Арманыңдағы концерт: аман-есен барып-қайту, ескеретін жайттар және пайдалы кеңестер
Бәрін ескердік: билеттерді жіберіп алмау, баспана жалдау, бір топ адам ішінде абдырап қалмай, концертке уақытылы барып-қайту.
Концерт маусымы әлдеқашан басталып кетті, егер әлі билет алмаған болсаңыз, сапарыңызды жоспарлайтын кез келді. Бірақ мұның бәрін ойланып, ақылмен жасау керек. Мен сүйікті әртістерімнің шетелде өткен оннан аса концертіне бардым, енді осы мақалада сапарды тиімді жоспарлауға көмектесетін нәрселерді айтып беремін.
- Сапарды алдын ала жоспарлаңыз және билеттерді жіберіп алмаңыз
- Концерт өтетін жерге жақын баспана таңдап, мүмкін болса метромен жүріңіз
- Концерт өтетін күні басқа жоспар құрмай, өзіңізбен бірге ең керек деген заттарды алып барыңыз
- Фан-зонаға билет алсаңыз, алдын ала келіңіз
- Концертке барғанда жақсы уақыт өтіңіз, бірақ өзгелерге кедергі келтірмеңіз
- Кері қайтқан кезде адасып кетпеңіз
- Шағын FAQ
Сапарды алдын ала жоспарлаңыз және билеттерді жіберіп алмаңыз
Ең жақсысы — билеттерді ресми өкілдер сатылымды бастаған сәтте сатып алу. Сонда алыпсатарларға артық ақша төлеудің қажеті болмайды. Әдетте сатылым турдың басталуына бір жыл немесе бір жарым жыл қалғанда ашылады — бұл концерт өтетін уақыт пен орнына байланысты. Бірақ кейде билеттер ивентке небәрі бірнеше ай қалғанда ғана сатыла бастайды.
Билеттен құр қалмау үшін орындаушының әлеуметтік желілерін және ресми сайтын мұқият бақылап жүру қажет. Мәселе мында: әнші алдымен тур жайлы өз парақшаларында хабарлайды (мерзімі, қалалар мен елдер), ал ресми сайтында концерт өтетін стадиондар мен алаңдардың тізімі жарияланып, билет сататын ресми өкілдердің сілтемелері қоса беріледі. Шетелдік концерттерге билеттер, әдетте, Ticketmaster секілді платформаларда сатылады.
Осы кезде мыналарды ескеріңіз:
- Өзіңізге ыңғайлы қаланы таңдап, билет сатылымының басталатын күнін күнтізбеңізге белгілеп қойыңыз.
- Концерт өтетін орынды алдын ала қарап шығып, қай сектордан билет алғыңыз келетінін шешіп алыңыз — бұл уақытыңызды үнемдейді. Себебі сатылым кезінде нағыз билет «соғысы» басталады: онлайн-кезек ұзара беріп, сайт мүлде ашылмай қалуы мүмкін (Астанадағы Джей Ло концерті есіңізде ме?).
- Достарыңызбен келісіп, бірнеше құрылғы арқылы бір уақытта билет алып көруге тырысыңыз — жақсы орынға ие болу мүмкіндігі артады.
- Платформада алдын ала тіркеліп қойыңыз. Егер сайт сенімді болса, төлем деректерін сақтап қойған да жақсы — бұл да уақытты үнемдеуге көмектеседі.
2019 жылы құрбым Лондонда өтетін BTS тобының концертіне екі құрылғы арқылы билет алмақ болды, бірақ еш нәтиже шықпады — ал мен билет алып үлгердім. Дәл сондай жағдай менің басымнан да өтті: 2023 жылы Тейлор Свифттің концертіне билет алу үшін үш құрылғыдан бірнеше сағат бойы онлайн-кезекте тұрдым, бірақ ақыры билетті мен емес, күйеуім өз ноутбугінен сатып алды.
BTS концертінде
BTS концертінде
Әрине, кейде сатылым баяу жүріп, жақсы орындар біраз уақыт бойы қолжетімді болып тұрады. Бұл көбіне турға қосымша концерт күндері енгізілген жағдайда болады. Сол себепті өзіңізге ыңғайлы орын мен уақытты таңдап, билет сатып алу үшін орындаушының түрлі платформаларын үнемі қайта-қайта тексеріп отырған жөн.
Егер билеттер таусылып қалса, алыпсатарлардың сайттарын қарап көріңіз. Көбіне бұл — концерт билеттеріне арналған «olx» іспеттес viagogo платформасы. Иә, бағалар әлдеқайда қымбат, әрі алданып қалуыңыз да мүмкін, бірақ фан-топтардағы бейресми сатушылардан билет іздегеннен гөрі қауіпсіздеу.
