Жазда да салқын он ел: ыстықты ұнатпайтындарға арналған топтама
Жаздың қақ ортасында да еш қиналмай саяхаттағым келеді десеңіз, мархабат.
Жаз басталса болды, бәрінің ойы — теңіз не көл жағасына бару. Ал аптап ыстық +40 °C-тан асып, жағажайда күн шыжғырып жіберетін кезде не істемек керек? Шіліңгір шілдеде салқын жерде саяхаттасам ғой деп жүрсеңіз, мына бағыттарға көз салыңыз.
Қатонқарағай, Қазақстан
Қалай жетуге болады: Өскеменге ұшақпен немесе пойызбен жетіп, ары қарай көлікпен шамамен 6–7 сағат жол жүресіз.
Күн райы: күндіз +18...+22 °C, түнде +6...+10 °C.
Шілденің қақ ортасында да қалың көрпе қымтанып не ұйықтайтын қапқа тығылып жататын жердің бірі — Қатонқарағай. Мұнда жаңбыр сіңген қарағайдың иісі аңқып тұрады, альпі шалғындары гүлдеп жатады, ал тау өзендері Белуха мұздықтарынан бастау алады. Бұл өңірді толық аралағыңыз келсе, жол талғамайтын көлікпен барған дұрыс. Жолай Үріл ауылындағы әйгілі «Ясная поляна» демалыс орнында тоқтап, дәстүрлі алтайлық ауылдарда түнеп, шөптің хош иісі аңқыған фитобанға түсіп, артынша түнгі орманға қараған мұздай суға түсіп, сергіп алуға болады. Ал өзіңізді де, көлігіңізді де сынап көргіңіз келсе, аты аңызға айналған Ескі Австрия жолымен жүріп көріңіз. Батпақ пен тұман басқан 50 шақырымдық жолдың аяғында Марқакөл көлі күтіп тұрады.
Қарақол, Қырғызстан
Виза: қажет емес. Қазақстан азаматтары жеке куәлікпен кіре алады.
Қалай жетуге болады: Алматыдан көлікпен не автобуспен шамамен 6 сағатта жетесіз. Сондай-ақ Астана не Алматыдан Ыстықкөлге ұшып барып, ары қарай таксимен жетуге болады.
Күн райы: қалада күндіз шамамен +20 °C, шатқалдарда +12...+15 °C.
Шекарадан өткен соң жарты күн ішінде қылқан жапырақты орман, жасыл жайлау мен Теріскей Алатауының шатқалдарына тап боласыз. Бір күніңізді Қарақол қаласының өзіне арнаңыз. Бұл — тау етегіндегі шағын әрі тыныш қала. Тауға шығатын туристердің көбі осында аялдайды. Қаланың орталығын аралап, көне ағаштан салынған Қасиетті Үштік шіркеуіне кіріп, кешке халықаралық The Hut барында жергілікті сырадан дәм татуға болады.
Бұл жақтағы ең қызық челленж — теңіз деңгейінен 3500 метр биіктіктегі Алакөл мұздық көліне дейінгі треккинг. Жаздың өзінде мұнда қар жатады. Егер тәжірибеңіз болмаса не ыңғайлы аяқ киіміңіз жоқ болса, жергілікті гидпен барған дұрыс. Тауға көтерілгеннен кейін Алтын-Арашан аңғарына түсіп, ыстық минералды бұлақтарға түсіп демалуға болады.
Сванетия, Грузия
Виза: бір жылға дейін қажет емес.
Қалай жетуге болады: Ақтау, Атырау, Шымкент, Алматы немесе Астанадан Тбилиси не Кутаисиге ұшып барып, ары қарай көлікпен немесе маршруткамен Местияға жетуге болады.
Күн райы: күндіз +18...+22 °C, түнде +8 °C шамасында.
Тбилиси мен Батуми аптап ыстықтан қызып жатқанда, Сванетияда Кавказ жотасынан соққан суық жел есіп тұрады. Биік таулардың ортасында орналасқан Местия ауылынан Шалаади мұздығына дейін жаяу баруға болады. Соқпақ жол салқын қылқан жапырақты орман мен тау өзенінің жағасымен өтеді.
Мұнымен шектелгіңіз келмесе, Местиядан көлік жалдап, Еуропадағы ең биік тұрақты қоныстардың бірі саналатын Ушгулиге барыңыз. Мұнда X ғасырдан қалған тас мұнараларды аралап, Шхара тауының алып мұздығын тамашалайсыз. Кондиционердің орнына жергілікті тұрғындар мұздай бұлақ суын ішіп, салқын мацони жеп, отбасылық қонақүйлерде дайындалатын ыстық кубдари бәліштерімен жүрек жалғайды.
Канас, Қытай
Виза: 30 күнге дейін қажет емес.
Қалай жетуге болады: Алматы немесе Астанадан Үрімжіге ұшып, ары қарай ішкі рейспен не автобуспен Канасқа жетуге болады.
