Венада тұрғанға қанша ақша керек? Бір отбасының шығыны
Қымбат қаладағы күнкөріс.
Сәлем! Менің атым — Аружан. Екі жылдан бері күйеуім екеуіміз Аустрияның Вена қаласында тұрамыз. Бұл қала жылдар бойы өмір сүруге ең жайлы қалалар рейтингісінде көш бастап келеді. Бірден айтайын, Вена — Аустрияның ең қымбат қаласы емес. Зальцбург пен Инсбрук сияқты батыстағы қалаларда күнкөріс астанадан да қымбат. Бұл — Вена арзан деген сөз де емес, әрине. Дегенмен қала әкімшілігі тұрғындарға түрлі жеңілдіктер мен бағдарламалар арқылы шығындарын азайтуға септеседі. Бұл мақалада Венадағы күнкөріс шығындарын жазып шықтым.
Алдымен виза алдық
- Жергілікті саябақтар
Аустрияға келу үшін алдымен студенттік ықтиярхатқа өтініш беру керек. Ондай хатты Астанадағы Аустрия елшілігі арқылы тапсырасыз. Өтініш мақұлданғаннан кейін VFS визалық орталығы арқылы ұлттық D визасына өтініш бересіз.
Студенттік ықтиярхатқа өтініш беру 218 EUR (шамамен 117 мың KZT) тұрады және оны сіз жыл сайын жаңартып отыруыңыз керек. Мен студент болғандықтан D визасын тегін алдым, ал күйеуіме осы визаны алуға 150 EUR (шамамен 81 мың KZT) төледі.
Құжаттар тізімі стандартты визаға тапсырғандай болады. Бірақ бір ерекшелігі бар: егер алғаш рет D визасына өтініш беріп отырсаңыз, шотыңыздағы қаражаттың қалай келгенін дәлелдеуіңіз керек.
Ықтиярхатты алуға өтінішіңіздің жауабын 3 аптадан бастап 4 айға дейін күтесіз. Себебі сіздің өтінішіңіз бойынша Астанадағы елшілік емес, Аустриядағы сіз баратын қаланың әкімшілігі шешім қабылдайды. Біз тапсырған өтінішіміздің жауабын 4 апта күттік, ал D визасын 3-4 күнде алдық.
Венаға билет алдық (студенттерге жеңілдік бар)
Қазақстаннан Венаға тікелей рейс әзірге жоқ. Біз онда Ыстамбұл арқылы жеттік.
Студенттерге тамаша бір мүмкіндік бар: Turkish Airlines-та аккаунтыңызда студент мәртебесін растасаңыз, билетке жеңілдік аласыз және екінші жүкті тегін таси аласыз. Студент жеңілдігімен менің Астана–Ыстамбқл–Вена бағытындағы билетім 2 шабаданмен 265 000 теңгеге шықты. Ал тап мен сияқты екі шабадан алған, бірақ студент емес күйеуімнің билеті 390 000 теңге болды.
Венаға басқа да бағыттармен жетуге болады. Мысалы, Pegasus Airlines әуе компаниясы Ыстамбұл арқылы ұшады. A-Jet рейстері Астанадан Анкара арқылы қатынайды, ал AZAL ұшағымен Баку арқылы жетесіз. Қай бағытты таңдайтыныңыз билет бағасы мен ұшу уақытына байланысты.
Егер бірнеше рет ұшақ ауыстырғыңыз келмесе, SCAT әуе компаниясының Астанадан Прагаға тікелей рейсін таңдауға болады. Прагадан Венаға дейін пойызбен не автобуспен шамамен төрт сағат жүресіз.
Тұратын жер іздедік
Венада пәтер табу оңай емес. Көп жағдайда пәтер иелері үйін жалға бермес бұрын жалға алушымен міндетті түрде кездесіп алады.
