Сәтсіздіктер «жасап шыққан» нұсқаулық: Aviasales.kz командасының саяхаттағы фиасколарынан туған даналық
Саяхаттауды жанындай жақсы көретін жандардың сәтсіз сапарлар туралы хикаялары.
Саяхат – жаңа орындарды ашып, жарқын әсерлерге бөленудің керемет мүмкіндігі. Бірақ демалыс сәтсіздіктер мен тосын жағдайларға толы болып шықса ше? Бұл мақалада Aviasales.kz командасы демалудың орнына жоспарларын өзгертіп, жоғалған жүкті іздеп, жайсыз қонақүйлерге тұруға тура келген ең қиын әрі есте қалған сапарлары жайлы баяндайды.
Грузия: мың құбылған ауа райы мен қаңырап қалған туристік қала
Альбина, Aviasales.kz жетекшісі
Мен әрбір сапардың өзіндік әдемілігі бар деп есептеймін және сәтсіз жағдайлардан да пайда табуға тырысамын. Бірақ кейде бәрі біз қалағандай бола бермейді. Мен Грузияда дәл осындай жағдайға тап болдым.
2021 жылдың қыркүйек айы еді. Біз бес жылдан кейін алғаш рет отбасымызбен он күндік демалысқа шықтық. Жеті күнді Урекиде, үш күнді Батумиде өткізуді жоспарлағанбыз. Бірақ Урекиде бар болғаны төрт күн ғана болдық.
Бастапқыда бәрі жақсы болды. Біз теңізге шомылып, маусым соңында әлі жұмыс істеп тұрған дәмханаларда керемет тағамдардан дәм таттық. Екінші күні нөсер жаңбыр басталып, үш күн бойы тоқтаусыз жауды. Алғашқы күні күн ашылады деп үміттендік, бірақ ауа райы суыта бастады. Сөйтіп біз екі баламен үш күн бойы бөлмеден шықпай отырдық. Интернет істемей қалды, дәмханалар жабық болды. Демалысты қалай да құтқару үшін Батумиге ертерек жол тартуға шешім қабылдадық. Бұл өте дұрыс шешім болды. Батумиде біз бес күн бойы шуақты ауа райын пайдаланып, жанымыздағы керемет мейрамханаларда демалдық.
Қорытынды: бірдеңе дұрыс болмай жатса, бірден іске көшіңіз. Батыл болыңыз, барлық броньды алып тастап, демалыстың рахатын сыйлайтын жерге жол тартыңыз. Әрине, артық шығындар туындауы мүмкін, бірақ ол соған тұрарлық.
Ыстанбұл: лоукостер мен нашар қонақ үй
Мира, SMM маман
Менің бірден екі сапарым сәтсіз өтті. Біріншісінде Шымкентте 12 сағаттық ауысып отыруды күттім (далада жаз, одан қалса, қалтамда ақша жоқ), ал екіншісі – Ыстанбулға саяхат, қиындықтарға толы болды. Сол туралы айтып берейін.
Бұл сапарда барынша үнемдеуді жоспарладым, сол себепті Түркістан арқылы ұшатын ең арзан лоукостер билетін сатып алдым. Тек бір ғана ауыр қол сөмкем болды (тура гиря сияқты). Ұшу жылдам өтті. Бірақ ескі әуежайдан шыққан бойда-ақ ауа райымен жолымыз болмағанын түсіндік. Жаңбыр жауып тұрды, аспан сұрғылт еді. Google Maps бізге жақын аялдаманы көрсетті, бірақ біз оны таба алмадық. Жолыққан адамдардың бәрі ештеңе білмейтінін айтты. Біз әуежай маңында 30 минуттай аялдама мен Istanbulkart (біздің Onay сияқты) сатып алатын жер іздеп жүрдік. Үмітіміз үзілейін дегенде қалаға туристерді апаратын арнайы шаттлдар бар екенін білдік. Бақытымызға орай, солардың біріне міне алдық.
Алайда біз басқа ауданнан бірақ шықтық, сондықтан қонақ үйге жету үшін метроға отыруды ұйғардық. Картада ол орталыққа жақын сияқты көрінді, бірақ біз Ыстанбұлдың тік көшелерін ескермеппіз. Елестетіп көріңізші: лоукостермен ұшып келу, кейін – беймәлім ауданға жетуге тырысу, одан соң – метро және қонақ үйге дейін Ыстанбұлдың биік-қыратты көшелерімен жаяу жүру. Әрең дегенде серігіммен қонақ Бөлмемізге кіре сала темекі иісі мен қапырықты бірден сездік. Біз бұл қонақ үйді Booking арқылы бес түнге броньдағанбыз, пікірлер жаман емес еді, бірақ шындығына келгенде мүлде басқа болып шықты.
