Шымкенттен Шаолиньге дейін: Қытайдағы академияда шыныққан әйел
Темірдей тәртіп, күнделікті жаттығу мен қытайлық академиядағы өмір.
Сәлем! Есімім — Мөлдір, жасым 37-де. Қорғаныс министрлігінің қосалқы капитанымын. Қазір фитнес-жаттықтырушымын. Биыл Астанадан Шымкентке көшіп келдім. Өзім тәртіп пен денсаулықты бірінші орынға қоямын. Спортпен айналысып жүргеніме 20 жылдан асты. Сол себепті көптен бері Шаолиньге барып көруді армандап жүрдім. Биыл сонда жол түсті. Не көргенімді осы материалда баяндап берейін.
Шаолиньге жол
Шаолиньге сапарым биыл мамырда Шымкенттен басталды. Шымкенттен Ташкентке таксимен жеттім. Ташкент–Гуанчжоу бағытында ұшаққа отырып, Гуанчжоудан Дэнфэнге жүрдек пойызбен бардым. Бірақ ол жақтағы академия маған ұнаған жоқ. Сол күні Тэнджоу қаласына пойызға билет алып, түнде 5–6 сағатта жеттім. Нәтижесінде Қазақстаннан Шаолиньге барып-қайту жолына 300 000–350 000 теңге шамасында ақша кетті.
Тэнджоуға қалай тап болдым?
Біздегі танымал блогерлер барған Дэнфэндегі Шаолинь академиясынан көңілім қалды. Тұру жағдайы нашар. Іші лас, бір бөлмеде төрт қыз жататын. Тауға аптасына бір рет қана шығарады. Содан бірден өзге академияларды интернеттен іздеп, Тэнджоудағы Yu Kung Fu International School академиясын таптым.
Ол Қытайдағы Шаньдун провинциясында, Ляньцин тауында, будда ғибадатханасының кешенінде орналасқан. Шаолиньдің өзінде болмағанымен, шаолиньдік кунг-фу, тайцзи, цигун мен санда элементтерін үйретеді. Академияның негізін қалаушы — шаолинь монахы Shi Yan Chao. Қазір бұл академия Шаолиньдегі академиялардан асып түспесе, кем емес.
Онда телефонға үңіліп отыруға уақыт жоқ. Әр күн таңғы ерте жаттығудан басталып, денені ғана емес, мінезді де тәрбиелейді.
Бірнеше күннен кейін-ақ ойың тынышталып, табиғатпен үндесе бастағандай күй кешесің. Тауда орналасқандықтан ауасы таза, жан-жағы әсем табиғат. Қытайша сәнделген академияның ғимараты да, ауласы да ерекше көңіл күй сыйлайды. Айнала тып-тыныш, тек анда-санда соғылған қоңырау мен жаттығушылардың айқайы ғана естіледі.
Бұл академия аумағында тек жаттығу мектебі емес, таудың жоғарырақ жағында үлкен будда ғибадатханасы да орналасқан. Ауласының бәрі көгалдандырылған, саябақ сияқты. Жаттығу залдары, алаңдары, баспалдақтары бар. Арнайы жаттығу киімдері академияның өзінде беріледі.
Ол жерге әлемнің әр түкпірінен адамдар келіп жаттығады. Арнайы қонақүйі бар. Бөлмелері таза әрі жайлы. Барлық жағдай жасалған. Бір бөлмеде екі адам тұрады. Жаттығу мен тұру бағасы бірге жүреді. Мен бір аптаға 550 000–600 000 теңгенің айналасында ақша төледім. Бірақ мұнда жаттығатын уақытың ұзарған сайын төлейтін сома да азая береді.
Күн тәртібі
Таңертең бес жарымда оянатынбыз. Алтыда түгенделген соң сапқа тұрамыз да, жүгіруге шығып кететінбіз. Денені қыздыру үшін шамамен 2–3 шақырым тау бөктерінде жүгіретін едік. Одан кейін 7:20-ға дейін кунг-фу жаттығуларын жасайтынбыз.
