Астанада коньки тебетін жерлердің топтамасы: сақтап алыңыз

Астанаға биыл көктем емес, қыс кеш келді. Әйтеуір конькиді сандықтан шығаратын (не жалға алатын) кез келді. Астанада Алматымен салыстырғанда тегін мұз айдыны көбірек. Әрі мұнда мұздың еріп кетуі де екіталай. Осы тізімді сақтап алыңыз да, өзіңізге ұнаған кез келген мұз айдынына барып қайтыңыз.

Жабық алаңдар 

Астананың ызғарына бәрі бірдей шыдай бермейді. Жел мен қарға алаңдамай коньки тепкісі келетіндер үшін қалада жабық, тексерілген бірнеше мұз айдыны бар. 

«Алау» мұз сарайы

• 

   
• 

   

Мекенжайы: Қабанбай батыр, 47. 
Билеттер: 16 жастан асқан ересектерге — 2 000 теңге, балаларға — 1 500 теңге; демалыс күндері 14:00-ден — ересектерге 2 500 теңге, балаларға — 1 800 теңге. Билеттерді кассадан не онлайн алуға болады. 
Коньки жалға алу: балаларға — 1 500 теңге, 13 жастан асқан ересектерге — 2 500 теңге.
Жұмыс тәртібі: сәрсенбі — жұма аралығында 19:00-ден 23:00-ге дейін, демалыс күндері — 11:30-дан 23:00-ге дейін істейді. 
Байланыс: +7 771 24- 67-48, @alauicepalace. 

Бұл — Астанадағы ең танымал мұз айдыны. Мұз тап-таза, кезекші құтқарушылар бақылап жүреді. Ішінде жүрек жалғап алғанға кофехана жұмыс істейді. Алаудың музыкалық вайбы да ерекше: мұнда Қайрат Нұртастың әндерінен бастап Бритни Спирске дейін қойылады. 

Mega Arena

• 

   
• 

   

Мекенжайы: Қабанбай батыр, 62, MEGA Silk Way.
Билеттер: 1 500 теңге.
Коньки жалға алу: 1 500 теңге.
Жұмыс тәртібі: күнде 10:30-дан 22:00-ге дейін істейді. 
Байланыс: +7 701 098-22-71, @megasilkway. 

Мұз айдыны MEGA Silk Way сауда-ойын-сауық орталығының ішінде. Көлемі ықшам әрі ыңғайлы. Мұнда көбіне балалар коньки тебеді, сондықтан ұшып сырғанай алмайсыз. Жаттықтырушыдан жеке не топпен бірге сабақ алуға болады.

Тарлан

Мекенжайы: Тұран даңғылы, 5/1.
Билеттер: тегін (үш адам ертіп кіруге болады).
Коньки жалға алу: тегін.
Жұмыс тәртібі: күнде 08:00-ден 22:00-ге дейін істейді.
Байланыс: +7 701 789-96-69, @paralympic_training_center. 

Бұл — мүгедектігі бар адамдарға арналған тегін мұз айдыны (коньки де тегін беріледі). Кірерде осы орталықтағы дәрігердің тексеруінен өтіп, рұқсатын аласыз. Бұдан соң кез келген уақытта көпшілікпен бірге тегін сырғанап, өзіңізбен бірге үш адамға дейін ертіп барсаңыз болады.

Тағы осы тақырыпта

Астананы 0 теңгемен аралайық. Қайда барамыз? Не істейміз?

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Ашық аспан астындағы алаңдар 

Астананың нағыз қысын көремін десеңіз, конькиді желмен жарысып жүріп, ашық алаңда тепкен дұрыс. Астанада мұндай мұз айдыны жетерлік. 

Орталық саябақ

Мекенжайы: Орталық саябақтағы Амфитеатр алдында, Тұран даңғылы, 2/6.
Билеттер: тегін.
Коньки жалға алу: 2 000 теңге.
Жұмыс тәртібі: күнде 11:00-ден 22:00-ге дейін істейді.
Байланыс: +7 717 248-27-30, @astanapark. 

Биыл Орталық саябақта көлемі 1200 шаршы метр болатын мұз айдыны ашылды. Оны қоршап тұрған ағаштарға қызылды-жасылды шамдар ілінген. Жанында тюбинг жалға алу пункті мен ып-ыстық сусындар ішетін кофеханалар бар. Ертегіге еніп кеткендей жүресіз!

