2026 жылы өтетін концерттер: бармасаңыз болмайтын он бір тур
Ариана Гранденің сахнаға оралуы, Оливия Диннің үлкен туры, Gorillaz-дың Алматыға келуі — мұның бәрі биыл келе жатқан қуаныш.
Сүйікті әртісіңіздің концерті — аяқ астынан демалысқа тартып кеткенге тамаша себеп. Сіз сапардан барынша керемет әсер алсын деп, биыл әлемнің әр бұрышында болатын әйгілі өнерпаздардың он бір концертін бір жерге топтастырып қойдық.
The Weeknd
Қайда өтеді: Ұлыбритания, Еуропа.
Жақын локациялар: Мюнхен, Амстердам, Варшава.
Қашан өтеді: қаңтар-қыркүйек.
Билет бағасы: 80 еуродан не 49 мың теңгеден басталады.
Эйбел Тесфайенің (әртістің шын есімі) 2022 жылы басталған After Hours Till Dawn турына әлі күнге дейін жұрт таласа билет алып, стадиондар лық толады. Бұл шоу әртістің үш бірдей альбомын — After Hours, Dawn FM және жаңа шыққан Hurry Up Tomorrow қамтиды. Бұл жай ғана концерт емес, музыка декорацияның бір бөлшегіне айналатын ауқымды нуар sci-fi фильмі іспетті.
Оның клиптеріндегі күрделі сюжеттерді түсінбесеңіз де, концерттегі көрініске көзіңіз тойып қайтады. Турда визуал эффектілер мен жарық шебер қолданылатыны сондай — Blinding Lights пен Starboy хиттерін тыңдағанда, өзіңізді ғарышқа алғаш ұшқандай сезінесіз. Миллиондаған доллар жұмсалған заманауи шоу қандай болатынын көргіңіз келсе, ойланбастан билет алыңыз.
Леди Гага
Қайда өтеді: Жапония, АҚШ.
Жақын локациялар: Токио, Нью-Йорк.
Қашан өтеді: қаңтар-сәуір.
Билет бағасы: 400 доллардан не 205 600 теңгеден басталады.
Былтыр құбыжықтар ханшайымы Mayhem атты жаңа альбомымен турне жасай бастады. Гага — қарама-қарсы дүниелерді қиыстырудың хас шебері. Оның бойынан өзге ғаламшарлық бейнелерді де, готикалық сарынды да, театрландырылған бейберетті де байқауға болады.
Оның Жапония мен Америкадағы туры жай концерт емес, режиссурасы мықты визуал аттракцион. Астындағы темір торға бишілер қамалған алып кринолин көйлегінің өзі неге тұрады! Ал бағдарламасы әдеттегідей: Mayhem альбомының жаңа туындылары мен бәріміз жатқа білетін әйгілі хиттер кезек-кезек шырқалады.
Эд Ширан
Қайда өтеді: Жаңа Зеландия, Аустралия, Колумбия, АҚШ, Канада.
Жақын локациялар: Лос-Анджелес, Сидней.
Қашан өтеді: қаңтар-қараша.
Билет бағасы: 75 доллардан не 39 мың теңгеден басталады.
Эд Ширанның концерттерінде стадиондағы шоу жарқ-жұрқ еткен отшашу мен жылтырақ образға емес, қарапайым жейде киіп, гитара ұстаған әртістің харизмасымен-ақ елді баурап алады. Былтыр Эд Mathematics Tour атты ауқымды турын аяқтай сала, Loop атты жаңа альбомын таныстырды да, қайтадан әлемді шарлай бастады.
Оның дискографиясының бай болғаны сонша — әндер тізімінен романтикалық кездесуге де, отбасылық саяхатқа да лайық әуен табылады. Әртістің жылдар бойғы жанкүйерлеріне де, балаларыңызға да бірдей жағатын саяхат бағытын іздесеңіз, осы турды ұсынамыз. Тек билеттерді алыпсатарлар талап кетпей тұрғанда, сатып алып үлгеріңіз.
Bad Bunny
Қайда өтеді: Аргентина, Бразилия, Аустралия, Жапония, Ұлыбритания, Еуропа.
Жақын локациялар: Варшава, Милан, Дюссельдорф.
Қашан өтеді: қаңтар-шілде.
Билет бағасы: 80 еуродан не 49 мың теңгеден басталады.
Бенито (Bad Bunny) әлемді жаулап жатыр: музыкант өзінің алтыншы альбомы — Debí Tirar Más Fotos жинағын жарыққа шығарып, 2026 жылғы әлемдік турнесіне дайын отыр. Осы онжылдықтың бас латинамерикалық әртісі өзінің супержұлдыз мәртебесін тағы да дәлелдеді: келер жылы Superbowl сахнасын дәл осы әртіс шайқамақ.
