Астананы 0 теңгемен аралайық. Қайда барамыз? Не істейміз?
Астана тіршілігі танығысы келген адамдарға арнап, ең көрікті орындарды топтап қойдық.
Сәлем! Менің есімім — Базарбек. Астанада тұрып жатқаныма биыл 10 жыл болды. Сондықтан қаланы жақсы білетін астаналықпын деп айта аламын.
Астана қымбат қала деп ойлайтындар көп. Бірақ мұнда бір тиын жұмсамай-ақ керемет демалуға болады. Қаланы жақсырақ танығыңыз келсе немесе демалысты көңілді әрі үнемді өткізгіңіз келсе, осы тізімді сақтап алыңыз.
Серуендейтін жерлер
Нұржол желек жолы
Есіл өзенінің жағалауы
Ботаника бағы
Орталық саябақ
Нұржол желек жолы
Астанадағы негізгі ғимараттар осы жолдың бойында орналасқан. Күндіз мұнда жұмысына асыққан кеңсе қызметкерлерін, ал кешке алаңсыз қыдырып жүрген адамдарды көресіз. Ақордадан Ханшатырға дейінгі бұл желек жол — аз уақытта қала тіршілігімен танысқысы келетіндерге таптырмас орын.
Есіл өзенінің жағалауы
Бұл жер — нағыз классика. Жағалаудағы өмір әсіресе жазда қайнап жатады: жұрт серуендеп, велосипед теуіп, көше музыканттары ән салып, өзен бойы құжынап тұрады. Ал қыста мұз қатқан аппақ айдын әсерлі көрінеді. Сырғанақ теуіп, саф ауада сейіл құра аласыз.
Ботаника бағы
Сол жағалаудағы сүйікті демалыс орным. Мұнда жүгіруге, велосипед тебуге, пикникке шығуға не жай ғана Астананың сұлу аспанына қарап, көгалда алаңсыз демалуға болады. Бақтың ортасындағы жасанды көлшіктің жанында екі оранжерея бар. Тропик өсімдіктер мен суккуленттердің қалай өсетінін өз көзіңізбен көргіңіз келсе, мархабат. Бірақ онда кіру ақылы екенін ескертеміз. Ересектер билеті — 1200 теңге, балалар билеті 600 теңге тұрады.
Президент саябағы
Өте үлкен аумақты алып жатқан жап-жасыл саябақ. Алуан түрлі ағаш пен дала гүлін көресіз. Балаларды ойнататын ақылы әткеншектер де бар. Пирамиданың артындағы шолу алаңынан Есіл өзені мен сол жағалаудың заманауи ғимараттары сән-салтанатты көрінеді.
Орталық саябақ
Бұл саябақта бәрі бар: шағын көлшік, аттракциондар, фудкорт, шаңғы-роллер трассасы. Бірақ маған саябақтың ішкі бөлігіндегі тыныштық көбірек ұнайды. Мұнда көбі біле бермейтін Дендро саябақ та бар.
Бейбітшілік және келісім саябағы
Ататүрік саябағы
Кіші Талдыкөл көлі
Ататүрік саябағы
Қаладағы ең жайлы саябақ деп білемін. Мұнда Есіл өзеніне қарап отырып, шағын дәмханадан түрік шайын алып, жүрек жалғап алсаңыз болады. Ары-бері өткен қайықтар мен шулаған шағалаларға қарап, құдды бір Босфор жағасында жүргендей боласыз. Шаршасаңыз, гамакта тынығып алуға болады.
Бейбітшілік және келісім саябағы
Астанадағы ең жаңа саябақ. Саябақ ортасындағы күмбез астында алып емен ағашы бар. Ал күмбездің төрт кіреберісі дүниенің төрт бөлігін білдіреді. Қабырғадағы инсталляциялар, сарқырама түріндегі субұрқақ пен «Жұлдызды аспан» өткелі саябақты ерекше тартымды етеді.
Кіші Талдыкөл көлі
Кіші Талдыкөл көлі — Астананың қақ ортасындағы ерекше табиғи аймақ. Ғасырлар бұрын қалыптасқан көл алуан түрлі құстың мекеніне айналған. Мұнда аққу мен үйрек, кейде тіпті қызғылт қоқиқазды да көруге болады.
Көл жағасын аралағыңыз келсе, ыңғайлы аяқ киім киіп, құстарды жақыннан көруге дүрбі алғаныңыз жөн. SOS.Taldykol қоғамдық қоры кейде тегін жаяу экскурсиялар да ұйымдастырып тұрады.
