Ірі футбол чемпионаттарына қалай билет аламыз?
Руслан Меделбектің кеңестері.
Еуропада жаңа футбол маусымы басталды. Алматының «Қайрат» командасы Чемпиондар лигасының негізгі кезеңінде ойнайды. Бұған қоса, қыркүйекте 2026 жылғы әлем кубогының билеттері де сатылымға шығады. Демек саяхатыңызды футбол додасымен байланыстыруға себеп көп. Ал біз сізге Чемпиондар лигасына, Испания, Англия, Франция чемпионаттарына, әлем чемпионатына билет алу жолын түсіндіреміз.
Испания чемпионаты
Кез келген футбол клубы матчтың билеттерін алдымен ресми сайттарында жариялайды. Мәселен, Испанияның «Реал Мадрид» командасының я «Барселона» клубының ойынын көргіңіз келсе, билетті осы клубтардың ресми сайттарындағы «Tickets» бөлімінен ала аласыз. Испания чемпионатының қарапайым билеттері матчқа 9-10 күн қалғанда шығады. Ал VIP билеттер ертерек сатыла береді.
Мысалы, «Барселона» ойындарына билет алу үшін сайтындағы «Tickets» бөліміне кіріп, «let me know» батырмасын басып, хабарламаға поштаңызбен жазылып аласыз. Билет сатылымға шыққанда, поштаңызға хат келеді.
Ал «Реал Мадридтің» матчтарына билет шыққанын сайттан қарап, аңдып отыру керек.
Испанияда қарапайым билеттер ойынның маңыздылығына қарай 30-50 еуродан (15–26 мың теңге), VIP билеттер 350 еуродан (184 мың теңге) басталады. Әрине, «Барселона» мен «Реал Мадрид» арасында Эл-Классико ойындарының билеттері қашанда қымбат болады. Мұндай супер матчтардың билеттері де тез сатылып кетеді. Сондықтан чемпионаттың күнтізбесі шыға сала ресми сайтқа кіріп, аңдып отырып, кейде кезекте тұрып билет алуға тура келеді. «Валенсия», «Атлетико», «Вильярреал» сынды ортаңқол командалардың ойынына билет алған оңайырақ.
Франция чемпионаты
Франция чемпионатының ойындарына да билеттерді әр клубтың ресми сайтынан алуға болады. «Пари Сен Жермен» командасы билеттерін ресми сайттарына шығарады. Билеттер бірнеше дәрежеге бөлініп, 50 еуродан (26 мың теңге) басталады. Кейбір клубтардың, мәселен, «Монаконың» ойынына билеттер 12 еуродан (6 300 теңге) сатылады. Билет құны команда мен ойынның деңгейіне тікелей байланысты.
Италия мен Германия чемпионаттары
Италия мен Германия чемпионатының матчтарына билетті әр клубтың ресми сайтынан оңай алуға болады. Мәселен, Италияның «Ювентус», «Наполи», «Милан», «Рома» командаларының ойындарына билеттер ресми сайтта сатылады. Бұл елде де билет бағасы ойынның және командалардың деңгейіне байланысты болады.
Германия чемпионатында «Бавария», «Боруссия Д», «Лейпциг» сынды мықты клубтардың ойындарына да билеттер ресми сайт арқылы сатылады. «Бавария» мен «Боруссия Д» клубтарының матчына билет алу үшін сайтына тіркелу керек.
Англия премьер-лигасы
Англия чемпионатындағы гранд клубтардың ойынына билет алу қиындау. Мысалы, «Ливерпуль» командасының ойынына барғыңыз келсе, алдымен билет алуға кезекке жазыласыз. Сол кезек бойынша билеттер сатылымға шығады. Алдыңызда тым көп адам жазылып, билетсіз қалуыңыз да мүмкін. «Арсеналдың» да ресми сайтында билеттер лотерея сияқты сатылады. Алдымен тіркеліп, билетке өтініш тастайсыз, кейін сізді таңдаса ғана билет аласыз. «Манчестер Ситидің» билетіне де алдын ала тапсырыс беріп, күту керек. Сондықтан көбіне Англиядағы ойындарға билетті алып-сатарлардың сайтынан алуға тура келеді. Солардың бірі — Fanpass.net сайты.
Англияда екі рет матчқа бардым. Чемпиондар лигасындағы «Манчестер Юнайтед» — «Атлетико Мадрид», «Манчестер Сити» — «Реал Мадрид» ойынына билетті Fanpass.net сайтынан алдым. Екеуінде де билет қолыма тиді. Мәселе болған жоқ. Алдын ала төлем жасап, билетті алып қоясың. Ал билет матч болатын күні келеді. Клубтардың ресми сайттан билет алған қиын. Себебі клуб жанкүйерлері негізгі орындарды бір жылға бір-ақ алып тастайды. Жалпы сатылымға шығатын билеттерді сол алып-сатар сайттар сатады.
