Қазақ даласынан Тибет тауларына дейін: әлемдегі үздік сегіз пойыз маршруты
Аспаннан жерге түсейік.
Заманауи пойыздар діттеген жеріңізге жылдам жеткізіп қана қоймай, сапарды өзінше бір саяхатқа айналдырып жібереді. Бірде қараңғы орманның қақ ортасымен өтетін, артынша биік таудың басына шығаратын ескі де жаңа пойыздар маршруттары — кәдімгі тревел-шоу. Бұл үрдістен Орталық Азия елдері де қалыс қалмай, теміржол арқылы турист тартуға тырысып жатыр. Біздің топтамадағы маршруттар пойыз арқылы саяхаттауға деген көзқарасыңызды түбегейлі өзгертеді.
Қазақстаннан Тәжікстанға: Jibek Joly (Алматы — Самарқанд — Душанбе — Ташкент — Алматы)
Бағасы: Ересектерге — 270 000 теңге, 15 жасқа дейінгі балаларға — 210 000 теңге.
Ерекшелігі: Тек Наурыз мейрамында қатынайды, биыл 21–26 наурызда жүрді.
Jibek Joly туристік пойызы — рельс үстіндегі қонақүй, мұнда қалалар арасындағы логистикаға бас ауыртып, шабадан жинап уақыт жоғалтпайсыз. Бір елде ұйықтап, басқа елде оянасыз. Көретін жер көп болуы үшін маршрутты үнемі жетілдіріліп отырады: биыл құрам Алматы — Самарқанд — Душанбе — Ташкентті басып жүріп өтіп, Алматыға қайта оралды. Әр қалада 1–2 тәулік аялдайсыз.
Тұрмыстық тұрғыдан бұл — саяхаттың ең жайлы нұсқаларының бірі. Турға жаңа вагондар қойылады, әр купеде жуынатын екі бұрыш, душ, кондиционер, қысқа толқынды пеш пен тоңазытқыш бар. Оның үстіне, бұл бағаға тек билет емес, түскі және кешкі астар, жергілікті гидтердің экскурсиясы, музей билеттері мен қонақүйдегі бір түн де кіреді. Мұндай бағыттағы трипке өз бетіңізше аттансаңыз, жол қымбатқа түсер еді.
Пойызда тұрған ыңғайлы болды: вагондар жайлы, тап-таза, жолсеріктер сыпайы, тамағы әр түрлі болды. Душанбеде бізді ыстық ықыласпен қарсы алды, әрбір сәт мұқият ойластырылған. Ел үшін маңызды көп орынды аралап, гидтерден мол мағлұмат алдық, жергілікті жұртпен тілдестік. Мерекелік кеш керемет ұйымдастырылған.
Мүмкіндік болса, онда тағы бір күнге қалар едік.Тек бір кемшілік болды. Ислам өркениеті орталығында өтеді деген экскурсия өтпей қалды. Орталықтың аумағына барғанымызбен, ішке кіретін билет алып бермеді, ал бұл Ташкенттегі ең қызық, бірегей орын еді. Бірақ жалпы алғанда сапарға көңіліміз толды.
Душанбеде биыл туристерді сән-салтанатпен қарсы алып, мерекелік дастарқан жайған, ал Ташкентте аңызға айналған палау беріп, Magic City саябағындағы керемет кеш өткізген. Самарқандта жолаушыларды әйгілі Регистанға ғана емес, әлі күнге дейін қолдан қағаз жасайтын «Конигил Мерос» фабрикасына да апарған.
Қазақстаннан Өзбекстанға: Keruen Express (Алматы — Түркістан — Самарқанд — Ташкент — Алматы)
Бағасы: Ересектерге — 250 000 теңге, 14 жасқа дейінгі балаларға — 210 000 теңге.
Ерекшелігі: Жылына төрт рет турға шығады.
Тағы бір ұқсас туристік маршрут — Keruen Express. Тек ол Тәжікстанға бармайды, бірақ жылына төрт рет — наурыз, мамыр, қыркүйек пен қазан айларында жүреді. Ендігі сапарға 26 қыркүйек пен 1 қазан аралығында шығуға болады. Билеттер алдын ала сатылып кететіндіктен, саяхатты қазірден бастап жоспарлаған жөн.