Тегін кіруге болатын мұражайлар
Ұлттық музей
Қазақстандағы ең үлкен әрі ең негізгі музей. Мұражайды толық аралап шығу үшін жарты күн уақыт кетеді.
Ұлттық музейге кірген ақылы. Билет бағасы 700 теңгеден басталады. Бірақ әр айдың үшінші жексенбісінде Қазақстан азаматтары мұражайға тегін кіре алады. Яғни, биыл жыл соңына дейін 16 қараша және 21 желтоқсан күндері тегін кіруге болады.
Сондай-ақ, әдетте 18 мамыр — Халықаралық музей күні де кіру тегін және атаулы күнге орай «Музей түні», «Жұлдызды гид» сияқты түрлі шаралар ұйымдастырылады. Шетел азаматтары үшін музейге кіру билеті (Алтын залмен қосқанда) 2000 теңге тұрады.
Музей дүйсенбіден басқа күндері 10.00-ден 18.00-ге дейін жұмыс істейді. Бірақ касса 17.00-де жабылады. Сондықтан ертерек барған дұрыс.
Тұңғыш Президент музейі
Қазақстан Республикасының Тұңғыш Президенті музейі ерекше сәулет туындысы саналады. Ғимараттың авторы — атақты британ архитекторы сэр Норман Фостер.
Музей Қазақстанның тұңғыш президенті Нұрсұлтан Назарбаевтың өмірі мен қызметіне, тәуелсіздік жылдарындағы Қазақстан тарихына арналған.
Кіру тегін. Музей жұмыс күндері, дүйсенбі жұма аралығында сағат 10:00-ден 17:30-ға дейін ашық. 13:00-14:00 аралығында түскі үзіліс. Міндетті түрде кем дегенде бір күн бұрын +7 71 72 70-83-65 және +7702 258 66 08 нөмірлері арқылы алдын ала жазылу керек. Әйтпесе музейге кіре алмайсыз.
Он адамнан артық келушілер тобы жиналғанда қазақ, орыс, ағылшын тілдерінде тегін экскурсияға өтінім бере аласыз. Шағын топқа қазақ, орыс, ағылшын тілдерінде тегін аудиогид бар.
Президент орталығы
Тұңғыш Президент музейінің жанында Президент орталығы орналасқан. Музей экспозициясы президентке қатысты жәдігерлерден бөлек, Қазақстан тарихына қатысты экспонаттарды, ұлттық музыкалық аспаптарды да қамтиды. Орталықта сондай-ақ түрлі уақытша көрмелер де өткізіліп тұрады.
Кіру тегін. Музей дүйсенбі жабық болады. Басқа күндері 10:00-ден 17:30-ға дейін жұмыс істейді.
Ашық аспан астындағы ғарыш музейі
Ашық аспан астындағы ғарыш музейі
Әскери-тарихи музей
Әскери-тарихи музей
Ғарышқа қызықсаңыз, Тұран даңғылы бойындағы Ұлттық ғарыш орталығының аумағында ерекше (әрі тегін) музейге тартыңыз. Мұнда «Боран» ғарыш кемесі мен «Союз», «Зенит», «Протон» зымырандарының үлгілерін көруге болады.
Әскери-тарихи музей
Әскери-тарихи жәдігерлер қойылған мұражай. Төрт қабаттан тұратын музейден түрлі дәуірге тән қару-жарақты, киім үлгілерін тамашалай аласыз.
Музей биыл қыркүйектен бастап ақылы қызмет көрсету тәртібіне көшті. Бірақ билет бағасы қымбат емес, ересектерге бар болғаны 500 теңге, студенттерге 300 теңге, балалар мен зейнеткерлер 200 теңге төлеп кіреді.
Ал музей ауласындағы әскери техника экспозициясын тегін аралауға болады. Танк, ұшақ, зеңбіректерді жақыннан көріп, ерекше фотолар түсіре аласыз. Дүйсенбі жұмыс істемейді. Басқа күндері 10:00-ден 18:00-ге дейін. Бірақ касса 17:00-ге дейін жұмыс істейді. Әр айдың соңғы бейсенбісі де істемейтінін есте ұстаңыз.
Өнер сүйер қауымға
Forte Kulanshi Art Space
Заманауи өнерге қызығатын жандарға арналған арт кеңістік. Сурет экспозициялары жиі ауысып тұрады. Сондықтан әр барғанда жаңа өнерпаздардың туындыларымен танысып қайтуға болады. Кіру тегін. Күн сайын 10:00-20:00 аралығында жұмыс істейді.
