Алматыда коньки тебетін жерлер
Жып-жылы ғимараттағы, тау етегіндегі не old money стиліндегі мұз айдындары.
Алақай, Алматыға қалың қар жауып, коньки тебетін уақыт жетті! Әттеген-айы, сүйікті «Медеуіміз» жөнделетін болып, жабық тұр. Бірақ қалада коньки тебетін басқа мұз айдындары жетерлік. Таза ауада сырғанаймын дегендерге — ашық алаңдар, тоңғақпын дегендерге жып-жылы жерлер бар. Бәрін осы мақалаға топтап қойдық.
Жабық алаңдар
Күн райы бұзылып кетіп, коньки тебуіме кедергі болмай ма деп уайымдасаңыз, жабық мұз айдындарында алаңсыз сырғанауға болады.
Орталық стадиондағы мұз айдыны (Megaice)
Мекенжайы: Сәтпаев, 29/2.
Билеттер: 3 000 теңге.
Коньки жалға алу: 2 000 теңге.
Жұмыс тәртібі: демалыс күндері 20:00-ден 21:30-ға дейін істейді.
Байланыс: +7 778 273-28-89, @megaice_sport.
Орталық стадион аумағындағы шағын, бірақ өте жайлы мұз айдынында адам аз, ал мұзы үнемі таза тұрады. Ішіндегі дәмханада жүрек жалғап, жылынып алуға болады. Жұмыс күндері мұнда спортшылар жаттығады. Көпшілік коньки тебуге тек демалыс күндері кіре алады. Сеанс басталғанға дейін ертерек келген жөн. Кешігіп қалғандарды кіргізбеуі мүмкін.
Sunkar мұз айдыны (Megaice)
Мекенжайы: Қаппаров, 167/1.
Билеттер: 3 000 теңге.
Коньки жалға алу: 2 000 теңге.
Жұмыс тәртібі: демалыс күндері 20:00-ден 22:00-ге дейін істейді.
Байланыс: +7 706 727-61-51.
Мәнерлеп сырғанаушылар мен хоккейшілер жаттығатын шағын жабық мұз айдыны. Мұнда да жұмыс күндері тек спортшылар кіреді, ал демалыста көптің келуіне болады. Мұзы сапалы, қауіпсіздік ережелері қатаң сақталады.
Olimpic Arena
Мекенжайы: Абай, 44/3.
Билеттер: ересектерге — 2 500 теңге, студенттерге — 1 800, 14 жасқа дейінгі балаларға — 1200 теңге.
Коньки жалға алу: 14 жасқа дейінгі балаларға — 1200 теңге, ересектерге — 1 800 теңге.
Жұмыс тәртібі: жұмыс күндері 22:30-дан 00:00-ге дейін, демалыс күндері 13:00-ден 16:40-қа дейін істейді.
Байланыс: +7 700 111-08-50, @olimpic_arena.
Күндіз мұнда хоккейшілер жаттығады, ал кешкісін көпшілік коньки тепсе болады. Тебе алмайтын десеңіз, ақылы үйрететін нұсқаушы жүреді. 30 минуттық сабақ бағасы — 3 000 теңге. Алайда сеансқа үлгеру үшін ертерек барған дұрыс: билеттер онлайн сатылмайды, ал кассада билет шектеулі.
Ашық аспан астындағы алаңдар
Биыл (келер жылы да, арғы жылы да) «Медеу» жабық. Тарихи кешенді 2028 жылға дейін жаңартып, жөндемек. Бірақ қала ішінде де, тау бөктерінде де басқа ашық мұз айдындары бар.
Шымбұлақтағы мұз айдыны (Megaice)
Мекенжайы: Керей-Жәнібек хандар, 640А.
Билеттер: ересектерге — 3 000 теңге, 13 жасқа дейінгі балаларға — 2 000 теңге. 4 жасқа дейінгі балалар мен зейнеткерлерге — тегін.
Коньки жалға алу: 2 000 теңге.
Жұмыс тәртібі: жұмыс күндері 12:00-ден 22:00-ге дейін, демалыс күндері 10:00-ден 22:00-ге дейін істейді.
Байланыс: +7 706 727-51-61, @megaice_sport.
«Медеуі» уақытша жабылған Алматы әлемдегі ең биік мұз айдыны бар қала деген атақтан айырылғысы келмейтіндей. Биыл теңіз деңгейінен 2 260 метр биікте орналасқан жаңа мұз айдыны ашылды. Ол «Шымбұлақ» курортының төменгі станциясында, аспалы жолдың жанында орналасқан. Мұз айдынына аспалы жолмен, тоқпен жүретін таксимен (жай мәшинені кіргізбейді) не «Медеудің» алдындағы тұрақтан жүретін автобустармен жетуге болады.
