Бакуде 250 мың теңгеге бір ай тұрдым. Қалай жетті?
Жаңа достар тауып, қалада көп серуендедім, «неформал» орындарды аралап, романтикаға толы шарап барларына бардым.
Бакуге алғаш былтыр қазанда барғанмын. Екі апта ішінде қаланың негізгі көрікті жерлерін аралап, оның сыртындағы жерлерді көріп үлгердім, тіпті әзербайжандық әріптесімнің тойында билеп те қайттым. Одан кейін Еуропаның алты қаласын небәрі 550 мың теңгеге аралап шықтым. Ол енді бөлек әңгіме.
Бакуде құрбым жұмыс істейді. Сол себепті бұл қалаға қайта оралғым келіп, бұл жолы ұзағырақ уақытқа баруды ұйғардым. Жаңа жыл қарсаңында екінші рет 38 күнге ұшып бардым — бұл жолы өзімді турист емес, жергілікті тұрғындай сезіндім.
Күн райы қалай болды?
Мен Бакуде желтоқсанның соңынан қаңтардың соңына дейін болдым. Күн көбіне нөлден жоғары, шамамен +8°C тұрды. Күн райы мінсіз емес, бірақ Астанадан кейін нағыз курорттай сезілді. Қарды бір-ақ рет көрдім, оның өзі бірден еріп кетті.
38 күнге заттарымды 7 келілік рюкзак, ноутбук пен ұсақ-түйекке арналған шоппер ғана алдым.
Қайтардк бірнеше нәрсені түсіндім: көйлек алғаным — қате шешім болған, ал кроссовкалар — ең керегі. Мен қысқы етікпен барған едім, бірақ оны кию мүмкін емес — тым ыстық, сондықтан мүлде кимедім. Сырт киімім қап-қысқа қысқы күрте болды — онда да жиі ыстықтап кетіп жаттым, тек басқа таңдауым болмады.
Қысқасы, Бакудегі қаңтар Астананың сәуірмен бірдей екен.
Билеттер
Астана–Баку–Астана бағытына билет маған 70 000 теңгеге түсті. Мұндай бағаны Aviasales.kz қосымшасындағы ыңғайлы функцияның арқасында ұстап алдым: рейсті «Таңдаулыларға» қосып қойдым, ал AZAL компаниясында жеңілдік пайда болған сәтте бірден хабарлама келді. Мұның қалай жұмыс істейтіні туралы олар телеграм-арнасында жазған.
Астанадан түнгі үште ұшып, таңғы беске жететін ыңғайсыз уақытқа қарамастан, AZAL-мен ұшқан ұнайды. Билетке 10 кг қол жүгі кіреді, оған қоса ноутбук сөмкесін де еш қиындықсыз өткізе береді. Ең жағымдысы — тегін тамақ та береді.
Тұрған жерім
Кешкі қала
Орталық парк
Үйге келгенде жолым болды. Бакуде тұратын құрбымның үйінде тегін тұрдым. Егер екі бөлмелі пәтер жалдасам, шамамен тағы 250 мың теңге кетер еді, яғни жалпы бюджет екі есеге өсер еді.
Қыста баратындарға маңызды ескерту: Бакуде орталық жылу жүйесі жақсы дамымаған. Көп пәтерде батареяның орнына электр жылытқыштар қолданылады — олар тек бір бөлмені жылытады және көп тоқ шығындайды. Сондықтан баспана таңдағанда осыны ескерген жөн.
Не істедік?
Мен жұмыс істемедім, ал құрбым ұзақ демалыста болды — бос уақытымыз жеткілікті еді. Күн сайынғы жоспар әртүрлі: кейде түске дейін ұйықтаймыз, кейде достарды шақырып, кино қараймыз. Бір күні қалада ұзақ серуендеп, көше мысықтарын тамақтандырып, кафелерге кіріп шығамыз, енді бір күні үйде шай ішіп отырып, кешкісін ғана сыртқа шығамыз.