Bad Bunny-дің концерттері — бұл АҚШ-қа не Еуропаға арнайы ұшып баруға тұрарлық үлкен кеш. Егер реггетон жанрын заманауи классикаға айналдырған адамның өнерін өз көзіңізбен көргіңіз келсе, әртістің ресми сайтынан билет қарай беріңіз.
Florence and the Machine
Қайда өтеді: Ұлыбритания, Еуропа, АҚШ.
Жақын локациялар: Амстердам, Париж, Берлин.
Қашан өтеді: ақпан-тамыз.
Билет бағасы: 75 еуродан не 46 мың теңгеден басталады.
Флоренс Уэлч сахнаға Everybody Scream атты жаңа альбомымен оралып жатыр. Оның концерттерін жай өнерден гөрі бұл мистикалық рәсімге көбірек ұқсайды. Солистің ерекше дауысы мен театрландырылған қойылымы көрерменді тылсым әлемге тартып әкетеді.
Әртістің жанкүйері болмасаңыз да, оның дауысын сөзсіз естігенсіз. Dog Days Are Over, Shake It Out пен You’ve Got the Love сияқты туындылары «Өсекші қыз», «Галактика сақшылары» мен «Вампир күнделіктері» сияқты хит туындылардың атмосферасын жылдар бойы қалыптастырып келді. Florence and the Machine концертіне құлаққаппен тыңдағанда сезілмейтін нағыз катарсис күйін кешкісі келетіндер барғаны дұрыс.
Gorillaz
Қайда өтеді: АҚШ, Ұлыбритания, Еуропа, Түркия, Қазақстан.
Жақын локациялар: Алматы, Стамбұл.
Қашан өтеді: ақпан-тамыз.
Билет бағасы: 70 мың теңгеден басталады.
MTV клиптерін көріп өскендерге сүйінші: аңызға айналған Gorillaz Қазақстанға келмек! 2026 жылдың 22 тамызында Дэймон Албарн мен Джейми Хьюлеттің тобы Park Live Almaty фестивалінде өнер көрсетеді. Бұл — олардың елдегі алғашқы концерті. Бағдарламада әйгілі Feel Good Inc. қана емес, The Mountain жаңа альбомындағы тректер де шырқалмақ.
Gorillaz шоуы — шынайы өмір мен мультфильм тоғысқан өнер: алып экрандарда 2D-кейіпкерлер шайқап жатса, сахнада рок, хип-хоп және электроника үндеседі. Фестиваль 21-23 тамыз аралығында Бірінші мамыр тоғанында өтеді. Топ 2026 жылы Алматыдан бөлек Барселона, Париж бен Лондонды қамтитын Еуропа және АҚШ турнесін де жоспарлап отыр. Сондықтан оларды ел ішінде көре алмай қалсаңыз, шетелдік паспортыңызды жаңартуға тамаша себеп табылды дей беріңіз.
The Neighbourhood
Қайда өтеді: АҚШ, Еуропа, Ұлыбритания, Түркия, Жаңа Зеландия, Аустралия, Сингапур, Корея, Мексика.
Жақын локациялар: Стамбұл, Сеул, Прага.
Қашан өтеді: наурыз-қазан.
Билет бағасы: 60 еуродан не 36 мың теңгеден басталады.
Калифорниялық The Neighbourhood тобы ұзаққа созылған үнсіздіктен кейін (((((ultraSOUND))))) атты альбомын жарыққа шығарды. 2026 жылы топ әлемнің отыз қаласын аралап, өзінің тек он жыл бұрынғы Tumblr эстетикасымен шектелмейтінін дәлелдемек.
Әрине, басқа фанаттармен бірге Sweater Weather әнін айқайлап шырқап, бірер минутқа болса да, жасөспірім шағыңа оралу — бағдарлама сөзсіз болатын пункт. Алайда жаңа релизге қарасақ, бұл турда бізді ностальгия ғана емес, тың инди-дыбыстар да күтіп тұр. Олардың бұрынғы гастрольдік сапарларынан қалып қойған болсаңыз, мұның орнын толтыратын сәт туып тұр.
Оливия Дин
Қайда өтеді: Ұлыбритания, Еуропа, АҚШ, Аустралия, Жаңа Зеландия.
Жақын локациялар: Варшава, Амстердам, Милан.
Қашан: сәуір-қазан.
Билет бағасы: 100 еуро не 61 мың теңгеден басталады.
Оливия Диннің музыкасы — қарбалас пен шудан шаршағанға пана болатын өнер. Оның Art of Loving альбомы жаныңды жылытатын жұп-жұмсақ құшақ не өзіңді жақсы көрген маңызды екені жайлы сырлы әңгімедей естіледі. «Грэмми» үміткері әрі британдық нео-соулдың беткеұстары өзінің нәзік те сыршыл әлемін үлкен турға алып шықпақ.
