Пхукеттегі алғашқы демалыс: ең жақсы аудандар, жағажайлар, тамақ пен басқа да қызықтар
Тревел-блогер Ерасыл Мирасбектің аралға арналған жолнұсқасы.
Пхукет — жай ғана курорт емес, мұнда ұзақ уақытқа қалғың келеді. Көгілдір суға сүңгіп, күннің батқанына тамсанып, әр сәтіңді дәмді тағамдарға, жаңа кездесулер мен аяқасты әңгімелерге арнауға болады. Осы аралға аяқ басқан сәттен-ақ, оны неге Тайландтың ең жанды мекені деп атайтынын түсіндім. Енді өз тәжірибемді бөлісіп, қайда бару керек, ненің дәмін татқан жөн және басты қызықтарды қалай жіберіп алмауға болатыны жайлы айтып беремін.
Пхукеттің аудандары: өз атмосфераңды таңда
Пхукетке әркім өз қалауымен келеді. Біреулер пальмалардың көлеңкесінде демалғысы келсе, енді біреулер түні бойы көңіл көтеруді қалайды. Бұл арал екі сценарийге де сай келеді, тек өзіңізге лайықты аудан таңдасаңыз болғаны.
Тыныштық пен жайлы демалыс іздегендерге — Карон мен Ката. Мұнда тазалық, жасыл табиғат және жайлы атмосфера қалыптасқан. Жұптарға, балалы отбасыларға, ата-анасымен демалатындарға, сондай-ақ қаланың күйбеңінен шаршағандарға бұл — керемет таңдау.
Егер драйв пен көңіл көтеруді қаласаңыз — Патонг. Мұнда шуақты, көңілді әрі жарқын өмір қайнап жатыр. Жағажайлар, барлар, дүкендер, көше тағамдарын сататын орындар таң атқанша жұмыс істейді. Патонгтың жүрегі — әйгілі Бангла-Роуд көшесі. Өз басым осы ауданда тоқтадым және әдетте қонақүйлерде тұрақтаймын: ыңғайлы, қауіпсіз әрі сервис жағын да алдын ала білесің (бұл Пхукет үшін өте маңызды). Егер сіз де мен сияқты кешкі серуен мен сауық кештерін ұнатсаңыз, қонақүй — тамаша шешім. Келесің, шомыласың, демаласың — кейін қайтадан жолға шығасың. Ал болашақта отбасыммен бара қалсам, міндетті түрде вилланы таңдар едім. Бірақ ол мүлде басқа әңгіме.
Пхукеттің қызықтары: жағажайлар мен тарихи ғимараттар
Патонгтың үш шақырымдық жағажайы — ұзын, танымал әрі өте көп адам жиналатын орын. Алайда судың тазалығы аса көңіл көншітпейді. Сондықтан шомылғыңыз келсе, Ката Нои, Фридом, Най Харн немесе Сурин жағажайларына барғаныңыз дұрыс.
Жағажай маңында тамақтану қымбатқа шығады, сондықтан ас ішу үшін қалаға барған жөн. Егер тай тағамдарынан жалықсаңыз (иә, ондай жағдай да болып тұрады), JungCeylon Mall сауда орталығына бас сұғыңыз. Мұнда суши, паста, бургер сияқты түрлі тағамдар пісіретін үлкен фудкорт бар. Сонымен қатар дүкен аралап, серуендеп қайтуға да болады.
Жағажай мен кештер — бұл керемет нәрсе, бірақ Пхукет тек онымен шектелмейді. Қала ішінде ескі үйлер мен тартымды көшелер бар, қытай мәдениетін көріп, бір кинофильм түсіріп жатқандай ерекше атмосфераны сезінесіз. Нағыз Пхукеттің тарихымен танысу осы жерден басталады.
Old Phuket Town
Бұл аудан — архитектурасы мен ерекше атмосферасымен таңғалдыратын аралдың нағыз жауһары. Кішігірім көшелер, сингапурлық шопхаус стилінде салынған үйлер, португал нақыштары мен қытай өрнектері, ағаштан ойып жасалған терезелер мен әдемі балкондары — фотографтар мен әсемдікті бағалайтын жандар үшін таптырмас мекен.
- Thalang Road көшесімен серуендеңіз — бұл ескі қаланың басты көшесі, демалыс күндері жаяу жүргіншілер базарына айналады.
