Ит-мысықты ұшақпен тасымалдаған қанша тұрады? Қандай құжаттар керек?

Ит-мысықпен жол жүру — сізге де, жануарға да үлкен стресс. Бірақ дайындықты ерте (кемінде бірер ай бұрын) бастасаңыз, әуе компаниясының талаптарын зерттеп, құжаттарды жинап, екпелерін салдырып, төрт аяқты досыңызды тасымалдау сөмкесіне үйретіп үлгересіз. Бұл мақалада демалысыңыз не көшіңіз жеңіл өтуі үшін жануарларды тасымалдау ережелерін түсіндіріп береміз.

Жануарларды ұшаққа мінгізуге бола ма?

Әуе компанияларының көбі Қазақстан ішінде ұшсаңыз — сегіз апталық, халықаралық рейстерге мінерде — үш айлық ит-мысықты бортына кіргізе береді. Үй жануары қасыңызда бола ма, багажға жіберіле ме — жануардың салмағына, өлшеміне және тұқымына байланысты. Бұған әуе компаниясының ішкі ережелері мен баратын еліңіздің заңдары да әсер етеді. Мысалы, мынадай ережелер бар:

• Брахицефалдар. Тұмсығы жалпақ иттер мен мысықтарды (мопс, бульдог, парсы мысығы) көп компаниялар тек салон ішінде тасымалдауға рұқсат береді. Бас сүйегінің құрылымына байланысты оларда тыныс алу қиындықтары болады, ал қысым өзгергенде бұл асқынып кетуі мүмкін.
• Қауіпті тұқымдар. Бультерьер, стаффордшир бультерьері мен мастиф сияқты иттерді кейбір тасымалдаушылар бортқа алмайды.

Мысықтар мен иттерден бөлек, салонда тасбақа мен ұлуларды тасымалдауға рұқсат беріледі. Ал құстар, балықтар мен кеміргіштер көбіне арнайы жүкқұжат арқылы жүк бөлімінде «арнайы жүк» ретінде тасымалданады. Әдетте бір жолаушыға екеуден артық үй жануарын алуға болмайды.

Жануарлар ұшақтың қай жерінде ұшады?

Ит-мысығыңыз кішкентай болса, олармен бірге салонда ұшуға болады, бірақ ерекше жағдайлар да кездеседі.

Ұшақ салонында

Мұнда тасымалдау сөмкесімен қосқандағы салмағы 8 келіден аспайтын жануарлар жіберіледі. Сөмкені алдыңыздағы орындықтың астына қою керек. Мұндай жағдайда тасымалдағыштың орташа өлшемі — 30×45×22 см болуға тиіс. Оған мысық немесе кішкентай ит еркін сыяды. Бұл параметрлер тарифіңізге байланысты өзгеруі мүмкін, сондықтан билет алар алдында сайттан ақпаратты тексеріп алыңыз.

Жүк бөлімінде

Жануардың салмағы 8 келіден асса, ол арнайы жабдықталған жүк бөлімінде ұшады. Мұнда тасымалдау контейнері тек қатты, берік пластиктен жасалған және темір есікті болуы шарт. Кейбір әуе компаниялары (мысалы, SCAT) жануарларды тек осылай тасымалдайды.

Жануарды тасымалдауға қандай құжаттар керек?

Құжаттар тізімі шекара асасыз ба, жоқ па — соған байланысты.

Қазақстан ішінде ұшу үшін:

Сізге ветеринарлық паспорт және мемлекеттік клиникадан алынған анықтама қажет. Паспортта мына мәліметтер болуға тиіс:

• Микрочип туралы деректер. Чиптеу барлық екпеден бұрын жасалуы керек.
• Құтыруға қарсы екпе. Ұшуға дейін кемінде 30 күн бұрын салынуы қажет.
• Паразиттерге қарсы өңдеу. Сапарға дейін 1–5 күн бұрын жасалады.

Шетелге ұшу үшін:

Паспорт, чип пен екпелерге қоса, № 1 анықтаманы әуежайда № 5а халықаралық сертификатына алмастыру керек. Бірақ ережелер елге байланысты өзгеруі мүмкін:

• Еуроодақ: Құтыруға қарсы антиденелерге тест  керек. Ол сапардан кемінде 3 ай бұрын жасалуы тиіс. Сондықтан мұндай сапарға 4 ай бұрын дайындала бастаған жөн (алдымен екпе, бір айдан соң тест, тағы 3 айдан соң жолға шығу).
• БӘӘ, Үндістан, Ұлыбритания, Ирландия: Әдетте жүк құжатын рәсімдеп, жүк терминалы арқылы тасымалдауды талап етеді.
• Аустралия, Сингапур мен Жаңа Зеландия: Әкелуге рұқсат қағазы (Import Permit) керек және жануарды 10–30 күндік карантинде ұстауы мүмкін. Оған өзіңіз төлейсіз.
• Мальдив аралдары, Бали: Итпен баруға болмайды. Мальдивте бұл діни нормалар мен аралдардың нәзік экожүйесіне байланысты болса, Балиде аймақты құтыру ауруынан таза ұстау мақсаты көзделген.

