Robbie Williams-ті қарсы алайық: Қазақстанға ғашық болу үшін Алматыда неден дәм татуға болады?
4–7 қыркүйек аралығында Алматыда Park Live Almaty фестивалі өтеді. Осы тұста бір сұрағымыз бар: сахнада өнер көрсететін әртістер қалай күш жинар екен?
Достарыңызға жіберу
Robbie Williams, Marilyn Manson және Park Live Almaty-ның басқа да хедлайнерлері сет-лист дайындап жатқанда, біз оларға арнап өзіміздің «дәмді» тізімімізді құрдық. Әрине, сіздер үшін де. Кез келген концерт алдында қуат сыйлайтын ұлттық тағамдардан жасалған плейлистімізбен таныс болыңыздар.
Үлпілдеп тұратын бауырсақ
Дәм татып көруге болатын жерлер: Navat мейрамханалар желісінде (порциясы — 1000–1200 теңге). Ал ерекше түрін жеп көргіңіз келсе Alma Cafe-ге барыңыз: мұнда картоп қосылған бауырсақты қаймақ және шортанның уылдырығымен ұсынады (4400 теңге).
Сыртынан қарасаң донат сияқты, бірақ ішінде ештеңе жоқ. Ыстық бауырсақтың иісі — балалық шаққа апаратын нағыз телепорт: табадан жаңа түскенін қолыңды күйдіріп жүріп ұрлап жеген сәттерді еске түсіреді. Бауырсақты кез келген уақытта, кез келген жерде, кез келген жағдайда жей беруге болады: негізгі астың алдында жеңіл тіскебасар ретінде де, шай және тосаппен десертке де жарайды.
Шетелдіктерді таңғалдыратын қазы
Дәм татып көруге болатын жерлер: кез келген қазақ тағамдары мейрамханасында, супермаркетте немесе базарда (орташа бағасы — бір келісі 7 000–9 000 теңге).
Жылқы етінен жасайтын ең танымал дәм — қазы. Шетелдіктерді ерекше таңғалдыратын тағам. Жылқы қабырғасынан алынған жұмсақ етті тұз, бұрыш және сарымсақ қосып дәмдеп, ішекке салады да, кем дегенде екі сағат қайнатады. Нәтижесінде тіл үйірердей жұмсақ тағам шығады — оның тіскебасар ретінде де жейді, бешбармаққа да қосады.
Қазыны бауырсақпен бірге жеп көріңіз — дәмін сөзбен айтып жеткізу мүмкін емес.
Қазыны бауырсақпен бірге жеп көріңіз — дәмін сөзбен айтып жеткізу мүмкін емес.
Кез келген дастарханның сәнін ашатын бешбармақ
Дәм татып көруге болатын жер: Jinau мейрамханасын ұсынамыз — мұнда қамыр мен еттің үйлесімі мінсіз (5000 теңге).
Дастарханның ажарын кіргізетін классика: жұқалап жайылған қамыр, қайнатылған ет (көбіне жылқы еті мен қазы), пияз және дәмді сорпа. Бешбармақ — қазақтың ең басты тағамы, онсыз ешбір үлкен жиын өтпейді десек артық емес. Тойларда бешбармақтың дастарханға әкелінуі — жас жұбайлардың шығуынан да қатты қол шапалаққа ие болатын нағыз көрініс.
Ал егер батысқа, Атырау не Ақтауға жолыңыз түссе, фишбармақты байқап көріңіз — ол да бешбармақ, бірақ қызыл балық қосып пісіреді. Дәмі ерекше, тіпті таңғаларлық.
Ал егер батысқа, Атырау не Ақтауға жолыңыз түссе, фишбармақты байқап көріңіз — ол да бешбармақ, бірақ қызыл балық қосып пісіреді. Дәмі ерекше, тіпті таңғаларлық.
Балықтан жасайтын көктал
Дәм татып көруге болатын жер: Auyl мейрамханасы, 7 300 теңге.
Гастро-райдердің тізіміне қосар тағы бір тағам — көктал. Бұл тағам үшін үлкен балықты (сазан не сазан тұқымдасы) көкөніс қосып, тұтасымен қақтап пісіреді. Нәтижесінде ерекше шырынды, әрі дәл сол «даладағы» түтіннің иісін сездіретін тағам шығады. Қызық дерек: «көктал» сөзі «жас тал» дегенді білдіреді, өйткені ертеде балықты талдың шыбығына қақтап пісірген екен.
