Ап-арзан Еуропа: 550 мың теңгеге алты қаланы аралап шыққаным туралы
Бұл соммаға виза, ұшақ билеттерін, тіпті кәдесыйларды да алдым.
Оқиға шілде айында басталды. Aviasales.kz Telegram-арнасынан Pegasus-та жаппай сатылым болып жатқанын көріп қалдым. Бағалар тым тартымды болды, сонда маған «Неге Еуропаны аралап қайтпасқа?» деген ой келді.
Маршрутты «достарыма барамын» – деп құрдым. Алғашқы нүкте ретінде Франкфуртты таңдадым. Ол жерден Гёттингенде оқитын құрбыма жету ыңғайлы. Ал елге досым тұратын Вена арқылы қайтуды жоспарладым. Сондай-ақ Берлинді қатты көргім келді. Сосын қалалар тізіміне Лейпциг қосылды. Құрбым да онда барып көрмепті.
Сөйтіп, менің бағытым былай шықты: Франкфурт — Гёттинген — Берлин — Потсдам — Лейпциг — Нюрнберг — Вена.
Бұл — менің алғашқы Шенгенім. Ұшақ билеттерін жеңілдікпен алғаныма қарамастан, «визаны алу қиын» және «Еуропадағы бағалар мені банкрот қылады» деген ой мазалады. Бірақ бәрі бекер екен. Өте жақсы демалып, қаражатымды қалай сақтап қалғанымды қазір айтып беремін.
Виза мен ұшып-қону: сәтті лоукостер және тегін интернет
Ұшақта
Тегін sim-картам
Астанадан Стамбул арқылы ұшу билеттерін 212 мың теңгеге алдым (багажбен, барып-қайту). Негізі 140 мың теңгеге алуға болар еді, бірақ «Сатып алу» батырмасын басуға біраз ойланып қалдым. Ойланып отырғанда баға 90 мыңға өсіп кетті.
Түсінгенім: тиімді баға көрсең — бірден алған дұрыс. Оның үстіне Pegasus-та кішкене қосымша ақыға билетті қайта брондау мүмкіндігі бар.
Тағы бір лайфхак: әртүрлі қалаға ұшу және әртүрлі қаладан қайту (open-jaw) өте тиімді — бұл алғашқы қалаға қайта оралуға кететін уақыт пен ақшаны үнемдейді.
Ал мен лоукостермен ұшуға қорыққан едім: орындықтар тар, жайсыз болады деп ойладым. Бірақ жолым болды. Мені екі рет тегін авариялық есіктің жанына отырғызды, ол жерде аяқ қояр жер жеткілікті. Шағымданатындай ештеңе болмады: ұшу да жайлы, қону да жұмсақ болды.
Виза
Визаға өтінішті мен Астанадағы Германия елшілігіне өткіздім. Себебі сапарымның басым бөлігін сол елде өткізуді жоспарлағанмын. Ешқандай құпия жоқ: Demalys сайтындағы нұсқаулықты мұқият оқып, сұралған құжаттардың дәл сол тізімін өткізу жеткілікті.
Негізі визам бойынша мен Нюрнбергтен қайта ұшуым керек болған. Бірақ жолға шыққан соң жоспар өзгеріп, ақыры Вена арқылы қайттым. Оның ешқандай да салдары болған жоқ, сондықтан виза мақұлданғаннан кейін бағытты өзгертуден (мүмкін) қорқудың қажеті жоқ сияқты.
Тағы бір бонус: елшілікте маған 30 ГБ интернеті бар неміс SIM-картасын тегін берді. Ол бүкіл шенген аумағында жұмыс істейді (роумингті қосу ғана керек). Ұсақ-түйек дүние көрінгенімен, ондаған еуромды үнемдеді.
Логистика: «жұлдызды» бағыт пен ел ішінде бірыңғай жүріс билеті
Менің маршрутым «жұлдыз» принципімен құрылды: мен базам ретінде Гёттингенді таңдадым (ыңғайлы орналасқан). Заттарымды сол жерде құрбымның үйіне қалдырып, көрші қалаларға тек жеңіл сөмкеммен шығып жүрдім.
- Гёттинген — Берлин (үш күн, Потсдамға қысқа сапармен).
- Гёттинген — Лейпциг (бір күндік жол).
- Гёттинген — Нюрнберг (транзит) — Вена.