Сіз Aviasales.kz-тің желідегі парақтарына жазыласыз, ал біз сізге рақмет айтамыз. Ок па?

Telegram

Instagram

Ұшаққа қандай тасымалдау сөмкесі керек?

Таңдау жануардың қайда ұшатынына және әуе компаниясының талаптарына байланысты.

Әуе компаниясының талаптары

Контейнерлерге қойылатын жалпы талаптар: құрылымы берік, желдеткіші бар және түбі су өткізбейтін болуы керек. Жануар ішінде еркін тұрып, бұрылып жүріп, жата алуға тиіс. Егер ол жүк бөлімінде ұшса, ішіне су төгілмейтін ыдыс бекіту керек.

Жұмсақ немесе қатты тасымалдағыш

• 
• 

Салонға жұмсақ сөмке алуға болады (ол жеңіл әрі орындық астына қоюға ыңғайлы), бірақ ол жай спорттық сөмке емес, арнайы тасымалдағыш болуы шарт. Жүк бөлімі үшін — тек темір есігі бар, IATA сертификатталған қатты пластик контейнер керек. Құлыптың беріктігіне мән беріңіз, ұшу кезінде ашылып кетпеуі керек.

Өлшемдері

Салондағы сөмкенің өлшемі әдетте 40×30×20 см болуы керек, бірақ нақты деректі әуе компаниясының сайтынан қараңыз. Өлшемдер ұшу класына да байланысты болуы мүмкін. Мысалы, Air Astana-да эконом класта талап — 30×47×27 см, ал бизнес-класта — 40×26×20 см. 

Тағы бір маңызды сипаттама — сөмкенің салмағы. Ішіндегі жануармен бірге есептегенде, тасымалдау контейнерінің салмағы 8 келіден аспауға тиіс (кейбір әуе компаниялары он келіге дейін рұқсат береді).

Багажға жіберуге арналған контейнер ит-мысығыңыз ішінде еркін жүріп-тұратындай кең болуы керек. Габариттері бойынша стандартты шектеулер шамамен мынадай: 125 × 75 × 75 см.

Жануармен бірге билетті қалай сатып алуға болады?

1. Билет аларда әуе компаниясынан сіз ұшатын ұшақ моделінде жануар тасымалдауға бола ма, жоқ па деп сұрап алыңыз. Кейбір шағын ұшақтардың жүк бөлімі жылытылмайды, сондықтан үлкен итті тасымалдаудан бас тартуы мүмкін. Растау алған соң билет алып, жануар тасымалдау қызметін рәсімдеңіз.

2. Егер билетті алып қойған болсаңыз, дереу әуе компаниясына сайты, WhatsApp нөмірі не колл-орталығы арқылы хабарласыңыз. Бір рейсте тасымалдауға болатын жануар саны шектеулі екенін ұмытпаңыз.

3. Жануар үшін төлем әдетте тіркеу кезінде жасалады, сондықтан әуежайға кемінде 3 сағат бұрын келіңіз.

Жануарды тасымалдаған қанша тұрады?

Баға әуе компаниясына, жануардың салмағы мен бағытқа байланысты.

• Ішкі рейстерде: 5 000 – 25 000 теңге.
• Халықаралық рейстерде: 40–250 USD (шамамен 19–116 мың KZT) аралығында.

Мысалы, Air Astana-мен Алматыдан Астанаға мысық тасымалдау шамамен 12 950 теңге, ал үлкен ит — 15-20 мың теңге. Ал Лондонға ұшсаңыз, бұл бағалар тиісінше 51 мың және 61–82 мың теңгеге дейін өседі.

Әуе компанияларының ережесі

Зағиптарға көмектесетін нұсқаушы иттер мен қызметтік иттерді әуе компанияларының көбі тегін және салонда тасымалдауға рұқсат береді (тек тұмсыққап кигізіп қою керек). Қалған жағдайларда кестеде жазылған:

Саяхатшыларға кеңес

• Шетелге сапарды 3–4 ай бұрын жоспарлаңыз.
• Борттағы орындар шектеулі, сондықтан орынды алдын ала брондаңыз. Ұшуға 24 сағат қалғанда әуе компаниясына жануармен ұшатыныңызды тағы бір мәрте ескертіңіз.
• Жануармен онлайн тіркелу мүмкін емес, сондықтан ветеринарлық бақылаудан өту үшін әуежайға ерте келіңіз.
• Ұшу кезінде жануарды сөмкеден шығаруға болмайды. Мысығыңыз қанша мияуласа да, ұшақ қонғанша шыдай тұруы керек.

Осы тақырыпта басқа не бар?

Мынаны Ақтөс көрмесін: бұралқы иттер бақытты елдер