Парижді сүйетін бойжеткеннен гид: қаладағы мына жерлерді көрмей кетпеңіз

Сәлем! Менің атым — Аружан. Еуропаның 27 елін, қаншама қаласын аралап үлгердім. Бірақ Париж — қайта-қайта барғым келе беретін ерекше шаһар. Егер мұнда алғаш рет келгелі жүрсеңіз, сериалдардан көрген стереотиптердің бәрін ұмытыңыз. Франция астанасы ашықхаттардағы көріністен әлдеқайда терең әрі тіршілігі қайнаған тірі қала. Бұл нұсқауды жеке тәжірибеме сүйеніп жазып шықтым. Ол сапарыңызды күйзеліссіз әрі артық шығынсыз жоспарлауға көмектеседі деп үміттенемін.

Париждің ең көрікті жерлері

Эйфель мұнарасы

Жұмыс уақыты: күн сайын 09:15-тен 22:45-ке дейін.
Билет бағасы: екінші қабатқа лифтімен көтерілу — 23 EUR (шамамен 12 мың KZT), мұнараның ең биік нүктесіне шығу — 36 EUR (шамамен 20 мың KZT) басталады.

Біреулер бұл жерді шектен тыс жарнамаланған туристік орын деп санайды, енді бірі өз көзімен көрсем деп армандайды. Мен екінші топқа жатамын. Мұнара 1889 жылғы Дүниежүзілік көрмеге уақытша павильон ретінде салынған. Алғашында жергілікті зиялы қауым оны ашықтан-ашық жек көріп, «темір құбыжық» деп атаған. Бірақ уақыт өте келе ол Париждің басты символына айналды. Марс алаңынан мұнараға төменнен қарау тегін. Ал төбесіне шығамын деп отырсаңыз, кезекке уақыт жоғалтпас үшін билетті ресми сайттан бірнеше апта бұрын алып қойған дұрыс. Күн батарда Трокадеро алаңынан мұнара ғажап көрінеді. Бұл кезде Эйфель мұнарасының шамдары жанады.

Париж Құдай Ана соборы — Нотр-Дам

Жұмыс уақыты: жұмыс күндері 07:50-ден 19:30-ға дейін, демалыс күндері 08:15-тен 19:30-ға дейін. Бейсенбі күні 22:00-ге дейін ашық.
Билет бағасы: тегін.

Күрделі жөндеу жұмыстары аяқталғаннан кейін собор туристерге қайта ашылды. Ол Париж тарихы басталған Сите аралындағы тарихи орталықта орналасқан. Мұнда тек ғибадат ету үшін келмейді. Бұл — маңызды сәулет ескерткіші әрі француз готикасының символы. Ішіне кірмесеңіз де, айналасын міндетті түрде аралап шығыңыз. Орта ғасырлық асқақ сәулет, әйгілі тас гаргульялар, Сена жағалауы мен ескі көпірлер сапарыңыздың бір сағатына әбден лайық.

Монмартр мен Сакре-Кёр базиликасы

• 
• 

Жұмыс уақыты: базилика күн сайын 06:30-дан 22:30-ға дейін ашық.
Билет бағасы: тегін.

Бұл шығармашылық аудан қаланың ең биік төбесінде орналасқан. Сондықтан 237 баспалдақпен жаяу көтерілуге дайын болыңыз. Ауданды аралағанда шырмауық басқан тыныш көшелерге бұрылып, ескі винил пластинкалар сататын дүкендерді қарап, Тертр алаңындағы көше суретшілерін тамашалаңыз. Төбенің ең биік жерінде аппақ Сакре-Кёр базиликасы орналасқан. Ол 1871 жылғы Франция — Пруссия соғысынан кейін үміттің символы ретінде салынған.

Елисей алаңдары мен Триумф аркасы

Жұмыс уақыты: Елисей алаңдары тәулік бойы ашық, Триумф аркасының шолу алаңы 10:00-ден 23:00-ге дейін жұмыс істейді.
Билет бағасы: даңғыл бойында серуендеген тегін, аркаға көтерілу — 16 EUR (шамамен 8 689 KZT).