Villa Ice Rink (Megaice)
Мекенжайы: Әл-Фараби, 140а.
Кіру бағасы: ересектерге — 3 000 теңге, 14 жасқа дейінгі балаларға — 2 000 теңге, 4 жасқа дейінгі балалар мен зейнеткерлерге — тегін.
Коньки жалға алу: 2000 теңге.
Жұмыс тәртібі: жұмыс күндері 12:00-ден 22:00 дейін, демалыс күндері 10:00-ден 22:30-ға дейін істейді.
Байланыс: +7 706 727-61-51, @megaice_sport.
Villa Boutiques & Restaurants аумағында орналасқан ашық аспан астындағы бұл мұз айдыны — қаладағы ең ғажап орындардың бірі. Мұнда тек коньки теуіп қана қоймай, Аяз атаға хат жазып, шырша бұтақтарынан жасалған гүлдесте сатып алып, аумақтағы кофеханалардың бірінен ыстық сусын алуға болады. Тебе алмайтындарға нұсқаушылар да бар.
Dostyk Plaza маңындағы мұз айдыны
Мекенжайы: Самал-2 ш.а, 111а.
Кіру бағасы: ересектерге — 3 000 теңге, 12 жасқа дейінгі балаларға — 2 000 теңге.
Коньки жалға алу: 2 000 теңге.
Жұмыс тәртібі: жұмыс күндері 10:00-ден 22:00 дейін, демалыс күндері 10:00-ден 00:30-ға дейін істейді.
Байланыс: +7 706 727-61-51, @dostykplaza.
Dostyk Plaza сауда орталығының ішкі ауласынан мұз айдыны ашылды. Дүкен аралауға келгенде коньки теуіп, артынша ыстық шай не кофе ішіп, сауда орталығындағы мейрамханалардың бірінде тамақтана кеткен ыңғайлы. Ұйымдастырушылар алда мұнда кәсіби мәнерлеп сырғанаушылардың шоуы да өтеді деп уәде еткен.
Alem Ice Park
Мекенжайы: Жүнісов, 340/42.
Билеттер: 1500 теңге (зейнеткерлер мен жүкті әйелдерге — 1000 теңге). Коньки жалға алу: 1 500 теңге.
Жұмыс уақыты: жұмыс күндері 11:00-ден 20:30-ға дейін, демалыс күндері 10:00-ден 21:30-ға дейін істейді.
Байланыс: +7 775 188-93-64, @alem.park.
Балаларға арналған Alem ойын-сауық паркінің аумағындағы бұл мұз айдыны — бүкіл үй ішімен келіп сырғанағанға тамаша жер. Коньки теуіп болғаннан кейін балалармен бірге әткеншек, батут пен сырғанағы бар ойын аумағына кіруге болады. Көпбалалы отбасына 30% жеңілдік бар. Оларға кіру құны — 1 050 теңге.
Бірінші мамыр тоғанындағы мұз айдыны
Мекенжайы: Бірінші мамыр өндірістік аймағы көш, 11Б.
Билеттер: ересектерге — 2 500 теңге, студенттерге — 2 000 теңге, балалар (16 жасқа дейін) мен зейнеткерлерге — 1 600 теңге. 5 жасқа дейінгі балаларға тегін.
Коньки жалға алу: 1 500 теңге.
Жұмыс уақыты: күнде 11:00-ден 22:00 дейін істейді.
Байланыс: +7 708 111-50-17, @pervomayskie_prudi.
Табиғат аясында коньки теуіп, артынша таудан баллонмен сырғанап түсіп, аяғында ошақ басында жылынып отырғыңыз келсе, Бірінші мамыр тоғанындағы мұз айдыны — таптырмас жер. Мұнда нұсқаушымен жаттығуға да болады. 30 минуттық сабақ бағасы — 3 500 теңге.
Haragun Ice Club
Мекенжайы: Садовый переулок, 205а.
Билеттер: жұмыс күндері: 12 жасқа дейінгі балаларға — 2000 теңге, ересектерге — 4000 теңге, демалыс күндері: балаларға — 3000 теңге, ересектерге — 6000 теңге.
Коньки жалға алу: балаларға — 2000 теңге, ересектерге — 3000 теңге.
Жұмыс уақыты: 10:00-ден 22:00-ге дейін істейді.
Байланыс: +7 777 858-59-59, @haragun_country_club.
Көктөбеге жақын ат клубының аумағындағы мұз айдыны. Кіру билеті біраз орыннан, тіпті Шымбұлақтағы коньки тебетін жерден де қымбат. Алайда сұлулығы соған татиды. Мұндағы мейрамхананың терезесінен тау мен жылқыларды тамашалап отырып, түскі ас іше аласыз. Адам аз жүреді және билет алуға кезекте тұрмайсыз. Онлайн сатып алуға болады.
