Қазақстанда қайда арзан демалуға болады: артық шығынсыз сапарға арналған үздік идеялар
10 000 теңгеге үш мезгіл тамағы бар курорттардан бастап, жабайы жағажайлардағы шатыр астындағы демалыс пен тегін балшыққа орау процедураларына дейін.
Демалыс – бұл міндетті түрде шетелге шығу емес. Әсіресе қазір қазақстандық қонақүйлердің, демалыс базалары мен глэмпингтердің саны (сапасы да деп сенеміз) біртіндеп артып келе жатыр. Биылғы жазда қай бағытты таңдауға болады? Алакөлде балшық ванналарымен емделу, Бурабайдың мөлдір суларында сергіп алу немесе достарыңызбен Ақтауға жол тарту — бәрі өз таңдауыңызға байланысты. Біздің мақалада қазақстандық курорттарға қалай жетуге болатынын және демалысқа қанша қаражат бөлу қажет екенін шолып өтеміз.
Алакөл
Жаздағы температурасы: су — +25-28 °C-қа дейін, ауа — +35 °C-қа дейін.
Алакөл — емдік суы мен балшығымен танымал үлкен тұзды көл. Мұнда демалысты әртүрлі форматта өткізуге болады. Ол сіздің көлдің қай жағалауын таңдайтыныңызға байланысты: Алматы немесе шығыс жағалауы. Әрқайсысының өз ерекшелігі, жайлылық деңгейі мен ойын-сауықтары бар.
Алматылық жағада демалушы көп жиналмайды, өйткені демалыс базалары бір жерге шоғырланбай, бүкіл жағалау бойына шашырай орналасқан. Мұнда ойын-сауық аз: катерде серуендеу, балық аулау немесе судың жағасында тынығуға болады. Инфрақұрылым толық дамымаған: интернет кейде ұстамайды, дүкендер мен дәмханалар көп емес — сондықтан сирек немесе ерекше заттар қажет болса, өзіңізбен ала барған жөн.
Шығыс жағалауда мүлдем бөлек жағдай. Бұл — емдік аймақ (осында атақты емдік балшық көзі орналасқан) әрі бүкіл жағалаудың ойын-сауық орталығы. Дәл осы жерде Alazone Arena-да концерттер өтеді, көбік кештері, дискотекалар ұйымдастырылады, экскурсиялар мен көрікті жерлер бар. Белсенді демалыс түрлері көп болғанымен, мұнда демалу қолжетімді.
Қалай жетуге болады:
Көлікпен немесе пойызбен: Астана, Алматы, Өскемен немесе Семейден Ақши немесе Жаланашкөл станциясына дейін (5 000 теңгеден бастап). Одан әрі базаға қоғамдық көлікпен не такси жалдап жетуге болады (4 000 теңгеден бастап).
Ұшақпен: Алматыдан немесе Астанадан ұшақпен (18 000 теңгеден бастап), ары қарай Үржардан таксимен (шамамен 15 000 теңге, толық салон).
Демалыс құны:
- Демалыс базасындағы бір түн (үш мезгіл тамақпен) — 12 000 теңгеден бастап.
- Төрт адамға арналған отбасылық коттедж — 80 000 теңгеден бастап.
- Бір адамға арналған дәмханадағы түскі ас — 2 000 теңгеден бастап.
- Емдік процедуралар — 4 000 теңгеден бастап.
Біз Алакөлге отбасымызбен жеті жылдан бері үзбей жыл сайын барамыз — демалыс басталса болды, бірден сол жаққа тартамыз. Бұл біз үшін дәстүрге айналып кетті. Мұнда суы жылы, ауасы таза, жалпы, бәрі үйдегідей жайлы. Қазір Өскеменнен жол жөндеуден өтті, енді еш қиындықсыз жетеміз. Бұрын жолда қатты шайқалып, көлге шаршап жететінбіз.
