Өзі арзан, өзі маржан: қырғыздың Қарақол тау-шаңғы курорты
Қалай жетеді, қанша кетеді — бәрін айтып береміз.
Шымбұлақ пен Oi Qaragai-дың барлық трассасын жаттап алсаңыз, енді көрші елдегі Қарақол курортын көріп қайтыңыз. Онда тез жетесіз әрі бағасы да қолайлы. Қарақолда қай жерде және қанша теңгеге сырғанауға болатынын айтып берейік.
Бұл курорт қай жерде?
Қарақол Ыстықкөл облысында. Тянь-Шань тауларының бөктерінде орналасқан Қырғызстанның үлкен тау-шаңғы курорттарының бірі.
Қарақол қаласынан жеті шақырым жердегі бұл база теңіз деңгейінен 2 300 метр биікте тұр. Айналасы — қарағай орманы. Кеңес үкіметінің кезінде мұнда елдің олимпиада командасы жаттыққан. Кейін Қарақол курорты жөндеуден өтіп, жергілікті халық пен туристердің қыста демалатын жеріне айналды.
Мұнда сырғанау маусымы қарашаның аяғында басталып, сәуірдің ортасына дейін жалғасады. Күн райы жайлы, температура −5 градустан түспейді. Соған қарамастан курорт аумағында қалыңдығы 1,5–2,5 метрлік қар жатады. Сондықтан қысқы спортқа бұл жердің климаты жайлы.
Трассалар мен көтергіштер
Мұнда сырғанауға арналған 14 трасса бар, олардың жалпы ұзындығы 20 шақырымнан асады. Сноуборд не шаңғы тебуді үйреніп жүргендерге «жасыл» деңгейлі трассалары жасақталған: олардың ұзындығы 800 метрден басталады. Жақсы тебе алатындар — «көк» трассада, ал тәжірибелі шаңғышылар «қызыл» мен «қара» трассаларда сырғанайды. Ең ұзын трассаның ұзындығы 4,5 шақырымнан асады. Сырғанау деңгейіне қарай әркім өзіне ыңғайлы трассадан түсе алады.
Шаңғы мен сноубордты кәсіби деңгейде тебетіндерге фрирайд аймақтар бар. Яғни трассалардан тыс, жасақталмаған жерлерден орман не тың қардың үстімен түсуге болады. Жылдамдық пен экстримді сүйетіндерге, таулы жер бедерін кешіп түскенді жақсы көретіндерге ыңғайлы.
Екі орындық, үш орындық көтергіштер бар. Шаңғы не сноуборд тебуді енді-енді үйреніп жүргендер курорт аймағынан кәсіби нұсқаушы жалдап, сырғанаудың қыр-сырын меңгере алады.
Шаңғы-сноубордтан басқа шана, коньки, қар мотоциклі бар. Шанамен сырғанағанға қауіпсіз еңіс жасалған. Жалғыз жүріп те, топ болып та сырғанаған ыңғайлы. Ал коньки тебетін мұз айдыны кәсіби техникамен дайындалады. Коньки, шаңғы, сноуборд, арнайы киім мен басқа да керек-жарақ курорт аумағындағы бөлімшеде жалға беріледі.
Қарақолға қалай жетеміз?
Ұшақ
Жақында қырғызстандық Asman Airlines әуекомпаниясы Алматы-Қарақол бағытында жұма мен жексенбі күндері қатынайтын рейс ашты. Билет бағасы 37 900 теңгеден басталады. Рейс күні жақындаған сайын билет бағасы қымбаттай түседі. Ұшу уақыты — 50 минут.
Бұл рейс уақыты ыңғайсыз болса, Қарақолға Бішкек арқылы ұшақпен жете аласыз. Air Astana мен TezJet әуекомпаниялары 80 000 теңгеге апарады. Алматы-Бішкек арасы да, Бішкек-Қарақол арасы да ұшақпен 50 минуттық жер. Әттеген-айы, ауысып отыру уақыты ұзақ болуы мүмкін.
