Шоудан қалмайтын Zeé: блогердің концерт туризмі бойынша ақыл-кеңесі
Калифорния шөлінен Барселонадағы квир-клубтарға дейінгі жолда түйгенім.
Мен ақша тауып үйреніп алған бала сияқтымын. Кішкентайымнан көрсем деп армандаған әртістердің концерттері үшін әлемнің түкпір-түкпіріне ұшып жүремін. Бәрі 2013 жылы, 18 жасымда 30 Seconds to Mars концертіне барғаннан басталды. Кейін ұзақ уақыт мұндай сапарларға қаржылай мүмкіндігім болмады. Ал ақша таба бастаған соң тоқтай алмадым: Барселонада Beyoncé-нің, Чикагодағы Lauryn Hill-дің шоуына бардым, Doja Cat пен Lana Del Rey қатысқан аңызға айналған Coachella-2024 фестивалін көрдім. Ол жерде маған тіпті artist pass беріліп, әртістерге арналған жабық аймақтарда жүрдім. Кейін Нью-Йорктегі Charli XCX пен Troye Sivan-ның бірлескен туры, Париждегі Beyoncé, Madison Square Garden аренасындағы Lady Gaga концерті болды. Ал KeshYou концертін үйімнен екі квартал жерден көрдім.
Demalys-тың өтінішімен концерт сапары барынша жақсы өткізуге көмектесетін бірер ақыл-кеңес айтып берейін. Кеттік!
- №1 ереже. Концерт өтетін орынды мұқият таңдап, әртісті зерттеймін
- №2 ереже. Ерекше жақсы көрмейтін әртістің концертіне бармаймын
- №3 ереже. Билетті тек ресми сайттан аламын
- №4 ереже.
- №5 ереже. Концертке арнайы образ дайындаймын
- №6 ереже.
- №7 ереже. Концертке күшімді сақтаймын
- №8 ереже. Концерттен бөлек те демалуға тырысамын
- Айтпақшы, концертке жалғыз барғаннан қорықпаңыз
№1 ереже. Концерт өтетін орынды мұқият таңдап, әртісті зерттеймін
Концерт туризмі — өте қымбат хобби. Неге екенін білмеймін, бірақ көбіне бәрінің қалтасы көтере бермейтін елдерді таңдаймын. Оның үстіне, логистика жағынан да ондай бағыттар әрдайым қолайлы емес.
Бірақ маған басқа нәрсе маңыздырақ. Мысалы, Beyoncé концертіне дәл Парижге ұшуды таңдадым. Өйткені бұл — оның ең жақсы көретін қалаларының бірі. Тіпті тұңғыш қызы Blue Ivy де дәл сол қалада дүниеге келуіне себеп болған. Парижде ерекше шоу болатынын ішім сезді. Түйсігім алдамапты! Дәл осы концертте сахнаға күтпеген жерден Miley Cyrus шықты.
Lady Gaga-мен де дәл осындай жағдай болды. Ол Нью-Йорктің тумасы, ал бұл концерт оның турындағы соңғы шоу еді. Сондықтан ондағы атмосфера ерекше болатынын сездім. Шынында да сол күні Madison Square Garden-де болғандардың бәрі бұл оның ең үздік концерті болды деп айтты. Атмосфера ғажап, көрермен әр әнді қосылып шырқады.
Ал Charli XCX пен Troye Sivan-ның бірлескен турын алайық. Бұл поп пен рейв элементтері аралас атақты концерт болды. Әдетте әртістер Нью-Йорк сияқты қалалардағы концерттерге ерекше мән береді. Әсіресе мансабындағы маңызды кезеңде. Ол кезде Charli XCX жаңа ғана Brat альбомынан кейін әлемдік поп-жұлдызға айналып келе жатқан, ал Troye Sivan да сәтті альбом шығарған еді.
Нью-Йорк — ең беделді музыка сыншылары, сән әлемінің өкілдері мен тренд қалыптастыратын адамдар жиналатын қала. Сондықтан Madison Square Garden немесе Лос-Анджелестегі SoFi Stadium сияқты ареналарда әртістер бар күшін салады.