Көшпенділер сүйіп жеген құрт
Сатып алуға болатын жер: кез келген супермаркет. Бағасы: бір қаптамасы 500–1000 теңге.
Қазақтар үшін құрт — италиялықтар үшін пармезан секілді. Бұл — күнге кептірілген, домалақ пішінді, тұзды әрі қышқыл сүттен жасалған тағам. Ғасырлар бойы құрт ұзақ жолға шыққан көшпенділердің жүгін жеңілдетіп, аштығын басқан: әрі тояды, әрі жылдар бойы бұзылмай сақталады. Бүгінде құртты спортшылардың сөмкесінен де табуға болады (ақуызы мен тұзы мол), сондай-ақ ол — сыйға тартуға да таптырмас дәм.
Бала кезден жақсы көретін жент
Сатып алуға болатын жерлер: кез келген супермаркет (бір қаптамасы ~3 000–6 000 теңге). Ал әдемі сыйлық қораптағы немесе түрлі дәмі бар жентті «Ұлт дәмінен» таба аласыз.
Бұл ұлттық тәтті — қуырылған тары, ерітілген май, қант пен балдан жасалады. Кейде жентке мейіз не жаңғақ қосады. Әр шаңырақтың өзіне тән әдісі бар, бірақ біздің ең сүйікті нұсқамыз — шоколадқа салынған жент.
Еттен жасалған қуырдақ
Дәм татып көруге болатын жер: Qaimaq мейрамханасында (5000–6000 теңге).
Атауы «қуыру» сөзінен шыққан. Қазанда қой немесе жылқы етінің бөліктері, сондай-ақ сүйек-қарын (бауыр, жүрек, өкпе) пен пияз қуырылады, көбіне картоп қосылады. Нәтижесінде құнарлы, қою әрі нағыз «етқұмарға» арналған, түтін иісі аңқыған тағам шығады. Бұл — етті сүйіп жейтіндерге арналған дәм.
Шөл қандыратын қымыз
Сатып алуға болатын жерлер: супермаркеттер немесе мейрамханалар (1 литрі — 2000–3000 теңге).
Қапырық концерттен кейін Роббиді сергіту үшін біз ұсынар дәм — қымыз. Қымыз — қышқылтым, сәл газдалған сусын. Оны бие сүтін ашытып, кейін ұзақ әрі мұқият араластырып, одан соң салқын, қараңғы жерде біраз уақыт тұндырып әзірлейді.
Нәтижесінде шөл қандыратын, бойды сергітетін, иммунитетті күшейтетін нағыз шипалы сусын шығады.
Нәтижесінде шөл қандыратын, бойды сергітетін, иммунитетті күшейтетін нағыз шипалы сусын шығады.
Қазақтың попкорнына айналған тары
Дәм татып көруге болатын жерлер: тарыдан жасалған чизкейк — Sandyq (шамамен 3000–4000 теңге), тары қосылған балмұздақ — Umami (бір домалағы 1450 теңге тұрады).
Қуырылған тары дәні. Дәмі попкорн мен жүгері үлпегіне ұқсайды, жеңіл жаңғақ реңкі бар. Тарыдан бәрін жасайды — балмұздақтан бастап чизкейкке дейін. Дәмді әрі тойымды.
Еліміздің символына айналған Kazakhstan шоколады
Сатып алуға болатын жерлер: кез келген супермаркет, «Рахат» фирмалық дүкендері немесе әуежайдағы Duty Free. Бағасы: бір плиткасы 800–1000 теңге тұрады.
Саяхатшылар толтырып алып кететін ашық көгілдір қаптамадағы дәл сол шоколад. Оларды түсінуге болады. Өйткені бұл — сүтті және ащы шоколадтың мінсіз үйлесімі (45% какао). Шоколадты 1942 жылдан бері алматылық «Рахат» фабрикасы шығарады. Егер фирмалық дүкеніне жолыңыз түссе, шоколадқа қоса қара өрік қосылған шоколад, жержаңғақты вафли мен шоколад кәмпиттерін де алып көріңіз.