Бұл — Келісім алаңынан басталатын кең әрі асқан салтанатты даңғыл. Егер қымбат люкс брендтерін ұнатып, Louis Vuitton, Chanel не Dior секілді алып флагман дүкендерде сауда жасағыңыз келсе, сізге дәл осы жерге бару керек. 

Шопинг қызықтырмаса, даңғылдың тарихына назар аударыңыз. Ол Наполеонның «Ұлы армиясының» жеңістеріне арнап салдырған алып Триумф аркасына барып тіреледі. Арканың төменгі жағында Белгісіз жауынгердің қабірі жанындағы Мәңгілік алау жанып тұр. Ал осы жерден жан-жаққа 12 даңғыл тарайды.

Люксембург бағы мен сарайы

Жұмыс уақыты: күн сайын ашық. Уақыты маусымға қарай өзгереді, әдетте 07:30-дан 21:30-ға дейін.
Билет бағасы: тегін.

Бұл жасыл саябақты XVII ғасырда патшайым Мария Медичи салдырған. Ол туған жері Флоренцияны сағынып, Парижде сүйікті италиялық бақтарын қайта жасап шыққысы келген. Жоспары іске асқан сияқты. Қазір бұл — қала тұрғындарының сүйікті саябақтарының бірі. Оның басты ерекшелігі — бүкіл аумаққа қойылған жасыл темір орындықтар. Оларды қалаған жеріңізге жылжыта аласыз. Қаласаңыз, Медичи субұрқағының жанына отырыңыз. Қаласаңыз, көне ағаштардың көлеңкесінде не жылыжайда кітап оқыңыз.

Вогез алаңы

Жұмыс уақыты: тәулік бойы.
Билет бағасы: тегін. Виктор Гюго музейінің тұрақты көрмесіне де тегін кіруге болады.

Бұл — XVII ғасырдың басында салынған қала ішіндегі ең көне алаң. Оны шаршы пішінінен, мінсіз симметриясы мен айнала орналасқан аркалы қызыл кірпіш ғимараттарынан жазбай танисыз. Бір кездері мұнда француз ақсүйектері тұрған. Алаң да солардың құрметіне аталған. Бұл — Парижде 20 мың қадам жүргеннен кейін сэндвич сатып алып, көгалға отырып демалғанға таптырмас жер. Айтпақшы, алтыншы үйде Виктор Гюго бірнеше жыл тұрған. Қазір онда жазушының музейі бар.

Парижде не істеуге болады?

Бұл бөлімге сапарыңызды түрлендіріп, уақытыңызды жергілікті тұрғын секілді өткізуге көмектесетін қызық мәдени орындар, іс-шаралар мен көпшілік біле бермейтін жерлерді жинап шықтым.

Орсе музейіндегі жауһарларды көріңіз

• 
• 

Жұмыс уақыты: сейсенбіден жексенбіге дейін 09:30-дан 18:00-ге дейін, бейсенбі күні 21:45-ке дейін. Дүйсенбі — демалыс.
Билет бағасы: кассада 14 EUR (шамамен 7 603 KZT), онлайн — 16 EUR (шамамен 8 689 KZT).

Бұл музей XX ғасырдың басындағы бұрынғы теміржол вокзалының көрікті ғимаратында орналасқан. Шыны төбесі мен төбедегі алып сағаттың арқасында іші үнемі жарық әрі кең көрінеді. Импрессионизмді ұнатсаңыз, міндетті түрде барыңыз. Мұнда Моне, Ренуар, Дега мен Ван Гогтың түпнұсқа туындылары қойылған. Ең танымал еңбектердің қатарында Ван Гогтың автопортреті, оның «Жұлдызды түні» мен Анри Руссоның «Жылан арбаушысы» бар.