Көлік
Алматыдан Қарақолға дейін жол 400 шақырымдай жер, арасында топырақты нашар жол да бар. Кеген шекарасынан өту керек болады, сонда шамамен алты сағаттан аса жолда жүруіңіз мүмкін. Өзіңіз көлік айдағыңыз келмесе, такси жалдауға болады. Бір жаққа жеңіл көліктің толық салоны шамамен 120 000 теңгеден басталады.
Автобус
Биыл Алматыдағы «Сайран» автовокзалынан Алматы-Қарақол бағытында күнделікті автобус жүре бастады. Ол да шамамен алты сағатта Кеген арқылы Қарақолға апарып тастайды. Билеті 7 520 теңге тұрады.
Курорттағы баға қандай?
Басқа тау-шаңғы курорттары сияқты, мұнда да баға маусымға, апта күніне, уақыт пен мерекеге байланысты өзгеріп тұрады. Қарақолға бірінші рет келіп тұрсаңыз, алдымен арнайы ски-пасс картасын сатып алу қажет. Кейін оған ақша салып, балансын толтырып отыруға болады. Картаның құны — 1 750 теңге.
2025–2026 маусымына арналған ски-пасстар (теңге)
Билет түрі | Негізгі маусым (сейсенбі — бейсенбі) | Негізгі маусым (жұма — дүйсенбі) | Сұраныс жоғары маусым (31.12 – 11.01) |
|---|---|---|---|
Күндізгі (09:00–16:00) | 8 150 | 9 900 | 11 650 |
Балаларға (12 жасқа дейін) | 5 825 | 5 825 | 6 990 |
Таңғы (09:00–12:00) | — | 8 150 | 9 320 |
Түстен кейінгі (12:00–16:00) | — | 8 735 | 9 900 |
Экскурсиялық | 4 080 | 8 150 | 4 080 |
Түнгі сырғанау (18:30–22:00) | 5 825 | 8 735 | 6 990 |
Күндізгі (09:00–16:00)
Негізгі маусым (сейсенбі — бейсенбі)
8 150
Негізгі маусым (жұма — дүйсенбі)
9 900
(31.12 – 11.01)
11 650
Балаларға (12 жасқа дейін)
Негізгі маусым (сейсенбі — бейсенбі)
5 825
Негізгі маусым (жұма — дүйсенбі)
5 825
(31.12 – 11.01)
6 990
Таңғы (09:00–12:00)
Негізгі маусым (сейсенбі — бейсенбі)
—
Негізгі маусым (жұма — дүйсенбі)
8 150
(31.12 – 11.01)
9 320
Түстен кейінгі (12:00–16:00)
Негізгі маусым (сейсенбі — бейсенбі)
—
Негізгі маусым (жұма — дүйсенбі)
8 735
(31.12 – 11.01)
9 900
Экскурсиялық
Негізгі маусым (сейсенбі — бейсенбі)
4 080
Негізгі маусым (жұма — дүйсенбі)
8 150
(31.12 – 11.01)
4 080
Түнгі сырғанау (18:30–22:00)
Негізгі маусым (сейсенбі — бейсенбі)
5 825
Негізгі маусым (жұма — дүйсенбі)
8 735
(31.12 – 11.01)
6 990
Жабдықтарды жалға алу
Шаңғышылар мен сноубордшыларға арналған жиынтықтарды тікелей тау-шаңғы базасынан немесе Қарақол қаласынан жалға алуға болады. Жабдықтарды алу үшін жеке куәлік немесе төлқұжат қажет екенін ескеріңіз. Бір құжатқа тек бір жиынтық (және балаға бір жиынтық) беріледі. Курорттағы баға жабдықтың тозу деңгейіне (шыққан жылына) байланысты:
- 2013–2014 жылғы сноуборд не шаңғы — 4 080 теңге.
- 2017–2018 жылғы сноуборд не шаңғы — 5 240 теңге.
- Балалар жиынтығы — 2 330 теңге.
Қайда қонамыз?
Қарақолда үй-жай бойынша екі таңдау бар: бірі — курорттың өзінде үйшік не номер жалдау, екіншісі — курорттан жеті шақырым жердегі Қарақол қаласындағы қонақүйде тұру.
