Жұрт биыл күзде қай елде демалмақ? Шолып шықтық
Спойлер: Түркияға билеттер арзандады, бірақ қазақстандықтар бәрібір Азияға ағылып жатыр.
Жаздың бітуіне санаулы күндер қалды, ал Жаңа жылға дейін әлі біраз уақыт бар. Мұндайда қайтеміз? Әрине, қашып кету керек! Қазақстандықтар биыл күзде қайда бет алды екен дегенді түсінбекке Aviasales.kz деректерін зерттедік. Көргеніміз – әдетке айналған бағыттардың орнын жаңалары басып, кей жерлерде жақсылап үнемдеуге де болады екен. Не білгенімізді толығырақ айтып берейік.
Жапония: тосыннан топжарған
Күзде Жапонияда жаздың қапырығы кетіп, күн райы +15–20°С болып тұрады. Бұл — ежелгі ғибадатханалар мен неонды көшелерде қыдырып, момидзи жапырақтарының қызыл-күрең түске боялғанын көретін таптырмас кезең.
Сірә, осы романтика теңіз жағалауындағы демалысты жеңген сияқты: Жапонияға сұраныс былтырмен салыстырғанда 412% артқан.
Бұл мыңдаған қазақстандық Токиоға ағыла бастады деген сөз емес, тек осы бағыттағы брондау үлесі төрт есе өскенін көрсетеді.
Неге күзде бару керек? 13 қазанға дейін үлгерсеңіз, Осакада өтетін Expo 2025 дүниежүзілік көрмесінің финалына қатыса аласыз. Онда ондаған елдің болашақ технологиясына арналған павильондарын көруге болады.
Түркия: ежелден таныс ескі дос
Күзгі Түркия – тәжірибелі саяхатшылардың сүйікті мекені. Адам қарасы азаятын, теңіз әлі жылы болып тұратын, қонақүй мен мейрамхана жаздан гөрі анағұрлым арзан болатын мезгіл. Стамбұл көшелерінде еркін серуендеуге немесе турист аз жағажайларда еркін демалуға болады. Міне, клишесіз, артық шығынсыз «барқыт маусым» деген осы шығар.
Соған қарамастан, туристер арасында Түркияның үстемдігі сәл әлсірегендей. Антальяға баратын билеттер 20 пайызға арзандағанымен, таласып-тармасып жатқан адам жоқ — брондау үлесі аздап төмендеген.
Неге күзде бару керек? 20 қыркүйек пен 23 қараша аралығында өтетін Стамбұлдың заманауи өнер биенналесіне қатысыңыз. Бұл кезде бүкіл қала тұтас бір галереяға айналады. Тек мешіт емес, ескі хамамдарға қойылған авангард инсталляцияларды да көріп, Стамбұлды жаңа қырынан танимын десеңіз, жолға жиналыңыз.
Әзербайжан: дем арада демалу
Бұл ел дереу маған жет деп тұрғандай: Бакуге баратын билеттер шамамен 20 пайызға арзандады, ал сұраныс 30 пайызға артқан. Әзербайжан саяхатшылардың must visit тізіміне нықтап орнықты. Мұның бір айғағы — авторымыздың былтырғы сапары: ол Бакуге алғаш барғаннан-ақ ғашық болып қайтқан.
Неге күзде бару керек? Күн райы тамаша: ыстық емес, бірақ күн ашық. Бір уикендтің өзінде біраз нәрсеге үлгеруге болады: Гейдар Әлиев орталығының сәулетіне тамсанып, ескі қаланың лабиринтінде адасып, пахлавамен бірге шай ішіп қайтасыз. Ал қазан айында өтетін Халықаралық джаз фестиваліне барсаңыз, саяхатыңызды әсем әуен сүйемелдеп тұрғандай күй кешесіз.
Грузия: сүйкімді ас, сусын мен сұлулық
Грузияға деген қызығушылық бәсеңдеген жоқ. Ал Тбилисиге билеттердің 25 пайызға арзандағаны саяхатқа жиналғандарға жақсы ілік болды. Тек тым көп күтпей барған жөн: біздің бір авторымыздың екіұдай әсермен қайтқаны бар.
Неге күзде бару керек? Күзде Грузияда Ртвели, яғни жүзім жинау мерекесі болады. Елдің түкпір-түкпірінде шарап фестивалі өтіп жатады. Кахетиядағы көптеген шарап зауыты туристерді жүзім жинауға, тіпті Челентано ойнаған фильмдегідей аяқпен таптап көруге шақырады. Оған қоса, Казбегидегі алтын түсті таулар мен Тбилисидің жайлы барларындағы кештер — саяхаттыңызды мінсіз етеді.
Өзбекстан: Жібек жолдың жәдігерлері
Күзде Өзбекстандағы аптап ыстық басылып, ежелгі қалаларды аралаған әбден жайлы болады. Самарқандтың ғажайып мозаикаларын тамашалап, Бұхара базарларында саудаласып, нағыз палаудан дәм татып қайтыңыз.
Неге күзде бару керек? 5 қыркүйек пен 20 қараша аралығында Бұхарада заманауи өнер биенналесі өтеді. Бұл — көне қалада серуендеуді заманауи өнер туындыларымен ұштастыруға таптырмас мүмкіндік. Биенналеге жол шығындары туралы біз мақала да жазғанбыз.
Қиыр Азия: Вьетнам, Оңтүстік Корея, Таиланд
Бұл өңірге қазақстандықтардың қызығушылығы барған сайын артып келеді. Ал күз — мұндай саяхатқа шыққанға тамаша кез.
Неге күзде бару керек?
- Вьетнам: 6 қазанда өтетін Күз ортасы мерекесіне (Тет Чунг Тху) қатысуға болады. Шамдар шеруі мен арыстан биін тамашалап, Халонг шығанағын аралау — ең керемет сәттердің бірі. Оның үстіне, Солтүстік Вьетнамда бұл кезде жаңбыр маусымы аяқталып, Халонг шығанағына жол ашылады.
- Оңтүстік Корея: Қыркүйекте Пусан қаласында Азиядағы ең ірі кинофестиваль — BIFF өтеді. Бүкіл елде ағаштар алтынға боялып, Сеулдің ажарын аша түседі.
- Таиланд: 5–6 қарашада Чиангмайда сиқырлы Лой Кратонг пен Йи Пенг аспан шамдары фестивалі өтеді. Мыңдаған шамның аспанға көтерілгенін көру ғажап емес пе?
Айтар ақылымыз
Статистикаға қарасақ, туристердің көбі билеттерді алдын ала сатып алатын болған. Бұл ақшаңызды үнемдеп қана қоймайды, ең ыңғайлы күн мен рейсті шертіп жүріп таңдап аласыз. Сондықтан шабаданды ойша жинап қойсаңыз, ертеңге қалдырмай, бүгін-ақ арзанға билет алып қойыңыз.
