Әуезді Қазақстан: ғажайып сапар үшін 5 альбом
Біз жолда не тыңдау керек екенін нақ білеміз.
Бұл бес қазақстандық альбом – кез келген сапарға лайық серік. Мейлі Каспий үстімен ұшып бара жатсаңыз, Сарыарқаның кең даласын кезіп жүрсеңіз, Мұзтау шыңына өрлеп бара жатсаңыз немесе Есік көліне қысқа бір саяхатқа шықсаңыз да, осы әуендер сапарыңызға сән береді. Фольклордың терең сарыны, хип-хоптың заманауи ырғағы, жаңаша түрленген ретро – мұның бәрі Қазақстанның рухын жүрекпен ғана емес, құлақпен де сезінуге мүмкіндік береді.
Yeski Taspa
Yeski Taspa — қазақтың классикалық әндеріне жаңаша көзқарас. Жобаның қатысушылары бұрынғы танымал әндерді аса ұқыптылықпен өңдеп, оларды хор және жанды музыкалық бэнд сүйемелдеуімен заманауи каверлерге айналдырады. Әр композицияға арнайы визуалды тартымды бейнебаян түсірілген. Оны көру тұрарлық!
Альбом «Дос-Мұқасан» тобы алғаш орындаған халық әні «16 qyz» ашылады. Бұл жолы оны dudeontheguitar заманауи өңдеуде шырқайды. Сондай-ақ альбомда Айжан Нұрмағамбетова, «МузАрт», Қыдырәлі мен Қарақат, Ренат Гайсин, Мәдина Садуақасова, Нұржан Қалжан және тағы басқа да өнерпаздардың шығармалары шырқалады. Олардың әрқайсысы — Қазақстан вокал өнерінің өз буыны мен бағытын танытушы тұлғалар.
Бұл альбом қалада демалыс пен серуен үшін таптырмас серік: мұражай аралау, көрмелерді тамашалау, таңғы specialty кофе не кешкі шараппен үйлесетін жылы, жайлы әуендер.
Қайдан тыңдаймыз: YouTube, Spotify, Apple Music, Яндекс Музыка.
jeltoksan. – «Müşel Jas»
«Müşel Jas» альбомы — тұжырымдамалық тереңдігімен және үйлесімділігімен ерекшеленеді. Әнжинақ авторы - Бексұлтан Бақытжан, яғни jeltoksan. лақап атымен танымал әнші әрі автор, әр релизінде өз көпқырлылығын көрсетіп, өткір тақырыптарды батыл көтеруден қаймықпайтын өнер иесі.
Альбом атауы — түркі дүниетанымындағы он екі жылдық өмірлік циклді меңзейді. Бұл туындыда jeltoksan өзінің 25 жасына орай толғанған терең ойларын, сұрақтары мен ізденістерін баяндайды. Бұл — есею, қателіктер, және бәрін қайта бастау мүмкіндігі туралы. Альбомның алғашқы трегі — әлеуметтік өткір тақырыпты қозғайтын хип-хоп жанрындағы проза, ол бүкіл жинаққа бағыт-бағдар береді. Кейінгі әндерде лирикалық иірімдер арқылы махаббат, достық пен адалдық жайлы сыр шертіледі. Ал соңғы «Közimdi Aşam» трегі — прологтағы тақырыптарға қайта оралып, шығарманы толық шеңберге айналдырады.
Лонгплейде Steppe Sons атты альтернативті фолк-ансамбльмен бірлескен туынды да бар, ол жалпы атмосфераны күшейтіп, ерекше бояу береді.
Бұл музыканы тыңдай жүріп, елдің түкпір-түкпіріндегі көлдер мен өзендердің, теңіз жағалауларының көрінісіне сүйсінуге болады — мейлі ол Бурабайдың орманды жоталары болсын, не болмаса jeltoksan. өзі туған Жайық өзенінің жағасы болсын, бәрі де осы әуендермен үйлесім табады.
Қайдан тыңдаймыз: YouTube, Spotify, Apple Music, Яндекс Музыка.
Turan — «Folk&Symphony (Live)»
Turan — түрлі аспапта ойнайтын бес музыканттан құралған этнофольклорлық топ. Олар көне халық әуендерін, ежелгі аспаптар мен көмеймен айтылатын әндерді қазіргі заманның музыка ағымдарымен шебер үйлестіре біледі. Бұл музыка көшпенділік, мифология және табиғатпен тікелей байланыс жайлы.
Альбом ерекшелігі: этнофольклорлық топтың әуені мен симфониялық оркестрдің үндестігі. Музыканттар қылқобыз арқылы желдің гуілін, қасқырдың ұлығанын немесе зарлы үнді жеткізсе, асатаяқ пен тоқылдақ арқылы думанды тойдың дабырын көз алдыға әкеледі.
Егер бұл әнжинақты Бозжыра шатқалында атпен серуендеп жүргенде немесе Тұзкөл жағасында Хан-Тәңірінің көрінісіне қарап тыңдасаңыз — өзіңізді тарихи фильмнің ортасында жүргендей сезінесіз. Қысқаша айтқанда, Turan тобының музыкасы автосаяхаттар үшін таптырмас серік.
Қайдан тыңдаймыз: YouTube, Spotify, Apple Music.
Kalifarniya — «Kush Pende»
«Kush Pende» — көңіл күйге арналған альбом. Фархат Қалиев, яғни Kalifarniya лақап атымен танымал орындаушы, өз туындыларында хип-хопты, махаббатқа толы лириканы және электронды би әуендерін (EDM) қазақтың дәстүрлі музыкалық элементтерімен үйлестіре біледі.
Әнжинақ Фархаттың өзін таныстыруынан басталады. Бұл — рэп орындаушыларының «gang» ұғымын қолданғаны секілді, қазақтың ақын-жырауларының өз руын таныстыру дәстүрін еске түсіреді. Әртістің сөз саптауы ұтымды, ұйқастары шебер, ал сарказм мен сатира араласқан сөйлемдері тыңдаушыны бірден баурап алады.
Бұл альбом белсенді демалысқа өте қолайлы: мысалы, Іле Алатауындағы хайкинг серуендеріне немесе Катонқарағайдағы шаңғы тебуге таптырмас музыкалық серік.
Қайдан тыңдаймыз: YouTube, Spotify, Apple Music, Яндекс Музыка.
Orynkhan — «Tau»
«Tau» альбомы — инди-фолк жанрындағы туынды, 2021 жылдан бері өз тыңдарманын табудан танбай, өзектілігін жоғалтпаған ерекше шығарма. Бұл альбом — адамның табиғатпен байланысы мен махаббаттың алуан қырын баяндайтын көпқабатты музыкалық әңгіме.
Мысалы, «Tau» мен «Tabigat» тректері табиғаттың саундтрегі іспетті естіледі. «En» мен «Gashyqpyn» - шынайы махаббаттың жүректен шыққан бейнесі болса, «Qushaqta» — жеңіл сағыныш пен жақын жаныңды құшақтағың келетін нәзік сезім жайлы.
Әндердегі аспаптық әуен тым күрделендірілмеген, керісінше, Орынханның әсем тембрін нәзік әрлеп, әндердің басты дәмін аша түседі. Дәл осы қарапайымдылық пен тереңдік — әнжинақтың басты ерекшелігі, ол сізді бей-жай қалдырмайды.
«Tau» — кез келген сапардың шымылдығын жабар тамаша туынды. Ол жол бойындағы әсерлерді жаймен жинақтап, жүректе жылы із қалдырады.
Қайдан тыңдаймыз: YouTube, Spotify, Apple Music, Яндекс Музыка.