- Өнер әлемі қайнап жататын кафелерге бас сұғыңыз — олардың әрқайсысы шағын музей іспетті.
- ХІХ ғасырдан қалған үйлерді тамашалай жүріп, кофеханалардың бірінде тай мұзды кофесін ішіп көріңіз.
- Қабырға суреттерін (муралдарды) іздеңіз — мұнда комикс кейіпкерлерінен бастап, музыканттар мен жолбарыстарға дейін түрлі бейнелерді кездестіруге болады.
Кинодағы дәл сол қонақүй
Киносүйер қауым үшін қызық дерек: Old Phuket Town ауданындағы бір қонақүй Леонардо Ди Каприо ойнаған әйгілі «Жағажай» фильмінде көрсетілген.
Wat Chalong: ғибадатханалар кешені
Ескі қала сәулеті Пхукеттің бет-бейнесін ашса, Wat Chalong ғибадатханасы оның жанын көрсетеді. Бұл — ғибадатханалар мен крематорий орналасқан керемет кешен. Әр ғимараттың қабырғасы мозаикамен, фрескалармен, алтын жалатылған мүсіндермен және көз тоймайтын ерекше суреттермен безендірілген. Тіпті крематорийдің өзі сарай секілді сән-салтанатымен таңғалдырады.
Бұл жерге күн қатты ысымай тұрып, ертемен барғаныңыз жөн. Иық пен тізені жауып тұратын киім киюді ұмытпаңыз — бұл қасиетті орынға кірердегі басты талаптардың бірі.
Пхукеттегі керемет күнбатыс: ең әсерлі орындар
Күннің батуы — жай ғана табиғат құбылысы емес, жүрекке әсер етер сәт. Сол сиқырлы мезетпен үндесетін сүйікті орындарымды бөліскім келеді.
Promthep Cape (Промтхеп мүйісі)
Егер жергілікті тұрғындардан немесе Google-дан Пхукеттегі ең ғажап күн бататын орынды сұрасаңыз, бәрі бір ауыздан Промтхеп мүйісін атар еді. Бұл — аралдың ең оңтүстік нүктесі. Мұнда Андаман теңізінің шексіз көгілдір айдыны, көрші аралдар және Януй мен Най Харн жағажайларының көріністері ашылады.
Пальмалардың арасында еркін серуендеп, батылыңыз жетсе, су жиегіне дейін баратын тар соқпақпен төмен түсіп көріңіз. Туристік маусымда бұл жер адамға толы болатынын ескеріп, ертерек барған жөн. Егер төменге түсуді ойласаңыз, ыңғайлы аяқкиім киіп алыңыз. Фотоаппарат немесе қуатталған телефонды ала баруды ұмытпаңыз — мұндай көріністі елеусіз қалдыруға болмайды.
Мүйістің дәл қасында орналасқан стильді Summore Day кафесінде бір шыны кофе ішіп, күн батқанша рақаттана аласыз. Интерьері — минималистік, атмосферасы — тыныш, ал терезенің ар жағындағы көрініс — эстетикалық рақаттың өзі.
Laemsai Cup Cafe
Теңіз көрінісі мен күннің батуы ұштасқан ерекше атмосфераны ұнатсаңыз, бірден Laemsai Cup кафесіне барыңыз. Бұл — төбенің үстінде орналасқан, теңізге қарайтын кең террасасы бар көркем орын. Интерьері — тропикалық стильде, әр бөлшегі табиғатпен үндесіп тұр. Ал мұнда түсірілген фотосуреттер Instagram парақшаңызға сән беріп, нағыз армандағы сәттерді еске салады.
Сурин жағажайы
Күннің батуы үшін ешқандай әдемі безендірудің қажеті жоқ. Кейде бар болғаны құмға жайғасып, тізеңізді құшақтап, көкжиекке сіңіп бара жатқан күнді үнсіз тамашалағыңыз келеді. Егер дәл осындай күйде болсаңыз — бағытыңыз Сурин жағажайы болсын.
Түнгі өмір: жәндіктер сататын кешкі базар, клубтар және шоу
Патонг пен басқа аудандарда күн батқан соң, аралдың екінші тынысы ашылады: кешкі базарлар қыза түсіп, сауық құрушылар көшеге шығады.
