Маған БАӘ ұнаған жоқ. Неге екенін айтып берейін
Ұлпан Рамазанованың қыдырып жүргенге қиын, бірақ әсем Әмірліктер туралы әңгімесі.
Биыл көктемнің басында Aviasales.kz сайтынан БАӘ-ге өте арзан ұшақ билеттері барын байқап қалдым: бір бағытқа бар-жоғы 35 мың теңге шамасында тұрды. Бұл жаңалықты достарыма да, күйеуіме де жібердім — сөйтіп кешке қарай біз, отызға енді келген шаршаңқы бесеу, Әмірліктерге жол тартуға әзір топ болып құралдық.
БАӘ — мен барған оныншы ел. Былай болса екен дейтін ерекше үмітім болған жоқ, тек теңізге түссем ғой деп ойладым. Оның үстіне сапарымыз күйеуім екеуіміз үйленгенімізге бір жыл толған мерейтойға — 7 шілдеге тұспа-тұс келді.
Әуежайдан түскенде-ақ ішім қылп ете қалды. Алғаш көзіме түскені — көз қарықтырған сән-салтанат. Айналам түгел «шіріген байлардың аста-төк әлеміне қош келдің!» деп тұрғандай.
Бірден айта кетейін: бұған елдің кінәсі жоқ, өзімнің табиғатым сондай. Мен ысырапшылдықты ұнатпаймын, тарихи мәні бар дүниелерді, заттардың әсем пішінінен гөрі терең мазмұнын жоғары қоямын.
Ұнаған жері де бар енді
Ғажап қонақүй мен жағалау
БАӘ-дегі қонақүйлер расымен де сән-салтанатқа толы мұражайдарға ұқсайды. Біз Абу-Дабидегі Royal M Hotel by Gewan қонақүйінде (тәулігіне шамамен 200 доллар) және Дубайдағы Waldorf Astoria Dubai Palm Jumeirah қонақүйінде (250 доллардан бастап) тұрдық. Екеуі де — деңгейі жоғары әрі үй ішімен тып-тыныш демалғанға да, жұмыс бойынша сапарлап барғанға да лайық орындар.
Бізге тіпті Emirates Palace Mandarin Oriental қонақүйінің жеке жағажайына барудың сәті түсті. Ол мен көргендердің ішіндегі ең әдемі әрі ең қымбаты деуге болады. Онда біздің досымыз демалып жатқан, сондықтан кіріп көрдік. Қонақтарға жайлы болуы үшін арнайы әкелінген ақ құм, жұмсақ шезлонгтар мен адам айтса сенгісіз сервис бар: қызметкерлер көзілдірігіңізді сүртіп берейік дейді, ал модельге ұқсайтын даяшылар тегін мұздай су мен балмұздақ таратып жүреді. Бұл қонақүй әуелде шейхтің резиденциясы ретінде салынған деген әңгіме бекер айтылмаса керек.
Тағы ұнаған нәрселер
KFC ерекше дәмді. Біз қонақүйге жайғасқан сәтте-ақ Talabat жеткізу қосымшасы арқылы тапсырыс бердік (ол күні-түні жұмыс істейді). Ет пен картоп фриінің дәмі тіл үйіреді. Айтпақшы, курьермен байланысу үшін түсініктемеде мекенжайды нақты көрсеткен жөн, себебі БАӘ-де WhatsApp арқылы қоңырау шалу мүмкін емес.
Көлікпен жүрген ыңғайлы. БАӘ-де жаяу жүру мүмкін емес — күн шыжып тұрады. Сондықтан біз такси мен көлік жалдау қызметін пайдаландық. Такси бағасы шамамен әр шақырымға 2 дирхам (295 теңге) тұрады. Біз көбіне YanGo қолдандық, бірақ жергілікті сервистер де бар: Careem, Hala Taxi, ал Абу-Дабиде — Abu Dhabi Taxi. Көлік жалдау орта есеппен 200 мың теңгеге шықты. Екі қаладағы қозғалыс реттелген, жолдар ыңғайлы. Маңыздысы — жүргізуші куәлігіңіздің халықаралық мәртебесі бар екенін алдын ала тексеріңіз.
Айрықша заманауи сәулет. БАӘ-дегі ғимараттар жаңа әрі минималистік стилімен ерекше. Онда жүргенде Астанадағы кейбір архитектуралық шешімдерге не арқау болғанын түсінесіз — ұқсастық айқын көрінеді.
Ерекше есте қалған екі жер
Sea World Abu Dhabi
teamLab Phenomena Abu Dhabi
Sea World Abu Dhabi. Керемет аквариум, аумағы өте кең, теңіз жануары мен балықтың түр-түрі бар. Міндетті түрде барыңыздар.
teamLab Phenomena Abu Dhabi. Мультисенсорлы форматтағы заманауи өнер музейі. Ол — адамның барлық сезім мүшесі қуанышқа бөленетін нағыз сиқыр мен адам ойының ғажайып көрінісі.