Германиядағы көлік құралдары
Басты лайфхак — бірыңғай Deutschland-Ticket алу. Мен оны MVV-App арқылы 58 еуроға (35 мың теңге) сатып алдым. Бұл билетпен қала ішіндегі кез келген көлікке (автобус, трамвай, метро) және аймақаралық жергілікті пойыздарға шексіз отырып жүре аласың. Маңызды бір «бірақ» бар: билет тек Regional санатындағы пойыздарға жарамды, ал жылдам пойыздарға (ICE/IC) мінуге болмайды. Сол себепті кейде 2–3 рет ауысып отыруға тура келетін. Қорқынышты естілгенімен, іс жүзінде жүйе мінсіз жұмыс істейді: бір пойызды өткізіп алсаң да, 20 минуттан кейін келесісі келеді. Вагондар таза, ішінде дәретхана да, резеткі де бар. Кестені Deutsche Bahn қосымшасында (DB Navigator) қарап отырған ыңғайлы.
Елдер арасында: Нюрнбергтен Венаға мен FlixBus-пен 25 еуроға (16 мың теңге) бардым. Бұл — түнгі жеті сағаттық рейс. Орындықты шалқайтып, ыңғайлатып, ұйықтап алдым. Осылайша қонақүйге ақша үнемдедім.
Венадағы көлік: Австрия үшін WienMobil қолданбасын жүктеу керек. Қажетті мерзімге жүріс билетін сол жерден сатып алуға болады. Мен 48 сағатқа жарамдысын 14,10 еуроға (~8 555 теңге) алдым. Қайта-қайта билет ала бергенше осылай әлдеқайда тиімді.
Баспана: хостелдер мен достарымның үйлері
Барлық жерде дерлік мен достарымның үйінде тұрақтадым. Ал Берлинде екі түнге хостелде тұрдым. Мен осылайша әжептеуір үнемдедім, дегенмен хостелдердің өзі қымбат емес еді.
Хостелдер туралы аңыздар
Ластық пен қауіпсіздік туралы стериотиптерді ұмытыңыз. Берлиндегі Kiez Hostel-де екі түнге 70 еуро (42 400 теңге) төледім. Әйелдерге арналған бөлме кең, таза, қауіпсіз әрі жайлы болды. Хостелдердің басты артықшылығы — ортақ асүй: өзің тамақ пісіре аласың, тегін шай ішесің, басқа саяхатшылармен таныса аласың. Бірақ букингтегі әдемі суреттерге сене бермеңіз, әрқашан жаңа пікірлерді оқыңыз. Ал мүлде ақша жұмсағыңыз келмесе, каучсёрфингті де қарастыруға болады.
Мен тұрғын үйге жақсы үнемдедім, бірақ достарда қону да әрдайым жайлы болмайды — кейде бір жастықпен кілемде ұйықтауыма тура келді (дегенмен, Венада әрі тегін!).
Тамақ: шұжықтар, дәретхана суы және 20 еуро тұратын шницель
Дөнер, Потсдам
Берлиндегі карривурст
Дөнер, Вена
Шницель жеудеміз, Гёттинген
Бургер Кинг, Нюрнберг
Тамақтануым үнемдеуіме байланысты болды, бірақ аш жүрген жоқпын.
- Таңғы ас: көбіне достарымның үйінде ішіп жүрдім. Берлинде 1-2 еуроға (600-1200 теңге) дайын ботқа сатып алатынмын, оны хостелдің асүйінде қайнатып іштім.
- Тіскебасарлар: жемістердің бағасы Қазақстандағымен шамалас, сондықтан жолдорбамда әрдайым алма мен банан жүрді.
- Көше тағамдары: менің фавориттерім — донерлер мен аңызға айналған карривурст (карри тұздығы қосылған шұжықтар). Тойымды, тез дайындалады әрі бағасы небәрі 5-7 еуро (3 000-4 500 теңге). Толыққанды түскі асқа уақыт болмаса, вокзалдардағы сэндвичтердің де бағасы осындай.
Өзімнен аяғынды ит жесін деп, Гёттингенде Kartoffelhaus-қа бардым. Онда 20 еуро тұратын (12 мың теңге) үлкен шницель жедім. Тағы бір күні вьетнам мейрамханасында 15 еуроға кешкі ас ішіп шықтым. Жалпы, Еуропада порциялар үлкен: 5 еуроға да, 20 еуроға да тойып шығуға болады.
Су мен кофе
Мен кофені жан-тәніммен сүйемін. Сондықтан күніне 4-5 еуро (2 400-3 000 теңге) капучиноға жұмсалатын. Кофе сіз үшін маңызды болмаса, ішетін су теп-тегін. Еуропада құбыр суы таза әрі ішуге жарамды. Өзіммен бірге жиналмалы бөтелке алып жүрдім де, суды барлық жерде — тіпті дәретханаларда да (құрбымның кеңесі) толтырып алатынмын. Бұл қалыпты нәрсе және ақшаңды әжептәуір үнемдейді.