Тегін мұз айдындары
Өз конькиіңіз болса және кіру ақысын төлегіңіз келмесе, тегін мұз айдындары да бар.
Almaty Ice Park, Тұңғыш президент қоры саябағы
Мекенжайы: Назарбаев, 44а/1.
Коньки жалға алу: ересектерге — 2500 теңге, студенттерге — 2000 теңге, балаларға — 1500 теңге.
Жұмыс уақыты: күнделікті 10:00-ден 23:00 дейін істейді.
Байланыс: +7 747 239-68-57, @iceparkalmaty.
Бұл жаңа алаңды Нью-Йорктің Орталық саябағындағы мұз айдынына ұқсатып жатыр. Айдын ашыла сала кеңінен танылып, кешкі уақытта және демалыс күндері адам көп жүретін болды. Өз конькиіңіз болса, кіру тегін, болмаса, осы жерден жалға алуға болады.
Осындай мұз айдындары 28 гвардияшы-панфиловшы атындағы саябақта, Республика сарайының жанында және Бірінші президент саябағында да ашылған (кіру тегін, жалға алу бағасы мен жұмыс уақыты бірдей). Ал алдағы күндері тағы жеті тегін мұз айдыны ашылмақ:
- Almaty Arena мен Halyk Arena аумағында;
- Наурызбай ауданы әкімшілігінің маңында;
- Сейфуллин атындағы саябақта;
- Kokjiek Garden саябағында;
- «Гүлдер» саябағында;
- ҚБТУ тұрағында.
Алматыда коньки тебуге қанша ақша кетеді?
| Мұз айдыны | Кіру бағасы | Жалға алу | Сырғанау уақыты | Мекенжайы |
|---|---|---|---|---|
| Орталық стадиондағы мұз айдыны | 3 000 теңге | 2 000 теңге | 1,5 сағат | Сәтпаев, 29/2 |
| Sunkar жабық мұз айдыны | 3 000 теңге | 2 000 теңге | 1,5 сағат | Қаппаров, 167/1 |
| Olimpic Arena | 1 200 — 2 500 теңге | 1 200 — 1 800 теңге | 1,5 сағат | Абай, 44/3 |
| Shymbulak Megaice | 2 000 — 3 000 теңге | 2 000 теңге | 1,5 сағат | Керей-Жәнібек хандар, 640А |
| VILLA ICE RINK | 2 000 — 3 000 теңге | 2 000 теңге | 1,5 сағат | Әл-Фараби, 140а |
| DOSTYK PLAZA | 2 000 — 3 000 теңге | 2 000 теңге | 2 сағат | Самал-2 ш.а, 111а |
| Alem Ice Park | 1 500 теңге | 1 500 теңге | 1,5 сағат | Жүнісов, 340/42 |
| Бірінші мамыр тоғаны | 1 600 — 2 500 теңге | 1 500 теңге | 2 сағат | Бірінші мамыр өндірістік аймағы, 11Б |
| Haragun Ice Club | 2 000 — 6 000 теңге | 2 000 — 3 000 теңге | 2 сағат | Садовый переулок, 205а |
| Тұңғыш Президент қорының саябағы | тегін | 1 500 — 2 500 теңге | 2 сағат | Назарбаев, 44а/1 |
| 28 гвардияшы-панфиловшы атындағы саябақ | тегін | 1 500 — 2 500 теңге | 2 сағат | Гоголь, 40в/2 |
| Республика сарайы | тегін | 1 500 — 2 500 теңге | 2 сағат | Достық, 56 |
| Тұңғыш президент атындағы саябақ | тегін | 1 500 — 2 500 теңге | 2 сағат | Навои/Әл-Фараби |
Мұз айдынына барарда
Коньки теппес бұрын бірнеше маңызды жайтты ескерген жөн.
- Ашық мұз айдынына бармас бұрын мұздың жағдайын алдын ала нақтылап алған дұрыс: қалада күн жылынып кеткенде, алаң жұмыс істеп тұр ма, мұз еріп кетпеді ме — соны сұрап алыңыз;
- Қарбалыс уақытынан тыс баруға тырысыңыз: кешкі уақытта және демалыс күндері алаңдарда адамдар көп жүреді;
- Қарапайым серуенге қарағанда қалыңырақ киініңіз, ал таудағы мұз айдынына барсаңыз, термокиім киген жөн;
- Коньки тебуді енді үйреніп жүрсеңіз, қоршаудан ұстап сырғанаудан не қызметкерлерден көмек сұраудан қысылмаңыз. Құлап қалсаңыз, негізгі жолдан тезірек шетке шығыңыз;
- Мұз айдынында сағат тіліне қарсы бағытта сырғанау керек — бұл қауіпсіз қозғалыстың негізгі ережелерінің бірі.
Суретті салған — Дада Кирей.
