Шетелде демалыста жүрген қазақ жігіттерінің сегіз түрі
Біздің елдің туристері — туристердің төресі!
Ел арасында «қазақтың нағыз ер азаматы демалмайды» деген бір таптаурын түсінік бар. Оның өмірінде екі-ақ режим болады-мыс: алдымен тынымсыз жұмыс істейді, ал қолы қалт ете қалса, енді не істеуге болады деп бас қатырады. Бірақ жыл сайынғы демалыс маусымы бұл пікірді жоққа шығарып келеді. Шетелде де, Қазақстандағы курорттарда да демалып жүрген неше түрлі қазақ жігітін кездестіруге болады.
Біз, Demalys редакциясы, мұның рас-өтірігін анықтауға тырысып көрдік. Ол үшін Aviasales.kz сарапшыларының кейінгі үш айдағы іздеу статистикасын алып, комик Мұхтар Ерланның көрген-білген тәжірибесін қостық. Сөйтіп демалыста жиі кездесетін қазақ жігіттерінің сегіз түрі сипатталған күлкілі гид шықты. Әр типке сай келетін ең қолайлы демалыс бағыттарын да қоса ұсындық.
Жалғыз жүрген жігіт
Белгілері: Үш түймесі ағытылған жейде, аппақ тіс, жағажайда киетін сәнді қалпақ.
Жергілікті бағаларға қатты таңырқайды. Артынша байларша күледі. Әдетте ол — жұмыстан қажыған кәсіпкер не топ-менеджер. Ол үшін бұл демалыс — жай қыдыру емес, ресурс жинауға инвестиция. Елге барған соң бизнесін үлкейтуі керек қой. Күні нақты жоспарланған: таңертең массаж, түсте қымбат мейрамхана, кешке атмосфера үшін люкс көлік жалдайды. Қай жерде жүрсе де жаңа таныс табады. Қонақүйдегі адамдардың жартысымен таңғы аста-ақ танысып үлгереді. Бірақ немен айналысасыз деп сұрасаңыз, нақты жауап ести қоюыңыз екіталай. Бір анығы — осы демалыстан кейін тағы бір үлкен жоба бастаймын деп қайтады.
Мұндай жігітті қайдан кездестіруге болады?
- Нью-Йорк (NYC) — байланыс орнатқанға, шабыт жинап, ерекше салтанатпен серуендеп қайтқанға таптырмас қала.
- Милан (MIL) — қымбат мейрамхана мен бренд дүкендерін жақсы көретіндерге сөзсіз ұнайды.
- Париж (PAR) — бульварда кофе ішіп отырып, дедлайннан шаршаған миды тынықтыратын классика.
Аквамен
Белгілері: Күнге керемет күйген, шашы оңып кеткен, ал футболкасын жоғалтып алғанына көп болған.
Бұл жігіт судан шықпайды. Теңіздің суы салқын ба, бассейн терең бе — екі қойың бір сом. Жағалауға шығару мүмкін емес. Өмір бойы су бетінде қалқып жүрген сияқты. Теңізде толқын көтерілсе болды, серфер боп шыға келеді. Ал су тынық кезде, құтқарушыға айналады. Тіпті сұрамаған адамдарға да жүзуді үйретіп кетеді. Немен айналысатынын ешкім білмейді. Аквамен-ау сол.
Мұндай жігітті қайдан кездестіруге болады?
- Бали (DPS) — серфинг пен мұхит жағасындағы ұзақ демалысты жақсы көретіндердің меккесі.
- Пхукет (HKT) — жағажай, дайвинг пен арал аралағанды ұнататындар арасында ең танымал бағыт.
- Батуми (BUS) — Қара теңізде ұзақ жүзіп, кешке жағалау бойымен серуендегісі келетіндерге лайық қала.
Отағасы
Белгілері: Аздап шаршағаны білініп тұрады, күнге күйіп қызарып кеткен, басынан көзілдірігін тастамайды.
Демалыста қалай шаршауға болады дейсіз бе? Осы кісіден сұраңыз. Курортқа көлік барар болса, ұшаққа билет алуды ойламайды да. Бүкіл отбасын отырғызып алып, жолға шығып кетеді. Соның кесірінен демалыстың алғашқы екі күні бойы ес жия алмай жүреді. Шыжыған күннің астында ұйықтап қалатын әдеті бар. Сөйтіп демалыс бойы денесіне қаймақ жағып жүреді. Алаңсыз жүру деген атымен жоқ. Балалар жоғалып кетпеді ме, әйелінің роумингі істеп тұр ма — бәрін бақылап жүреді. Үйге қайтатын күнді асыға күтеді. Өйткені, өзі айтқандай, үйге барып бір демалуы керек.
Мұндай жігітті қайдан кездестіруге болады?
- Анталия (AYT) — Алматы мен Астанадан ең көп ізделетін, отбасылық демалыстың классикасы.
- Газипаша, Аланья (GZP) — адам аздау, тыныш жағажай іздейтін отбасыларға қолайлы.
- Шарм-эш-Шейх (SSH) — жыл бойы жылы теңізі мен отбасылық қонақүйлері үшін сұранысқа ие бағыт.
Жергілікті гуру
Белгілері: Аладдиндікіндей кең шалбар, қолтығында йога төсеніші, ал айналасына ойлы көзбен қарайды.
Бұл жігіт «тап қазіргі сәтпен» өмір сүреді. Таңын күнге сәлем беруден бастайды. Бірнеше сағат медитация жасайды. Қайда жүрсе де, Будданың мүсіні мен веган кофехана тауып алады. Әңгімесінің негізгі тақырыптары: транссерфинг, энергия, сана, ментал саулық. Бұрын кім болғанын ешкім білмейді. Бірақ кім болғаны оған маңызды емес. Ең бастысы — жақын жерде кофешоп ашық тұрса болды. Өйткені ол дәл қазір ретритте. Омммм...
