Алматыда биыл өтетін сегіз фестиваль. Билеттер қанша тұрады?
Отыз күн концерт, қырық күн фестиваль.
Алматыда концерт пен фестиваль маусымы көктемде-ақ басталып кеткен. Бірақ жаздағы думан бұдан да ауқымды болайын деп тұр. Биыл қалаға панк-рок аңыздары, 2010 жылдардың жұлдыздары мен стадиондарды лық толтыратын k-pop әртістері келіп, өнер көрсетпек. Біз бұл жолы фестиваль форматына тоқталуды жөн көріп, алда болатын сегіз негізгі шараны топтап шықтық. Иә, кептелісте біраз тұруыңыз мүмкін. Бірақ тарихи музыкаларды тірідей тыңдағанда, шаршағаныңызды ұмытып кетесіз.
- Solana: Қазақстан сахнасындағы әлемдік жұлдыздар
- Рахат Fest: Көл жағасындағы фестиваль
- DO BE DOO: Курорттағы джаз-пикник
- i’ONE FEST: k-pop пен q-pop фанаттарына
- BEU FEST: Трамплиндегі той
- Satisfaction: Естелікке айналған электронды музыка
- OYU Fest: Екі күндік мерейтой
- Park Live Almaty: Тарихи уикенд
- Фестивальге не ала бару керек? Не апармай-ақ қойған дұрыс?
Solana: Қазақстан сахнасындағы әлемдік жұлдыздар
Қашан, қайда болады: 16 мамыр — Орталық стадион.
Бағасы: 60 000 теңгеден басталады.
Solana — музыка мен жоғары технологияларды ұштастыруға тырысып жүрген амбициялық жоба. Ұйымдастырушылар біз әдетте Coachella трансляцияларынан ғана көретін жоғары деңгейдегі сахна жасаймыз, инновациялық жарық береміз деп отыр.
Бірақ бастысы бұл емес. Фестте 2010 жылдардың алтын дәуіріндегі атақты жұлдыздар — Flo Rida, Busta Rhymes, Tyga, Nicole Scherzinger, Timbaland пен Keri Hilson өнер көрсетпек.
Фестиваль Алматы мен Астанада өтеді. Оңтүстік астанада билеттер 60 000 теңгеден басталады. Электронды билеттер поштаңызға іс-шара болатын күні бір-ақ келеді. Уайымдап жүрмеңіз. Бұл — қауіпсіздік шарасының бір бөлігі.
Рахат Fest: Көл жағасындағы фестиваль
Қашан, қайда болады: 23 мамыр, Первомай тоғандары.
Бағасы: 30 000 теңгеден басталады.
Рахат Fest — үй ішімен баратын музыка кеші. Биыл лайнапқа ұйымдастырушылар жергілікті топ-әртістерді де, шетелдік қонақтарды да қосқан: сахнаға Zivert, Fly Project пен RaiM, сондай-ақ Dequine, 6ELUCCI мен Крайм Волшебник шығады.
Фест аумағында фудкорт, балаларға арналған аумақ пен интерактив бұрыштар болады, ал ұрттап алғандарға «сау жүргізуші» қызметі қарастырылған.
Билеттер қарапайым және VIP деп екі санатқа бөлінеді. Қарапайым билеттер 30 000 теңгеден басталады. Достарыңызбен бірге алған тиімді — топтық билеттер (пакеттік ұсыныстар) арзанырақ түседі. 10 жасқа дейінгі балаларға ата-анасымен бірге тегін кіреді. Тоған жағасында тұрақ іздеп қиналмас үшін алдын ала трансферге төлеуге болады: көлікпен алып барып, алып қайту — 5 000 теңге.
DO BE DOO: Курорттағы джаз-пикник
Қашан, қайда болады: 30 мамыр, Almaty Resort.
Бағасы: 15 000 теңгеден басталады.
Адам лық толы стадиондар ұнамайды десеңіз, DO BE DOO-ға барыңыз. Бұл — Almaty Resort-тағы жайлы пикник-фестиваль: шөп үстінде отырып, кешкі салқында сапалы музыка тыңдайсыз.
Бағдарламасына қарасақ, тыңдарманды пианист Нұргүл Нүсіпжанованың орындауындағы классика, аңызға айналған «JCS» тобының алматылық джаз-фьюжн стилі мен әйгілі хедлайнер Муся Тотибадзе күтеді.