7:20-да таңғы ас ішеміз. Әдетте таңғы асқа көкөніс, жұмыртқа мен күріш берілетін. Негізі ондағы тамақтың бәрінде күріш пен көкөніс көп. Екі-үш күнде бір рет қарбыз да береді. 8:20-да қайтадан сап түзеп, жаттығудың екінші кезеңін бастаймыз. Сөйтіп 11:00-ге дейін жаттығамыз. Мастерлер әртүрлі күрес тәсілдерін меңгертіп, гимнастика жасатып, өзін-өзі қорғау элементтерін үйрететін еді.
12:00-де түскі ас ішеміз де, 14:30-ға дейін демаламыз. Біреу таза ауада серуендейді, біреу мызғып алады. Екі жарымда қайта сап түзейміз. Үшінші кезеңде кунг-фудың қозғалыстарын үйреніп, дененің иілгіштігін жақсарту үшін созылу-керілу жаттығуларын жасаймыз. Сонда күн сайын 6–7 сағаттай жаттығуға кететін.
Мұның бәрі біткен соң 18:00-де кешкі ас дайын болады. Асханаға барып, тамақтанған соң ұйқыға кеткенше қолымыз бос болатын. Айтпақшы, академия маңында дүкендер бар. Тәтті бірдеңе қалағандар сол жақтан жүрек жалғап алады. Біреулер серуендеп, үй ішімен хабарласады. 21:00-де бәріміз түнгі ұйқыға кететін едік.
Қиындықтар
Өзім бұрыннан спортпен айналысқандықтан жаттығу жасаған оңай болды. Жүгіруден, баспалдаққа мініп-түсуден, жүк көтеріп тепе-теңдік сақтаудан қиналғаным жоқ. Қорыққаным бір ғана нәрсе — таяқ еді. Денені соққыға үйретіп, шынықтыру үшін мастеріміз таяқпен аяқ-қолымыздан, преске ұрып шынықтыратын. Денеміз көгеретін, әрине. Бірақ нәтижесі көп күттірмейтін. Ауырғанға бойымыз үйреніп, бұлшық еттеріміз қатайып, соққыға төтеп беру қабілетіміз жақсара түсетін. Кейін таяққа да үйреніп кеттім.
Айтпақшы, цемент төселген алаңда ұзақ пресс жасағаннан құйымшағымның тұсы қанап, жара болып қалған. Үйге келген соң да ол жарам ұзақ жазылды. Басқа айтарлықтай қиындық көргенім жоқ. Барғаныма өкінбеймін.
Қандай қызық болды?
Әлемнің түкпір-түкпірінен адамдар келіп жаттыққандықтан, әртүрлі адамды көрдім. Арасында олимпиада чемпиондары мен танымал адамдар да жүрді. Өзгелердің дамуға, шынығуға, үйренуге деген құлшынысын көріп, нәтижесіне таңғалдым. Сол академияда сегіз айдан бері тұрып, жаттығып жүрген бір ер адам есімде қалып қойды. Жұдырығымен цементтің үстінде секіріп, кеудесін жерден көтеріп шынығатын. Бұл жаттығуды көп істегені сонша — қолы ісіп кеткен. Соған қарамастан ол жаттығуын тоқтатпайтын.
Академияның маңында жоғарыда айтқанымдай будда ғибадатханасы орналасқан. Арасында сонда барып, медитация жасайтын едім. Өзім мұсылман болсам да, медитация жасап көру қызық болды. Тыныштықта отырып, ойыңды жүйелеуді, дұрыс дем алуды, эмоцияларыңа зейін қоюды үйренеді екенсің. Жаттығудан қатты шаршап кеткен кезде медитация арқылы онда не үшін барғанымды еске салып, іштей күш беретінмін.
Қанша теңге кетті?