Қазір базалар да көбейді — әркім өз талғамына сай таба алады. Біз өзімізге ұнағандарын таңдап қойдық: «Оазис», «Парус», «Пеликан». Бірақ маусымда алдын ала брондаған дұрыс — жақсы базаларды тез брондап алады. Ата-анамыз жыл сайын радон ванналарын қабылдайды. Одан кейін олар шынымен жеңілдеп қалады, қан қысымы реттеледі, буындары да аз ауырады.
Жалғыз кемшілігі — жыл сайын жағалау тарылып барады. Су көтеріліп, құмды жағажай азаюда, кей жерде тіпті судың шетінде бірден тастар басталады. Өкінішті, бұрын жағажай кеңірек болатын.
Дегенмен, қай жағына барсаң да — туған жердің табиғаты, адамдар өзіміздің халық, бағалар да қолжетімді.
Бурабай
Жаздағы температурасы: су — +20–23 °C-қа дейін, ауа — +25–30 °C-қа дейін.
Бурабай — Ақмола облысында орналасқан танымал курорттардың бірі. Оны халық арасында жиі «Қазақстандық Швейцария» деп атайды. Бұл аймақ таза көлдерімен, қылқан жапырақты орманының ауасымен, ыңғайлы жаяу бағыттарымен және демалыс аймақтарымен әйгілі.
Курорт жүрегі — Бурабай көлінің Көгілдір шығанағы. Онда сондай-ақ Жұмбақтас жартасы бар. Көлдің өзі терең емес, жағалауы құмды және майда тасты. Суы сергітерліктей сап-салқын, әсіресе ауа райы құбылып тұрса. Айтпақшы, мұнда ауа райы жиі өзгеруі қалыпты жағжай — күндіз +30 °C болып тұрса, кешке худи киіп, көрпеге оранып отырасыз. Қонақ үйлер мен демалыс аймақтарына жақын орналасқан жабдықталған жағажайларда шомылуға кеңес береміз — онда суы тазалау әрі тынышырақ.
Басқа көлдерге де барып көруге болады: Шортанды — салқын әрі терең суды ұнататындарға, Шабақты — тыныштықты қалайтындарға, мұнда халық аз. Жергілікті тұрғындар бұл көлдерге отбасымен демалғанды ұнатады.
Белсенді демалысты ұнататындарға жаяу серуендеп, шолу алаңдарына жетуді ұсынамыз: мысалы, Оқжетпес жартасына немесе Бурабай тауына көтеріліңіз — биіктен керемет көрініс ашылады. Велосипедпен серуендеуге де болады, бірақ асфальт жолдармен жүрген дұрыс: орман соқпақтарында жиі тамырлар, шұңқырлар мен құм кездеседі. Ал егер тек «тыныштық пен кәуапты» ұнатсаңыз, көл жағасындағы коттедж немесе шағын үй жалдау — тамаша нұсқа. Көптеген демалыс орны мангал аймақтарын ұсынады. Маусымда алдын ала брондаған жөн. Сондай-ақ ертерек келген дұрыс: сағат 11-ге қарай кіреберісте кептеліс басталады.
Қалай жетуге болады: ең ыңғайлысы — Астанадан Бурабайға дейін жету: көлікпен — шамамен 3-4 сағат, такси бағасы орта есеппен 4 000 теңге. Пойызбен — 1 500 теңгеден бастап, «Курорт-Бурабай» немесе «Шортанды» станцияларына дейін жете аласыз. Басқа қалалардан алдымен Астана немесе Көкшетауға жетіп, содан кейін көлікке немесе пойызға ауысқан ыңғайлы.
Демалыс құны:
- Стандартты екі адамдық нөмір (таңғы аспен) — 20 000 теңгеден бастап.
- Коттедж жалдау — тәулігіне 15 000 теңгеден бастап.
- Екі адамға арналған түскі ас (дәмханада) — 4 000-6 000 теңге.
- Қайық немесе катамаран жалдау — сағатына 1 500-3 000 теңге.