№2 ереже. Ерекше жақсы көрмейтін әртістің концертіне бармаймын
Әйтпесе көңіліңіз толмай шығады.
2023 жылы Renaissance World Tour кезінде Beyoncé концертіне көп адам барды. Бірақ біразына ұнамаған екен. Себебі әндерінің жартысын да білмейтін болып шықты. Сонда не үшін бардыңыз? Қазір сән болғаны үшін ғана бес-алты ескі хитін білетін адамдардың концертке ұмтылғанын түсінбеймін.
Биыл жазда Doja Cat концертіне бармақ болып, билет те алып қойған едім. Өкінішке қарай, жолым түспеді. Бірақ мен оның соңғы альбомын толық тыңдап шықтым, TikTok-тағы концерт видеоларын көрдім. Яғни мені не күтіп тұрғанын жақсы білдім.
Қазір көп адам Kanye West концерттеріне барып жүр. Бірақ олардың жаңа альбомынан бір ән болса да тыңдады ма? Әрине, жоқ. Кейін концерттен шығып алып, көңілім қалды деп айтып жүреді. Осындай қымбат сапардан шын ләззат алу үшін сол әртістің музыкасын, шығармашылығын және мәдениетін жақсы білу керек. Сонда ғана жұмсаған ақшаңыз ақталады.
№3 ереже. Билетті тек ресми сайттан аламын
Егер америкалық әлемдік жұлдыздың концертін АҚШ-та немесе Еуропада көруге таңдау болса, мен әрқашан Еуропаны таңдаймын. Өйткені мұнда билеттер әлдеқайда арзан. Мысалы, Beyoncé концертіне Еуропада ресми қайта сатылым арқылы билетім 400 еуроға түсті. Ал Нью-Йоркте дәл сол концерттің билет бағасы сатылым басталған кезде-ақ шамамен 900 доллар болды.
Барселонадағы VIP билет мың еуродан сәл ғана асты. Ал дәл сол турдың АҚШ-тағы VIP билеті 2 мың доллар тұрды. Бұл өмірімдегі ең қымбат сатып алған билет болды. Бірақ оған мүлде өкінбеймін. Билетті мен әрдайым тек Ticketmaster арқылы аламын. Егер қайта сатылған билет алсам да, сол сайттан ғана сатып аламын. Өйткені онда тексерілген сатушылар бар және алаяқтарға тап болу қаупі жоқ.
Әлемдегі ең танымал әртістердің көбі дәл осы платформамен жұмыс істейді. Сондықтан Viagogo сияқты басқа сайттарды іздеудің аса қажеті жоқ.
№4 ереже. Қонақүйді концерт өтетін арена маңынан таңдаймын
2021 жылы BLACKPINK концертіне Абу-Дабиге ұштық. Бірақ неге екені белгісіз, қонақүйді Дубайдан брондадық. Бұл менің Біріккен Араб Әмірліктеріне алғаш баруым еді. Ол жаққа бұрын қызықпағанмын, сондықтан арақашықтықтың қаншалықты үлкен екенін де елестетпеппін.
Сөйтсек, бір қаладан екіншісіне бір сағаттан астам жол жүру керек екен. Қажетті уақытта эмираттардың арасында қоғамдық көлік жүрмейді, ал стадион маңындағы жолдардың бәрі жабылып қалған. Соның кесірінен таксиге қыруар ақша жұмсадық.
Содан бері бір нәрсені анық түсіндім: үлкен концерт күні көлікке сену — ең нашар шешім. Қалада кептеліс көбейеді, ал арена маңында нағыз көлік тығыны басталады.
Қазір қонақүйді міндетті түрде стадионға жаяу баруға болатын жерден немесе метроның тікелей желісі бойынан таңдаймын. Сонда көлік күтіп қалмаймын.
№5 ереже. Концертке арнайы образ дайындаймын
- Леди Гага концертінде
Сүйікті әртісіңнің концертіне барған кезде оның әлемінің бір бөлігіне айналғандай сезіну өте маңызды. Сондықтан әр концертке ерекше образ құрастырамын.