Тегін демалыс
Kichin-де досыммен
Avara-да
Біз көбіне Бакудің «бейресми» жастары жиналатын орындарға баратынбыз. Мысалы, Avara секонд-хендінде кейде DJ-сеттер өтеді, Kichin — жергілікті адамдармен танысып, әңгімелесуге болатын жайлы бар, ал Chevre-де жақсы би кештері өтіп тұрады. Барлығына кіру тегін, сондықтан көбіне ештеңе алмай-ақ барып, билеп, араласып қайтатынмын.
Айта кету керек, жастардың көбі орысша білмейді, сондықтан көбіне ағылшынша сөйлестік, кейде тіпті аудармашыны пайдалануға тура келді.
Кейде қызық үшін модельдік немесе актерлік кастингтерге барып көрдік. Бірде букинист дүкеніне кіріп, иесімен үш сағат бойы әңгімелесіп отырғанымыз да бар.
Келесі жолы міндетті түрде Yarat заманауи мәдениет орталығына баруды жоспарлап жүрмін — онда тегін көрмелер көп өтеді екен.
Мәдени демалыс
Teatr O2 театрына бардық — қойылымдар орыс тілінде қойылады. Алматыдағы тәуелсіз шағын театрлардың атмосферасын еске салды: зал небәрі 30 адамға шақталған, көрермен қарапайым орындықта отырады, ал актерлер дәл қарсы алдыңда ойнайды. Өте әсерлі болды. Билет бағасы шамамен 25 манат (8 000 теңге).
Оған қоса құрбыммен ескі хаммамға бардық. Негізі бұл біздің қоғамдық моншаларға ұқсас: сауна, мұздай бассейн және қосымша массаж. Бірақ бастысы — процедурадан кейін асықпай шай ішу. Толық пакет (хаммам, скраб, шай, су) 30 AZN (шамамен 8 525 KZT).
Ұнаған жерлер
Бакудегі шарап барлары ерекше ұнады — тыныш, романтикалық атмосфера, асықпай отырып әңгімелесуге таптырмас орын. Ең ұнағаны — Kefli, бірақ Boho мен Double Eleven де өте жақсы.
Кофеханалардан Yuva-ны ерекше атап өтемін — баристалармен жақын араласып кеттік, кейде тек демалып отыру үшін баратынбыз. Ал Old School Cafe-де шай небәрі 25 AZN (шамамен 7 105 KZT), оған лимон, тосап пен печенье бірге беріледі.
Жалпы, Бакудегі орындар туралы ұзақ айтуға болады. Біз жаңа нәрсе табуға асық болдық, бірақ қауіпсіздікті де ұмытпадық: күмәнді ұсыныстардан әрдайым бас тарттық, әсіресе жаңа танысқан жігіттер қанша жерде әдепті боп көрінсе де, қала сыртында қыдырып қайту стяқты ұсыныстарға келіспедік.
Тамағы
Үйдегі кешкі ас
Кутабтар
Мен сыртта тамақтануға көп ақша жұмсамадым, көбіне өзіміз дайындадық. Астана мен Баку арасындағы азық-түлік бағасында аса бір айырмашылық байқамадым, бірақ супермаркетке бару бәрібір негізгі шығындардың бірі болды.
Тез әрі арзан тамақ керек болса, донер мен айран (3 AZN (шамамен 853 KZT)) жақсы көмектеседі. Ал біз қатты ұнатқан тағам — кутаб: жұқа қамырдан жасалып, ішіне ет, ірімшік немесе көк салынады (чебурекке ұқсайды, бірақ жеңілірек). Бағасы — 1 AZN (шамамен 284 KZT).
Ал кофеханаларда баға айырмашылығы айқын: ең қарапайым капучиноның өзі 7 AZN (шамамен 1 989 KZT)-тан басталады — Қазақстанда мұндай баға әдетте қымбат орындарға ғана тән.
Интернеті
Мен мобильді интернетті мүлде қолданбадым: SIM-карта да, eSIM да, роуминг те алмадым. Әзербайжанда өз SIM-картамды пайдалану мүмкін болмай шықты, ал бұл елге алғаш барғанда алған нөмірім жарамсыз боп қалған екен. Оның үстіне елде IMEI-кодтарды тіркеу ережелері бар, соның салдарынан қиындық туындады. Бір айға қымбат eSIM алғым келмегендіктен, 38 күнді мобильді интернетсіз жүрдім.