DO BE DOO-ға концерт көруге ғана емес, мәдениетке бойлау үшін де баруға болады. Белгілі музыкатанушы Ирэна Аравина Бродвей туралы интерактив лекция өткізеді, онда кез келген адам вокалдан бақ сынап, ырғақпен жұмыс істеп көре алады.
Билеттер 15 000 теңге тұрады, жас шектеуі — 21+. Аумақта фудкорт бар, аш қалмайсыз.
i’ONE FEST: k-pop пен q-pop фанаттарына
Қашан, қайда болады: 31 мамыр, Almaty Arena.
Бағасы: 7 000 теңгеден басталады.
Корей және қазақстандық поп-толқын ырғағында жүргендер міндетті түрде баруы керек фест. Ұйымдастырушылар жоба ауқымы бойынша бірегей шара болмақ дейді. Сахнаға Оңтүстік Кореядан келген үш ұжым мен жергілікті танымал әртістер шығады. Лайнаптағы корейлік хедлайнер қатарында ROCKY, TNX пен KANDIS айтылады, ал қазақстандық q-pop өкілдерінің қатарында ACE, iONE! пен басқалары бар.
Бағасы қалтаны қақпайды: билет 7 000 теңгеден (билеу алаңы) басталады. Ал максимум комфорт пен анық көрініс керек дегендер 25 000 теңгеге VIP аймақтан орын алса болады.
BEU FEST: Трамплиндегі той
Қашан, қайда болады: 6 маусым, «Сұңқар» ХШТК.
Бағасы: 18 000 теңгеден басталады.
Биыл BEU fest-тің өтіп жүргеніне бес жыл толады. Мерейтойлық лайнапта Ninety One, Қайрат Нұртас, Мирбек Атабеков, Жанар Доғалова, Ulukmanapo мен басқалары бар.
Халықаралық трамплиндер кешенінің көрінісі оқиғаға ерекше атмосфера сыйлайды (және кептеліс болуы әбден мүмкін).
Қазір сатылымда билеттің екі түрі бар: фан-аймақ билеті — 18 000 теңгеден, ал амфитеатр билеті 25 000 теңгеден басталады.
Satisfaction: Естелікке айналған электронды музыка
Қашан, қайда болады: 27 маусым, Tortuga демалыс орны (Первомай тоғандары).
Бағасы: 20 000 теңгеден басталады.
Биыл Satisfaction электронды музыка фестивалі өткен күндердің ескірмейтін хиттеріне басымдық бермек. Бұл кеште өнер көрсетуге Fedde Le Grand бен Burak Yeter келе жатыр. Олардың тректері ондаған жыл бұрын шықса да, өнерпаздар әлі күнге дейін әлемдік сахналарды жарып жүр.
Лайнаптан бөлек, ұйымдастырушылардың тосынсыйы бар: кім екені фестивальде бір-ақ белгілі болатын құпия қонақ бар. Tortuga базасының аумағында тек фудкорттар емес, сеттер арасында демалуға болатын арт-кеңістіктер де ашылмақ.
Стандартты билет қазір — 25 000 теңге, VIP-билеттер — 69 000 теңге. 12 жасқа дейінгі балалар ата-анасымен тегін кіреді (бірақ іс-шара форматы түнгі уақытқа арналғанын ескеріңіз).
Бұл фестиваль 6 маусымда Астанаға соғады, бірақ құрамы басқаша. Онда R3HAB, John Martin, Eva Simons сияқты әртістер өнер көрсетеді.
OYU Fest: Екі күндік мерейтой
Қашан, қайда болады: 4–5 шілде, Первомай тоғандары.
Бағасы: 22 200 теңгеден басталады.
OYU Fest те биыл бесінші рет өтпек. Мерейтой! Соның құрметіне болар, алғаш рет екі күнге созылмақ. Ал өкініштісі — фестиваль биыл тек Алматыда өтеді.
Ұйымдастырушылар биылғы лайнапты әзірге құпия ұстап отыр, бірақ фестиваль әр жылы көпті таңырқата білетінін мойындау керек. Бұрын мұнда Dequine, Zoloto, Moldanazar мен Қайрат Нұртас сынды жарық жұлдыздар өнер көрсеткен. Сондықтан OYU-ға еш күмәнданбастан бара беруге болады. Онда заманауи қазақ музыкасының қаймақтары жиналары анық.