Әдетте әртістің соңғы альбомының стиліне сүйенемін. Мысалы, Beyoncé-нің Cowboy Carter альбомында ковбой стилі басым болды. Сондықтан ковбой етігін киіп, қалпақ тағып бардым. Айтпақшы, киімімнің бәрі Орталық Азия брендтерінен болды: шалбарым — CUT A DASH, жейдем — ALBASTY. Ал ковбой қалпағын Парижден әрең тауып алдым.
Айтпақшы, үлкен концерттердің алдында кәсіпкерлер де бірден белсенді болып кетеді. Францияда Beyoncé концерті қарсаңында көшенің бәрінде ковбой қалпақтары сатыла бастады. Соның арқасында Парижге тек концерт үшін келген америкалықтардың бәрі дәл сондай қалпақ киіп жүрді. Өйткені Еуропада билет өз елдеріне қарағанда әлдеқайда арзан болатын.
Ал Lady Gaga концертіне мүлде басқа образ таңдадым. Оның шоуы театрға ұқсайтынын, ерекше әрі батыл атмосфера болатынын түсінген соң, толықтай қара түсті, концептуалды киім кидім.
Бірақ концертке киетін киімдегі ең маңызды нәрсе — ыңғайлы аяқкиім. Сән қуып, биік өкшемен барудың қажеті жоқ. Adele концертінде отырып тыңдауға болатын шығар. Бірақ Lady Gaga «Just Dance» әнін айтқанда билегің келеді, аяқтың ауырғанын ойлап тұрмайсың.
Әлеуметтік желіге суретке түсуді қаласаңыз, туфлиіңізді киіңіз. Бірақ фан-аймаққа кірер алдында міндетті түрде кроссовкаға ауысыңыз. Өйткені үш сағат бойы секіріп, билеуге тура келеді.
№6 ереже. Концерт мерчіне алдын ала ақша жинаймын
Мен концерт мерчтерін жақсы көремін. Сондықтан оған алдын ала шамамен 300 доллар бөліп қоямын. Бұл ақша екі-үш жақсы зат алуға жетеді.
Әр сапардан міндетті түрде бірнәрсе сатып аламын. Оның үстіне, сол киімдерді кейін гардеробымдағы басқа брендтерге қарағанда жиі киемін.
Мысалы, Beyoncé мерчінің футболкалары өте сапалы. Өте ыңғайлы болғандықтан, күнделікті кездесулерге де, басқа жұмыстарға да киіп жүремін. Сырт көзге менде басқа киім жоқ сияқты көрінетін шығар, бірақ маған солай ұнайды.
Сүйікті әртісіңнің мерчі — сенің кім екеніңді және нені жақсы көретініңді білдіретін белгі.
Ең ерекше мерч Charli XCX пен Troye Sivan-ның Sweat турында болды. Олар концертте жыныстық қатынастан кейін қолдануға арналған кішкентай сүлгілер сатты. Мен де біреуін сатып алдым. Бірақ оны әлі мақсаты бойынша пайдаланған жоқпын, әзірге қол сүртіп жүрмін.
Тағы бір ұнаған заты — қымбат әрі танымал Hydro Flask брендімен бірге шығарылған термобөтелке. Қазір ол бөтелке барлық сапарыма бірге жүреді.
Ал ең үлкен қателігім Coachella-2024 фестивалінде болды. Өзіммен жеткілікті қолма-қол ақша алмадым. Ал фестивальдегі мерч таңдауы керемет еді — бағдарламадағы жүзге жуық әртістің бәрі өз өнімдерін сатып жатты.
Дәл сол кезде банк Калифорния шөлінен жасалған төлемді күмәнді операция деп есептеп, картамды бұғаттап тастады. Тіпті қонақүйге таксимен қайтуға да ақшам қалмады. Қолма-қол ақшам тек Doja Cat футболкасын алуға ғана жетті.
Содан бері ең басты қағидам — АҚШ-тағы шөлдің ортасында қалмай тұрып, банкке алдын ала хабарласып қою.
№7 ереже. Концертке күшімді сақтаймын
Мұндай сапар үшін ең қолайлы уақыт — төрт-бес күн. Одан аз болса, бәріне үлгеруге асығасың, ал одан көп болса, қажетсіз ұзақ болып кетеді.