Бағдарламасы жоғарыда айтқан турға қатты ұқсайды: пойыз Алматыдан жолға шығып, Самарқанд пен Ташкентке соғады да, сапар сөресі — Алматыда аяқталады. Жібек жолының негізгі нүктелеріне бағытталған рельс үстіндегі қонақүй форматы мұнда да қайталанады, тек жүру кестесі икемдірек. Jibek Joly турынан айырмашылығы — бұл маршрутқа Түркістан кіреді: қалада толық бір күн болып, көне Отырар қалашығының үйінділеріне экскурсияға барасыз, зәулім Қожа Ахмет Ясауи кесенесі мен Қылует жерасты мешітін көресіз. Самарқандта екі күн болып, қонақүйде түнейсіз. Қалған қалаларға бір күннен бөлінген. Маршрут пен тур бағдарламасы өзгеріп тұруы мүмкін, кестені сайттан нақтылап алыңыз.
Қырғызстан бойынша: Бішкек — Балықшы
Бағасы: Ересектерге — 800 KGS (шамамен 4 421 KZT) (қолма-қол төлегенде 1 000 KGS (шамамен 5 527 KZT)), балаларға — 400 KGS (шамамен 2 211 KZT).
Ерекшелігі: Панорамалық вагонға отырғыңыз келсе, VIP белгісі бар билет сатып алыңыз. Пойыз жазда ғана жүреді.
Ыстықкөлге тар көлікпен, ыстық плацкартпен не автобуспен барып жүргендер көп. Енді көлге жайлы жетіп қана қоймай, жол-жөнекей Қырғызстанның таңғажайып табиғатын тамашалап баруға болады. Бішкек — Балықшы пойызының құрамына ұлттық нақышта безендірілген, панорамалық терезелері бар VIP-вагондар қосылды. 2026 жылдың мамырынан бастап олардың саны алтыға жетіп, орын брондау жеңілдей түсті.
Жолға бар-жоғы төрт сағат уақытыңыз кетеді, шаршап үлгермейсіз, бірақ Боом шатқалы мен оның қойнауындағы тау өзенінің көріністеріне көзіңіз тояды. Пойызда кондиционер жұмыс істеп тұр, зарядтауға арналған USB мен Type-C порттары бар. Әжетханалары да тап-таза. Пойыз ішінде буфет бар.
Қытайдан Непалға: Цинхай-Тибет теміржолы
Бағасы: 64 CNY (шамамен 4 562 KZT) (екінші класс) 225 CNY (шамамен 16 мың KZT) (бизнес-класс) дейін.
Ерекшелігі: Бұл маршрут біршама экстремал. Егер денсаулығыңызда ақау болса, дәрігермен кеңескен дұрыс.
Бұл теміржол ресми түрде әлемдегі ең биік таулы магистраль деп танылған. Жолдың бір шақырымы 4000 метрден астам биіктікте (мысалы, Шымбұлақтың ең биік нүктесі — 3200 метр) төселген, мұндай жерде ауа тар болғандықтан, қарапайым пойыздар арнайы жүйесіз жүре алмас еді. Сондықтан бұл жол нағыз жиһанкездер мен инженерлік туындыларға қызығатындарға арналған.
Осындай экстремал биіктікте өзіңізді жайлы сезінуіңіз үшін вагондар ұшақ принципімен жобаланған: олар толықтай герметикалық, ішке арнайы жүйе арқылы қосымша оттегі беріліп отырады. Халі нашарлаған адамға деп, әр орындықтың жанына оттегі маскалары бар ұяшықтар жасаған.
Терезеден көз тартар ғажайып пейзаждар — ұшы-қиыры жоқ таулы үстірттер, жабайы қодастар үйірі мен қар жамылған шыңдар көрінеді. Жайлы креслода ыстық шай ішіп отырып, Танг-Ла асуынан өту деген ғажап қой!
Жапония бойынша: Токио — Осака
Бағасы: Қарапайым вагонға билетті алдын ала брондау шамамен 15 мың JPY (шамамен 45 мың KZT) иена тұрады. Брондамай алсаңыз — 14 мың JPY (шамамен 43 мың KZT).
Ерекшелігі: Саяхатшылар Фудзи тауы ең жақсы көрінетін орындарды жылдар бойы зерттеп анықтаған, сондықтан мұндай орындар тез-ақ сатылып кетеді.
