30 еуроға дейінгі веналық кәдесыйлар: дәмді, әдемі әрі ерекше
Тізімде ешқандай шаң жинағыштар мен химия жоқ! Тек шарап, эстетика және дәмді заттар ғана.
Бұл мақалада үйіңізде шаң басып, ұмыт қалатын кәдімгі туристік кәдесыйлар жоқ. Тоңазытқышқа магниттер, кілт ілгіштер және Моцарт пен Климттің «Сүйісу» туындысы бейнеленген жаппай тауарлар – бұл жолы бұлар шетте қалады. Оның орнына аустриялық шараптар, тіл үйірер тәттілер, нәзік антикварлық фарфор мен тарих иісі аңқып тұрған көне картиналарды қарастырамыз. Осының бәрін қайдан және қалай алуға болатынын төменде баяндадым.
Аустриялық тәттілер
Мен әрбір сапарымда жергілікті супермаркетке міндетті түрде барамын. Бұл мәдени және экономикалық талдаудың маңызды бөлігі: адамдар не жейді, қандай нанды ұнатады, сөрелерде ірімшіктің қандай түрі бар және олардың бағасы қандай. Тізімді классикалық аустриялық тәтті – «Моцарткугельн» (Mozartkugeln) кәмпиттерінен бастағым келіп тұр. Бұл аса ерекше сый болмаса да, таптырмас таңдау. Аталмыш кішкентай дөңгелек шоколад кәмпиттер марципан, нуга мен жабайы пістеден жасалған. Венаның кез келген бұрышында қызыл орамдағы Моцарткугельн кәмпиттерін кездестіресіз. Қызыл-сары жұқалтырға оралған бұл нұсқасы түпнұсқадан сәл өзгеше болғанымен, құрамында дәл сол марципан, нуга мен жабайы пісте бар. Супермаркетте тоғыз кәмпиттен тұратын қаптама шамамен 5 еуро тұрады.
Түпнұсқа кәмпиттер Зальцбургтегі отбасылық кәсіпорында 130 жылдан астам уақыт бойы жасалып келеді. Оларды тек төрт жерде ғана сатады. Өкінішке қарай, олардың арасында Вена жоқ. Түпнұсқаны оның орамасына қарап біле аласыз: күміс түсті жұқалтырға (фольга) мен көк түсті Моцарт бейнесі салынған. Сондай-ақ бұл кәмпиттер өндірістік нұсқаларынан өзгеше, себебі қолмен жасалады, сол себепті пішіндері біркелкі емес. Тоғыз кәмпиттен тұратын қаптаманың бағасы шамамен 21 еуро.
Кассаға барар жолда Manner неаполитан вафлилерін ала кетіңіз. Бұл да нағыз аустриялық классика, біз үшін «Қазақстан» шоколады қандай болса, Аустрия үшін де дәл сондай құндылығы бар. Manner компаниясы тәтті өнімдерді 130 жылдан бері шығарып келеді, ал оның қызғылт түсті қаптамасы – Аустрия кондитер өнеркәсібінің символына айналған.
Венада бірнеше Manner фирмалық дүкендері бар, онда жиі жеңілдіктер болып тұрады. 600 грамдық сыйлық қаптамасы шамамен 10 еуро тұрады.
Шарап бөтелкесі
Кез келген адам Аустрия ақ шарабымен танымал екенін біледі, әсіресе Grüner Veltliner және веналық Gemischter Satz сияқты сорттары белгілі. Жақсы аустриялық шараптың бөтелкесін қарапайым супермаркеттен де, арнайы шарап дүкендерінен де сатып алуға болады. Арнайы дүкендерде сатушыдан кеңес алып, бөтелкені тасымалдауға ыңғайлы етіп орап беруді сұрай аласыз. Бағалар - сапасына, шыққан жылы мен сиректігіне қарай 5 еуродан бастап шексіздікке дейін өсе береді.
Егер сізді дәстүрлі шарапханалар қызықтырса, «хойригерлерге» (Heuriger) бару керек. Олар Вена шетінде орналасқан. Мұнда жергілікті балғын шараптарды татып көріп, сатып алуға болады. Көптеген хойригер сәуір мен қазан айлары аралығында ашық, бірақ барғанға дейін Google Maps арқылы нақтылап алған жөн. Мысалы, бір жолы біз ауа райының қолайсыздығына байланысты ерте жабылып қалған веналық хойригерге барып, жолымыз болмаған еді.