- Жаяу жүргінші бағыттары мен негізгі көрікті жерлер — тегін.
Мен көкшетаулықпын, сондықтан Бурабай бізге таяқ тастам жерде — көлікпен бір сағаттан асса уақытта жетеміз. Біз онда жиі барамыз — жазда да, қыста да. Маған ең ұнайтыны — ауасы. Қарағай, шайыр, жаңбырдан кейінгі дымқыл жердің иісін ешнәрсемен шатастырмайсың. Соқпақтармен немесе көл жағасымен серуендегенді ұнатамын. Күзде тіпті ерекше — тыныштық, адам аз, орман алтын түске боялады.
Шілдеде мұнда әрдайым адам өте көп. Жол жиегінде көліктер Жасыл желекке дейін тізіліп тұрады десе де болады. Барлық нәрсенің бағасы — кәуаптан бастап тұрғын үйге дейін — бірден қымбаттап кетеді. Адамдар айналаны ластайды, қоқыс жәшіктері мен ескерту тақталарының барына да қарамайды. Бірақ соған қарамастан, жазда жиі барамыз, өйткені Бурабай — туған, жақын жеріміз.
Бұқтырма бөгені
Жаздағы температурасы: су – +22-25 °C дейін, ауа — +28-33 °C дейін.
Бұқтырма су қоймасы Қазақстанның шығысында, Өскеменнен жүз шақырым жерде орналасқан. Бұл елдегі ең ірі жасанды су қоймасы және әлемдегі ең үлкендердің бірі.
Жергілікті табиғат — бұл жылы судың кең айдыны, құмды жағажайлар, жасыл төбелер мен танымал курорттық аймақтарда кездеспейтін тыныштық.
Мұнда адамдар у-шу ойын-сауық үшін емес, асығыстықсыз, туристердің көптігінен аулақ демалыс үшін келеді. Шомылып, күнге қыздырынып, балық аулап, қайықпен серуендеп немесе жай ғана судың жағасында отырып демалады.
Тұрақтауға арналған нұсқалар көп: қабырғасы фанерадан жасалған кеңестік базалардан бастап, жағаның дәл жанынан салынған арзан коттедждерге дейін бар. Сондай-ақ «жабайы» аймақта шатыр тігуге болады. Ол әдетте тегін, бірақ азын-аулақ ақы сұрауы мүмкін. Көлге жақын жолдар кей жерлерде шұрық-тесік, әсіресе бұрыс жолға түсіп кеткен болсаңыз.
Шомылуға және тұруға ең танымал ауылдар — Зубовск, Қабанбай және су қоймасы арқылы өтетін көпірге жақын аудандар. Жазда су жақсы жылынады, ал жағалауы кең, суға түсу орны жайпақ — балалармен демалуға қолайлы. Бірақ мынаны есте ұстау керек: мұндағы инфрақұрылым деңгейі «дәмхана-киоск-қайық жалдау» шамасында. Қалған керек заттарды өзіңізбен алып келіңіз: тамақ, ыдыс-аяқ, шезлонг, қолшатыр, дәрі-дәрмек қобдишасы, дұрыс жастық.
Қалай жетуге болады: ең ыңғайлысы — Өскемен арқылы бару. Алдымен — қалаға дейін пойызбен немесе ұшақпен жетіп аламыз, одан кейін — Жаңа Бұқтырма станциясына дейін пойыз немесе автобуспен (1000–2000 теңге), әрі қарай — демалыс базасына дейін таксимен (5000 теңгеден бастап). Өскеменнен қашықтығы — 80-150 км.
Демалыс құны:
- Демалыс базасындағы бір түн — 6 000 теңгеден бастап.
- Су жағасындағы үйді жалдау — тәулігіне 10 000 теңгеден бастап.
- Шатыр тігетін орын — тегін немесе тәулігіне шамамен 1 000 теңге.
- Дәмханада түстену үшін орта чек — 2 000 теңгеден бастап.
