Кашқа қашу: Түркия қалашығына саяхат жоспарлау үшін не білу керек
Неліктен бәрі Кашты жақсы көреді, қалашыққа қалай жетеміз және онда нені көру керек?
Сәлем, менің есімім Акма. Егер сіз де мен сияқты демалыс кезінде қарбаласты ұнатпай, Аланиядағы қонақүйлер мен Стамбұлдың көшелерінен бөлек тағы бірдеңе көргіңіз келсе, онда Каш – сіз үшін керемет орын.
Каш – бұл порт-қала, Түркиядағы шағын Грекия іспетті, Жерорта теңізінің жағалауындағы төбеде орналасқан. Бұл қала өзінің жайлы атмосферасымен, еуропалық көшелерімен және әсем табиғатымен танымал. Мұнда демалу – мегаполистердің шуы мен түрікше "ол инклюзив" тығыздығынан шаршаған адамдарға, сондай-ақ жас жұбайлар мен жасы үлкендеу балалары бар ата-аналарға өте қолайлы. Қалада баспалдақтар мен тік өрлер көп болғандықтан, кішкентай балалары барларға абай болған жөн.
Кашқа қашан бару керек?
Кашта жаз өте ыстық, бірақ теңіз шілде-тамыз айларына қарай ғана толықтай жылынады. Мұнда жағажайда демалу үшін ең қолайлы уақыт – күз: тамыздың соңы мен қарашаның басы аралығы. Қыркүйекте ауа райы әлі де ыстық болуы мүмкін, ал қазанда інжір піседі. Кейде ауа райы қолайлы болып, тіпті Жаңа жылға дейін суға түсуге болады. Желтоқсаннан наурызға дейін Кашта қыстауға жайлы: күндізгі температура шамамен +15°C, ең суық ай – қаңтар. Ара-арасында жаңбыр жауып тұрады, бірақ туристер аз болады.
Кашқа қалай жетеміз және қай жерде тұрақтауға болады?
Ең қолайлысы: Даламан немесе Анталия әуежайына ұшып келіп, Кашқа трансфермен жету немесе көлік жалдау. Даламаннан Кашқа дейінгі жол – 2–3 сағат (146 км), ал Анталиядан – 3–4 сағат (190 км). Иә, жол ұзақ, бірақ терезеден табиғаттың тамаша көрінісі сізді барлық қиындықты ұмыттырады.
Кашқа баратын жол – нағыз роуд-мувидегі оқиға сияқты, мұнда жолдың өзі мақсаттан маңызды. Жол бойы тоқтап, суретке шексіз түсіре бергің келеді. Кашқа баратын автобус ескі әрі қатты жайлы емес, сондықтан біздің сапарымызға аздап драма қосты. Бірақ жолсеріктің шайы мен таулы серпантиндердің көрінісі – шаршауды ұмыту үшін жеткілікті.
Егер жайлылықты қалайтын болсаңыз, көлік жалдаған дұрыс – бұл таксиге қарағанда ыңғайлы әрі арзан. Бірақ Кашта оны қайта өткізе алмайсыз, тек Даламанға немесе Анталияға бару қажет
Туристер Кашта көбінесе таңғы ас қосылған бутик-қонақүйлерде тұрады, пәтер не вилла жалдайды. Ұзақ демалыс немесе теңіз жағасында оңашалану үшін Бююкчакыл жағажайының маңындағы немесе Чукурбаг түбегіндегі пәтерлер қолайлы. Сондай-ақ тыныш Пенинсула атты түбек бар, ол жерге көлікпен немесе таксимен 15 минутта жетуге болады. Бұл жердің табиғаты әсем, виллалар мен қонақүйлер көп, бірақ жағалауы тасты. Бір күндік сапарлар немесе қала аралап серуендеуді ұнататындар үшін орталыққа жақын жерлерде тоқтауға кеңес береміз. Ол аймақта хипстерлік атмосфера сезіледі.
Біз достарымызбен (бес адам) La Moda Aparts пәтерлерінде төрт түнге 700$-ға тоқтадық (адам басына 35$ бір түнге). Қожайынның жеке жағажайы бар қонақүйі болғандықтан, бізді тегін пароммен жеткізіп, сол жерде демалуға мүмкіндік берді.
Кашта және оның маңында не көруге болады
Мұндағы теңіз мөлдір және көкшіл. Сондықтан яхта серуендері мен дайвингке арналған ұсыныстар өте көп.
Ескі қала
1923 жылға дейін Каш грек қаласы болған, және бұл оның сәулет өнерінен айқын көрінеді. Екі-үш қабатты үйлер грек және түрік стильдерінің үйлесімін көрсетеді, ал тар, ұсақ тас төселген көшелері Ескі қаланың әр бұрышын суретке түсіргіңіз келетіндей әсер қалдырады.
Кашта музейлер жоқ, бірақ қолдан жасалған бірегей заттар сатылатын шағын дүкен өте көп. Мұнда кілемдер, ыдыс-аяқ, картиналар, кәдесыйлар мен әшекейлер табуға болады.