Man I Need және So Easy to Fall in Love әндерін сүйіп тыңдайтын фанаттарға айтарымыз, қапы қалмаңыздар: мұндай концерттің билеті көзді ашып-жұмғанша таусылып қалады. Барлық мәліметті әншінің ресми сайтынан таба аласыздар.
Tame Impala
Қайда өтеді: Великобритания, Еуропа.
Жақын локациялар: Прага, Барселона, Берлин.
Қашан өтеді: апрель-май.
Билет бағасы: от 100 евро или 61 тысяча тенге.
2025 жылдың қазан айында Tame Impala бес жылға созылған үнсіздікті бұзып, Deadbeat атты бесінші студиялық альбомын жарыққа шығарды. Кевин Паркер бұл жолы Аустралияның орман рейвтерінен шабыт алған, ал диско-ырғақты Dracula трегі маусымның басты хитына айналып үлгерді. Тіпті жоба тарихында тұңғыш рет Billboard Hot 100 чартына енді.
Аңызға айналған The Less I Know the Better мен жаңа туындыларды жанды дауыста тыңдағысы келетіндерге бұл тур — таптырмас мүмкіндік. Паркер Еуропа мен Ұлыбритания бойынша 26 концерттен тұратын тур жариялады: гастрольдік сапар сәуірде Португалиядан басталып, Мадрид, Париж, Берлин мен Лондон қалалары арқылы өтеді. Tame Impala-ның шоуларындағы визуал ессіздік ұмытылмас эмоция сыйлайды, сондықтан көктемгі демалысқа асықпай қамдана беріңіз.
Metallica
Қайда өтеді: Еуропа, Ұлыбритания.
Жақын локациялар: Будапешт, Франкфурт, Берлин.
Қашан өтеді: май-июль.
Билет бағасы: от 400 евро 243 тысячи тенге.
Хэви-металдың майталмандары M72 әлемдік турын биыл да жалғастырмақ. Сіздің бұл топ туралы біліміңіз тек TikTok-тағы хиттермен немесе сериалдармен шектелсе де, Metallica-ның жанды концерті — өміріңізде бір рет болсын барып көргенге тұрарлық дүние. Мұнда музыканың ырғағы билетпей қоймайды, ал сахнадағы топтың қуаты мен қарқынына жиырма жастағылардың өзі қызғана қарайды.
Бұл турдың үлкен ерекшелігі — No Repeat Weekend тұжырымдамасы: топ әр қалада мүлдем басқа әндер тізімімен екі бөлек концерт береді. Жанкүйерлер өзін стадионда емес, шағын әрі жайлы клубта жүргендей сезінуі үшін, алаңның дәл ортасына ішінде «жылан іні» (Snake Pit) бар алып сақина тәріздес сахна орнатылады. Мұндай конструкция стадиондағы «нашар орын» деген ұғымды болдырмайды — топты кез келген нүктеден тамаша көруге, тыңдауға болады.
Ариана Гранде
Қайда өтеді: АҚШ, Канада, Ұлыбритания.
Жақын локация: Лондон.
Қашан өтеді: маусым-қыркүйек.
Билет бағасы: 400 доллардан не 206 мың теңгеден басталады.
Алты жыл үзілістен соң Ариана сахнаға оралмақ. Кейінгі жылдарын ол Бродвей мен сиқыр әлеміне арнап, үлкен арманы — «Wicked» фильміндегі мейірімді мыстан Глинданың рөлін сомдады. Бірақ Eternal Sunshine Tour-дың уақыты келіп жетті.
2024 жылдың наурызында шыққан альбомды қолдауға арналған бұл турне биыл жазда басталады. Қазіргі кестеде он шақты қала бар: гастроль маусым айында Окленд пен Лос-Анджелестен басталып, Нью-Йорк пен Монреальда өтеді, ал тамызда Ариана Лондондағы O2 Arena сахнасында бірнеше концерт береді. Әншінің ресми сайтындағы жаңалықтарды бақылап отырыңыз. Еуропа қалаларында да концерт беруі әбден мүмкін.
Қай билетті бірінші алған дұрыс?
Саяхаттағы негізгі мақсатыңыз нақты бір концертке бару болса, алдымен соған билет сатып алып, содан кейін ғана бағытты жоспарлап, ұшаққа билет алған абзал. Концертке бару — зор естелік қана емес, көп күш кететін шытырман. Сондықтан барлық жоспарды соған орай құрған дұрыс. Концерттік сапарды қалай ұйымдастыру керегі туралы бұдан бұрын жазған материалымыздан оқып шықсаңыз болады.