- Қайық немесе катамаран жалдау — сағатына 2 000 теңгеден бастап.
Менің күйеуім өскемендік, және ол әр жаз сайын Бұқтырмаға баратын. Өткен жазда ол маған бұл жерді көрсеткісі келді. Ол маған сонша әңгімелеп, мақтаған соң, мен ерекше бір нәрсе көрем деп күттім. Бірақ шындықта бәрі «күту мен шындық» сияқты болып шықты.
Жолдың көп бөлігі жақсы болды, бірақ жақындаған сайын ой-шұңқырлар көбейді, жүру қиындай түсті. Жақсы бір дәмхана табу үшін де біраз іздеуге тура келді. Ал кешке қарай масалар маза бермей, дұрыс серуендеуге мүмкіндік болмады.
Бірақ маған ағаштан салынған, кесектен жасалған үйлер қатты ұнады — оларда өте жайлы екен, әсіресе кәуап пісіріп, террасасында отырған кезде.
Қапшағай су қоймасы
Жаздағы температурасы: су – +25–28 °C дейін, ауа — +35 °C дейін.
Алматылықтар үшін ең жақын әрі түсінікті жағажайлық демалыс орны — әрине, Қапшағай. Онда жету оңай, суы жылы, жағажайлары құмды, ал инфрақұрылымы жыл сайын жақсарып келеді. Жағажай маусымы маусымнан қыркүйекке дейін созылады.
Соңғы бірнеше жылда Қонаев қаласының өзі де қатты өзгерді. Енді Қапшағай бұрынғыдай емес, жақсы жағынан әрине. Биыл көктемде мұнда жағалауды жаңарту жұмыстары аяқталды: шағын субұрқақтар, жинақы пирс, велосипед жолдары мен жаңа дәмханалар пайда болды. Бірақ бұрыннан таныс демалыс түрлері де жоғалған жоқ. Жағалауда, бұрынғыдай, белсенді демалыспен айналысуға болады — катамаран немесе су мотоциклін жалға алу, жағажай волейболын ойнау немесе көлеңкеде пикник жасау. Балық аулау да танымал — әсіресе таңертеңгі және кешке уақытта. Отбасымен келгендерге жергілікті хайуанаттар бағы мен аквапарк орналасқан ауданға баруға кеңес береміз.
Тәулігіне үй жалдап тұруға, бір күнге шатырмен келуге немесе апта соңында күндері шағын демалыс ұйымдастыруға болады. Мұндай демалысқа орын әзірге жеткілікті, бірақ шілдеге қарай алматылықтардың жұма-жексенбідегі дәстүрлі ағымы басталады да, алдын ала бронь жасамасаңыз, дұрыс баспана табу қиын болады.
Қалай жетуге болады: көлікпен шықсаңыз, Алматыдан 60 км қашықтықта. Такси мен электричка бар, жиі қатынайды, жолға шамамен бір сағат уақыт кетеді. Электричка — 2 000 теңгеден бастап, такси — 5 000 теңгеден бастап.
Демалыс құны:
- Демалыс базасында бір тәулікке – адам басына 6 000 теңгеден бастап.
- Үй жалдау – тәулігіне 10 000 теңгеден бастап.
- Жекеменшік жағажайға кіру – 500–1 000 теңге.
- Дәмханада түстену үшін орташа чек — 2 000 теңге.
- Катамаран немесе қайық жалға алу — сағатына 1 500 теңгеден бастап.
Жаздың ыстық күндерінде Алматыда ең қарапайым әрі сүйікті ермек — Қапшағайға бару. Әдетте жаз бойы екі-үш рет барып үлгереміз. Достармен жиналып, музыка қосып жолға шығамыз, жолда жүгері мен қарбыз сатып аламыз.
Біз жабайы жағажайларды жақсы көреміз — онда адамдар аз, суы да тазарақ сияқты (негізі, солай деп сенгіміз келеді). Біздің сияқты «жабайылар» қолшатыр, доп, тамақ алып келеді — бәрі қалыпты.