Artumar галереясы
Қазақстандық және шетелдік суретшілердің туындылары қойылған галерея. Өзіңізге ұнаған еңбекті сатып алуға да болады. Картинаның түр-түрі бар: кенепке салынған ғажап картиналар да, тың формадағы мүсіндер де қойылған. Кіру тегін. Күн сайын 10:00-20:00 аралығында жұмыс істейді.
Діни орындар
Бас мешіт
Константин мен Елена шіркеуі
Константин мен Елена шіркеуі
Бас мешіт
Орталық Азиядағы ғана емес, әлемдегі ең үлкен мешіттердің бірі. Кіру тегін, бірақ дресс-код сақтау керек. Әйелдерге орамал тағып, ұзын көйлек киіп, ерлерге тізеден төмен түсіп тұратын шалбар киіп келген дұрыс. Дресс-код сақтамаған болсаңыз, мешітке кіреберісте жамылғы беріледі.
Діндар болмасаңыз да, сәулет туындысына тамсанып қайтыңыз. Ал Астананы биіктен көремін десеңіз, мұнаралардың біріне ақылы түрде көтерілуге болады. Билет бағасы — 2 000 теңге. Мешіт күн сайын таңғы 7:00-ден кешкі 21:00-ге дейін ашық тұрады.
Константин мен Елена шіркеуі
Көп адам біле бермейтін бұл шіркеу Астананың ең көне ғибадат үйлерінің бірі. Шіркеудің ерекшелігі — 1854 жылы толықтай ағаштан салынып, 1893 жылы қазіргі орнына көшірілген. Шіркеу әсем өрнектерімен, көгілдір шатырымен және рухани тыныштық сыйлайтын ерекше атмосферасымен көз тартады. Күнделікті таңғы 08:00-ден 19:00-ге дейін кіруге болады.
Спортпен шұғылдануға болатын орындар
Веложол
Триатлон саябағы
Триатлон саябағы
Бұл жерге келгенде қалада жүргеніңізді ұмытып кетесіз: кең жазық, жаяулар жүретін ұзын жолдар мен аққан судың әсем көрінісі басқа әлемге тартып әкеткендей болады. Мұнда әйгілі «Тақтар таласы» сериалының фанаттары үшін бірнеше тартымды инсталляция да бар.
«Арқар» көпірі
Сарайшық көшесінің бойындағы оң және сол жағалауды жалғап тұрған «Арқар» көпірінің астындағы кеңістікті ашық аспан астындағы спортзал деуге болады. Бұл жерде бірнеше баскетбол алаңы, уорк-аут жаттығу аймағы қарастырылған. Ыстық шай мен тіскебасар сатып алып, Есіл бойымен қыдырып қайтсаңыз да болады.
Қала сыртындағы веложол
Астана іргесіндегі «Жасыл белдеуді» қала ішіндегі шұрат дерсіз. Қосшы қаласына қарай жолда, «Қазанат» ипподромынан кейін велосүйер қауымның жұмақ жері бар. Веложолдың жалпы ұзындығы 25 километрден асады және Қарқаралы мен Қорғалжын тас жолдарын жалғап тұр. Ұзақ жүргісі келмейтіндерге айналма жол да қарастырылған. Жаз аяғында мұнда қарақат пен жиде теруге болады.
Тегін экскурсиялар
- Астананы жалғыз аралап, қала тарихымен, көрікті жерлерімен танысқыңыз келсе, izi.TRAVEL қосымшасын жүктеп алыңыз. Онда қаладағы маңызды орындар мен архитектуралық нысандар туралы қызық ақпаратты тыңдай аласыз. Қосымшада алты тілде аудиоэкскурсия бар. Бұл қосымша жаяу серуенді қызықты әрі пайдалы етеді, әрі гид қызметіне жүгінбей-ақ, қала атмосферасынан ләззат аласыз.
- Ескі Ақмоланың тарихын танытып жүрген Fading.TSE қауымдастығы тұрақты ақылы экскурсиялардан бөлек, free walking tours форматындағы қызық серуен де ұйымдастырып тұрады. Мұндай форматтағы экскурсия тегін болғанымен, гид еңбегін бағалап, өзіңіз қалаған соманы бере аласыз. Экскурсия кестесін Fading.TSE инстаграм парақшасынан бақылап отыруға болады.
Астана — заманауи сәулетімен ғана емес, әркімге қолжетімді тегін демалыс орындарымен де ерекше қала. Уақытыңызды тиімді өткізіп, жаңа әсерге бөлену үшін қомақты қаражат жұмсаудың қажеті жоқ. Бастысы — қаланы жаңа қырынан ашуға деген құлшыныс пен ыңғайлы аяқ киім болса болды!
