Көмегі тегін қонақжай гид — Алматыдағы визит-орталықтар
Бәрі бір жерде.
Алматы — Қазақстанның әр өңіріндегі жұртты өзіне баураған тылсым қала. Мұнда адамдар демалыста жаңа жер көрмекке, тауға шығып, саябақтарды аралап, «Алматының вайбын» сезінбекке келеді. Ұлттық статистиканың мәліметінше, кейінгі жылдары Алматыға ішкі туристер көптеп келе бастаған: былтыр 1.7 миллионнан аса қазақстандық қалаға қонақ болып кеткен. Бұл — елдегі барлық туристің шамамен бестен бірі.
Қала туралы сенімді ақпарат іздегендерге Алматыда туристік ақпараттық пункттер — визит-орталықтар жұмыс істейді. Бұл орталықтар жолаушыға жедел жауап беріп, бағыт-бағдар көрсету үшін құрылған.
2017 жылдан бері Алматыны туристік жер ретінде танытып, осы орталықтардың жұмысын үйлестіріп жүрген ұйым — Almaty Tourism Bureau-мен визит-орталықтардың туристерге не пайдасы барын баяндап берейік.
Visit Almaty визит-орталықтары деген не?
Бұл — қаладағы арнайы ұйымдастырылған пункттер. Онда сізге Алматының ең көрікті орындары жайлы, экскурсиялар мен іс-шаралар туралы ақпарат береді, қала ішінде қалай қатынап, қайдан тамақтанып, қайда тұруға болатыны жайлы да айтады. Қала картасы мен басқа да пайдалы ақпарат жазылған парақшаларды тегін ала аласыз. Ақыл-кеңес мен бағыт-бағдар қазақ, орыс және ағылшын тілдерінде беріледі. Осылайша орталық әр туриске ыңғайлы жағдай жасайды.
Бәрі интернетте тұр ғой, визит-орталыққа барудың қажеті не?
Себебі саяхат кезінде алған әсеріңіз бен эмоцияңыз өте маңызды. Ал бұл орталықтар сапарыңызды әдемі әрі жүйелі бастауға септеседі. Визит-орталықтар қала қонақтарына Алматыда қандай іс-шаралар өтіп жатқанын баяндап, уақытыңыз бен ақшаңызды үнемдеп, ең маңызды мәліметті бір жерден жедел алуға мүмкіндік береді.
Визит-орталық қазақстандық туриске неге керек?
- Уақыт үнемдейсіз, уайымнан арыласыз. Қажет ақпараттың бәрін осы жерден аласыз.
- Баруыңыз керек жерлерден маршрут құрып береді. Аса танымал емес көрікті орындарды да ұмытпайды.
- Саяхатыңызды жайлы әрі қауіпсіз етеді. Мына жерге бармай қалдым-ау деп сан соғып қалмай, сергек әрі сенімді сапарлайсыз.
Мұндай орталықтарды қайдан табамыз?
Алматыда мұндай тоғыз ақпараттық пункт жұмыс істейді. Олар әуежайда, ірі көлік тораптары мен қаладағы танымал жерлерде тұр.
Мекенжайлары:
- Майлин көшесі, 2 (халықаралық әуежай терминалында)
- Панфилов көшесі, 114а
- Тимирязев көшесі, 40/2 («Атакент»)
- Омаров көшесі, 76/2 («Көк-Төбе»)
- Байтұрсынов көшесі, 100/1а (Абай даңғылы мен Сәтбаев көшесінің арасында)
- Зенков көшесі, 24а (Ықылас атындағы мұражайдың жанында)
- Достық даңғылы, 56/3 («Қазақстан» қонақүйінің артында)
- Достық даңғылы, 111/1 («Көпір» аялдамасы)
- Керей-Жәнібек хандар көшесі, 465а («Медеу» спорт кешені)
Визит-орталықтың барлығы 10:00-ден 20:00-ге дейін жұмыс істейді (тек әуежайдағы визит-орталық тәулік бойы істейді). Кеңесшілер сізге қызық маршруттарды таңдауға көмектеседі, мәдени нысандар мен бүкіл отбасына арналған орындар туралы айтып береді. Мұнда туристерге бар жағдай жасалған — қазақ, орыс және ағылшын тілдеріндегі ақпараттық материалдар береді, тегін Wi-Fi және дәретханасы бар.
2018 жылы алғашқы орталық ашылғалы визит-орталықтардың қызметіне 116 мыңнан аса турист жүгінген. Олардың қатарында Қазақстанның әр өңірінен және шет елдерден келген саяхатшылар бар. Сіз де Алматыға баруды жоспарлап отырсаңыз, алдымен Visit Almaty сайтындағы іс-шаралар топтамасымен танысып шығыңыз. Ал қалаға келгенде визит-орталықтарға соға кетуді ұмытпағайсыз.