Ататүрік саябағы

Мекенжайы: Тәшенов пен Амман көшелерінің қиылысы. 
Билеттер: тегін.
Коньки жалға алу: 1000 теңгеден басталады.
Жұмыс тәртібі: күнде 10:00-ден 23:00-ге дейін істейді.

Ататүрік саябағындағы астаналықтардың сүйікті мұз айдыны биыл хоккей аренасы форматында жасалды: мұнда коньки теуіп қана қоймай, ойын ойнауға да болады. Жанында шана мен тюбингіге арналған сырғанақтар да бар. 

Қала алаңы

Мекенжайы: Бейбітшілік көшесі, әкімшілік қасында. 
Билетер: тегін.
Коньки жалға алу: 1 500 теңге. 
Жұмыс тәртібі: күнде 10:00-ден 00:00-ге дейін істейді.

Оң жағалаудағы мұз айдыны. Астананың бұл бөлігіне біраздан бері келмеген болсаңыз, мына жер — жақсы себеп. Кейінгі жылдары бұл маң түбегейлі өзгерген. Жазда субұрқақ жұмыс істейді, ал қыста мұз айдыны мен сырғанақ бар.

«Жастар» сарайы 

• 

   
• 

   
• 

   

Мекенжайы: Республика даңғылы, 34.
Билеттер: тегін.
Коньки жалға алу: 1000 теңгеден басталады.  
Жұмыс тәртібі: күнде 11:00-ден 00:00 дейін істейді. 

Хоккей ойнағанды ұнататын балалар мен жасөспірімдер арасында танымал мұз айдыны. Әдетте Жаңа жыл қарсаңында ортаға әдемі шырша тігіледі. Ағаштағы шамдар жарқырап, алаңға жарық шашып тұрады. Мереке екенін сезбей жатсаңыз, дереу осында келіңіз.

«Ғашықтар» саябағы

Мекенжайы: Тұран даңғылы, 37, Хан Шатыр маңында.
Билеттер: тегін.
Коньки жалға алу: 1000 теңгеден басталады.  
Жұмыс тәртібі: барғанда нақтылап алу керек. 

Хан Шатырдың іргесіндегі саябақтан ашылған кең мұз айдыны. Алаңнан бөлек, мұнда Жаңа жылға орай жануарлардың мүсіндері де қойылған. Сондай-ақ арнайы жарықтандырылған фотоға түсетін жер де бар. 

Sana Sport жанындағы мұз айдыны 

Мекенжайы: Қажымұқан 5.
Билеттер: 500 теңге.
Коньки жалға алу: 1 500 теңге.
Жұмыс тәртібі: 11:00-ден 00:00-ге дейін істейді. 

Sana Sport орталығының жанында тұрған үлкен дөңгелек мұз айдыны. Мұз субұрқақ айналасында жатыр, ал төбеге ілінген шамдар романтикалық атмосфера сыйлайды. Сондықтан бұл жер — кездесуге шақырғанға тамаша орын. Айдын жанында сырғанақ та бар, балаларға тюбинг пен шанамен сырғанауға арналған құрал-жабдық жалға беріледі. 

Астанада коньки тебуге қанша ақша кетеді?  
 

Мұз айдынына барарда 

Мұзға шықпас бұрын осы тізімге бір көз жүгіртіңіз. Мұнда тұмауратып қалмас үшін не майып болып қалмас үшін көмектесетін барлық маңызды нәрсе жазылған.  

• Мұздың бетін тексеріңіз. Ашық айдындар жабық ареналарға қарағанда сирек тазаланады, сондықтан мұз бетінде жарықтар не қар жатуы мүмкін; 
• Шайбадан сақ болыңыз. Астанадағы тегін айдындарда хоккей ойнайтындар бар. Әсіресе енді коньки теуіп үйреніп жүрсеңіз, мұндай матчтардан алыс жүрген дұрыс;
• Қалың киініңіз. «Алау» сияқты жерлерде салқын болуы мүмкін. Ең дұрысы — жеңіл жейде үстінен худи не кеңжейде киіп алыңыз.