Түркияда шаш ектірдім. Қанша кеткенін, қалай өскенін айтып берейін
Жеке тәжірибе негізінде баяндап, қаражатын есептеп береміз.
Сәлем! Менің есімім — Файзолла, 40 жастамын. Маңғыстау облысында тұрамын. Былтыр мамырда Стамбұлда шаш ектіріп қайттым. Бұл операцияға көп дайындалдым. Шаш ектіруге қанша ақша жұмсағанымды, неге Стамбұлды таңдағанымды және ота қалай өткенін айтып берейін.
Шашым неге түсе бастады?
Мен қазір мұнай саласында жүргізуші болып істеймін. Бұрын бұрғылаумен айналысып, мұнай шығатын маңда көп жұмыс істедім.
Бір күні түнгі ауысымда зиян газдардың маңында жүріп қалып, артынан ұзақ ауырғаным бар. Қанымдағы билирубин (қанда болатын пигмент, көбейіп кетсе бауыр мен өт жұмысы нашарлайды) түспей, көп емделдім. Содан кейін шашым сусып түсе бастағанын байқадым. 5-6 жылда төбем көрініп қалды. Шашымның түскеніне жұмыс орнымдағы экологияның нашарлығы себеп болды ма деймін.
Бұрыш тұнбасын жағып көргенім бар, шаштың ұйықтап қалған түптерін шымырлатып, «оятады» деп еститінмін. Бірақ одан басқа шашымды сақтап қалуды құнттамадым. Содан биыл шаш ектіруге бел будым.
Клиниканы қалай таңдадым?
Клиника тапқан, таңдаған қиын болмады. Жақын досым бұрын Стамбұлда ектіріп келіп, шашы жап-жақсы өсіп шыққан. Досымнан сол клиниканың контактілерін алдым.
Өзге клиникалардың шарттары мен ұсыныстарын да көріп шықтым. Қазақстандағы клиникалардың да парақшасын қарадым, осында жасатқан таныстарым да бар. Өзімізде бұл операция талшық санына қарай 600–700 мың теңгеден басталады. Бірақ бәрібір досымның ұсынған клиникасына бүйрегім бұрып тұрды. Себебі Стамбұл шаш егу бойынша алдыңғы қатарда әрі сервисі жақсы дамыған.
Негізі ондай клиникалардың қызметі ұқсас: шаш еккеннен бөлек плазмотерапия жасайды, әуежайдан күтіп алады, шығарып салады, трансфер жібереді, екі түнге қонақүй жалдап береді. Мұның бәрі қызметтер пакеті сияқты жинақталып нақты бір сомада ұсынылады.
Әрине, тек отаға төлеп, жол мен тамақ, қонақүй сияқты шығындарды өзіме де келістіруге болар еді. Тіпті, графттың (1-4 тал шаш фолликуласы бар терінің кішкентай бөлігі) санына қарай бағасы өзгеретін клиникалар да бар. Бірақ маған бәріне бір рет төлеп барған тиімді әрі ыңғайлы көрінді.
Бірнеше емхананың қызметі мен бағасын салыстыра отырып, ақыры досым айтқан Million Hair Center деп аталатын клиникаға тоқталдым. Оларға жайымды айтып жазған соң, клиника менеджері төбемді, желкемді суретке түсіріп жіберуімді сұрады. Сөйтіп маған шаш егуге 6 000 графт керегін айтты. Бұл өте көп. Сонда желкеден 6 000 графт алынып, төбеге егіледі екен.
Операция кезінде дәрігер одан көп графт салса, баға өзгермейді деп ескертті. Кейбір клиникалар 6 000 графтты екіге бөліп, арасына уақыт салып жасайды. Біз таңдаған клиника бәрін бірден жасап береміз деді. Әрі бағасы да тиімді болған. Қайда қонамыз, клиникаға қалай қатынаймыз, қайдан тамақтанамыз деп бас ауыртқан жоқпын. Қызмет пакетіне бір рет төлеп тастадым.