Күн райы: күндіз +16...+19 °C, түнде +6 °C.
Қытайға енді қазақстандықтар визасыз бара алады. Сондықтан тек Шанхайда сауда жасау үшін емес, табиғатын көру үшін де барған жөн. Шыңжаң өлкесінің солтүстігінде орналасқан Канас қорығында алып мұздық көл бар. Оның суы күннің түсуіне қарай ақшыл көктен қою жасыл түске дейін құбылып тұрады.
1068 баспалдақпен Гуаньюй шолу алаңына көтерілсеңіз, көл ғажап көрінеді. Сондай-ақ таңертең қалың тұман басатын Ертегілер шығанағына не Ай шығанағына барып қайтуға болады.
Көлдің айналасын қалың тайга қоршаған. Мұнда ағаш үйлер орналасқан, өзендердің бойымен жаяу жүргіншілерге арналған ағаш жолдар төселген. Сол жолмен жүріп келе жатып көне жартастағы суреттерді де көруге болады. Қаладағыдай түтін де, аптап ыстық та жоқ. Кешке киіп алатын жылы күртені ұмытпаңыз.
Нувара-Элия, Шри-Ланка
Виза: тегін рәсімделетін электронды виза (ETA).
Қалай жетуге болады: Алматыдан Air Astana әуе компаниясының тікелей рейсімен не Шарджа арқылы Коломбоға ұшып, одан әрі пойызбен Нувара-Элияға баруға болады.
Күн райы: күндіз шамамен +16...+19 °C, түнде +10 °C.
Шри-Ланка десе, көпшіліктің ойына бірден қапырық тропикалық ыстық келеді. Бірақ Кандиден пойызға отырып, аралдың ортасындағы таулы аймаққа көтерілсеңіз, мүлде басқа әлемге тап боласыз.
Нувара-Элияны британдық отарлау дәуірінен қалған сәулеті, гольф алаңдары, атшабарлары, мұнтаздай көгалдары мен Оңтүстік Азияға мүлде ұқсамайтын салқын климаты үшін «Кішкентай Англия» деп атайды. Әлемге әйгілі цейлон шайы өсірілетін алқаптарды таңертең қою тұман басады. Ал кешке салқын болатыны сонша — шілденің өзінде көп қонақүй камин жағады. Бұл — сүйікті худиіңізді киіп, ыстық шайдан ұрттап, демалып қайтқанға таптырмас жер. Ал аралдың жағалауындағы қалаларда бұл кезде аптап ыстық болады.
Рейкьявик, Исландия
Виза: Шенген визасы қажет.
Қалай жетуге болады: Ыстанбұл не Франкфурт арқылы Копенгагенге, Миланға не Варшаваға ұшып, одан әрі Рейкьявикке тікелей рейспен жетуге болады.
Күн райы: күндіз +11...+14 °C, түнде +7 °C.
Егер ыстық жағажайдан гөрі солтүстіктің қатал табиғатын жақсы көрсеңіз, Исландия сізге сөзсіз ұнайды. Мұнда мүк басқан алқаптарды, жер астынан атқылап жатқан Строккюр гейзері мен Сельяландсфосс секілді алып сарқырамаларды көресіз.
Вик ауылының жанындағы әйгілі Рейнисфьяра жағажайында жанартаудың қара құмы мен биік базальт бағандары көз тартады. Мұнда суға түскіңіз келмеуі мүмкін, бірақ мұндай көріністі әлемнің басқа жерінен табу қиын. Егер халықаралық жүргізуші куәлігіңіз болса, толық жетекті кемпер жалдап, аралды айналып өтетін сақина жолмен саяхаттаған ыңғайлы. Жол бойында ең көркем жерлерге тоқтап, табиғаттың сұлулығын тамашалай аласыз. Шомылуға да мүмкіндік бар. Бірақ теңізге емес, табиғи ыстық бұлақтарға түсесіз. Мысалы, әйгілі Blue Lagoonнемесе туристер аз баратын Sky Lagoon кешеніне барыңыз.
Буэнос-Айрес, Аргентина
Виза: 30 күнге дейін қажет емес.
Қалай жетуге болады: Алматы не Астанадан Ыстанбұл арқылы ұшуға болады.
Күн райы: күндіз +11...+14 °C, түнде +7 °C.
Бізде жаз басталғанда, Жердің арғы бетінде қыс боп жатады. Буэнос-Айрес Қазақстаннан алыс орналасқанымен, виза қажет емес әрі бір ғана ауысып мінетін рейспен жетуге болады. Мұндай саяхат ұзақ уақыт есте қалары сөзсіз.
Шілдеде қалада күн өте жайлы болады. Күнге күйіп кетемін деп алаңдамай-ақ, Сан-Тельмо ауданындағы көне көшелерді аралауға болады. Егер мұнда да салқын жетпей жатса, елдің оңтүстігіндегі Эль-Калафате қаласына жол тартыңыз. Сол жерде Перито-Морено мұздығының үстімен арнайы бағытпен жаяу серуендеуге болады. Одан кейін Барилочеге барып, қар басқан Анд шыршаларының арасында сноуборд теуіп, жергілікті шеберханаларда дайындалатын ыстық шоколадтан дәм татып көріңіз.