Әрине, осындай жағажайларда да қандай да бір инфрақұрылым болғанын қалаймыз: дәретханалар, қоқысқа арналған жәшіктер, тұрақты тазалау жұмыстары. Қазірше ондай жоқ, барымен базар деп, қолжетімділіктің рақатын көреміз.
Сарыағаш
Жаздағы температурасы: термал бұлақтарындағы судың температурасы +30-35 °C, ал ауа +35 °C-қа дейін жетеді.
Сарыағаш — денсаулығын жақсартып, демалыстан пайда алғысы келетіндер үшін арналған курорт. Бұл аймақ шипажайларымен танымал — мұнда науқастан кейін оңалуға немесе жай ғана күш жинап, демалуға келеді: су құрамында кремний бар, ол гастритке, күйзеліске және буын ауруларына жақсы көмектеседі.
Демалыстың екі түрі бар: толық шипажайлық пакет алып, ем-дом, тамақтану және дәрігердің бақылауында болуға болады немесе жақын жерден бөлме жалдап, тек бұлақтарға барып, серуендеп, судан ішіп, базардан жеміс-жидек алып, ауылдың өмірін сезінуге болады. Айтпақшы, көп шипажайларда ішетін минералды су бюветтеріне ол жерде тұрақтамасаңызда «тегін кіру» қарастырылған.
Мұндағы климат жыл бойы жұмсақ, сондықтан маусымнан тыс кезде де баруға болады. Күз бен көктемде әсіресе жайлы: аптап ыстық жоқ, айнала жасыл, бақтарда жемістер пісіп жатады. Серуенге төбелер мен ауылдар жағына шығуға болады — таза ауа, ағаштар, асықпайтын адамдар. Жақын жердегі дәмханалар қарапайым, сәнді болмаса да, дәмді тамақ дайындайды: тандыр нан, самса, сорпа.
Егер ортаны ауыстырғыңыз келсе, маңайда термалды купельдер мен көлдер бар, бірақ оларға көлікпен жету керек. Ресми көрсеткіштерді күтпеңіз, жергілікті тұрғындардан немесе жүргізушілерден алдын ала сұрап алған дұрыс: қай жерде суға түсуге тұрарлық екенін міндетті түрде айтып береді.
Қалай жетуге болады: ең ыңғайлысы — Шымкент арқылы бару. Шымкенттен Сарыағашқа дейін қоғамдық көлікпен (1 500 теңгеден бастап) немесе таксимен (4 000 теңгеден бастап) шамамен екі сағат. Сондай-ақ Алматыдан, Астанадан және басқа қалалардан тікелей пойыздар жүреді.
Демалыс құны:
- Емдеу және тамақтанумен шипажайдағы бөлме — 9 000 теңгеден бастап.
- Ем-шарасыз тұрақтау — 5 000 теңгеден бастап.
- Дәмханада екі адамға түскі ас — 3 000-5 000 теңге.
- Алматы–Сарыағаш пойызына билет — 6 000 теңгеден бастап.
Биыл көктемде ата-анам ақыры Сарыағашқа барып қайтты — көптен бері армандап жүр еді, бірақ сәті түспей жүрген. Есімде, бала күнімде жыл сайын әжемді сонда жіберетін, енді ата-анамның да кезегі келді. Олар «Хадия Сарыағаш» шипажайынан емдік жолдама алды: тұру, тамақтану, процедуралар. Минералды сулар, ванналар, дәрі тамызғыштар, массаж — бәрі денсаулығына қарай жеке таңдалып берілді. Жолға шығар алдында міндетті түрде дәрігермен кеңесті, өйткені мұндай сулар мен тазарту процедуралары бәріне бірдей жарай бермейді.