Сонда клиниканың қызметтер пакетіне 2020 доллар жұмсадым. Оның ішіне не кіретіні төмендегі кестеде.
Клиниканы былтыр жыл басынан іздей бастадым да, ақпанда отаны қайда жасататынымды нақтылаған соң операцияны мамырға жоспарлап, билет алдым. Алдын ала қан тапсырудың қажеті жоқ деді. Негізінен бұл операцияны жасату үшін анемия болмағаны маңызды, себебі шаш түптерінің тез жазылып кетуіне қан жетіспеушілігі қатты әсер етеді екен.
Стамбұлда
Жұбайым екеуіміз Түркияға мамырда Ақтау-Стамбұл бағытындағы рейспен жеттік. Билетті өзіміз алдық, алдын ала жоспарлап қарағандықтан әрі мамыр туристік маусым болмағандықтан арзанға түсті. Екі адамға барып-келу билеті 164 000 теңгеге шықты.
Стамбұлға тек шаш ектіруге барамын деген мақсат болғандықтан, қыдырамыз деп ойлаған жоқпыз. Бұған дейін Түркияға барып жүрдім, сондықтан ары-бері жол тапқанда қиналмадым.
Әуежайдан клиника қызметкері күтіп алып, қонақүйге алып барды. Сол күні біз тек дәрігерге көрініп кеттік. Операцияны ертеңгі күнге жоспарладық.
Қонақүй клиникадан алыстау екен, бірақ трансфер болды. Бөлмеміз стандарт нөмір, іші ыңғайлы, таза әрі әдемі болды. Керек дүниенің бәрі болды. Бөлме бағасына таңғы ас кіреді екен.
Екінші күні таңертең қонақүйден таңғы ас ішіп, клиника трансферімен операцияға келдік. Операция шамамен 8 сағатта бітті. Арасында үзіліс жасап, сол жерде түстеніп алдым. Әйелім жоғарғы залда мені күтіп отырды. Оған да түскі ас берілді.
Операцияны ауырғанды сездірмейтін препарат салып жасайды екен. Есімді біліп, төбеме жасалған манипуляцияның бәрін сезіп жаттым, бірақ ауырған жоқ.
Шаш еккенде алдымен талшықты желкеден түбімен, терінің кішкентай бөлшектерімен қоса жұлады екен. Сосын маңдай мен төбені жаңа шашты еккенге дайындайды. Фолликулалар жақсы орнығып кетуі үшін плазмотерапия жасалады. Сосын желкеден алынған шашты (графттарды) дайындалған жерге отырғызады. Графттың санына қарай операция уақыты 6–12 сағат болады.
Операциядан кейін
Операциядан кейін төбемді ашық қалдырып басымды айналдырып таңып берді, қолыма арнайы үрмелі көпшік пен жаялықтар ұстатып, қонақүйге демалуға жіберді. Бірақ ауырсынуды басатын дәрінің күші қайтқан соң өзімді жайсыз сезіндім. Қозғалмастан, тек шалқамнан жатып ұйықтаған қиын болды. Еңкеюге, артық жүріп-тұруға болмайтын еді.
Әйтеуір сол түнді әрең өткізіп, келесі күні тексерілуге бардым. Басымды қарап, жуып, таңғышымды жаңартып берді. Таңғыш төбедегі ісіктің бетіме ығысып кетуінен, плазма ағып кетуінен сақтап тұрады екен. Үйге де сол таңғышпен қайттым. Бірнеше күннен соң түнде шешіп жатуға рұқсат етті.
Қайтарда дәрігер ауырғанды басатын дәрілер мен антибиотиктер жазып берді. Витаминдер мен арнайы бас жуатын пантенол қосылған көбік, екі сульфатсыз сусабын салып жіберді. Одан бөлек арнайы күтім жасағанға ақылы сусабындар мен маскаларды ұсынды, бірақ оны алған жоқпын.