Мұндай жігітті қайдан кездестіруге болады?
- Бангкок (BKK) — көне храмдар мен зәулім ғимараттардың арасында рухани тепе-теңдік іздейтіндерге.
- Куала-Лумпур (KUL) — ескі мәдениет пен жасыл саябақтар араласқан экзотикалық мегаполис.
- Сеул (SEL) — будда сарайларын аралап, кейін ультразаманауи көшелерде серуендегісі келетіндерге.
Зерттеуші
Белгілері: Мойнында пленкалы фотоаппарат, қолында қағаз гид, үстінде Patagonia жейдесі.
Бұл жігіт жағажайда жатып, күнге күюге емес, «жергілікті мәдениетті терең сезінуге» келеді. Ол үшін танысу қосымшасында жергілікті адамдармен сөйлесуге де даяр. Michelin жұлдызы бар мейрамханаларды «капитализм қақпаны» деп біледі. Сондықтан тек көшедегі жергілікті тағамдарды жейді. Арқасына рюкзагын асып алып жүре береді. Шытырман іздеп қалған. Қажет болса, 30 күн үнсіздікке кетуге де дайын. Мұртын мақтан тұтады. Ал өз өмірін жұрт бағаламай жүрген тревел шоу деп біледі.
Мұндай жігітті қайдан кездестіруге болады?
- Рим (ROM) — тарих, музей мен ұзақ серуенді ұнататындарға.
- Барселона (BCN) — көше өнері, Гауди сәулеті мен Готика кварталының тар көшелерін зерттегісі келетіндерге.
- Прага (PRG) — туристер көп бара бермейтін жергілікті дәмханаларды іздегендерге таптырмас қала.
Мәңгі студент
Белгілері: Бүкіл демалыста бір футболкамен жүреді, арқасында рюкзак, еш шаршамайды.
Желіге ең алдымен не салады дейсіз ғой? Иә, ұшақтың қанаты. Бұл жігіт қозғалатын нәрсенің бәрін жалға алады. Мопед пе, самокат па, велосипед пе — бәрін айдап көруі керек. Оның ерекше қабілеті бар: қай жерде отырса да, ұйықтай береді. Әлеуметтік желіге тренд түсіреді. Түнде тауға жаяу шығуға да, таңертең аралға кетіп қалуға да бірден келіседі. Ол үшін әлем — дос болатын адам қаптап жүрген жер. Ал ең үлкен арманы — бір күні автостоппен жер шарын айналып шығу.
Мұндай жігітті қайдан кездестіруге болады?
- Ташкент (TAS) — демалыс күндері аяқасты барып қайтуға болатын ең танымал бағыттардың бірі.
- Кутаиси (KUT) — рюкзак асынып, Еуропаны араласам дейтін адамдардың сүйікті қаласы.
- Ереван (EVN) — ұзақ серуенге, жаңа адамдармен танысқанға, асықпай демалып қайтқанға қолайлы бағыт.
«Роднойларымен» жүрген жігіт
Белгілері: Кемі үш жігіттен тұратын топ, ұқсас шолақ шалбар, ырду-дырду.
Оларды дауысынан-ақ танисыз. Голливудтағы бойдақтар кеші туралы фильмдердегідей жоспар құрады. Бірақ ақырында бәрі басқаша боп шығады. Ұйқыдан кеш тұрады. Таңғы астан мақұрым қалады. Жағажайға да әрең жетеді. Келесі күні осының бәрі тағы қайталанады. Олардың арасында міндетті түрде “мен бұл жаққа бұрын келгем” дейтін бір жігіт болады. Бірақ ештеңе есінде жоқ. Жоспарлары сағат сайын өзгереді. Бірі базарға барғысы келеді, бірі тауға шығайық дейді, үшіншісі қонақүйде жата берейікші деп көндіруге тырысады. Демалыстың соңына қарай бір-бірінен шаршап кетеді. Бірақ елге қайтып келе жатқанда-ақ ендігі жолы ана елге барайық деп ақылдасып отырады.
Мұндай жігіттерді қайдан кездестіруге болады?
- Ыстанбұл (IST) — түнгі өмірі мен көше тағамдары үлкен топқа арналған қала.
- Тбилиси (TBS) — қонақжайлығымен және мол дастарханымен танымал.
- Баку (BAK) — Каспий жағалауы мен Ескі қаласы дос-жаранмен қыдырғанға өте ыңғайлы.
Контентмейкер
Белгілері: Қолында handycam, дрон, стабилизатор, үш телефон болады. Ал ең белсенді болатын уақыты — күн батар кез.
Жүрген жерін суретке түсірмесе, қайда болғанын ұмытып қалады. Қолына ұстаған техникалары киім толы шабаданынан да ауыр. Instagram-дағы парақшасы көздің жауын алады. Cуреттерінде бір мін жоқ. Фотоға түсіріп жіберіңізші деп сұрасаңыз, аянып қалмайтын ақкөңіл келеді. Үйге барған соң бірнеше гигабайт видеоны қайта-қайта көріп шығады. Түсіргеніне тамсанып жатып, келесі саяхатын мен алатын камерасын армандаған күйі қалғып кетеді.
Мұндай жігітті қайдан кездестіруге болады?
- Шанхай (SHA) — неон шамдары мен футуристік көшелері ерекше кадр түсіргенге өте қолайлы.
- Гуанчжоу (CAN) — алып мегаполис, блогерлер жақсы көретін бағыттардың бірі.
- Сеул (SEL) — азиялық трендтерді, жап-жарық көшелер мен әдемі кадрларды ұнататындарға таптырмас қала.