Анам бауырын айтып шағымданып жүретін, ал әкемнің басы жиі ауыратын. Курстан кейін екеуінің де жағдайы біршама жақсарды, тіпті жаңарғандаймыз дейді. Шипажайдың өзі таза, қызметкерлері сыпайы, тамақтары дәмді. Бар керегі ішінде бар, бірақ серуендейтін орын онша жоқ.
Балқаш
Жаздағы температурасы: су +25-28 °C дейін жылынады, ауа +35 °C дейін жетеді.
Балқаш — Қазақстан мен бүкіл Орталық Азиядағы ең ерекше су айдындарының бірі. Оның бірегейлігі — көлдің жартысы тұщы, жартысы тұзды болуы. Бұл көлдің екі бөлігін бөлетін тар мойнақтың әсерінен судың араласпауынан болады. Экологтар мен гидрологтардың айтуынша, бұл әлемде сирек кездесетін табиғи құбылыс.
Жазғы демалыс үшін ең жақсы уақыт — маусымның соңынан қыркүйектің басына дейін: су +25-28 °C дейін жылиды, ауа +35 °C дейін барады, жауын-шашын жоқтың қасы. Негізгі шомылу және орналасу орындары — Балқаш қаласы, Бүрылбайтал ауылы және оңтүстік жағалау, мұнда адам аз, суы таза. Жағажайлары негізінен құмды немесе ұсақ тасты, суға түсу ыңғайлы — балалармен демалуға қолайлы. Демалысты жайлы жағдайларда да, мейлінше «жабайы» түрде де өткізуге болады: демалыс базалары да, жағалауда шатыр тігетін орындар да бар.
Көптеген ойын-сауық жоқ, бірақ тыныштық пен табиғатты ұнататындар үшін бұл жазда артық шығынсыз демалыстың оңтайлы нұсқасы. Шомылу, балық аулау, жағалауда серуендеу, күн батуын тамашалау, пикник. Қайықпен шағын саяхат жасап немесе жергілікті көрнекті орындарға баруға болады: қалалық мұражай, металлургтерге арналған мемориал немесе көл маңындағы қаланың тіршілігін көру. Егер оңаша болғыңыз келсе, қаладан шалғай жабайы жағажайға шатыр тігіңіз: мұндай орындар осында жетерлік.
Қалай жетуге болады: Алматыдан — Балқаш-1 станциясына дейін пойызбен немесе көлікпен — шамамен 10–11 сағат (шамамен 600 км). Қарағандыдан — көлікпен немесе пойызбен алты сағаттай. Сондай-ақ маусымдық қалааралық автобустар бар немесе жол серіктестермен (попутка) жетуге болады.
Демалыс құны:
- Демалыс базасында тұру — тәулігіне 6 000 теңгеден бастап.
- Қонақүйдегі стандарт бөлме — 10 000–15 000 теңгеден бастап.
- Дәмханада түстену — 1 500–2 500 теңгеден бастап.
- Шатыр тігетін орын — тегін немесе жекеменшік аумақ болса 1 000 теңгеге дейін.
- Қайық жалға алу — сағатына 3 000 теңгеден бастап.
Біз өткен жылдың шілдесінде отбасымызбен және туыстарымызбен Балқашқа үш күнге бардық. «Досжан» демалыс аймағына тоқтадық, пікірлерге қарағанда — ең жақсы орындардың бірі. Үлкен коттеджді тәулігіне 200 000 теңгеге жалдадық (сол сәттегі ең қымбат нұсқа болды), бірақ бюджеттік нұсқалар да көп еді. Бұл жолы біз «люкс жайлылықты» таңдауды жөн көрдік. Базаның аумағы таза, балаларға арналған алаңдар бар, тамағы өте дәмді. Бірақ аймақ сыртына шыққанда айырмашылық бірден байқалады: лас, шыбын-шіркей көп, инфрақұрылым әлсіз.
Ең ұнағаны — көлдің өзі. Су жылы, таза, шомылуға жағымды. Соның өзі қайта келуге себеп бола алады.