Концерт өтетін жерге жақын баспана таңдап, мүмкін болса метромен жүріңіз
Көбіне концерт өтетін жерлер қаланың шет жағында орналасады. Егер сіз қалаға тек концерт үшін келген болсаңыз, алаңға жақын жерден қонақүй жалдаған дұрыс — ең тиімдісі жаяу жетуге болатын қашықтықта болғаны. Ал егер концертке баруды демалыспен ұштастырып жатсаңыз, өзіңізге ыңғайлы ауданда тоқтаңыз және концерт өтетін жерге қалай жетуге болатынын алдын ала біліп алыңыз.
Үлкен қалаларда концерт өтетін күні метроға мінген тиімді. Егер концерт ауқымды шара болса әрі туристер көп жиналатын болса, метрополитен қосымша вагондар шығарып, жолаушылар ағынын азайтуға тырысады. Кейде мұндай күндері метро мүлде тегін болады — жаңалықтарды тексеріп отырыңыз немесе метро қызметкерлерінен сұрап біліңіз. Мысалы, 2024 жылдың қарашасында Сиднейде өткен Coldplay концерті кезінде қалада Olympic Park-ке дейін қоғамдық көлікпен жүру тегін болды — тек билетіңізді көрсету жеткілікті еді.
Такси мен автобусты да қарастырып көріңіз, бірақ бұл жағдайда уақыт жағынан сақ болу керек — кептелістерден қашып құтыла алмайсыз.
Концерт өтетін күні басқа жоспар құрмай, өзіңізбен бірге ең керек деген заттарды алып барыңыз
Концерт өтетін күні күш-қуатыңызды үнемдеп, өзіңізді шараға дайындаңыз. Киімді ауа райына қарай таңдаңыз, ал ең бастысы — ыңғайлы аяқкиім киіңіз, әсіресе фан-аймақта тұратын болсаңыз, бұл өте маңызды.
Мүмкіндік болса, иыққа ілетін мөлдір сөмке алыңыз (белге тағылатын бананка-сөмке тіптен керемет болады) және ішіне ең қажетті заттарды ғана салыңыз: құжаттар, концерт билеті (егер басып шығарсаңыз), пауэрбанк, ұялы телефон және жеке заттар. Қауіпсіздік қызметіне мөлдір сөмкені тексеру әлдеқайда оңай, сол себепті сізді көп кідіртіп жатпайды. Ал концерт кезінде пауэрбанкті немесе басқа затты сөмкеден алып шығу өзіңізге де ыңғайлы болады. Көлемді аксессуарлар, ашық аяқкиім мен бағалы бұйымдарды алып бармаған жөн — зат қаншалықты аз болса, ішке соғұрлым жылдам кіресіз.
Құжат ретінде жүргізуші куәлігін алған жөн (егер жоқ болса, паспортты алыңыз). Кей концерт алаңдарында қауіпсіздік қызметі не бармен жасыңызды растау үшін құжат сұрауы мүмкін. Кейбір елдерде шетелдіктерден тек паспорт талап етіледі, сондықтан сапарға шығар алдында бұл ақпаратты алдын ала тексеріп алыңыз.
Әр концерт алаңының ішке алып кіруге болмайтын заттар жөнінде өз ережесі болады, бірақ көбінесе мыналарға тыйым салынады: жарылғыш және денсаулыққа қауіпті заттар, тамақ пен сусын, штативтер, селфи-таяқшалар және кәсіби фотоаппараттар.
Фан-зонаға билет алсаңыз, алдын ала барыңыз
Егер сіздің орныңыз отыратын секторда болса, билетте көрсетілген есіктің ашылатын уақытына қарай барған дұрыс. Әдетте ұйымдастырушылар концерт басталғанға дейін тыңдармандардың келіп, кезекте тұрып, тексеруден өтіп, өз орындарына жайғасып үлгеруі үшін жеткілікті уақыт береді.
Егер фан-зонаға билет алсаңыз, сахнаға қаншалықты жақын тұрғыңыз келетініне қарай концерт алаңына ертерек келіңіз. Орындаушының басқа концерттерінде фанаттар қанша уақыт бұрын келгенін әлеуметтік желілерден қарап, алдын ала бағамдап алыңыз (мен, мысалы, концерт басталардан екі сағат бұрын барамын). Қолшатыр, күннен қорғайтын крем және жеңіл тамақ ала барған дұрыс.
Ал егер мерч алғыңыз келсе, кезекке ертерек тұруға тура келеді — әйтпесе сізге керек өлшемдері қалмай қалуы мүмкін. Бірақ ең дұрысы — мерчке концертке дейін не кейін онлайн тапсырыс беру: таңдау көбірек, әрі халықтың арасында артық кезекке тұрмайсыз.
Кейбір әртістер қала ортасына арнайы мерч-фургон қояды, сонда фанаттар концертке дейін келіп, тауарларын сатып алып, сол мерчпен концертке бара алады. Мұндай ақпаратты да әлеуметтік желілерден қадағалап отыру маңызды.