Пәтерге келгенде біздің жолымыз болды. Жаңа салынған тұрғын үй кешенінен пәтер таптық. Мұнда пәтерлер ұзақ мерзімге жалға беріледі және кепілгер не жұмыс орнынан анықтама сұралмайды. Келісімшартқа онлайн қол қойдық. Қазір осы үйде екінші жыл тұрып жатырмыз. Коммуналдық төлем жалдау ақысының ішінде болғандықтан, оның нақты қанша екенін білмеймін.
Жалғыз келген студент таныстарымның көпшілігі жатақханада не басқалармен бірге пәтер жалдап тұрады. Вена — студенттік қала, сондықтан жатақхана аз емес: Stuwo, Fizz, OeJAB, OeAD, Viennabase22 және тағы басқалар. Бірақ сұраныстың жоғары болғандықтан, пәтер табуға ертерек қамданған дұрыс. Пәтерді мына сайттардан іздеуге болады: willhaben.at, housinganywhere.com, arsenal-living.at, theblueground.com.
Венада тұру бағасы таңдаған баспанаңызға байланысты. Жатақханадағы бір бөлменің айлық ақысы шамамен 350–800 EUR (шамамен 430 мың KZT) аралығында. Ал студия немесе бір бөлмелі пәтер жалдағыңыз келсе, айына орта есеппен 700–1 600 EUR (шамамен 860 мың KZT) төлеуге дайын болған жөн.
Аудан таңдағанда ескеріңіз
Венада жиыны 23 аудан бар және әрқайсысының атмосферасы ерекше:
- 21, 22-аудан — Дунайдың екінші жағында, табиғатқа жақын, отбасылық атмосфера
- 6, 7-аудан — жастарға арналған, хипстерлік
- 19-аудан — бай отбасылар тұрады
- 3-аудан — біздің аудан. Көлік торабы ыңғайлы, вокзалға жақын, орталыққа жаяу 30 минутта жетесіз
10–12 және 15–16-аудандарда иммигранттар көп тұрады. Сол себепті бұл аудандар у-шу, қарбалас көп. Қылмыс деңгейі де басқа аудандарға қарағанда сәл жоғары. Мұнда ескі әрі бағасы қолжетімді тұрғын үйлер көбірек, сондықтан туристер мен балалы отбасылар көбіне қаланың тыныш аудандарында тұрғанды жөн көреді.
Ішіп-жемге қанша кетеді?
- Cafe Central
Қалада төрт ірі супермаркет желісі бар: Billa, Spar, Hofer (Aldi) мен Lidl. Алғашқы екеуінде таңдау мол, бірақ бағасы жоғары. Соңғы екеуі — бюджеттік нұсқа.
Вена — көпұлтты қала, сондықтан мұнда әр түрлі елдің тауарларын сататын дүкендер де жетерлік. Ең танымалдары — түрік Etsan мен шығысеуропалық MixMarkt. Бұлардан басқа болгар, армян, үнді, вьетнам мен тағы басқа дүкендерді де кездестірдім.
Тамақ шығыны
Жұбайым екеуіміз айына азық-түлікке шамамен 600 EUR (шамамен 323 мың KZT) жұмсаймыз. Бірақ шоколад, печенье сияқты дайын тәттілерді көп алмаймыз, тамақты көбіне үйде дайындаймыз. Бұл — ең үнемді нұсқа.