Мельбурн мен Тасмания, Аустралия
Виза: қажет. Құжаттар онлайн рәсімделеді, ал биометриялық мәліметтерді виза орталығына барып тапсыру керек.
Қалай жетуге болады: Алматыдан Дубай, Абу-Даби не Доха арқылы Сидней не Мельбурнға ұшуға болады.
Күн райы: Сидней мен Мельбурнда күндіз +14...+16 °C, кешке +7 °C.
Бұл сапар басқа ғаламшарға барғандай әсер қалдыруы мүмкін. Саяхатты Мельбурннан бастаңыз. Шілде айында мұнда қыс болады. Сондықтан жылы пальто киіп, бір кесе флэт-уайт ішіп (айтпақшы, бұл сусынның отаны кім деген дауда Аустралия мен Жаңа Зеландия әлі күнге дейін келісе алмай келеді), Турак пен Саут-Ярра аудандарындағы викториялық сәулет үлгісіндегі ескі үйлерді еркін аралауға болады. Қаладан көлік жалдап, әйгілі Ұлы мұхит жолымен жүрген жөн. Жаз мезгілінде бұл жол туристік автобустарға лық толы болады. Ал қыста жол әлдеқайда тыныш. Жолай Грейт-Отуэй ұлттық паркінің ормандарынан жабайы коалаларды көріп, кешке әйгілі Он екі Апостол жартастарының жанында күннің батқанын тамашалауға болады.
Күн бұдан да салқын болсын десеңіз, Тасмания аралына барыңыз. Мұнда күндіз ауа температурасы шамамен +10 °C болады. Тасмания — табиғат аясында тасманиялық әзәзіл деп аталатын қалталы жыртқыштарды табиғи ортада көруге болатын әлемдегі жалғыз жер. Олар көлемі жағынан шағын итке ұқсайды. Арнайы қорыққа кіру билеті шамамен 40 AUD (шамамен 13 мың KZT) басталады.
Йоханнесбург, Оңтүстік Африка Республикасы
Виза: қажет. Астанадағы елшілік арқылы рәсімделеді.
Қалай жетуге болады: Алматы не Астанадан Ыстанбұл, Дубай не Доха арқылы Кейптаунға не Йоханнесбургке ұшуға болады.
Күн райы: күндіз +15...+18 °C, түнде +5 °C.
Осы мезгілде Кейптаун мен Йоханнесбургте құрғақ әрі салқын кезең басталады. Бұл — сафариге шығуға ең қолайлы уақыт. Біріншіден, аптап ыстық та, мазаны алатын жәндіктер де болмайды. Екіншіден, күн аз жауғандықтан шөп биік өспейді. Ал жабайы жануарлар суаттарға өзі келеді. Сондықтан арыстан, піл, мүйізтұмсық секілді аңдарды көруіңіз мүмкін. Біздің қыс айларына сәйкес келетін жергілікті жаз мезгілінде мұндай сәттер сирек кездеседі.
Сафариге таң ата ашық джиппен шыққан дұрыс. Жылы киініп, өзіңізбен бірге термосқа ыстық шай құйып алыңыз. Күндіз Үміт мүйісінде не Боулдерс жағажайында қысқы күннің астында жайбарақат жүрген пингвиндерді тамашалауға болады.
Аляска мен Колорадо, АҚШ
Виза: АҚШ-тың туристік визасы қажет.
Қалай жетуге болады: Алматы не Астанадан Ыстанбұл не Франкфурт арқылы Сиэтлге немесе Нью-Йоркке ұшып, ары қарай ішкі рейспен Аляскадағы Анкоридж қаласына жетуге болады.
Күн райы: Аляскада күндіз +10...+15 °C, Колорадода орташа есеппен +14...+16 °C.
Аляскада жазда міндетті түрде Кенай-Фьордс ұлттық паркіне круизбен шыққан жөн. Сол кезде алып мұздықтардың сынып, гүрілдеп мұхитқа құлағанын өз көзіңізбен көресіз. Бұл жақта Хомер қаласынан ағаш үй жалдап, қарлы алқаптарды квадроциклмен аралап, кешке каминдегі оттың сықырлаған үнін тыңдап ұйықтауға болады.
Аляска тым алыс не жолы күрделі көрінсе, Колорадо штатының тау шаңғысы курорттарына, мысалы, Брекенриджге барыңыз. Шілденің өзінде тау басында қар жатады, көтергіштер жұмыс істейді. Сондықтан аптап ыстықтың орнына мұз басқан көлдердің жағасындағы Альп шалғындарында серуендеп, кешке жергілікті пабта ыстық глинтвейн ішіп сергіп қайтуға болады.