Бізді «жақсы самалдығы мен көрінісі бар» бөлмеге шығарып салды. Алайда сайттағы суреттер шындыққа сәйкес келмеді. Онда терезе болған жоқ, ауасы тар, түрлі-түсті түсқағаздар жапсырылған, ауа баптағышы да дұрыс жұмыс істемей тұрды. Басқа нұсқалар жоқ деп айтты. Біз наразылық білдірдік, бірақ қызметкерлер ағылшынша білмеді, сондықтан ым-ишара мен Google Аудармашы арқылы түсіндірістік. Ақыры бізге екі есе үлкен бөлме берді, бірақ оның самалдығы баспалдақ алаңымен біріккен еді. Бұл баспалдақ кімге арналғанын және қайда апаратынын түсінбедік, сондықтан оның есігін мүлдем ашпадық. Жаңа бөлме үшін күресуге шамамыз болмады, сол себепті сол жерде қалдық.
Бұл сапар барысында болған оқиғалардың тек бірі ғана. Елге оралғаннан кейін, асқазаным ауырып, төсектен тұра алмай қалдым. Бірақ бұл басқа хикая.
Қорытынды: қонақ үйге ақшаны аямаңыз, маршрутыңызды мұқият жоспарлаңыз, тұрғын үйге жетудің бірнеше нұсқасын алдын ала ойластырып қойыңыз. Және таңғы асы бағасына кіретін қонақ үйлерді таңдаңыз.
Доминикана: жоғалған жүк пен 10 сағаттық уақыт айырмасымен жұмыс
Гүлнәр, Demalys-тың бас редакторы
Менің ең сәтсіз тәжірбием – Доминиканаға сапар. Біз 2023 жылдың ақпанында күйеуімнің достарына бір айға баратын болдық. Ол кезде мен жаңа компанияда небәрі жарты жылдан астам уақыт істеп жүрген едім. Сондықтан бір айға еңбек демалысын ала алмадым. Жолға, уақыт айырмасына үйрену үшін тек бір аптаға демалыс алдым. Ал қалған үш апта бойы Қазақстан уақытымен 6:00-ден 15:00-ге дейін жұмыс істедім, оған бір сағаттық түскі асқа үзіліс кірді.
Көңілімізді қалдырған алғашқы жағдай — жүгіміз жоғалды. Бізде екі шабадан болды: бірінде киімдеріміз болса, екіншісінде Қазақстаннан достарымыздың туыстары беріп жіберген сыйлықтар бар еді. Біз Turkish Airlines-пен Ыстанбұл және Мадрид арқылы ұшып, жүгімізді Санто-Домингоға дейін тіркейтінімізге сенімді едік. Бірақ Алматы әуежайында жүк тек Мадридке дейін тіркелетінін айтты. Бұл code shared рейс болғанына қарамастан, бізге көмек көрсетілмеді. Ыстанбұлда Мадридтен көмек сұрауымызды айтты, бірақ Мадридте бізге жүкті алу үшін қалаға шығу керек екенін түсіндірді. Бізде Шенген визасы болған жоқ, сондықтан олай жасай алмадық. Санто-Домингоға біз шаршап, түнде жеттік. Лас-Терренасқа жетіп алып, мәселені таңертең шешуді ұйғардық. Сол кезде мен мұндай жағдайда дереу Lost&Found бөліміне арыз жазу керек екенін білмедім. Алғашқы бір-екі апта бойы біз Turkish Airlines-ке сұраулар жіберіп, Санто-Доминго әуежайына қоңырау шалып, арызды тіркеуге тырыстық. Тіпті сонда барып келсек те, мәселе шешілген жоқ. Бір мезетте бәрін жайына қалдырып, уайымдамауға тырыстық. Негізінде жолсандығымызда жазғы және суға түсетін киімдеріміз ғана болды. Бірақ бізді достарымыз бен олардың ұлына арналған сыйлықтардың жетпеуі қатты қапаландырды. Ақырында, үлкен шабаданымыз табылып, қайтуымызға бірнеше күн қалғанда Алматыға жеткізіп берді. Бірақ ең қызығы, қайтар жолда біздің жүгіміз Алматыға тікелей тіркелді.
Сапардың екінші минусы – мен түнде жұмыс істедім. Уақыт айырмасы 10 сағат, мен Доминикана уақытымен кешкі 8-ден таңғы 4-ке дейін жұмыс істедім, кейде таңғы 5-6-да қоңырауларға қосылатынмын. Таңертең 11-12 шамасында оянып, әрі қарай ұйықтай алмайтындықтан жиі ашуланатынмын. Күндізгі 12-ден 8-ге дейін доминиканалық өмір сүрсем, кешке алматылық жұмысым басталатын.
Қорытынды: егер сізде ауысып отырулар болса, басқа адамдардың сыйлықтарын алмаңыз. Сондай-ақ ондай тәртіпке үйренбеген болсаңыз, 10 сағаттық уақыт айырмасымен түнде жұмыс істеген дұрыс емес.