Сүт | 1.3-2 EUR (шамамен 1 075 KZT) |
|---|---|
Нан | 1-5 EUR (шамамен 2 688 KZT) Аустриялықтар нан мен бәлішті жақсы көреді — дәмі де, бағасы да көңілге қонымды. |
Жұмыртқа | 2.70–5 EUR (шамамен 2 688 KZT) Жұмыртқаның бағасы оның көлеміне және тауықтың қалай өсірілгеніне байланысты. Қолда өскен тауықтың жұмыртқасы әдетте фабрикада өсірілген тауықтың жұмыртқасына қарағанда қымбатырақ болады. |
1 кг сиыр еті | Etsan түрік супермаркетінде — 16 EUR (шамамен 8 601 KZT) Billa, Spar супермаркеттерінде — 18 EUR (шамамен 9 677 KZT) |
Қияр | Billa-да — 8 EUR (шамамен 4 301 KZT) |
Сүт | |
|---|---|
Нан | |
Жұмыртқа | |
1 кг сиыр еті | |
Қияр |
Ал сыртта тамақтанатын болсаңыз, бағалар шамамен мынадай:
- Billa дүкеніндегі сэндвич — 2 EUR (шамамен 1 075 KZT);
- жартылай дайын тағамдар — 4 EUR (шамамен 2 150 KZT);
- түрік не араб дөнері — 5–10 EUR (шамамен 5 376 KZT);
- пицца — 10–20 EUR (шамамен 11 мың KZT).
Венада әлемнің түкпір-түкпірінен келген асханаларды табуға болады. Бұл қаланың маған ұнайтын тұстарының бірі — осы. Әзірге мұнда қазақ мейрамханасы жоқ. Бірақ өте дәмді өзбек тағамдарын пісіретін Samarkand рестораны бар. Венаға жолыңыз түссе, кіріп шығыңыз.
Кофе мәдениеті
Венаның кофе мәдениеті ЮНЕСКО-ның материалдық емес мәдени мұра тізіміне енген. Мұнда веналық меланж (Wiener Melange) ішіп, кофеханаларда уақыт өткізуді өте жақсы көреді. Ең әйгілі кофеханалар Cafe Central, Cafe Landtmann мен Cafe Sperl дер едім. Кофе аса қымбат емес. Бір кесе веналық меланж немесе капучино шамамен 4 EUR (шамамен 2 150 KZT), ал латте 4,2–6 EUR (шамамен 3 226 KZT) еуро тұрады.
Қала ішінде қалай қатынаған дұрыс?
Венаның көлік жүйесі өте ыңғайлы: автобус, трамвай, 5 желілі метро мен жылдам пойыздары бар.
Билет бағалары:
- Бір жол жүру (2 сағатқа дейін) — 3 EUR (шамамен 1 613 KZT)
- Жылдық абонемент (барлық көлік түрлері) — 461 EUR (шамамен 248 мың KZT)
- 26 жасқа дейінгілерге жылдық абонемент — 294 EUR (шамамен 158 мың KZT)
- Бұрын студенттерге арналған семестрлік абонемент (5 ай) 75 EUR (шамамен 40 мың KZT) тұрған, бірақ қазір бұл опция жоқ.
Билеттерді WienMobil қосымшасынан сатып алуға болады. Айта кетейік, Венада турникет жоқ, билеттер жүйесі толықтай сенімге негізделген. Бірақ контролер тексеру кезінде, сіздің билетсіз жүргеніңізді біліп, ұстап алса, айыппұл — 110 EUR (шамамен 59 мың KZT).
Жергілікті жұрт Венада «үш мезгіл бар» деп әзілдейді: күз, қыс және құрылыс маусымы. Жазда қалаға келетін туристер жол жөндеу жұмыстары мен жабық жолдарға дайын болсын. Таксиден Uber мен Bolt жұмыс істейді. 10 минуттық жол кемінде 13 EUR (шамамен 6 989 KZT) тұрады.
Ойын-сауық
- Вена операсы
- Вена операсы
Тегін не су тегін қызықтар
Венада 100-ден астам мұражай бар. Олардың кейбіріне жыл бойы, басқасына кей күндері тегін кіруге болады. Мысалы, әр айдың бірінші жексенбісінде Арсенал әскери-тарихи мұражайына және Габсбург әулетінің патшайымдарының бірі жазда тұрған Hermesvilla сарайына тегін кіре аласыз.
Ал Бельведер сарай кешені, онда Климттің әйгілі «Өбісу» картинасы сақталған, айына бір рет жұма күні кешке келушілерді тегін қабылдайды. Бірақ нақты күні ай сайын өзгеріп отырады. Вена мұражайына кіру тегін. Бұл — қаланың тарихы мен мәдениетін таныстыратын ең қызық әрі ең үлкен мұражайлардың бірі.
