейндері бар, қызмет көрсету сапасы жақсы.
Poseidon
Бағасы: күніне адам басына 13 500 теңгеден басталады
Бөлмені жалдау бағасына тамақ кірмейді. Бөлмелер жайлылығына қарай стандарт, комфорт, фэмили деп бөлінеді, одан бөлек коттедждері де бар. Терезеден әдемі көрініс ашылатын бөлмелер бағасы 2000 теңгеге қымбат тұрады. Ауласында бассейн, балалар ойын алаңы жабдықталған. Демалыс орнының ішінде караоке-бар, барбекю алаңы, Villa мейрамханасы, теннис корты, бильярд, пинг-понг, SPA, кір жуу қызметі бар. Сонымен қатар, балалар арналған шеберлік аква-гримм, жылтыр тату деген ойын-сауық бағдарламасы мен анимациялық кештері ұйымдастырылып тұрады.
Өткен жылы осы Poseidon-да демалдық. Өте таза, жиһазы бүтін, жағдайы жақсы демалыс орны екеніне көз жеткіздік. Әр бөлме адамдарына арнап шоппер мен шезлонгқа төсейтін төсеніш сыйлыққа беріледі. Қызметкерлері ақжарқын, сыпайы жандар — кез келген сұрауымызды тез орындайтын, әрдайым көмектесетін. Кішкентай баламен қыдырғандықтан мен үшін бұл маңызды болды. Тамағын да айтып өтпеске болмас, себебі Алакөлде асүйі сапалы жерді табу оңай емес. Бәрі өте дәмді әрі тойымды болды. Биыл қайта барамын деп жоспарлап отырмын.
«Аяла»
Бағасы: күніне адам басына 12 мың теңгеден басталады
«Аяла» — Көктумадағы жағадан бес-жеті минуттық жердегі демалыс базасы. Ескі және жаңа корпусы бар. Бөлмереі стандарт және комфорт деп бөлінеді. Жалдау ақысына үш мезгіл тамағы да кіреді. Ауласында тапшан, мангал, гамак, дүкен, балаларға батут бар. Ішінде велосипед жалға беріледі. Кешкісін караоке кештері мен кино көрсетілімдері ұйымдастырылады.
Өткен жылы «Аялада» демалдым. Қарапайым әрі тыныш, өте таза демалыс орны. Ескі корпусы да, жаңа корпусы да жинақы, төсек-орны таза. Тамағы қатты ұнады, қай-қай тағамы да көңілімізден шықты. Арғы жылы Алакөлдің Жарбұлақ жағында болдым, тым шулы боп еді, былтыр осы «Аяланың» жанға жайлы тыныштығы ұнады.
Шығыс жағалау (Абай облысы)
«Айым» демалыс базасы
Бағасы: күніне адам басына 12 мың теңгеден басталады
«Айым» — шығыс жағалауда орналасқан, жағажайдан 10 минуттық жердегі демалыс базасы. Түрлі деңгейдегі бөлмелерін ұсынады, жалдау құнына үш мезгілдік тамақ кіреді. Ауласында бассейн, балалар алаңы, кинотеатр бар. Play Station да ойнауға арналған бөлме де жасалған.
«Айым» демалыс орнына осымен үш жыл қатарынан демалуға бардым. Тіпті қызымның тұсауын да сол жерде кестік. Жайлы, бөлмелердің ішінде барлық жағдай жасалған, таза. Көлге шомылып келген соң іштегі кино алаңында балалар мультфильм көріп, бассейнге түседі. Ересектерге PS, үстел теннисі сияқты қызықтар бар. Түні тыныш өтеді, жан-жағында шу жоқ. Тамақтары халал әрі өте дәмді. Сұйық тамақ көп ішпейтін жолдасымның өзі кеспені де, сорпаны да тауысып қоятын. Қызметкерлерінің қарым-қатынасы да ұнады. Биыл тағы барамыз деп жоспарлап отырмыз.
«Фаворит»
Бағасы: күніне адам басына 22 500 теңгеден басталады
«Фаворит» — отбасылық демалыс орталығы. Аумағында ағаштан жасалған үйшіктер бар. Жатын орын саны мен ыңғайлылығына байланысты бағасы әртүрлі. Үлкен артықшылығы: ақысына үш мезгілдік тамақтану кіреді, VIP-үйшік алсаңыз күніне тіпті төрт рет тамақтанасыз. Жағажайдан 10–15 минуттық жерде, айналасы тыныш. 100 метр жерде арбат бар — кешкі серуенге ыңғайлы.
