Чехия супермаркетінен не әкелуге болады: 5 000 теңгеге дейінгі 7 нұсқа
Сөрелердегі ең үздігі: сыра, жеңсік ас, шоколад пен шарап.
Прагадa туристер хрусталь мен қуыршақ-марионеткаларды сыйлық ретінде сатып алып жатады. Бірақ бізде одан да жақсырақ идея бар: жергілікті супермаркетке барып көріңіз! Онда қала тұрғындары нан мен сүт («сыра» деп оқыңыз), сүйікті тәттілері мен жеңсік ас алады. Сонымен қатар егер барлық ақшаңызды дәмханалар мен көрікті жерлерге жұмсап қойған болсаңыз, супермаркет – тамаша әрі үнемді таңдау.
Карловар вафлилері
Дәстүрлі чех вафлилерін «оплатки» деп атайды. Оларды емдік қасиеті бар Карловы Вары қайнарларының суы негізінде дайындайды. Супермаркет сөрелерінде олар көп кездеспейді, бірақ ең танымалы — Opavia фабрикасының вафлилері. Олар 1856 жылдан бері өндіріп келе жатыр. Дәмдері бойынша да таңдау кең. Какао, шоколад не жаңғақ қосылғаны бар. Сізге кеңесім: бірден бірнеше қаптама алыңыз. Себебі біреуін үйге қайтар жолда жеп қоятыныңыз анық.
Бір қаптаманың бағасы: 100 чех кронасы (шамамен 2 000 теңге).
Чех сырасы
Чехия – сыра сүйер қауым үшін нағыз жұмақ. Бұл мәртебенің сыры – Орта ғасырларда қалыптасқан дәстүрлерде. Мұнда сыраны құрметтеп, оны мәдениеттің бір бөлігі деп санайды. Елде 500-ден астам сыра түрін табуға болады. Көптеген өндірушінің ассортиментінде алкогольсіз сыра да бар, бұл қазір Чехияда сәнге айналған. Қателеспеу үшін бөтелкелерден «nealkoholické pivo» немесе қысқаша «nealko» деген жазуларды іздеңіз.
Сыраның бағасы (жарты литрлік құты үшін): 25–40 чех кронасы (шамамен 500–800 теңге).
Чех ірімшіктері
Чехияда ірімшікті сырадан кем жақсы көрмейді. Ең танымал ірімшік – гермелин (hermelín). Бұл сиыр сүтінен жасалатын жұмсақ, ақ зеңді ірімшік. Ол камамберге ұқсайды. Гермелинді қуырады, маринадтайды немесе шараппен бірге жейді. Супермаркет сөрелерінде ең танымал брендтер – Král Sýrů және Sedlčanský.
Тағы бір танымал чех ірімшігі – нива (niva). Бұл көк зеңді жартылай жұмсақ ірімшік, ол салаттармен, соустармен және нанмен керемет үйлеседі. Ниваны чехтың Madeta компаниясы шығарады. Аталмыш кәсіпорын зеңді ірімшіктерден бастап, ерітілген түрлеріне дейінгі ассортиментімен танымал. Ірімшіктер 100 граммдық қаптамада сатылады. Сондықтан шабаданға тасымалдауға өте ыңғайлы.
100 граммның бағасы: 30–75 чех кроны (шамамен 600–1 500 теңге).
Studentská Pečeť чех шоколады
Чехияның аңыз Studentská Pečeť шоколады туралы айтпай кету мүмкін емес. Оның да дәмі мен салмасы да сан алуан. Мейіз, жаңғақ, тіпті желе қосылғанын таба аласыз. Тарихына аздап шолу жасайық. Аталмыш шоколад 1975 жылдан бері өндіріледі. Алғашында оны Модржанидегі Orion зауытында жасаған, кейін өндірісті Оломоуц қаласындағы Zora зауытына көшірді. Сол уақыттан бері әлі күнге дейін осы жерде шығарады. Шоколад әртүрлі қаптамалар мен көлемдерде сатылады, кез келген талғам мен бюджетке сәйкес тәттіні табуға болады.
Бір плитканың бағасы: 50–145 чех кроны (шамамен 500–3 000 теңге).
Чех паштеттері
Гурман үшін ең жақсы сыйлық — үйде жасалған паштет. Дәмдер сан алуан. Шарап қосылған моравиялық паштет, қызыл және қара бұрышпен, күркетауық пен жұмыртқа паштеті – әркім өз талғамына сай өнім таба алады.
Егер ерекше әрі тарихы бар нәрсе алғыңыз келсе, Hamé компаниясының Májka паштетінің дәмін көріңіз. Бұл Орталық және Шығыс Еуропадағы ең танымал бренд, кәсіпорын 1966 жылдан бері жұмыс істеп келеді.
Қаптама бағасы: 30–145 чех кроны (шамамен 600–3 000 теңге).
Чех тосабы
Егер Прага қаласынан жанға жылу сыйлайтын сыйлық алып келгіңіз келсе, ол – хош иісті тосабы. Мұнда ерекше дәмдер таңғалдырады. Дүкендер сөрелерінде ром қосылған қара өрік, ваниль қосылған алмұрт, розмарин қосылған таңқурай сынды таңғажайып үйлесімді табуға болады. Zezem және Ježkův statek өндірушілерінің тосабын ұсынамын. Олардың өнімдері тек үй жағдайында жасалады. Көп қаражат қажет етпейтін нұсқа ретінде Hame өнімдерін таңдаңыз. Ол да өте дәмді.
Бір құты бағасы: 50–170 чех кроны (шамамен 1 000–3 500 теңге).
Чехия ликёрлері
Чехтың шөптен жасалған әйгілі ликёры Becherovka. Оны сатып алмау - қылмыс. Бірақ Чехиядан жұмыртқа ликёрін де алып келуге болады. Жергілікті тұрғындар оны әдетте Рождество мен Пасха мерекелерінде ішеді. Алайда біз үшін (және сіз үшін де деп үміттенеміз) әр күн – мереке! Сондықтан тәжірбиелерден қорықпайтын достарыңызға бір-екі бөтелке ала кетіңіз. Сонымен қатар сөрелерден 14 түрлі шөптен дайындалған фернетті немесе құрамында 40 түрлі шөп бар магистер ликёрін табуға болады.
Бір бөтелкенің бағасы: 95–145 чех кроны (шамамен 2 000–3 000 теңге).