Жапонның жылдам жүретін «Синкансэн» пойызымен саяхаттау — кез келген турдағы негізгі пункттерінің бірі, себебі панорамалық терезесі бар пойыздан ашық күні Фудзи тауы ғажап көрінеді.
Мұнда сіз Токио мен Осака арасындағы 515 шақырымды бар-жоғы екі жарым сағатта жүріп өтесіз. Терезедегі көрініс үздіксіз өзгеріп отырады: бірде заманауи мегаполистер, бірде жап-жасыл күріш алқаптары, төбелер, енді бірде қалың орман мен кіп-кішкентай ауылдар көрінеді. Осылайша пойыздағы бір сапарда-ақ мың бояулы Жапония табиғатымен танысасыз.
Пойыздың жүру бағыты бойынша оң жақтағы терезе алдынан орын алуға тырысыңыз: тәжірибелі саяхатшылар жолдың 40-минутындағы көріністі жіберіп алмаңдар ескертеді, E орнын брондаңыз. Билетті алдын ала сатып алған жөн, себебі бұл орындарға талас күшті.
Оңтүстік Корея бойынша: Сеул — Пусан
Бағасы: Бір бағытқа билет құны — 54 USD (шамамен 26 мың KZT).
Ерекшелігі: Демалыс пен мереке күндеріне билеттер тура бір ай бұрын сатылымға шыға сала таусылып қалады, сондықтан алдын ала жоспарлаңыз.
Осы маршрутпен аттас хоррор фильмді көрген болсаңыз, уайымдамаңыз: қазіргі корей пойыздарында зомби жүрмейді. Салонынан бір қылшық таппайсыз! Сағатына 300 шақырымға дейінгі жылдамдықпен зулайтын пойыз футуристік Сеулден теңіз жағалауындағы Пусанға дейінгі шамамен 2,5 сағатта жеткізеді.
Бірінші класта сізге тегін жеңіл тіскебасар мен су береді, ал ондағы креслоларды қозғалыс бағытына қарай бұруға болады — бұл пойыз тербелісінен басы айналатындарға өте жайлы. Егер нағыз роуд-муви атмосферасын сезінгіңіз келсе, таңғы рейсті таңдаңыз: бұл кезде корей төбелерінен тұман көтеріліп жатқанын көресіз.
Вьетнам бойынша: «Жаңғыру экспресі» (Reunification Express)
Бағасы: Жатын вагондағы (купе) орын бағасы 50 USD (шамамен 24 мың KZT) басталады.
Ерекшелігі: Вагондар Ханойдағы әйгілі «пойыздар көшесінен» өтеді, пойыз бен үйлердің есік-терезесін санаулы сантиметр бөліп тұр.
Аңызға айналған бұл экспресс (ол Вьетнам соғысынан кейін елдің қайта бірігуінің символы саналады) Ханой мен Хошиминді байланыстырып, елді солтүстіктен оңтүстікке қарай толықтай кесіп өтеді. Бұл — 33 сағатқа созылатын, ұзындығы 1700 шақырымнан асатын маршрут. Әрине, бұл қашықтықты ұшақпен екі сағатта ұшып өтуге болады, бірақ онда жолдың ең көркем бөлігі — Хайван асуын көре алмайсыз. Мұнда пойыз бір жағынан жартастарға тақалып жүрсе, екінші жағынан көгілдір Оңтүстік Қытай теңізі мен джунгли ғажап көрінеді.
Сондай-ақ пойыз астанадағы әйгілі Train Street көшесімен өтеді — бұл құрам тура үйлердің ортасымен жүретін тар көше. Егер жол жиегінде тұрып күткіңіз келмесе, жақын маңдағы дәмханадан кофе алып, пойызды террасадан бақылауға кеңес береміз.
Шри-Ланка бойынша: Канди — Элла
Бағасы: Ересектер билетінің бағасы 10 USD (шамамен 4 833 KZT) (үшінші класс) басталып, 30 USD (шамамен 14 мың KZT) (бірінші класс) жетеді.
Ерекшелігі: Үшінші класқа шектеусіз мөлшерде билет сатыла береді, өйткені онда бекітілген орындар жоқ. Артық тұсы — пойызға кез келген жағдайда мінесіз, минусы — орынға таласуға (не жеті сағат бойы тікеңізден тік тұрып баруға) тура келеді.