Луврды аралап шаршаңыз

• 
• 

Жұмыс уақыты: дүйсенбі, бейсенбі, сенбі және жексенбі күндері 09:00-ден 18:00-ге дейін, сәрсенбі мен жұмада 21:00-ге дейін. Сейсенбі — демалыс.
Билет бағасы: 32 EUR (шамамен 17 мың KZT). 18 жасқа толмаған балаларға тегін.

Бұл — әлемдегі ең үлкен музейлердің бірі әрі бұрынғы король резиденциясы. Көп адамның жіберетін бір қатесі: белгілерге қарап, бірден кішкентай «Мона Лизаға» қарай жүгіреді, жеткен бойда жүздеген туристің басымен қосып суретке түсіреді де, музейден шығып кетеді. Сөкпеймін, әрине. Бірақ менің ұсынарым басқа. Лувр тым үлкен. Оны бір сағатта аралап шығу мүмкін емес. Өнерді жақсы көрсеңіз, музейге бір күнді толық арнаған дұрыс. «Жокондадан» бөлек, Самофракиялық Ника мүсінін, Милос Венерасын не француз кескіндемесіне арналған залдарды жоспарыңызға қосыңыз. Сәрсенбі мен жұма күндері Луврдың ұзағырақ жұмыс істейтінін де ескеріңіз.

Карнавале музейінде қала тарихын біліңіз

Жұмыс уақыты: сейсенбіден жексенбіге дейін 10:00-ден 18:00-ге дейін. Дүйсенбі — демалыс.
Билет бағасы: тұрақты көрме залдарына кіру тегін.

Бұл музей Маре ауданындағы екі сәнді сарайда орналасқан және Париж тарихын баяндайды. Ішінде көне дүкендердің маңдайшаларынан, король төсектерінен бастап Бастилия түрмесі камераларының шынайы есіктеріне дейінгі таңғаларлық топтама жиналған. Музейді аралап болған соң, ішкі ауласына кіріңіз. Онда сүйкімді кафе жұмыс істейді.

Пети-Паленің құпия бағына кіріңіз

Жұмыс уақыты: сейсенбіден жексенбіге дейін 10:00-ден 18:00-ге дейін, жұма мен сенбіде 20:00-ге дейін.
Билет бағасы: тегін.

Бұл — 1900 жылғы Дүниежүзілік көрмеге арнап салынған алтын қақпалы тағы бір сәнді сарай. Мұнда Сезанн, Делакруа мен Моне картиналарын, сондай-ақ антикалық өнердің үлкен коллекциясын көруге болады. Бірақ бұл жердің ерекшелігі — экзотикалық өсімдіктері, колонналары мен мозаикамен көмкерілген тоғандары бар жартылай дөңгелек ішкі бақ. Жолдың у-шуынан бір тынығып, кофе ішкенге тамаша орын.

Shakespeare and Company дүкенінде кітап оқыңыз

Жұмыс уақыты: дүйсенбіден сәрсенбіге дейін 10:00-ден 20:00-ге дейін, бейсенбіден сенбіге дейін 21:00-ге дейін, жексенбі күні 12:00-ден 19:00-ге дейін.
Билет бағасы: тегін.

Нотр-Дамның дәл қарсысында орналасқан бұл әйгілі дүкенге кезінде Хемингуэй, Жойс пен Фицджеральд кіріп жүрген. Ішінде ескі әдеби Париждің рухы әлі сақталған: төбеге дейін жететін ағаш сөрелер, ескірген жұмсақ креслолар, тар баспалдақтар мен бос орынның бәріне қойылған кітаптар. Француз тілін білмейтіндерге ағылшынша әдебиет те көп. 

Гарнье операсының сұлулығына тамсаныңыз

Жұмыс уақыты: күн сайын 10:00-ден 17:00-ге дейін.
Билет бағасы: 10 EUR (шамамен 5 430 KZT) басталады.