Тегін демалыстың тағы бір нұсқасы — хайкинг! Қала ішінде 14 ресми маршрут бар. Ал аймақтық пойызға мінсеңіз, 1–1.5 сағатта тауға жетесіз.
- Қаланың тау бөктеріндегі көрінісі
- Бельведер
- Зоопарк
- Шёнбрунн
Жылына бір-екі рет әлемдегі ең көне хайуанаттар бағы саналатын Шёнбрунн бағына небәрі 1 EUR (шамамен 538 KZT) лотерея билетін алып кіруге болады. Ал Jahreskarte атты қоғамдық көліктің жылдық абонементі болса, кейбір музейлер мен көрмелерге тегін кіру мүмкіндігі де беріледі.
Жасыңыз 27-ге толмаған болса, Вена опера театрының ең жақсы орындарына 20 EUR (шамамен 11 мың KZT) билет сатып ала аласыз. Сондай-ақ музыкалық филармония студенттерінің классикалық музыка концерттеріне тегін кіруге мүмкіндік бар. Ол үшін афишаны жіберіп алмай, алдын ала бақылап жүрген жөн.
Спортпен айналысу бағасы да әртүрлі. Спортзалға айлық абонемент 30 EUR (шамамен 16 мың KZT) басталады. Пилатестің 10 сабағы шамамен 220 EUR (шамамен 118 мың KZT), ал жаттықтырушымен бір сағат теннис ойнау 80 еуродан басталады.
Көңіл көтеруге кететін шығын да аса көп емес. Кино билеті шамамен 10 EUR (шамамен 5 376 KZT) тұрады. Ал бардағы бір саптыаяқ сыра не бір коктейльдің бағасы 5 EUR (шамамен 2 688 KZT) басталады.Жаттығу залы мен музей
Енді шығынды есептейік
Бір адамға қанша кететінін есептеп шықтым.
Режим | Шығын, кем дегенде | |
|---|---|---|
Эконом | Екі адамдық жатақхана бөлмесінде тұрасыз. Тамақты негізінен үйде дайындайсыз. Тек ең қажетті шығындарға ақша жұмсайсыз. | 650 EUR (шамамен 349 мың KZT) |
Комфорт | Жатақхананың бір адамдық бөлмесінде тұрасыз. Тамақты көбіне үйде ішесіз, кейде кафеға барасыз. Демалыс күндері серуендеп, шағын саяхатқа шығуға мүмкіндік бар. | 1 000 EUR (шамамен 538 мың KZT) |
Қымбат | Студияда не бір бөлмелі пәтерде тұрасыз. Үйде де, кафе мен мейрамханада да тамақтанасыз. Саяхаттап, көңіл көтеріп, сауда жасауға да бюджетіңіз жетеді. | 1 500 EUR (шамамен 806 мың KZT) |
Эконом
Шығын, кем дегенде
Комфорт
Шығын, кем дегенде
Қымбат
Шығын, кем дегенде
Аустрия — мәдениеті бай, табиғаты сұлу, қауіпсіздігі мен тәртібі жоғары ел. Оның тағы бір үлкен артықшылығы — Еуропаның дәл ортасында орналасуы. Сондықтан Венадан Еуропаның көптеген еліне оңай әрі жылдам жетуге болады. 1955 жылдан бері Аустрия бейтарап саясат ұстанып келеді. Соның арқасында бұл елге әлемнің түкпір-түкпірінен туристер ағылады.
Бірақ бұл — жергілікті тұрғындар туристерді ерекше ықыласпен, құшақ жая қарсы алады деген сөз емес. Сондықтан Венада ұзақ уақыт тұрып, жергілікті өмірге тезірек бейімделгіңіз келсе, аустриялық неміс тілінің диалектісін үйренуге дайын болғаныңыз жөн.