Мен ерекше атап өткім келетін хойригер – Mayer am Pfarrplatz, бұл жерде бір кезде Бетховеннің өзі болған деседі. Онда жету өте оңай: метроның U4 желісіне мініп, Heiligenstadt станциясына дейін барыңыз, содан кейін 38А автобусына ауысып, Fernsprechamt Heiligenstadt аялдамасынан түсесіз. Ол жерден Pfarrplatz, 2 мекен жайына дейін жаяу 4 минуттай жүру керек.
Қоғамдық көліктің барлық түріне арналған билеттерді метро станцияларындағы автоматтардан, Wiener Linien ресми сайтынан немесе WienMobil қосымшасы арқылы сатып алуға болады.
Ескі-құсқы базарында сатылатын фарфор
Веналықтар үшін ескі-құсқы тауарлар базарына бару - әдеттегі сенбілік дәстүр. Мұндай базарлардан қолжетімді, бірақ ерекше заттарды: фарфордан жасалған кофе мен шай сервиздері, интерьерге арналған бұйымдар, асханалық күміс заттар және тағы басқа көптеген қызықты дүниелер табуға болады.
Әр сенбі сайын таңғы 6:30-дан 14:00-ге дейін Нашмаркт (Naschmarkt) базарында қаланың ең үлкен ескі-құсқы заттар базары жұмыс істейді. Мұнда пайдасыз заттар да көп, бірақ сирек кездесетін бағалы бұйымдар одан да көп. Мысалы, Майсен фарфоры (Meissen) мен Аугартен фарфор мануфактурасының (Augarten Porzellan) өнімдері. Егер саудаласа білсеңіз, бұл қазыналарды арнайы дүкендердегіден екі есе арзанға алуға болады.
Еуропалық фарфорды іздеуге шабыттандыру үшін тарихқа аз-маз шолу: фарфор Қытайда пайда болғанымен, Еуропада оған ерекше баға берілген. Алғашқы фарфор бұйымдары Еуропа жағалауларына шамамен XIII ғасырда жеткен. Еуропа патшалары қытай фарфоры үшін нағыз «аңшылыққа» шықты, өйткені оны сарайда ұстау – бедел мен байлықтың белгісі еді. Кәрі құрлықтағы фарфор тарихы Майсеннен басталды. Неміс алхимиктері фарфор жасаудың құпиясын бірінші болып ашып, 1710 жылы Германияда алғашқы мануфактура құрылды. Ал 1718 жылы Венада Еуропадағы екінші мануфактура ашылып, император сарайына арналған фарфор шығару құқығын иеленді.
Еуропа екеніне қарамастан, саудаласуды ұмытпаңыз: сатушылар әдетте тауарларын өткізіп жіберу үшін жеңілдік жасауға дайын. Бірде мен Аугартен өндірісінің үш шам ұстағышын бар болғаны 30 еуроға сатып алдым. Маркетплейстерде дәл соларды әрбір данасын 40 еуродан сатады.
Нашмарктқа жету үшін метроның U4 желісімен Kettenbrückengasse станциясына дейін барыңыз. Ал егер трамвай пайдалансаңыз, N1 және N62 бағыттарын таңдаңыз, Wiedner Hauptstrasse аялдамасынан түсесіз.
Ескі картиналар
Сол Нашмаркттан үйге картина да қарап көріңіз. Сөрелерде жақсы күйде сақталған, бағасы да салыстырмалы түрде арзан туындылар көп. Винтажды жиектемелерде суреттер шын бағасынан әлдеқайда қымбат көрінеді. Бұл жұмыстар көбіне белгісіз еуропалық суретшілердің қолынан шыққан, ал сатушылардың өздері де бұл суреттердің қайда және қалай жасалғанын нақты білмейді. Дегенмен, бұл - үй интерьерін сәндейтін ерекше әрі айрықша сыйлық.
Сонымен қатар шағын антикварлық дүкендер мен базарда майлы бояумен салынған шағын картиналарды, литографияларды, танымал шығармалардың көшірмелерін және акварельмен салынған нобайларды табуға болады. Олардың бағасы әдетте 30 еуродан аспайды.