Бұл — III Наполеоннің тапсырысымен салынған әлемдегі ең әйгілі әрі әдемі опера театрларының бірі. Балетке билет алуды жоспарламасаңыз да, ғимараттың өзін көру үшін барған жөн. Салтанатты мәрмәр баспалдақ, Версаль стиліндегі алып фойелер мен Марк Шагал безендірген үлкен плафоны бар көрермен залы — алтын жалатылған әшекей мен хрустальдан басыңыз айналады.

Парижді бір күнде аралауға арналған дайын гид

Таңертең, 09:00–12:30

Күніңізді Трокадеро алаңынан бастаңыз. Мұнда таңғы тоғызға қарай келген дұрыс. Бұл кезде жарық сәтті түседі, ал Эйфель мұнарасының маңында туристер әлі азырақ болады. Суретке түсіп болған соң Марс алаңына қарай төмен түсіңіз. Сенаны Йена көпірі арқылы кесіп өтіп, жағалаумен қала орталығына қарай жүріңіз. Жолай сәнді Carette кафесіне кіріңіз. Күн ыстық болмаса, олардың әйгілі қою ыстық шоколадын алып шығыңыз. Түске қарай Сите аралындағы Нотр-Дам соборына жетесіз. Жаңартылған готикалық қасбеттерін тамашалап, ескі көпірлер бойымен серуендеуге болады.

Күндіз, 12:30–17:00

Нотр-Дамнан Сол жағалаудағы көрікті Латын кварталына өтіңіз. Тойып түскі ас ішетін уақыт келді. Дәстүрлі француз Bouillon мейрамханасын іздеңіз. Мысалы, Республика алаңындағысын таңдауға болады. Мұнда үнемі у-шу, үстелдер бір-біріне тақалып тұрады, ал даяшылар тапсырысты қағаз дастарқанның үстіне жазады. Бірақ шынайы Париждің келбеті — осы. Классикалық пияз сорпасын не үйректің конфиін байқап көріңіз. Тойып тамақтанғаннан кейін Люксембург бағына барыңыз. Орталық тоғанның жанынан бос жасыл орындық тауып, демалып, күнге жылынып, кітап оқып отырған не желкенді қайық ұшырып жүрген жергілікті жұрттың тіршілігін тамашалаңыз.

Кешке, 17:00–21:00

Күн бата бастағанда метроға түсіп, қаланың солтүстігіндегі Anvers станциясына барыңыз. Осы жерден Монмартр төбесінің етегіне шығасыз. Негізгі туристік баспалдақпен бірден көтерілуге асықпаңыз. Одан да Лепик көшесіне бұрылып, ескі наубайханалар мен винил пластинка сататын дүкендердің жанынан өтіңіз. Кешкі жетіге қарай аппақ Сакре-Кёр базиликасына көтеріліңіз. Төбенің баспалдағына жайғасып, көше гитарашыларының музыкасын тыңдап, қала көрінісіне қарап күнді шығарып салатын көпшілікке қосылыңыз.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Парижде қайда тұрған дұрыс?

Париж ұлу қабыршағындай шиыршықталып орналасқан 20 округке бөлінеді. Сапардың ұнар-ұнамасы таңдаған ауданыңызға да байланысты. Туристер улап-шулаған жерде де, жергілікті тыныш наубайхананың жанында да тұруға болады.

Ауданды картадан тексеріп көріңіз

Аудандар картасы мен көретін жерлерді Aviasales.kz-тің Ары-Бері қызметінен табасыз

ТуристерМарс алаңы, Лувр, Опера

Тарихи орталықСите аралы

Суретшілер мен кабареМонмартр ауданы

Ұйықтайтын жап-жақсы жерГренелль коммунасы

ТуристерМарс алаңы, Лувр, Опера

Тарихи орталықСите аралы

Суретшілер мен кабареМонмартр ауданы

Аудандарды Aviasales.kz

картасынан қарап шығыңыз

Аудандарды Aviasales.kz

картасынан қарап шығыңыз

Парижде қайда тамақтануға болады?