Супермаркет дәріханасы
Сапар алдында тұмауратып қалдым. Ауруды асқындырмас үшін супермаркеттерден 2 еуроға (1200 теңге) имбирь қосылған иммундық шоттар сатып алып жүрдім. Плацебо ма, жоқ па — білмеймін, бірақ күніне 20 мың қадам жүруге күшім жетті.
Ойын-сауық: тегін, арзан және «Моцарттың сүйемелдеуімен»
Лейпцигте құрбеммен бірге
Берлин қабырғасы
Бундестаг
Серуендеу — үнемшіл туристің басты ермегі. Бірақ оның да талай түрі бар.
Тегін Берлин мен Вена
Берлиндегі шіркеу
Венадағы Бельведер галереясы
Венадағы Бельведер галереясы
Венадағы Хандертвассер үйі
Берлинде тарих әрбір қадамда: Қабырға, Холокост құрбандарына арналған мемориал, Бранденбург қақпасы — бәрі тегін әрі ашық аспан астында. Серуенді аяқтаудың ең тамаша тәсілі — Шпрее жағасында 1 еуро тұратын сыра ішу. Венада көруге міндетті орындар — тарихи орталық (кемі төрт сағат бөліңіз), Дунай жағалауы және ерекше архитектурасымен таңғалдыратын Хундертвассер үйі.
Ал ақылы музейлерден классиканы таңдадым:
- Берлин: Жаңа мұражай (Neues Museum) — 14 еуро (9 мың теңге).
- Вена: Бельведер галереясы — 19,5 еуро (12 мың теңге).
Маңыздысы: мұражайлар қатты шаршатады, сондықтан олар үшін 3–4 сағаттан артық жоспарламаған дұрыс.
Егер сәулет өнері жалықтырса, шіркеулерге барыңыз. Бұл дін туралы емес, өнер туралы.
Осылай құрбым екеуіміз Лейпцигте хоры бар оркестр концертін небәрі 3 еуроға (~1800 теңге) тамашаладық, ал Гёттингенде репетиция кезінде органды тегін тыңдадық.
Сайттарды қолданбадым десем де болады, бірақ Meetup.com-нан тегін ивенттерді табуға болатынын білемін. Сосын мені Венада өткен Дивали мерекесіне досым шақырды: бірге тамақ жасап (Community Cooking), би билеп, көңіл көтердік. Бәрі — тегін!
Гидке ақша шашпай қалай үнемдеуге болады
Мен ақылы экскурсияларды ұнатпаймын. Менің рецебім:
- Гид орнына YouTube: барғым келетін жер туралы видеоларды алдын ала жүктеп, блогердің жүрген жолымен жүремін.
- Саундтрек: егер жалғыз серуендесеңіз, музыка тыңдаңыз. Мысалы, Потсдамдағы Сан-Суси сарайында серуендеп жүріп Моцарттың «Лакримозасын» тыңдау керемет әсер береді. Өзіңізді XIX ғасыр романының кейіпкері сезінесіз.
Транзит романтикасы
Ашығын айтқанда, Франкфурт пен Нюрнберг мен үшін тек транзит қалалары болып қалды. Ондағы менің топ-орындарым — вокзалда орналасқан тәулік бойы жұмыс істейтін Burger King және алып әуежай.
Франкфурт әуежайы — толық бір қала екен. Артық шаршамау үшін терминалдар арасында тегін автобустарды қолданыңыз. Және жолды адамдардан сұраудан ұялмаңыз, бәрі ағылшынша сөйлейді.
Қорытынды смета
Адам сенгісіз, бірақ факт: сегіз күндік Еуропа сапарына барлығы 550 мың теңге жұмсадым. Бұған виза, ұшақ билеттері, тіпті сыйлыққа алған веналық тәттілер де кірді.
Шығындар тізімі:
- 212 мың теңге — ұшақ (Астана — Еуропа — Астана, багажбен).
- 120 мың теңге — тамақ және Венада сыйлыққа сатып алған тәттілер.
- 90 мың теңге — виза және құжаттарды рәсімдеу.
- 60 мың теңге — бүкіл көлік (қалалар ішінде және елдер арасында).
- 43 мың теңге — тұрғын үй (Берлиндегі хостелде екі түн).
- 24 мың теңге — мұражайлар мен концерттер.
Еуропаға ұшуға «ең қолайлы сәт» деген болмайды. Әрқашан қымбат, қорқынышты немесе уақыт жоқ сияқты көрінеді. Бірақ менің тәжірибеме сүйенсек, арзан Еуропа — аңыз емес, шынайы мүмкіндік. Хостелде қонуға, көше тамағын жеуге және жоспарды жолай өзгертуге қорықпаңыз. «Лакримозамен» серуендеу кезіндегі эмоциялар кез келген ыңғайлы жағдайдан қымбат.
Бәріңізге кеңес беремін. Danke!