«Фаворит» аумағында шулы кештер мен ішімдікке тыйым салынған, себебі бұл базаның иесі тыныштық, ыңғайлылық пен жайлылықты бірінші орынға қояды. Ересектерге және балаларға арналған екі түрлі бассейні бар. Сондықтан нағыз отбасылық орталық десе де болады. Бұл демалыс орталығының тазалығы мен дәмді асы өз алдына бөлек әңгіме. Дәл осы жерді таңдағаныма өкінбеймін. Тиімді әрі ыңғайлы.
Dolce Vita
Бағасы: күніне адам басына 17 мың теңгеден басталады
Dolce Vita демалыс үйі Қабанбай ауылының орталығында, көлден бес минуттық жерде орналасқан. Ауласында балаларға арналған батут, бассейні бар. Бағасына үш мезгіл тамағы да кіреді. Емдік сазы мен термалды суы бар жерлерге экскурсиялар ұйымдастырылып тұрады.
Әйеліммен былтыр Dolce Vita-да демалдық. Иесі Құралай келген сәттен бастап бізді қуана қарсы алып, жалбыз қосылған шай ұсынды. Ол әр клиентіне қамқорлықпен қарайды, жұмысшыларын қонақ күтуге өте жақсы дайындаған. Күнделікті тамағының сапасын айтып жеткізу мүмкін емес, дәмі тіл үйіреді. Біз барған аптада бір де бір тағам қайталанғанған жоқ. Бөлмелері өте таза, күнде жиналып тұрады. Одан бөлек, термал суларға, сазға, балық аулауға апарды. Бұл жер қатты ұнады, міндетті түрде барып демалуға ұсынар едім.
«Инжу»
Бағасы: күніне адам басына 20 мың теңгеден басталады
«Инжу» — Алакөлге тиіп тұрған демалыс орындарының бірі, жағадан 30 метр жерде орналасқан. Ауласында екі бассейн, ойын алаңы бар. Аниматорлар келіп, сауық кештерін ұйымдастырып тұрады. Жағажайы жақсы жабдықталған, шатырлар мен шезлонгтар қойылған. Сонымен қатар, көлге қарап отырып шай ішуге болатын ашық аспан астындағы мейрамхана да бар. Бірақ бөлмені жалдау ақысына тамақ кірмейді. Үш мезгіл тамақтануды қосып алғыңыз келсе, күніне 12 мың теңге төлейсіз. Балаларға жасына байланысты 5 000–7 000 теңге төлейсіз.
Биыл осымен екінші жыл қатарынан «Инжу»-ге отбасыммен демалуға келдік. Адам санына қарай әртүрлі бөлемелері бар нөмірлерді жалдауға болады. Алдын ала брондап келу керек. Қонақүйдің қызмет көрсету сапасы жақсы, керек нәрсеңді тауып береді, бөлмені де тиянақты жинайды. Ең бастысы, орналасқан жері өте ыңғайлы, бөлмеден шыға сала көп жүрмей көлге түсуге болады. Медициналық кабинеті де бар, күнге қатты күйіп кетсеңіз, алғашқы көмек көрсетуге дайын.
«Достық»
Бағасы: күніне адам басына 13 мың теңгеден басталады
«Достық» — жағажайдың бірінші шебінде тұрмаса да, көлден 10–15 минуттық жерде орналасқан демалыс орны. Жалдау ақысына үш мезгіл тамағы кіреді. Ауласында бассейн, дәмхана, PS4, жаттығу алаңы, үстел теннисі бар. Екі корпустан тұратын қонақүйінде люкс, комфорт нөмірлері жабдықталған.
Дәл осы базаға 4 жыл қатарынан бардым. «Достық» демалыс базасы мені ерекше баурап алды. Жатын бөлмелері таза, керек жабдықтың бәрі бар. Мұнда тамақты өте дәмді пісіреді, жеті күнде жеті түрлі тағам берілді. Балаларға ойын алаңы, кинотеатр бар. Ауласындағы бассейні таза әрі үлкен: ересектерге де, балаларға да ыңғайлы. «Достықтың» орналасқан жері тыныш, көлге он минутта жетесіз. Иесі Айгүл апай жылы жүзді, өте қарапайым жан. Жүрген жерімде осы демалыс орнын айтып, ұсынып жүремін.