Міндетті түрде Banzaan кешкі базарына соғыңыз. Мұнда асшаяндар мен кальмарлар шоршып жатқан майға түсіп, экзотикалық жемістер бірінші рет көрген жанды таңырқатады. Ал батыл туристерге жәндіктер мен бақа тағамдарын да ұсынады. Әрине, әйгілі манго мен жабысқақ күріш те (mango sticky rice) дәл осы жерде дайындалады. Тағам түрі көп, бағасы қолжетімді, ал атмосферасы ұзаққа дейін есіңізде қалады.
Егер кешкі сауық пен би сіздің көңіліңізден шықса, Illuzion Club-қа бас сұғыңыз. Бұл — Тайландтағы ең үздік клубтардың бірі әрі әлемнің үздік 100 клубының қатарына кіреді.
Ал тым қатты дыбысты ұнатпайтындарға KYMA Beach Bar-ды ұсынамын: теңіз жағасында отырып, коктейль ішіп, құм үстінде файр-шоу тамашалауға болады. Өз басым бұл жерге жиі бардым — шын жүректен кеңес беремін.
Тайланд туралы айтқанда секс-туризм тақырыбын көтермей кету мүмкін емес. Бангла-Роуд көшесі осы индустрияның негізгі орталығы саналады. Мұнда барлар көп, ал кейбір әйелдер жыныстық қызмет көрсету саласында жұмыс істейді. Бірақ ең бастысы — барлығы екі тараптың келісімімен, шекара мен жеке кеңістікке деген құрметпен өтуі тиіс екенін есте ұстаған жөн. Сонымен қатар, мұқият болыңыз: кей қызмет көрсетушілер — леди-бойлар. Бұл құбылысты «жақсы» не «жаман» деп кесіп айту қиын, бірақ ыңғайсыз жағдайға тап болмас үшін бұл туралы білген артық емес.
Ал ерекше әсер іздегендерге атақты пинг-понг шоуы ұсынылады. Бұл шоулар да Бангла-Роуд бойында орналасқан. Әдетте, жарнама таратушылар өздері-ақ сізді шақырып жатады. Кеңесім: міндетті түрде саудаласыңыз — бағаны екі есе төмендетуге әбден болады. Шоу барысында видео түсіруге тыйым салынады. Бірақ бұл туралы толығырақ Пхукетке арналған жеке шығарылымымда егжей-тегжейлі айтып өттім.
Пхукетте ненің дәмін татуға болады?
Banzaan Night Market кешкі базарында Тайланд тағамдарын татып көруге болады. Алғашқы сапарыңызға арнап арнайы «must eat» тізімін дайындап қойдым:
- Пад тай — қуырылған күріш кеспесі жұмыртқа, тофу немесе тауық еті/асшаянмен дайындалады. Үстіне жержаңғақ, үрмебұршақ өскіні мен лайм қосылып, дәм үйлесімі ерекше тағамға айналады.
- Манго қосылған жабысқақ күріш (mango sticky rice) — тәтті, піскен манго мен кокос сүті қосылған, қантпен қайнатылып дайындалатын ерекше күріштен тұратын дәстүрлі тай десерті.
- Сате — грильде дайындалған шағын ет шашлықтары.
- Том ям — Тайландтың аты шыққан ащы-қышқыл сорпасы. Құрамында асшаян немесе тауық еті, лемонграсс, галангал (тай зімбірі), лайм, чили бұрышы мен кокос сүті бар.
- Жаңа ұсталған теңіз өнімдері.
Аралдың тағы бір кереметі — әр көшеден табылатын 7-Eleven дүкендер желісі. Күні-түні ашық бұл дүкендерде микротолқынды пеште лезде жылытып беретін дайын тағамдар сатылады. Мысалы, тауық еті қосылған күріш, удон, сорпа немесе дәстүрлі тай таңғы асы — қалағаныңызды таңдап, кассирге берсеңіз болғаны, бірнеше минут ішінде алдыңызда ыстық әрі дәмді ас дайын тұрады.
Туристердің сүйікті тағамдары:
- Тай стиліндегі тауық еті қосылған чили-сэндвич.
- Ірімшік қосылған тост — иісі мұрын жарады, дәмін татпай кету мүмкін емес!
- Ал бөтелкедегі жасыл сүтті шайды бір рет ішкен адам үйіне біреуін ала кетпей қоймайды.