«Қарақол базасы»
Мекенжайы: Қарақол курорты, Қарақол көшесі, 1
Нөмір бағасы: адам басына 12 600 теңгеден басталады
Курорт ішінде базаның қонақүйі, люкс коттеджі мен «шале» үйшіктері бар. Жиһаздары мен бөлмелер дизайны ескілеу, бірақ курорттың ішінде болғаны – үлкен артықшылық. Қонақүйде номер жалдау 20 мың теңгеден, «шале» үйшіктер 69 900 теңгеден, коттедж 233 мың теңгеден басталады. Бұл бағаға көтергіштер мен шаңғы-сноуборд жалдау құны, тамақ кірмейді. Жаңа жылдық мерекелерге қарай жалдау құны қымбаттай береді. Сондықтан қаңтардың басында баруды жоспарласаңыз, ең қымбат кезеңге түсесіз.
«Каприз»
Мекенжайы: Қарақол курорты, Қарақол көшесі, 1а
Нөмір бағасы: адам басына 29 мың теңгеден басталады
Одан бөлек курорт аумағында «Каприз» қонақүйі жұмыс істейді. Номерлері 58 мың теңгеден басталады. Ақысына таңғы астар кіреді. Таңғы астар қонақүй мейрамханасында швед үстелі жүйесінде өтеді. Бөлек ақысына бильярды, спа мен бассейні бар. Тау-шаңғы мен керек-жарақты жалға беретін жеке бөлімшесі де жұмыс істейді. Сырғанауды үйрететін нұсқаушыларды да осы қонақүйден табасыз.
Hills Hotel
Мекенжайы: Қарақол қаласы, Масалиев көшесі, 6а
Нөмір бағасы: адам басына 26 мың теңгеден басталады
Қарақол қаласында, тау-шаңғы базасынан көлікпен 10–15 минуттық жерде Hills Hotel орналасқан. Бұл қонақүй интерьерінде тек табиғи материалдар, жұмсақ маталар, жылы түстер қолданады екен. Әр деталіне мән беріп, қонақтарын жылы атмосферасымен баурауға тырысады. Стандарттан люкске дейінгі номерлерінің дизайны бөлек. Бағасы 26 500 теңгеден басталады. Бұл бағаға таңғы ас кірмейді. Таңғы асы кіріктірілген бөлме жалдау 29 400 теңге. Одан бөлек сауна мен массаж, ал сыртында көлік тұрағы бар.
Matsunokı hotel
Мекенжайы: Қарақол қаласы, Қоенкозов көшесі, 44
Нөмір бағасы: адам басына 25 500 теңгеден басталады
Қонақтарына бір реттік аяқ киімнен гөрі киіз тәпішке, бір реттік шай пакетін емес, жапырақ шай ұсынатын Matsunoki hotel-дің вайбы ерекше. Себебі ол болашақ ұрпақтың мүмкіндіктеріне зиян келтірмей өмір сүру концепциясын ұстанады. Қоқыс сұрыптайды, фермерлік азық-түлік тұтынуға тырысады, бір реттік заттар қолданбайды. Мұндай тұрақты даму принциптерін жақсы көрсеңіз, Matsunoki hotel сіз үшін таптырмас жерге айналады. Бөлмелері орын санынан қарай бірнеше санатқа бөлінеді, бағасы 25 500 теңгеден басталады.
Green Yard
Мекенжайы: Қарақол қаласы, Иса Тайлақов көшесі, 14
Нөмір бағасы: адам басына 31 900 теңгеден басталады
Үйдегідей жылы атмосфера ұсынатын, ауласында бау-бақшасы бар кішігірім қонақүй. Терезелері кең, дизайны қарапайым, бірақ жылылыққа толы. Жазда үстелде үнемі бақшаның гүлі тұрады, қыста міндетті түрде майшамдар жағылады. Маусымда аулада жаңа піскен жидектер мен көкөністерден тамақ пісіріледі, ал суық күндері қонақүй иесінің өзі тұздаған қызанақ-қиярдың дәмін көре аласыз. Отынмен жағылатын фин моншасы мен ауласындағы самалжайда ошақтар бар. Жылы атмосфера вайбын іздегеннің сұрағаны.