Менің жоспарым әрдайым бірдей: барған күні жақсылап демалып, ұйқымды қандырамын, ауа райына үйренемін. Содан кейін ғана концертке сергек күйде барамын.
Концерт болатын күні ешқандай белсенді жоспар құрмаймын. Қаланы аралап, турист сияқты шаршап жүру де жоқ. Сол күнгі жалғыз мақсатым — кешке дейін күш жинау. Өйткені аренада үш сағат бойы ән айтып, айғайлап, билеу үшін энергия керек.
Тағы бір маңызды кеңес — концерттен кейін де бір-екі күн қалып қойған дұрыс. Сол уақытта алған әсеріңізді қорытып, достарыңызбен бөлісіп үлгересіз. Концерт біте салысымен бірден ұшаққа отырудың қажеті жоқ. Мен мұндай қателікті Lady Gaga концертінен кейін жібердім. Келесі таңға билет алып қойған едім. Соның салдарынан кері қайтқан ұшуым өте ауыр өтті.
№8 ереже. Концерттен бөлек те демалуға тырысамын
Концерт өтетін қаланы таңдағанда, сол жерде шоуға қоса тағы қандай мәдени іс-шаралар бар екенін де қараймын. Қызық воркшоп, ерекше көрме не стендап болса, міндетті түрде барамын. Мұхит асып барып, тек концертпен шектелу орынсыз деп ойлаймын.
Мысалы, Нью-Йоркке барғанымда бірден Бродвейдегі екі мюзиклге билет алдым. Бұл мен қабылдаған ең дұрыс шешімдердің бірі болды. Бір сапарда бірден бірнеше әсер аласың: сүйікті әртісіңнің концертін көресің әрі өнердің басқа түрлерінен де шабыттанасың.
Барселонада фламенкоға барып, жергілікті квир-клубтардағы дрэг-шоуларды тамашаладым. Парижде Beyoncé концертін әйгілі Crazy Horse кабаресіне барумен үйлестірдім. Онда жалаңаштық көп болғанымен, бәрі өте нәзік, сәнді әрі талғаммен жасалған. Ал көпшілік мақтайтын Moulin Rouge кабаресіне әдейі барған жоқпын. Меніңше, ол туристерге ғана арналған орын.
АҚШ-та жүргенде андеграунд техно мәдениетін зерттегенді ұнатамын. Charli XCX концертіне барған сапарымда Нью-Йорктегі әйгілі Basement клубына кірдім. Бұл клубқа кіру оңай емес — фейс-бақылауы өте қатаң.
Бірақ сол ортаның мәдениетін түсініп, соған сай киініп барсаңыз, еш қиындықсыз кіресіз. Қазір бұл клубты көпшілік Берлиндегі әйгілі Berghain клубының америкалық баламасы деп атайды.
Айтпақшы, концертке жалғыз барғаннан қорықпаңыз
Ең жақсысы — сүйікті әртісіңізді сіз сияқты жақсы көретін адаммен бірге барған. Сонда бүкіл сапар әлдеқайда әсерлі өтеді. Бірақ бірге баратын адам табылмаса, соның кесірінен сапардан бас тартпаңыз. Жалғыз барғанның да өз артықшылығы бар.
2023 жылы туған күнімде жалғыз өзім Чикагоға Lauryn Hill концертіне ұшып кеттім. Бұл концерт оның аңызға айналған The Miseducation of Lauryn Hill альбомының 25 жылдығына арналды. Бұл — менің ең сүйікті альбомдарымның бірі.
Фан-аймақта мені қырықтар шамасындағы афроамерикалық әйелдер қоршап алды. Олар мені өз балаларындай қабылдады. Біз бірге билеп, құшақтасып, концерттегі барлық әнді қосылып айттық. Бұл өмірімдегі ең ұмытылмас концерттердің бірі болды.
Ең бастысы — бейтаныс адамдардың арасында жалғыз қалудан қорықпау керек. Өйткені музыканың адамдарды біріктіретін күші бәрібір бәрінен жоғары.
жоғары.