Жергілікті кафелер мен мейрамханалардағы тағам бағасы Түркияның басқа қалаларымен салыстырғанда қымбатырақ, бірақ өнімнің барлығы фермерлік және дәмі ерекше. Қонақүйлердің аумағында қызанақ, қияр, баялды және басқа да көкөністер мен жемістер өседі.
Қалада түрік, грек және еуропалық тағамдарды ұсынатын жайлы дәмхана мен мейрамхана көп. Әрине, міндетті түрде теңіз өнімдеріне тапсырыс беріп, теңіздің тамаша көрінісімен тамақтану ғанибет!
Суға кеткен Кекова қаласы
Кекова аралы, Каштан 25 км қашықтықта орналасқан, және бұл аймақтың басты көрікті жерлерінің бірі. Мұнда ежелгі Ликия қаласының қирандылары сақталған: қираған көшелер, тас баспалдақтар, ғимараттардың қалдықтары, колонналар мен мүсіндер. Бұл жерге барып, ежелгі дәуірдің атмосферасы мен таңғажайып көріністерін тамашалауға тұрарлық.
Аралға пароммен жетуге болады. Олар Каштан күн сайын қатынайды, жол ақысы шамамен екі мың теңге. Сондай-ақ аралды зерттеу үшін өте қолайлы түрлі бір күндік круиздік серуендер бар (оларды онлайн немесе Каштан іздеуге болады).
Грекиядағы Мейс аралы
Егер сізде жарамды шенген визасы болса, қайық жалдап, грек аралына аттануға болады. Немесе пароммен небәрі 20 минутта Мейс аралына жетуге болады, олар әдетте таңертең жүреді.
Мейсте жағалау бойымен серуендеп, грек сәулеті мен түрлі-түсті екі қабатты үйлерді тамашалауға, Рыцарьлар қамалына көтеріліп, кейін дәмді тағамдар мен балғын теңіз өнімдерінен дәм татуға болады.
Теңіз серуендері және дайвинг
Каш – Жерорта теңізінің мөлдір көгілдір сулары қоршаған порттық қала, сондықтан мұнда теңіз серуендері мен дайвинг ерекше танымал.
Суасты әлемі тек жарқын флорасы мен фаунасымен ғана емес, сонымен қатар жасырын қазыналарымен де қуантады: үңгірлер, суға батқан кемелер және ежелгі грек қайықтары. Дайындық деңгейіне қарамастан, Кашта өзіңізге лайықты дайвинг-турды оңай таба ласыз.
Ал әзірге суға сүңгуге дайын емес жандар үшін қайық экскурсиялары теңізді кезуге ең керемет жол.
Каштың үздік жағажайлары
Капуташ
Pinterest пен жарнамалық буклеттерде көрген дәл сол керемет жағажай. Капуташ Түркиядағы ең танымал жағажайлардың бірі, қаладан небәрі 20 км қашықтықта орналасқан. Мұнда бәрі ашықхаттағыдай: жартастар, ұсақ малта тас (жүруге ыңғайлы) және мөлдір көгілдір су.
Жағажай өте көркем, бірақ шағын – бар болғаны 200 метр, ал демалыс күндері адам көп. Жақсы орын алып, тұрақ табу үшін таңертең ерте келген жөн.
Каштың қалалық жағажайы
Каштың қоғамдық жағажайы орталыққа жақын, Чукурбаг түбегінде орналасқан. Мұнда жайлы демалыс үшін барлық жағдай жасалған: дәмханалар, мейрамханалар, қолшатырлар, шезлонгтар, балалар алаңы және үлкен тұрақ бар. Ескеретін бір жағдай: жағалауда ірі малта тастар бар, сондықтан ыңғайлы аяқ киім қажет.
Акчагерме
Балалармен демалуға керемет орын – Акчагерме жағажайы, ол Каштан небәрі 4 км жерде, Калканға барар жолда орналасқан. Мұнда жайлы отбасылық демалыс үшін барлық жағдай бар: тегіс жағалау, аквасаябақ, теннис корты және дәмхана.
Акчагерме бірнеше рет «Көк ту» марапатына ие болған. Бұл оның тазалығының, қауіпсіздігінің және жоғары деңгейдегі қызметінің белгісі.
Лимангазы
Лимангазы – тыныштық пен оңаша демалысты іздегендерге арналған жағажай. Ол әсем шығанақта орналасқан, және мұнда Каштан тек қайықпен жетуге болады. Қайықтар әр жарты сағат сайын жүреді, жолға шамамен 15–20 минут кетеді. Жол оңай емес, бірақ мұнда адамдар аз, және нағыз тыныш демалыстан ләззат алуға болады.
Патара
Патара – кеңістік пен оңаша болуды іздегендер үшін мінсіз орын. Бұл Түркиядағы ең ұзын жағажай (18 км) және Каштан 45 км қашықтықта орналасқан.
Жағажай ұлттық саябақ аумағында болғандықтан, кіру ақылы. Патара тек кең құмды жағалауымен ғана емес, сонымен қатар сирек кездесетін каретта-каретта тасбақаларымен де танымал. Олар осы жерде жұмыртқа салады. Тасбақаларды қорғау мақсатында жағажай тек күндізгі уақытта ашық, ал барлық қонақүй, дүкен мен дәмханалар жағалаудан кемінде бір шақырым қашықтықта орналасқан.