Француз асханасы — әлемдегі ең үздіктердің бірі. Бірақ бір жерге кездейсоқ кіре салсаңыз, дәмсіз пияз сорпасы мен негізсіз қымбат кофесі бар туристік дәмханаға тап болуыңыз мүмкін. Төменде мұндай жағдайға түспейтін орындарды ұсынамын.

Кофені қайда ішуге болады?

• 
• 
• 

Жергілікті классика — аздап ащы дәмі бар қою эспрессо. Францияда әдетте кофеге шәрбат пен үлпілдеген сүт көбігін қоспайды. Дұрыс орындарды білсеңіз, қалада жақсы спешелти кофе мен әдемі интерьері бар кофеханаларды оңай табасыз.

• Café Kitsuné. Біріншіден, мұнда кофе мен матча шынымен дәмді. Екіншіден, сусын алып, Пале-Рояль бағындағы көне тас аркалардың ортасындағы террасаға отырғанның өзі бір ғанибет. Тапсырысқа түлкі пішініндегі фирмалық үгілмелі печеньесін міндетті түрде қосыңыз. Қалада бірнеше филиалы бар. Бірақ король бағындағысы — ең көріктісі.
• Капуциндер бульварындағы Starbucks. Әдетте гастрономиялық гидтер желілік кофеханаларды ұсынбайды. Бірақ бұл Starbucks барғанға әбден тұрады. Ол XVII ғасырдағы бір кездері банк болған сәнді тарихи ғимаратта жұмыс істейді. Ішінде көне интерьер толық сақталған: биік төбе, алып айналар, люстралар мен сәнді өрнектер тұр. Фильтр-кофеңізді Версаль залында ішіп отырғандай боласыз.
• FAUNA. Бұл — 11-округте орналасқан, жергілікті жастар жиі баратын орын. Мұнда жұрт әйгілі даршын орамасын іздеп келеді. Оны өздері сол жерде пісіреді. Сондықтан кофехананы жаңа піскен тоқаштың иісінен-ақ тауып аласыз.
• La Crème du Palais Royal. Пале-Рояльдің дәл жанындағы жабық галереяда жасырынған сүйкімді шағын кафе.
• Carette. Трокадеро алаңындағы жүз жылға жуық тарихы бар классикалық кафе. Ол 1927 жылы ашылған. Мұнда кофе үшін емес, жоғарыда айтқан әйгілі ыстық шоколад үшін келеді. Ол өте қою әрі қанық. Жанына үлкен ыдыспен үйде дайындалған көпіртілген кілегей беріледі.
• Noir. Сапалы балама кофе мен спешелтиді ұнатсаңыз, осы желіні іздеңіз. Олар өте жылдам дамып жатыр. Минималистік кофеханалары қаланың әр округінде бар.

Түскі және кешкі асты қайдан ішкен жөн?

Бірден айтайын, Эйфель мұнарасының дәл жанындағы мәзірі сұмдық әдемі мейрамханаларды айналып өтіңіз. Ол жерлерде тамақ көбіне дәмсіз, бағасы да негізсіз жоғары болады. Дәмді әрі артық пафоссыз тамақтану үшін Bouillon не Bistrot деген жазуы бар орындарды іздеңіз.

Bouillon

Бұл — париждіктердің өзі көшеде кезекке тұратын әйгілі француз асханаларының форматы. Мәзірі қарапайым әрі қысқа: пияз сорпасы, жұмсақ үйрек сирағының конфиті, тартар мен қызыл шарапқа бұқтырылатын бёф-бургиньон сиыр еті. Іші әдетте у-шу, үстелдер бір-біріне жақын. Қалада мұндай бірнеше мейрамхана бар. Мен Республика алаңындағы филиалда кешкі ас іштім.

