Үй ішімен қайда демалуға болады? Жұрт таңдаған бес қала

Aviasales.kz дерегінше, 2025 жылы қазақстандықтар балаларымен жиірек саяхаттай бастаған: отбасына арналып жасалған брон саны былтырмен салыстырғанда 4 пайызға артқан. Жұрт демалуға климаты жайлы, бағасы қолжетімді жерлерді көбірек таңдайды. Былтыр көпшілік Стамбул, Баку, Анталья мен Куала-Лумпурға ұшса, биылғы сұраныс басқаша. 2025 жылы жұрт үй ішімен көбіне қайда демалып жатқанын шолып шығайық.

Ыстанбұл

Түрік асханасын, сәулетті мешіттер мен Ыстанбұлдағы ерке мысықтарды ұнатпайтын адам бар ма өзі? Ыстанбұл — баламен саяхаттауға таптырмас қала. Мұнда түрік сериалдарынан танитын көшелерде серуендеп, жағалау бойында сергіп, Ханзада аралдарына да тартып кетуге болады. Маусымнан қыркүйекке дейінгі жаз айлары — туриске ең жайлы кез.

Балаларды қайда апаруға болады?

• Айя-София — бұрын шіркеу болған, қазір мешіт әрі мұражай, қаланың ең көрікті жерлерінің бірі.
• Аквариум — судағы тіршілікті тамашалағы келгендерге таптырмас жер.
• Vialand паркі — кез келген жастағы балаға қызық болатын аттракциондар мен ойын алаңдары бар саябақ.

Баку

Баку — кейінгі кезде қазақстандық саяхатшыларды баурай бастаған әсем қала. Мұнда жұрт шамамен 10 күндей болады. Бірақ мынадай сәулетті қалаға мұның өзі аздық етуі мүмкін. Көне шаһарды аралап, Баку гүлзарларында тынығып, сәулет өнерінің жәдігерлерімен асықпай танысып шығыңыз. 

Балаларды қайда апаруға болады?

• Гобустан паркі — жартасқа салынған көне суреттер мен табиғаттың ғажап көрінісі көздің жауын алады.
• Баку-Кристалл-холл мен Опера театры — балаларға өзге елдің өнерін көрсетемін десеңіз, осында апарыңыз. 

Анталья

Анталья — қазақстандықтар ғана емес, шетелдік туристер де көп баратын ең танымал қаланың бірі. Былтыр онда әлемнің түкпір-түкпірінен 19,3 миллион турист барған. Бүкіл Қазақстан халқының санымен шамалас қой! Әрине, қаланың мөлдір теңізін, көп жердегі all-inclusive қызметі мен көне қаланың қирандыларын көргенде, Анталья неге танымал деген сұраққа жауап табыла қояды. Биыл бұл жаққа билет 18 пайызға арзандағанын да ескеріңіз.

Балаларды қайда апаруға болады?

• Анталья аквариумы — акула көретін туннелі бар, елдегі ең ірі су айдынының бірі.
• Дельфиндер мен теңіз арыстандары паркі — теңіз жануарлары көрсететін көңілді шоу.

Ташкент

Ташкент — терең тарихымен, мәдениетімен, дәмді асханасымен және қолжетімді бағасымен турист тартқан қала. Мамырдан бастап Ташкентке ұшатын әуе компаниялары көбейе түсті: Air Astana мен Uzbekistan Airways-қа Centrum Air да қосылды. Билеттер 12 пайызға арзандағанына осы әсер еткен болуы мүмкін. 

Балаларды қайда апаруға болады?

• Ташкент зообағы — сирек кездесетін жануарлар мен мазмұнды экскурсиялар бар. 
• Ташкенттегі Ботаника бағы — экзотикалық өсімдіктер арасында алаңсыз серуен құрасыз.

Тбилиси

Тбилиси әдеттегідей Қазақстандағы көп отбасының сүйікті қаласы болып қала бермек. Онда көретін жер көп: Көне қала, Нарикала қамалы, Мтацминда тауы деп кете береді! Руставели даңғылында серуендеп, грузин тағамдарынан дәм татып, халқының терең тарихына үңіліп, меймандос адамдармен сөйлесіп, марқайып қайтасыз. 12 күн көзді ашып-жұмғанша өте шығады. Ал жаңа эмоция керек дейтіндер осы уақыт ішінде Батумиге барып, жағажайда демалып қайтса болады!

Балаларды қайда апаруға болады?

• Мтацминда паркі — қала алақандағыдай көрінетін шолу дөңгелегі мен түрлі аттракцион бар.
• Тбилиси зообағы — сирек жануарларды тамашалайсыздар.