Негізгі шығындардың бәрін алдын ала төледім. Ал тұру, тамақтану мен жаттығу бір пакетке кіреді.
Шығын түрі | Шағын түсіндірме | Кеткен ақша |
|---|---|---|
Барып-қайту жолы | Шымкенттен Ташкентке такси, Ташкенттен Гуанчжоуға ұшу, Дэнфэнге дейін жүрдек пойыз бен Тэнчжоуға дейін түнгі пойыз | 300 000–350 000 теңге |
Оқу және тұру | Yu Kung Fu School мектебіндегі бір апталық курс: қонақүйдегі екі адамдық бөлме, күніне үш мезгіл тамақ пен күн сайын жеті сағаттық жаттығу | 550 000–600 000 теңге |
Жаттығу киімі | Академия беретін арнайы жаттығу киімі | Бағаға кіреді |
Майда-шүйде шығындар | Академия маңындағы дүкендерден тіскебасар мен тәттілер алу | Қалауыңызға қарай |
Барлығы | Қазақстаннан Қытайдағы кунг-фу мектебіне 7 күндік сапар | 850 000–950 000 теңге |
Барып-қайту жолы
Шағын түсіндірме
Шымкенттен Ташкентке такси, Ташкенттен Гуанчжоуға ұшу, Дэнфэнге дейін жүрдек пойыз бен Тэнчжоуға дейін түнгі пойыз
Кеткен ақша
300 000–350 000 теңге
Оқу және тұру
Шағын түсіндірме
Yu Kung Fu School мектебіндегі бір апталық курс: қонақүйдегі екі адамдық бөлме, күніне үш мезгіл тамақ пен күн сайын жеті сағаттық жаттығу
Кеткен ақша
550 000–600 000 теңге
Жаттығу киімі
Шағын түсіндірме
Академия беретін арнайы жаттығу киімі
Кеткен ақша
Бағаға кіреді
Майда-шүйде шығындар
Шағын түсіндірме
Академия маңындағы дүкендерден тіскебасар мен тәттілер алу
Кеткен ақша
Қалауыңызға қарай
Барлығы
Шағын түсіндірме
Қазақстаннан Қытайдағы кунг-фу мектебіне 7 күндік сапар
Кеткен ақша
850 000–950 000 теңге
Нәтижесі
Мен 19 жасымнан бері әскери қызметте жүрдім, спортқа жастайымнан жақынмын. Жеңіл атлетиканы ерекше жақсы көремін. Қорғаныс министрлігінде неше түрлі жарысқа қатысып, медальдар мен грамоталар алып жүрдім. Министрдің өзінен марапат та алдым. Сондықтан спортты жаным сүйеді. Қытайдағы Yu Kung Fu академиясына барғанда өз ортамда жүргендей болдым. Кунг-фуды үйреніп, тайцзидің баяу қимылдарын қайталағанда жаным рахаттанатын.
Негізі мен 21 күнге баруды жоспарлап едім, бірақ жұмыс бабымен дереу Қазақстанға қайтуым керек болды. Сол үшін ойламаған жерден кері қайттым. Бірақ академияға биыл қайта баруды жоспарлап отырмын. Киімдерімді сонда тастап кеткенмін. Себебі ол жақтағы атмосфера мен адамдардың энергиясы ерекше қуаттандыратын. Жеті күн жаттықсам да, рухым мен күшімнің асып-тасып тұрғанын сездім. Сол сезімдерді қайтадан бастан өткергім келеді.
Қазір көп адамда тәртіпке бағыну, уақытылы тамақтану, жүріп-тұру, ұйықтау жағынан мәселе бар. Өз-өзін қолға алып, тәртіпке үйренгісі келетіндерге осындай академияларды қарастырып көруді ұсынар едім. Дене арқылы рухты тәрбиелей отырып, тәртіпті ұстану өміріңді ретке келтіруге көмектесетініне сенімдімін.