Әлеуметтік желілердегі ғашықтардың жүріп бара жатқан пойыз есігінен сығалап, шексіз жасыл желек фонында сүйісіп бара жататын әлгі танымал кадрлар дәл осы жерде түсіріледі. Кандиден Эллаға дейінгі маршрут шамамен алты-жеті сағатты алады, бірақ құрам сағатына 40 шақырым жылдамдықпен сарқырамалар мен тұман басқан шай плантацияларының жанымен баяу жылжып отырғанда, бұл уақыт байқалмай өте шығады. Көпшілік бұл маршрутты әлемдегі ең әдемі жол деп атайды. Онысы әбден лайық баға: жол бойында тропикалық сарқырамаларды, джунглиді, күріш алқаптарын, шағын ауылдар мен мұнарлы жазықтарды көресіз. Нану-Оя мен Элла станцияларының арасы ең әдемі жол саналады: мұнда әр туннельден шыққан сайын алдыңғысына ұқсамайтын ерекше алқаптарды көресіз.
Айтпақшы, пойыз қызметкерлері суретке кәсіби фотографтардан кем түсірмейді. Олар пойыздағы ең әдемі ракурстарды жақсы біледі және туристерге қуана-қуана көмектеседі.
Бірінші класс деген, әрине, ең жайлысы ғой, бірақ біз екінші класты таңдауды ұсынамыз. Бірінші класта кондиционер қосылып, терезелер мен есіктер үнемі жабық тұрады, сондықтан нағыз драйвты сезініп, атмосфералық суреттерді тек тамбурда ғана түсіре аласыз. Ал үшінші класс билеті ақша үнемдегісі келетіндер мен сегіз сағат бойы тіп-тік тұрудан қорықпайтындарға қолайлы.
Маңызды: Пойыз қанша жерден баяу жүрсе де, есіктен сыртқа сығалап қараған, баспалдақта отырған бәрібір қауіпті. Жолда тар туннельдер, көпірлер мен жартас шоқылары кездеседі, сондықтан тұтқалардан ұстап жүріңіз, қауіпсіздік ережелерін сақтаңыз.
Швейцариядан Италияға: Кур — Тирано
Бағасы: Екінші кластың билеті — 62 CHF (шамамен 38 мың KZT), ал бірінші кластікі 113 CHF (шамамен 70 мың KZT) тұрады. Жолға шығамын ба, жоқ па деп, екі ойлы боп отырсаңыз, қайтару мүмкіндігі бар билет алған дұрыс, бірақ ол қымбатырақ болады (екінші және бірінші класс — 132 CHF (шамамен 81 мың KZT) және 226 CHF (шамамен 139 мың KZT)).
Ерекшелігі: Билеттерді кем дегенде екі ай бұрын сатып алу керек.
Италиядан Швейцарияға ұшақпен бір-ақ сағатта ұшып баруға болады. Бірақ онда сіз Альпі шалғындары, мұздық көлдері мен заңғар таулар көрінетін ең керемет төрт сағаттық саяхаттан мақұрым қаласыз. «Хәрри Поттерді» бұл жерде түсірмегенімен, өзіңізді нағыз «Хогвартс Экспресінде» отырғандай сезінетініңіз анық. Маршрут Швейцарияның ең көне қаласы Кур мен Италияның Тирано қаласын байланыстырады, жол бойында 196 көпір мен 55 туннель бар. Теміржол ЮНЕСКО-ның мұралар тізіміне енген: пойыз Оспицио Бернина станциясына қарай 2 253 метр биіктікке көтерілгенде, бұлттардың арасына кіріп кеткендей күй кешесіз. Төрт сағаттан астам уақыт ішінде терезе сыртындағы көрініс сұсты мұздықтардан басталып, Италияның пальмаларымен аяқталады.
Бұл пойыз өте жайлы: терезелері кең, орындықтары ыңғайлы, іші тап-таза және климат бақылауы жұмыс істеп тұр. Билеттерді алдын ала сатып алуға болады (солай етуіңіз керек те) — сатылым бір жыл бұрын басталады. Жаздағы туристік маусым кезінде және қысқы мерекелер уағында панорамалық терезе алдындағы орындар тез сатылып кетеді.
Суретті салған Дада Кирей.