Bistrot Madame

Классикалық пияз сорпасын ішуге болатын шағын бистро. Сорпаны қою сорпаға дайындап, үстіне мол етіп алтын түсті, еріп тұрған ірімшік салып береді.

La Maison d’Isabelle

Париждегі ең дәмді круассанды іздесеңіз, осында барыңыз. Латын кварталындағы бұл қарапайым наубайхана 2018 жылы сары май қосылған ең үздік круассан жүлдесін алған. Мінсіз қатпарланған, сырты қытырлақ әрі ауызға салғанда еріп кетеді.

Vaudeville

Бұл мейрамхана 1918 жылдан бері Париж биржасының қарсы бетінде қонақ қабылдап келеді. Ішінде жез бөлшектер мен айналар қолданылған ар-деко стиліндегі интерьер бар. Мұнда жаңа ауланған теңіз өнімдерін жеуге барған жөн. Устрица, теңіз шаяны мен асшаян салынған үлкен платоға тапсырыс беріңіз. Ыстық тағамнан жұмсақ үйрек төсін ұсынамын.

Le Relais de l’Entrecôte

Бұл әйгілі орын 60 жылдан астам уақыттан бері бірегей мәзірінен айнымай келеді. Мұнда бір ғана негізгі тағам дайындалады: құрамы құпия жасыл тұздық құйылған шырынды антрекот стейгі мен бір үйінді жіңішке фри. Бәрі өте қарапайым. Алдымен грек жаңғағы қосылған жеңіл жасыл салат әкеледі, артынан ет беріледі. Бағасы да тұрақты — 29 EUR (шамамен 16 мың KZT). Оның үстіне алтын түсті картоп фриін даяшылар қалағаныңызша қосып береді. Кіреберісте үнемі ұзын-сонар кезек. Бірақ тез жылжиды.

Жиі қойылатын сұрақтар

Парижге қалай жетуге болады?

Қазір Қазақстаннан Парижге тікелей рейс жоқ. Ең ыңғайлысы — Ыстанбұл, Франкфурт, Варшава не Доха арқылы ұшу. Ыстанбұл арқылы ұшқан әдетте арзанырақ шығады. Жол орта есеппен 9–14 сағатқа созылады. Бәрі транзит әуежайында қанша уақыт өткізетініңізге байланысты. Сапарға Шенген визасы қажет. Франция консулдығы визаны Астана мен Алматыдағы визалық орталықтары арқылы рәсімдейді. Құжат тапсыратын бос уақытты сапарға бірнеше ай қалғанда іздеу керек. Әсіресе көктемде және Жаңа жыл мерекесі қарсаңында бос күндер бірден таусылып қалады.

Осы тақырыпта басқа не бар?

Шенген алам десеңіз: қазақстандықтарға арналған нұсқаулық

Шенген визасының сауалнамасы: қазақстандықтарға арналған нұсқаулық

Неліктен сізге виза бермеуі мүмкін және ондай жағдайда не істеуге болады

Парижге қай мезгілде барған дұрыс?

Өзім Парижде үш түрлі маусымда болдым. Әр мезгілде оны жаңа қырынан таныдым.

Жаз. Бұл — Сена жағасындағы ұзақ әрі әдемі күн батар шақтың маусымы. Бірақ аптап ыстық та, билет кассаларындағы шексіз кезек пен баспана бағасы ең қымбат кез де осы. Қазір Еуропада аптап ыстық жиілегендіктен, сақ болыңыз. Күндіз қала орталығында серуендеген қиындайды. Жазда барсаңыз, ұзақ әрі жылы кештерде жүремін деп барыңыз. Ал күндіз саябақтарда ағаштың көлеңкесінде не музейлерде жүрген дұрыс. Оның үстіне тамызда жергілікті бистролар мен отбасылық дүкендердің көбі демалысқа жабылады.