Пәтерде тұрақты Wi-Fi болды, ал қалада қажет болса, жақын маңдағы McDonald’s-қа кіретінмін — онда тегін интернет бар. Кафелер мен мейрамханаларда да Wi-Fi бар, ал кей жағдайда көшедегі сатушылардан немесе жергілікті достардан интернет бөлісе тұр деп сұрайтынмын.
Көлік
BakıKART
Қала ішінде метро, автобус және жаяу жүрдім, ал бұл жолы Бакуден тыс жерлерге шықпадым. Жолақы төлеу үшін BakıKART картасы керек — оны әуежайдан немесе метро станцияларынан 2 манатқа сатып алуға болады. Балансты сол жерде терминал арқылы толтырасыз. Автобус — 0,3–0,5 манат, метро — 0,6 манат. Сондай-ақ теміржол вокзалынан әуежайға дейін және кері қатынайтын экспресс-автобустар бар, жолақысы шамамен 1,3–1,5 манат.
Жалпы, Бакуде, әсіресе орталық бөлігінде, жаяу серуендеген өте жайлы. Қала желді, бірақ астананың күн райынан кейін бұл маған аса бір қиындық тудырмады — керісінше, үйреншікті жағдай сияқты. Жаяу жүру — қаланың сәулетін тамашалап, оның атмосферасын сезінудің ең жақсы жолы.
Маңызды ескерту
Әзербайжанда 15 күннен ұзақ боламын деп отырсаңыз (бұл Қазақстан азаматтарына да қатысты), онда міндетті түрде тұрақтаған жеріңіз бойынша тіркелуіңіз керек. Мұны мен сияқты соңғы сәтке қалдырмаған дұрыс.
Бұл қалай жұмыс істейді: елге келген сәттен бастап 15 күн ішінде кез келген хостелге немесе қонақүйге жүгініп, тіркеуді рәсімдеп беруді сұрауға болады.
Ал мен бұл мәселені ең соңғы күні ғана шешуге мәжбүр болдым. Жергілікті досымнан жеке куәлігін алып, онымен бірге жұмыс уақытының қызған шағында ASAN Xidmət-ке (жергілікті ХҚКО баламасы) бардым. Сол жерде мені небәрі бірнеше минуттың ішінде тіркеп берді. Есіңізде болсын: уақытында тіркелмесеңіз, елден шығар кезде 400 AZN (шамамен 113 673 KZT) манат айыппұл төлейсіз және келесі келгенде елге кірерде қиындық тууы мүмкін.
Жалпы есеп
Жалпы 38 күнде шамамен 250 000 теңге жұмсадым. Шығындар былай бөлінді:
- 70 000 — билет (бару-қайту)
- 56 000 — супермаркеттегі азық-түлік
- 33 000 — ойын-сауық (театр, хаммам, билеттер)
- 26 300 — сыртта тамақтану
- 20 000 — көлік (әуежайдан таксимен 6 000 теңге қоса алғанда)
- 16 000 — кофе
- 16 000 — жергілікті әшекейлер
- 9 000 — кәдесыйлар мен сыйлықтар
Барлығы: 246 300 теңге. Кейде достарым мені қонақ етті, кейде мен оларға әпердім, сондықтан нақты сома сәл ғана өзгеруі мүмкін.
Бұл сапар ұнады ма?
Сөзсіз ұнады! Баку классикалық туристік нысанға бай қала демес едім. Бірақ достарыңмен бірге тұрып, өмір сүргенге өте жайлы жер екеніне көзім жетті. Бұл сапар тегін баспанасыз қалай боларын айту қиын, сондықтан мұндай форматты бәріне бірдей ұсына алмаймын.
Бірақ тілдік кедергісіз жаңа мәдениетпен танысып, қысты жылырақ жерде өткізіп, түрлі дос тапқыңыз келсе — Баку таптырмас қала. Жеке өзіме бұл қала еркіндік пен жеңілдік сезімін сыйлады. Instagram-да маған әлі күнге дейін Aviasales Azerbaijan жарнамасы шығып тұрады. Бұл қаладан мен керемет достар таптым және онда ораларым сөзсіз.