Rıversıde
Мекенжайы: Қарақол қаласы, Шапақ Батыр көшесі, 170
Нөмір бағасы: адам басына 11 700 теңгеден басталады
Қаладағы Riverside отбасылық кішігірім қонақүй туристер арасында қолжетімділігімен танымал. Бөлмелері 11 000-18 000 теңге арасында. Таңғы ас тегін, кешкі ас 2 900 теңге тұрады. Жеке автотұрағы мен курортқа апаратын трансфері бар. Қонақүй ауласы жинақы, жанында көл бар, тауларды әдемі ракурстан көруге болады.
Қайда тамақтанамыз?
Қарақолда аш қалмайсыз. Мұнда кәуаптың түр-түрі мен балықтың ең тәттісін дайындайтын кафелер бар. Өзімізге жақын бешбармақ пен қырғызша шорпаның дәмін көрмей кеткен дұрыс болмас. Қарақолдағы танымал мейрамханаларды тізіп шығайық.
Komuz
Қырғыздардың ұлттық аспабымен аттас Komuz этно-кафесі жергілікті дәмнің түр-түрін ұсынады. Мұнда шорпа ішіп, қырғызша бешбармақ жеп, палаудан дәм тата аласыз. Мәзірде қырғыз асханасынан басқа Шығыс пен Еуропа тағамдары да бар. Барған қонақтар кәуабын мақтайды. Жанды дауыстағы музыка мен ұлттық аспаптың үні мейрамханада жиі ойнап тұрады.
Arzym
Ет пен кәуап іздесеңіз, Arzym мейрамханасына тартқан жөн. Әртүрлі асхананың тағамдары ұсынылады, бірақ кәуап — бұл жердің көзірі. Оңаша отырғысы келетіндерге тегін бөлме де бар. Ал ән айтып, би билегенді сүйетіндер лофт стиліндегі караоке бөлмелерін жалдай алады.
Archa
Заманауи интерьерді, би алаңын, тағамдардың түр-түрін осы — Archa мейрамханасынан табасыз. Өзгелерден бөлек отыратын кабиналары мен караоке-залдары бар. Керісінше, жұртпен қосылып билеймін десеңіз, ортақ би алаңына шығуға болады. Еуропа мен Шығыстың тағамдарын дайындайды. «Тағам — өнер» деген ұстанымы бар, сондықтан астың дәмінен бөлек, көркемдігіне де ерекше мән береді.
«Караколка»
«Караколка» — балық тағамдарын дайындайтын кафе. «Караколка» деп аталып кеткен өзеннің жанында тұр, терезеден ағысқа қарап отырып түстенуге болады. Бұл кафе аспаздары алабалықтың өзін түрлі-түрлі етіп дайындай алады: қуырып береді, пеште не мангалда пісіреді, стейк жасайды, паста мен оливьеге қосады. Балық тағамдарын сүйіп жейтіндер үшін «Караколка» — таптырмас жер. Айтпақшы, кафе ішінің дизайны көзге жағымды, винтаж картиналар мен бұйымдар ерекше сән беріп тұр.
Сонымен
Қарақол тау-шаңғы курортына көзіңіз түсіп, бірақ екіойлы болып отырсаңыз, бұл жердің артықшылығы мен кемшілігін тізіп шығайық.
Артықшылығы:
- Тянь-Шань тауларын көресіз;
- Температурасы қолайлы (көбіне -5 градустан түспейді);
- Шаңғы-сноубордты үйренуге болады;
- Шаңғы мен сноуборд тебуден тәжірибеңіз мол болса, фрирайдқа әдемі жер;
- Жол қысқа, бағасы қолайлы.
Кемшілігі:
- Күн райына, маусымға тәуелді;
- Көлік қатынасы тұрақты емес (автобустың өзі күн райына тәуелді);
- Қысқы спорттан басқа көңіл көтеру түрлері аз.
Суретті салған — Дада Кирей.