Қыс. Бұл кезде Париж сұрғылт, ылғалды әрі желді болады. Ауа температурасы нөлден жоғары болғанымен, ылғалдан бәрібір суық сезіледі. Күн ерте батады. Сондықтан ұзақ серуенге уақыт аз. Есесіне турист жоқтың қасы, қонақүй бағасы арзандайды, Лувр не Орсе секілді негізгі музейлерге бірнеше сағат кезекте тұрмай кіре аласыз.

Көктем. Менің сүйікті маусымым. Наурыз-сәуірде қысқы ылғал кетіп, саябақтар жасыл желекке оранады, магнолия гүлдейді, ал жазғы қарбалас әзірше басталмайды. Жаяу жүргенге жайлы, кассадағы кезек те ұзын емес. Тек рюкзагыңызға қолшатыр салып алуды ұмытпаңыз. Көктемде жаңбыр жиі-жиі себелеп өтеді.

Парижде қандай көлікпен жүрген дұрыс?

Ең сенімді көлік — метро. Алғаш барған адамға 16 желіден тұратын сызбаны түсіну қиын болуы мүмкін. Бірақ қарапайым бір ереже бар: платформада желінің нөміріне емес, соңғы станцияның атауына қараңыз. 

Көп жүремін деп отырсаңыз, автоматтан 2 EUR (шамамен 1 086 KZT) Navigo Easy пластик картасын сатып алып, ақша салыңыз. Бір күнге арналған шексіз жол жүру билеті 12 EUR (шамамен 6 517 KZT) тұрады. Картасыз әр сапарға 2 EUR (шамамен 1 086 KZT) төлеуге тура келеді. 

Автобус ауасы тар метроны ұнатпайтындарға, терезеден қала көшелерін көріп отырғысы келетіндерге жақсы. №69 автобусқа міндетті түрде мініңіз. Оның бағыты қала орталығы арқылы Лувр мен Отель-де-Вильдің жанынан өтеді. Осылайша қымбат экскурсиялық екі қабатты автобусты алмастырады. Билетті Navigo Easy картасымен де алуға болады.

Парижден не ала келуге болады?

• Сары май. Атап айтқанда, Maison Bordier брендінің әйгілі сары майын алыңыз. Оның ерекшелігі — майды әлі күнге дейін қолмен алады, ерекше қоспалары да бар. Мадагаскар ванилі мен трюфельден бастап ысталған тұз бен юдзуға дейінгі түрлері бар. 125 грамдық бір қаптамасы 5–15 EUR (шамамен 2 715–8 146 KZT) тұрады. Оны La Grande Épicerie гастрономынан сатып алуға болады. Сол жерде кассадан қаптаманы вакуумдап беруін сұраңыз. Сонда сары май шабаданда бүлініп кетпейді.

• Макарон тәттілері. Меніңше, қаладағы ең дәмді макарондарды Pierre Hermé дайындайды. Олар жұмсақ, дәмі қанық, тым тәтті де емес. Тағы бір жақсы нұсқа — әйгілі Ladurée. Оларды кем дегенде сувенирдің өзі сияқты көрінетін әдемі қорабы үшін алуға болады.

• Прованс сабыны. Лаванда иісті сабын Францияның оңтүстігінде 600 жылдан астам уақыт бойы құпия рецептімен дайындалып келеді. Оны Монмартрдағы шағын сувенир дүкендерінен табуға болады. Менің сүйікті дүкенім — La Savonnerie de Montmartre.

• Officine Universelle Buly дәріхана косметикасы. Бұл француз бренді 1803 жылдан бері жұмыс істейді. Олардың бутиктері заманауи дүкеннен гөрі ағаштан ойылған шкафтары мен шыны құтылары бар ескі дәріханаға көбірек ұқсайды. Мұнда су негізінде жасалған хош иісті су, түрлі май не әдемі ретро түтікшедегі крем алу үшін кірген жөн. Сондай-ақ брендтің шаш тарайтын тарақтарына өз аты-жөніңіздің бас әріптерін ойып жаздырып алуға болады.

Суретті салған — СашаШура.