Ұшақ билеті поштаға келген жоқ. Қайтпек керек?
Саспаңыз, шешілмейтін түйін жоқ.
Билет ақшасы шотыңыздан алынып, бірақ билеттің өзі поштаңызға келмей жатса, уайымдап кететініміз бар. Бірақ әдетте бұл ақшадан не билеттен айырылып қалдыңыз дегенді білдірмейді. Көбіне бұған техникалық ақау не деректерді толтыру кезінде кеткен болуы мүмкін ұсақ қателер себеп болады.
Бұл мақалада сатушыны өз бетіңізше қалай табуға болатынын, брондау деректерін қалпына келтіру жолдарын және билетті қай сайттан алғаныңызды ұмытып кетсеңіз де, оны қалай алуға болатынын түсіндіріп береміз.
Хаттың расымен келмегеніне көз жеткізіңіз
Кейде келген билетті пошта жәшігінен байқамай қалуыңыз мүмкін. Сондықтан билеттің «жоғалуына» себеп болатын ең жиі кездесетін жағдайларды тексеріп шығуды ұсынамыз.
«Спам» папкасын тексеріңіз
Брондау жүйелерінен келетін автоматты хаттар ішіндегі PDF-файлдардың немесе сілтемелердің көптігінен жиі «Спам» немесе «Рассылки» (Жарнамалар) бөліміне түсіп кетеді. Егер Gmail қолдансаңыз, «Промоакции» (Жарнамалық акциялар) қосымша бетін де қараңыз. «Кіріс жәшігі» бөлімін ашып, іздеу жолағына авиакомпанияның немесе билет сатқан агенттіктің атын латынша не кириллицамен жазып көріңіз.
Кем дегенде бір сағат күте тұрыңыз
Егер поштаңызды түгел ақтарып шыққан соң да, хат табылмаса, біраз күте тұру керек: билетті рәсімдеу процесі лезде орындала бермейді. Төлем жасалған соң ақпарат жаһандық брондау жүйелері (GDS) арқылы өтеді. Кейде авиакомпания не агенттік төлемді өңдеу не хабарлама жіберу кезінде баяулап қалуы мүмкін. Егер төлем жасалған сәттен бастап бір сағат өтпеген болса, уайымдағанға әлі ерте — сәл шыдаңыз.
Электронды пошта мекенжайын дұрыс көрсеткеніңізді тексеріңіз
Асығыс кезде пошта мекенжайын жазғанда қате жіберген оңай (мысалы, gmail.com орнына gmai.com деп жазу). Егер қателестім-ау деген күдік болса, қорықпаңыз: билетіңіз бар, тек ол қате не бөтен мекенжайға кеткен. Мұндай жағдайда төмендегі нұсқау көмектеседі.
Билетті кімнен сатып алғаныңызды қалай білуге болады?
Билетті Aviasales.kz арқылы тапқан болсаңыз, мынаны ескеріңіз: біздің сайт — іздеу жүйесі, ал сатып алу процесі серіктес сайттардың бірінде өтеді (олардың барлығы біздің сайтқа шықпас бұрын қатаң тексерістен өтеді). Егер билет сатқан сайттың атын ұмытып қалсаңыз, оны мына «іздер» арқылы анықтауға болады:
Банк қағазы не төлем туралы хатты ашыңыз
Бұл — ең жылдам әрі сенімді әдіс. Банктің мобильді қосымшасын ашып, билет ақшасы алынған операцияны табыңыз. Төлем деректерінде «Алушы» деген жолақта сатушының аты көрсетіледі. Көбіне төлем мақсатында сатушы есімінен кейін бірден тапсырыс нөмірі жазылып тұрады. Оны сақтап қойыңыз — ол сатушының сайтына кіруге қажет болады.
Браузер тарихы
Егер билетті компьютерден не телефондағы браузер арқылы брондасаңыз, кейінгі бірнеше сағаттағы кірген сайттар тарихын (history) қараңыз. Жолаушылардың дерегін және карта мәліметтерін енгізген сайтты табыңыз.