Үйге операциядан кейін бір күн өткен соң қайттым. Басым таңулы, қып-қызыл төбем ашық. Әуежайда, көшеде жүргенде өзге жұрттың көзқарасынан ыңғайсыздандым. Бірақ амал жоқ, басым қалыпқа келмейінше төбемді жабуға болмайды деді. Стамбұлдан кетерде үйдегілерге сарқыт та алу керек. Сөйтіп ештеңеге қарамастан сол түріммен қаланы аралап жүре бердім.
Күтіну керек
Негізі клиника қызметкерлері бұл операция өте жеңіл, бірден аяққа тұрып кетесіздер деп сендірген. Сондықтан біз де жұмыстан бірнеше күнге ғана сұранып барғанбыз. Операциядан соң үйге жетіп, бірден жұмысқа кірісіп кетемін деп ойладым.
Бірақ келгеннен кейін он күн демалыс алуға мәжбүр болдым. Жайсыздық пен басымның ауырғаны үш-төрт күнде азайғанымен, толықтай ес жиюыма екі аптадай уақыт кетті. Үйде, сыртта көп жүргенді қойып, дұрыс тамақтанып, көп су ішу қажет еді. Еңкеюге, бетті төмен қаратуға болмайтын. Тіпті, телефонды жоғары көтеріп не көз деңгейінде ұстау керек болды. Бас киім де кимедім. Арақ-шарап пен темекіге, сауна мен моншаға, спортқа тыйым салынды.
Отадан кейін үшінші күні үйде жолдасым басымды пантенол қосылған көбікпен жуып берді. Бір-екі аптада басым қабыршақтанып, жазыла бастады. Бір ай шамасында шашым жиі түсіп жүрді. Мұның қалыпты екенін дәрігер ескерткен еді. Себебі орын ауыстырған фолликулалар шошынып, ескі шашты түсіріп жібереді, бірақ түптері орнында қалады екен. Сөйтіп жаңа жерге үйренісіп, орныққан соң жаңа талшықтар пайда болады.
Қанша кетті?
Аралық нәтиже
Баға былтыр мамырда ота жасатқан кездегі доллар бағамына сай көрсетілді.
Шығын | Сома, теңге |
|---|---|
Клиниканың қызмет пакеті (трансфер, қонақүйдегі екі түн, операция, плазмотерапия, дәрі-дәрмек, сусабындар, аудармашы) | ≈ 1 млн |
Әуе билеті (Ақтау — Стамбұл — Ақтау, екі адамға) | 164 000 |
Жүріс-тұрыс (тамақ, кәдесый) | 260 000 |
Жалпы шығын | 1,5 млн |
Шығын | Сома, теңге |
|---|---|
Клиниканың қызмет пакеті (трансфер, қонақүйдегі екі түн, операция, плазмотерапия, дәрі-дәрмек, сусабындар, аудармашы) | ≈ 1 млн |
Әуе билеті (Ақтау — Стамбұл — Ақтау, екі адамға) | 164 000 |
Жүріс-тұрыс (тамақ, кәдесый) | 260 000 |
Жалпы шығын | 1,5 млн |
Нәтижесі
Қазір
Бұрын
Қазір
Бұрын
Дәрігерлер өзгеріс алты айдан кейін басталып, толық нәтиже бір жылда көрінеді деген. Шаш ектіргеніме осы айда (2025 жылдың желтоқсаны) алты ай болды. Бұрын жылтырай бастаған төбемде қара шаш қаптады. Өзіме жасарып қалғандай көрінемін. Қанша дегенмен шаш адамға рең береді екен.
Ота жасатқаныма өкінбеймін. Бұған біраз жыл дайындалып, бірнеше ай бойы ақша жинадым. Нәтижесі көңілімнен шығып жатыр.
Суретті салған — Дада Кирей.