Чемпиондар лигасы
Чемпиондар лигасының топтық кезеңіндегі, 1/8 финал, ширек финал және жартылай финал матчтарының билетін әр елдің клубтары өзі сатады. Еуропалық клубтар билеттерді ойын алдында ресми сайтына жариялайды. Ал «Қайрат» іріктеу кезеңіндегі билеттерді ресми сайты мен ticketon.kz сайты арқылы сатылымға шығарды. Сондықтан «Қайраттың» сырт алаңдағы және өз алаңындағы ойындарының билеттерін алу үшін клубтың ресми сайты мен әлеуметтік желідегі парақшасынан көз жазбаңыз. Әдетте клуб билетке қатысты ақпаратты сайтында жариялайды.
Чемпиондар лигасы финалының билетін UEFA (Еуропа футбол қауымдастығы) сатады. Билет алғыңыз келсе, UEFA сайты арқылы тіркеліп, билетке кезекке тұрасыз. Кейін тіркелгендер арасында билет лотерея арқылы таратылады. Егер лотереядан билет ұтсаңыз, сізге кез келген бағадағы билет келуі мүмкін. Сол билетті алуыңыз керек болады. Сізге берілген уақыт ішінде төлем жасамасаңыз, билет басқа адамға ұсынылады.
Мәселен, мен 2024 жылы Германияда өткен Еуропа чемпионатында лотереяға қатысып, орта бағадағы алты билет аламын дегенмін. Маған төрт билет ұсынды. Төрт билеттің біреуі 2000 еуро болған. «Үшеуін аламын, біреуін алмаймын» деген болмайды, төрт билетті де алу керек. Мен қымбатсынып алмадым. Бірақ кейін журналист ретінде Еуропа чемпионатына аккредитация алып, Еуропа чемпионатының сегіз ойынынан хабар тараттым.
Әдетте Чемпиондар лигасының матчтарына билет өте тез сатылып кетеді немесе клубтың фанаттары алдын ала абонементпен алып қояды. Билеттерді әккі алып-сатарлар да жылдам алып, кейін үстіне баға қосып сатады.
Сондықтан алып-сатар сайттардан билет ала аласыз. Мысалы, досым екеуіміз былтыр Лондонда өткен Чемпиондар лигасының финалындағы «Реал Мадрид» (Испания) мен «Боруссия Дортмунд» (Германия) матчына билетті алып-сатар footballticketnet.com сайттан алғанбыз. Билет матч болатын күні келді. Алып-сатарлардан билет алған — тәуекел. Билет жалған болып шығуы мүмкін, бір адамға бірнеше билет сататындар да болады, бағасы да жоғары және матчқа бара алмасаңыз, билетті өткізіп, ақшаны қайтарып алу мүмкіндігі жоқ. Сондықтан олардан билет алу — әр адамның өз жауапкершілігі. Біз тәуекелге барып, төлем жасап алдық және жолымыз болып, матч көріп қайттық.
Чемпиондар лигасындағы «Интер Милан» мен «Барселона» арасындағы матчқа билетті «Интердің» ресми сайтынан алғанмын. Испания чемпионатындағы «Барселона» — «Осасуна» ойынының билетін «Барселонаның» сайтынан сатып алдық. Одан бөлек Чемпиондар лигасының бірнеше матчына алып-сатарлардың Viagogo.com сайтынан алғанмын. Чемпиондар лигасына билет алу қиын. Сондықтан кейде тәуекел деп алып-сатарлардан алуға тура келеді.
Әлем чемпионаты
2026 жылы 11 маусым-19 шілдеде АҚШ, Канада мен Мексикада футболдан әлем чемпионаты өтеді. Билет сатылымы 10 қыркүйекте басталады. 10-19 қыркүйекте билетке Visa картасы бар фанаттар ғана тіркеле алады. Кейін тіркелгендер арасында билет лотерея арқылы бөлінеді. Лотереядан билет ұтқандар төлемді Visa картасы арқылы жасауға тиіс.
Әлем кубогына билет алу үшін алдымен FIFA (Халықаралық футбол қауымдастығы) сайтына тіркеліп, FIFA ID ашу керек. Кейін поштаңызға билет сатылымы жайлы ақпараттар келіп тұрады.
Испаниялық Marca спорт басылымының жазуынша, 5 желтоқсанда Вашингтонда әлем кубогының жеребесі тартылған соң, билеттер жаппай сатылымға шығады.
Ал FIFA өз сайтында «билет сатылатын кезеңдерді жариялап отырамыз» дейді. Сондықтан ақпаратты жіберіп алмас үшін FIFA сайтына электронды поштаңызды ақпарат алуға тіркеп қойыңыз.
Футбол билеттері кейде қымбатқа шығып жатады. Сондықтан ақшаны ұшақ билетін арзанға алу арқылы үнемдеуге болады. Ал арзан билеттерді Aviasales.kz сайтынан табасыз.