Бұл көрікті орындар Саадият және Яс дейтін әр түрлі аралдарда орналасқан, бірақ билеттерді комбо-пакетпен алуға болады. Мысалы, Sea World пен teamLab мұражайына біріккен билет 480 дирхам (шамамен 71 мың теңге) тұрады. Оларды онлайн да, офлайн да сатып алуға мүмкіндік бар. Барарда таксимен жеткен дұрыс — бұл бағыттар туристерге жақсы таныс, жолдар мен автотұрақтар өте жайлы.
Ал енді кемшіліктерін айтайық
На пляже
В Лувре
Мечеть
Аптап ыстық
Біз саяхатқа ең сәтсіз уақыт — шілденің басын таңдаған екенбіз. Ол кезде ауа температурасы 38 градусқа жетті. Аса ауыр болды демеймін, бірақ теңіз суы қайнап тұрды. Әрине, шомылмай кетпедім, бірақ БАӘ-дегі теңіз сүйікті бес теңізімнің қатарына кірмейтінін айта кетейін.
Қарбалас
Маған уақыт жетпеді. Төрт күнде екі қала араладық — бұл, бәлкім, БАӘ үшін жеткілікті шығар, бірақ тым көп нысандарды жоспарға тықпалау қажет емес екен. Мен жылдам саяхат ырғағын ұнатпайтынымды түсіндім: мысалы, Луврда көбірек болғым келді. Бірақ қарбалас кестенің кесірінен Ferrari World мен Шейх Заид мешітіне барғандағы әсерім бәсең болды, ал аквапаркке барудан мүлде бас тарттым.
Қымбатшылық
Төрт күнде күйеуім екеуіміз тамақ, такси мен ұсақ-түйек заттарға деп бір миллион теңгенің басына су құйдық. Мысалы, қонақүйдегі ливандық мейрамханада бес адамға арналған кешкі ас 300 мың теңге болды, ал Ferrari World-тағы хот-дог пен кола 9 мың теңге тұрады екен.
БАӘ-де бағалар орта есеппен 2,5 есе қымбат екенін білуіңіз керек, сондықтан бюджетіңізді соған қарай жоспарлаңыз. Бірақ ірі сауда орталықтарындағы жеңілдіктердің арқасында бренд киімдері мен аяқ киімдерін Қазақстандағыдай бағамен табуға болады.
Қатты таңырқағаным — қазақстандықтардың көбі Дубай мен Абу-Дабиге көрші ауылға барғандай жиі ұшып барады. Сонша ақшаны қайдан алып жатырсыңдар, а?
Шопинг
Достарыма да, күйеуіме де жергілікті сауда орталықтары ұнады. Біз Yas Mall, Mall of the Emirates және Dubai Outlet Village орталықтарында болдық. Демалыс уақытымыздың шамамен 40 пайызын түрлі сауда-ойын-сауық орталығында өткіздік. Ал маған мұндай ұзақ шопинг бір азап: брендтерден онша хабарым жоқ, сауда жасағаннан шаршап кетем. Ал күйеуім — сникерхэд, яғни спорттық аяқкиімдердің ерекше үлгілерін жинағанды ұнатады, бірақ бұл жолы біз Nike-тен бір ғана шалбар мен «Birkenstock» аяқкиімін алдық.
Жансыз ел
Маған әр саяхатта ең маңыздысы — сол елдің шынайы келбетін тану. Ал Әмірліктерде — мейлі тып-тыныш Абу-Дабиде болсын, мейлі қарбалас Дубайда болсын — мен сол шынайы келбетін тани алмадым. Келбеті дейтінім — бірегейлігі, жергілікті тұрғындардың жылы жүзі, ел атмосферасындағы әуен мен табиғи бейнесі.
Мысалы, Арменияда таксистер бізге төл тәттілерін ұсынған. Таиланд пен Вьетнамда адамдардың мейірімділігі мен елгезектігіне тәнті болдым. Әр елде мен адамдармен жүздескен елеусіз сәттерден, олардың әңгімесінен естелік жинаймын. Ал БАӘ-де ондай тәжірибе бұйырған жоқ.
Тобықтай түйін
БАӘ — әсем, сән-салтанатты әрі қарқынды дамып жатқан ел. Бірақ мен басқа эстетиканы ұнататын адаммын. Достарыма бұл ел ұнады, ал маған күйзеліс пен қарбаласқа толы тәжірибе болды. Бәлкім, бірегей жерлерді таңдағанымда, қалаларды асықпай аралауға көбірек уақыт бөліп, қаржы шығынын алдын ала жоспарлап, өз әсеріме көбірек мән бергенімде бәрі басқаша болар ма еді.
БАӘ-ге комфортты, мінсіздікті, шопинг пен сән-салтанатты бағалайтындар барғаны дұрыс.
Ал мен Әмірліктерге енді тегін саяхаттап қана және teamLab мұражайында бір тәулік қалу үшін ғана барар едім.