Ақтау
Жаздағы температурасы: су +23–26 °C дейін жылиды, ауа +35 °C дейін барады.
Ақтау — Каспий жағалауындағы қала, мұнда көрші елдерден туристер жылы теңізді, ерекше ландшафт пен қолжетімді демалысты іздеп жиі келеді. Қала танымалдылығы артқанмен, бұл бағыт әлі де салыстырмалы түрде арзандау: қонақ үйлердің таңдауы мол — қарапайым қонақ үйлерден бастап теңіз жағасындағы заманауи кешендерге дейін бар.
Жағажайлары тас-құм аралас, суы мөлдір әрі жылы, әсіресе тамызда — теңіз +26-28 °C дейін жылиды. Ең танымал шомылу орындары — 3 және 4 ықшамаудандар, қалалық жағалау, сондай-ақ Кендірінің маңындағы курорттық аймақ. Шатыр тігуге арналған жабайы жағажайлар да жеткілікті, олар қаланың ортасынан сәл алыста орналасқан.
Ақтауда жазда күн ашық әрі ыстық — сапарға шыққанда күннен қорғайтын крем мен бас киім алуды ұмытпаңыз. Ал кешкі уақытта жағалауда серуендеу өте жақсы: «Приморский» бекінісінен теңіздегі күн бату көрінетін әдемі көпірге дейін жаяу жүріп өтсеңіз болады. Қаланың көп бөлігі кеңес дәуірінде салынған, ықшамаудандарға бөлінген, кең көшелері бар. Қалада өз бетіңізше серуендеуге ескі бекініс маңын, Приморский саябағын, Жартас соқпағын және теңіз жағасындағы амфитеатр тамаша орындар.
Тек жағажай демалысымен шектелмей, қала сыртына — Маңғыстау бағытына шығып қайтқаныңыз жөн. Ең танымал маршруттар — Бозжыра (өзге ғаламшарды еске түсіреді), Тамшалы (шөлдің ортасындағы бұлақ пен жасыл желекті жер), киіз үйге ұқсас Шерқала тауы. Мұндай сапарларға жол талғамайтын көлікпен немесе тур құрамында барған дұрыс. Экскурсияларды қалада бірден ұйымдастыруға болады.
Қалай жетуге болады: батыс Қазақстан тұрғындарына көлікпен не пойызбен баруға болады, ал ірі қалалардан (Шымкент, Астана, Алматы) ұшақпен барған ыңғайлы.
Демалыс құны:
- Қонақ үйлер мен апартаменттер — бір түнге 8 000–15 000 теңгеден бастап.
- Дәмханада екі адамға түскі ас — 4 000 теңгеден бастап.
- Шезлонг жалға алу — 1 000 теңгеден бастап.
- Маңғыстау бойынша экскурсиялар (топпен) — 17 000 теңгеден бастап.
- Табиғи көрнекті орындарға такси — екі жаққа 15 000–30 000 теңге.
Мен Ақтауды Венгрияға ұшып бара жатқанда көріп үлгердім. Мен Астана–Ақтау–Кутаиси–Будапешт бағытымен ұшқан едім. Қаланы көруге небәрі бір жарым күнім ғана болды, бірақ біраз нәрсеге үлгердім: жағалауды, аттракциондар саябағын, Жартас соқпағын, қалалық саябақты араладым, жағалаудағы кафелердің бірінде жаңа піскен балықтың дәмін таттым. Ең ұнағаны — айналамда турист көп болды, ал дәмханаларда мәзір үш тілде ұсынылды.
Сондай-ақ теңізде пароммен серуендеп үлгердім — серуеннің бағасы небәрі 2 000 теңгенің шамасында болды (20 минут). Келесі жолы бұл жаққа жазда келіп, көбірек уақыт өткізіп, демалыстың барлық сұлулығын сезінгім келеді.
Суреттер: Аружан Кузтаева, Назгуль Жанайдарова, Дарья Амангалиева.