Биыл да фестиваль Первомай тоғандарында өтеді, аумақта жәрмеңке, фудкорт пен интерактив аймақтар болады. Ерте брондауға болатын кез өтіп кетті, бірақ қазір сатылымда билеттің бірнеше түрі бар: бір күнге — 23 500 теңге, екі күнге — 44 000 теңге, үш досқа арналған бір күндік билет — 66 500 теңге (яғни әрқайсысына шамамен 22 200 теңгеден).
Park Live Almaty: Тарихи уикенд
Қашан, қайда болады: 21–23 тамыз, Первомай тоғандары.
Бағасы: 40 000 теңгеден басталады.
Тамыз айындағы ауқымды шара. Алматыға бүкіл Орталық Азиядан меймандары ұшып келмек. Биыл Park Live лайнабы 2000 жылдардағы тілектер тізімі сияқты көрінеді: жаңа альбомын әкеле жатқан Gorillaz, аңызға айналған гитара шебері Джек Уайт пен панк-рок манифесі бар The Offspring. Әлемдік аңыздардан бөлек, қазақстандық үздік музыканттар да өнер көрсетеді. Қырық мыңдай тыңдарман жанды музыкаға сусындау үшін жиналмақ.
Билеттер қарапайым және VIP деп екі санатқа бөлінеді. Қарапайым билеттер бір күнге 40 000 теңгеден не үш күнге 120 000 теңгеден сатылып жатыр.
Фестивальге не ала бару керек? Не апармай-ақ қойған дұрыс?
Мына кеңестерімізге мұқият құлақ ассаңыз, музыка мерекесі өте-мөте жайлы өтуі мүмкін.
Мына заттарды ала барыңыз:
- Жылы киім. Қалада күндіз +35°C болса да, тау бөктерінде не су жағасында күн батқан соң бірден суып кетеді. Жемпір, желбегей не жеңіл күрте алыңыз. Көкте жайғасып отырамын десеңіз, төсеніш те артық етпейді.
- Жайлы аяқ киім. Биік өкшелі туфли мен су жаңа ақ кеды дегенді ұмытыңыз. Фестивальдер өтетін жерлерде шаң, шөп пен тас көп. Аяқ киіміңіз жүргенге және естен танғанша билегенге ыңғайлы болсын.
- Пауэрбанк. Байланыс мұнараларына күш түскенде, телефон сигнал іздеп, қуатын әдеттегіден екі есе тез жоғалтады. Қайтар жолда такси шақыру үшін пауэрбанкті ұмытпаңыз.
- Билеттер. Адам көп болғандықтан, кіреберісте интернет істемей қалып жатады. Сондықтан оларды Apple Wallet/Google Pay-ге сақтап қойыңыз не скриншот жасап алыңыз.
- Күннен қорғайтын крем. Алматыда ашық аспан астында күн бұлтты болса да, 30–40 минутта күйіп кетесіз. Санскрин жағып алыңыз.
- Қолма-қол ақша (Б жоспары). Көп жерде карта не QR арқылы төлей бересіз, бірақ интернет қатып қалса деп, қалтаңызға кэш те салып алыңыз.
Ал мына заттарды апармаңыз:
Фестивальдер аумағында қауіпсіздік ережесі қатаң бақыланады, сондықтан тексеру кезінде уақыт жоғалтпас үшін мына нәрселерді апармаңыз:
- Ішіп-жем. Су мен бутерброд алып кіруге болмайды (тек балалар тағамын кіргізуге рұқсат, бірақ әр фестің ережесін бір көре салыңыз). Аумақта әдетте алуан түрлі фудкорт жұмыс істейді.
- Қауіпті заттар. Қару-жарақ, өткір заттар, пиротехника апармаңыз. БАҚ ретінде алдын ала тіркелмесеңіз, ұзын объективті кәсіби камера да алып кіруге болмайды.
- Көлемді заттар. Үлкен рюкзак мен шабадан алып жүрген нөпір арасында сізге де, айналаңыздағыларға да ыңғайсыз. Кейбір фест күзетшілері мұндай заттарды сақтау камерасына қалдырып кетіңіз деп талап етуі мүмкін.