Сатушымен байланысу және билетті алу
Серіктестің атын анықтаған соң, оның қолдау қызметіне хабарласу керек. Сатушының сайтына кіріп, «байланыс» (контакты) не «қолдау» (поддержка) бөлімін табыңыз. Сатушыға әртүрлі арналар арқылы шығуға болады. Көбінің Қазақстанда колл-орталығы болмауы мүмкін, сондықтан сайттағы кері байланыс формасын толтыру не хат жазу керек болады. Өтініште мына деректерді міндетті түрде көрсетіңіз:
- Жолаушының аты-жөні (брондау кезіндегідей латын әріптерімен).
- Ұшу күні мен бағыты (мысалы, 15 мамырдағы Алматы — Стамбул рейсі).
- Төлем жасалған уақыт.
- Операторға нақты сұраныс. Мысалы: «Пошта мекенжайын қате көрсетіппін, билетті мына дұрыс мекенжайға қайта жіберуіңізді сұраймын (мекенжайды мұқият тексеріп жазыңыз)».
Айтпақшы, сұранысты қазақ не орыс тілінде жіберуге болады, өйткені қазіргі жүйелердің көбі оны автоматты түрде аударып алады. Егер түсінбей қалады деп уайымдасаңыз, Chat GPT немесе кез келген ыңғайлы аудармашыны қолданыңыз. Оператор осы деректер бойынша броныңызды тауып, билетті жаңа пошта мекенжайына жібереді.
Gotogate, Mytrip пен Flightnetwork клиенттеріне арналған нұсқау
Егер сіз билетті осы халықаралық агенттіктердің бірінен алсаңыз, қолдау қызметінің жауабын күтпей-ақ, бірнеше минут ішінде жеке кабинет арқылы билетті өзіңіз жүктеп ала аласыз.
- Тапсырыс нөмірін табыңыз. Банк қосымшасына кіріп, төлем деректерін қараңыз. Тапсырыс нөмірі — сатушының атынан кейін жазылған цифрлар (мысалы, GOTOGATE*123456789).
- Сатушының сайтына өтіңіз. Мына сілтемелерді қолданыңыз: Gotogate, Mytrip, Flightnetwork.
- Жүйеге кіріңіз. Сайттан «Менің брондарым» (Мои бронирования) не «Тапсырысты табу» (Найти мой заказ) бөлімін табыңыз. Кіру үшін электронды поштаңыз бен банк үзіндісіндегі тапсырыс нөмірін енгізіңіз.
- Деректерді толтырған соң «Менің брондарым» беті ашылады. Сол жерден бағыттық түбіртекті PDF форматында жүктеп алуға не поштаңызға қайта жіберуге болады.
- Gotogate.com сайтына кірерде осындай шығуы керек.
Қай кезде Aviasales.kz-ке хабарласу керек?
Егер билетті біз арқылы тауып, бірақ банк үзіндісінен не браузер тарихынан сатушының атын таба алмасаңыз, саспаңыз. Біз сіздің іздеу тарихыңыз арқылы қай сайтқа өткеніңізді табуға көмектесе аламыз.
Серіктестің байланыс мәліметтерін айтуымыз үшін мынаны орындаңыз:
Егер билетті браузердегі сайт арқылы іздесеңіз: арнайы сілтеме арқылы өтіп, іздеу жолағында пайда болатын белгілерді (символдарды) біздің қолдау қызметіне (кез келген әлеуметтік желіге) жіберіңіз. Бұл бізге сіздің іздеуіңіз туралы ақпаратты көруге мүмкіндік береді.
Егер мобильді қосымша арқылы іздесеңіз: бізге «техникалық ақпарат» қажет. Оны көшіріп алып, бізге жіберіңіз:
«Профиль» бөліміне кіріңіз (төменгі оң жақ бұрыштағы түйме) → ең соңына дейін төмен түсіңіз → Aviasales логосын басыңыз. Экранның жоғарғы жағында «тех. ақпарат көшірілді» (тех. информация скопирована) деген жазу шығады.
Осы деректерді қолдау қызметіне жіберіңіз. Сөйтіп біз іздеу тарихыңызды көріп, билет алған компанияның тікелей байланыс нөмірлерін береміз.
Суретті салған— СашаШура.