Концертке барғанда жақсы уақыт өткізіңіз, бірақ өзгелерге кедергі келтірмеңіз
Ең қиыны артта қалды — сіз концерттесіз! Жаныңыздағы адамдарға құрметпен қараңыз: итермеңіз, сусын не пластик стақан лақтырмаңыз, ұзақ уақыт бойы жарқыл қосып түсірмеңіз. Өз орныңызда билеңіз, біреу өзін нашар сезінсе, көмектесуге тырысыңыз — концерттегі атмосфера бәрімізге маңызды.
Көбірек өзіңізді түсіруге тырысыңыз. Орындаушының концертінен үзінділерді кейін интернеттен оңай табуға болады, ал сіздің сол сәттегі бақытты жүзіңізге қарау — немерелеріңізге, достарыңызға, тіпті өзіңізге әлдеқайда қызығырақ болмақ.
Кері қайтқан кезде адасып кетпеңіз
Концерттен кейінгі ең маңызды нәрсе — көпшіліктің арасында жоғалып кетпей, қонақүйге аман-есен оралу. Егер достарыңызбен бірге келген болсаңыз, шығатын кезде бір-біріңіздің қолыңыздан ұстап жүріңіз — тура лагерьдегідей. Кенеттен бөлініп кетсеңіз, алдын ала басты кіреберістен алшақ бір кездесу орнын белгілеп алыңыз. Тіпті сол орынды Google Maps-та белгілеп қойған дұрыс.
Концерттен кейін қайтар жол нағыз шағын апокалипсиске айналуы мүмкін. Метроға лық толы адамдар, такси тапшы, жолда ұзын-сонар кептелістер. Сондықтан қонақүйге қайтарда келген жолмен жүргеніңіз дұрыс — бейтаныс бағытпен жүремін деп адасып кетуіңіз мүмкін.
Концерттен кейін жақсылап демалып, күш жинаңыз — алты сағат, тіпті одан да көп уақыт бойы көпшіліктің арасында тұру оңай емес. Тынығып алған соң, қалай барып-келгеніңізді әлеуметтік желілерде жазыңыз. Әртістің және турдың хэштегтерін қосуды ұмытпаңыз — бұл басқа фанаттарға сіздің жазбаңызды табуға көмектеседі.
Мен концерттен кейін қалада тағы бірнеше күнге қалғанды ұнатамын. Себебі әр бұрышта сүйікті әртісіңнің мерчін киген жанкүйерлерді кездестіруге болады. Қоғамдық орындарда әндері ойнап жатады, айналадағылар қосылып айтып тұрады — мұндай атмосфера концерт жайлы естеліктеріңізді одан сайын әсерлі етеді.
Тейлор Свифттің Лиссабондағы концертінен кейін жанкүйерлерді барлық жерден көруге болатын — көрші шағын қалаларда, сауда орталықтарында, тіпті мейрамханаларда да. Мекемелерді оның хиттері ойнап тұрды, ал адамдар бірге ән айтып, билеп жатты. Кітап дүкендерінде Тейлордың шығармашылығына арналған арнайы сөрелер қойылыпты — көзге бірден түседі. Маған қала немесе тіпті бүкіл ел сол сәтте әншінің фан-базасымен бірге өмір сүріп жатқандай әсер қалдырды.
Шағын FAQ
Алдымен нені сатып алған жөн — ұшақ билеті ме, әлде концертке билет пе?
Егер сапардың басты мақсаты — концертке бару болса, ең алдымен концертке билет сатып алған жөн. Содан кейін ғана бағытыңызды жоспарлап, ұшақ билеттерін қараған дұрыс. Концертке бару — ұмытылмас әрі көп күш талап ететін дүние, сондықтан бүкіл сапарыңызды сол шараға ыңғайластырып ұйымдастырған тиімді.
Концерт кейінге шегерілсе немесе мүлде өтпейтін болса, не істеу керек?
Өкінішті, бірақ мұндай жағдай концертке бір күн қалғанда да болып жатады. Мұндай жағдайда сіз жасай алатын жалғыз нәрсе — ресми сайт арқылы билет құнының 100% қайтарымын сұрату. Ал егер концерт кейінге қалдырылса, жағдай сәл күрделірек: кейбір әртістер немесе ресми өкілдер билет құнын толық қайтармайды. Іс-шараны бір айға, бір жылға немесе тіпті белгісіз мерзімге шегеруі мүмкін.
Концерттің кейінге шегерілуін немесе мүлде өтпей қалуын алдын ала болжау мүмкін емес, сондықтан әрқашан сақтықпен жоспарлаған дұрыс. Ұшақ билеттері мен қонақүйлерді күнін ауыстыруға немесе тегін бас тартуға болатындай етіп брондаңыз.
«Сақтандыру» ретінде сапарыңызды концертсіз де қызықты болатындай етіп жоспарлаған жөн. Концертке баруды жаңа елге немесе бірнеше қалаға саяхатпен ұштастырыңыз. Сонда концерт өтпей қалса да, сапар бекер өтпейді.
