Нәрестемен ұшаққа міну: ережелер мен кеңестер

Рейсті күту, жүк тапсыру, бірнеше сағат бортта отыру — осының бәрі сәбимен ұшатын ата-анаға нағыз сынақ болуы мүмкін. Бір емес бірнеше баламен ұшаққа мінетін болсаңыз, сөзсіз алдын ала дайындық керек. Терең демалыңыз, біз баламен ұшуды жеңілдететін ережелер мен кеңестерді дайындап қойдық.

Үнемді саяхаттау және басқа да пайдалы нұсқаулықтар — әлеуметтік желілерімізде

Telegram

Instagram

Нәрестеге қалай билет аламыз?

Қазақстан ішінде екі жасқа толмаған бала тегін ұшады. Ата-анасының алдында отыратындықтан оларға косымша орын қажет емес. Бірақ өзіңізге билет алған кезде міндетті түрді сәбиді де тіркеу керек. Егер екіге толмаған баланы аспа бесікпен (люлька) не авто-орындықпен тасимын десеңіз, оған билеттің 50%-ын төлеп, орын аласыз. Авто-орындықтың ені 41 сантиметрден аспауы керек әрі ұшақ орындығына бекітетін мүмкіндігі болғаны абзал. Бірақ кей әуе компанияларында баланы авто-орындықта не аспалы бесікте тасымалдауға рұқсат жоқ. Мысалы, Qazaq Air-мен ұшсаңыз, екіге толмаған баланы тек алдыңызға алып отыруға дайын болыңыз.

2-14 жас аралығындағы балаға билеттің 50%-ын төлейсіз. Себебі оған бөлек орын қарастырылған. Билет тарифінде багаж болса, балалар билеті бойынша да багаж тасымалдау мүмкіндігі беріледі.

Ал шетелге баламен шығамын десеңіз, билеттің 90%-ын төлеуіңіз мүмкін — бәрі әуе компаниясы мен тарифіңізге байланысты. Оны алдын ала біліп алғаныңыз дұрыс.

Сәбимен ұшуға қалай дайындалу керек?

• Әрине, алдымен баланы қарайтын дәрігермен кеңескен абзал. Жолға қандай дәрі-дәрмек ала барған жөн екенін сұрап алыңыз.
• Құжаттарыңыз бен керек-жарақтарыңызды ыңғайлы сөмкеге алдын ала салып қойыңыз.  
• Баланың ұйқы режимін реттеңіз не болмаса түнгі рейстерді таңдауға тырысыңыз. 
• Тіркеу аймағы не паспорт бақылауында сізге көбірек уақыт қажет болуы мүмкін, сондықтан әуежайға ертерек барыңыз.
• Ұшақ ұшарда баланы емізуге не қосымша сүтін беруге тырысыңыз, осылайша оның құлағын бітеліп қалудан сақтайсыз. 
• Орынды алдыңғы қатардан алуға тырысыңыз, ұшаққа кіріп-шығуға әрі кең отыруға ыңғайлы.

Барлық әуежайда «Ана мен бала» бөлмесі қарастырылған. Кейбірінде тек гигиеналық продедуралар жасауға мүмкіндік болса, кейбірінде рейске отырғызу басталғанша демалатын жағдай жасалған. Әуежай қызметкерлерінен «Ана мен бала» бөлмесіне бағыт сұрасаңыз, баламен ұшаққа отырғанша реттеліп ала аласыз.

Бортқа арба алып кіруге бола ма?

Бортқа кіргізетін арбаның жиналған күйіндегі ұзындығы көп дегенде 34 сантиметр, ені 32 сантиметр, биіктігі 14 сантиметр болуы керек әрі жинаған соң салып қоятын қаптамасы болуы қажет. Мысалы, Graco, Anex, Nuna, Joie, Inglesina маркаларының серуендеуге арналған арбаларын бортқа алып кіруге болады. Жоғарыда айтылған параметрлерден үлкен арба жүкпен бірге тасымалданады. Рейске тіркелу кезінде арбаңызды бортқа дейін пайдаланамын десеңіз, ұшаққа кіргенше онымен жүре аласыз. Сіз бортқа кіргенде бортсеріктер арбаңызды үлкен жүктердің қасына салып қояды.

Борт ішінде аспа бесік беріле ме?

Кейбір рейстерде сәбиге арнап тегін аспа бесік алуға болады — қандай әуе компаниясымен ұшатыныңызға байланысты. Мысалы, Air Astana алдыңғы қатары кең ұшақтарында аспа бесік береді. Ол үшін әуе компаниясының сайтына кіріп не операторға қоңырау шалып, MySEAT орнын сатып алу керек. MySEAT бортқа бірінші кіріп, бірінші шығуға, алдыңғы кең орындарға жайғасуға мүмкіндік береді. Бағасы 7 950 теңгеден басталады.

FlyArystan әуе компаниясымен жолға шықсаңыз да аспа бесік сұрай аласыз. Ол үшін бірінші қатарда отыру керек әрі [email protected] поштасына жазып, аспа бесікті алдын ала брондау қажет. Бірінші қатардан орын алсаңыз әрі аспа бесікті брондасаңыз болғаны — аспа бесік тегін беріледі. 

Өкінішке қарай, Scat пен Qazaq Air әуе компанияларында ондай қызмет жоқ. Екі жасқа толмаған бала ата-анасының алдында отырады.

Тағы не ала жүру керек?

Кез келген жағдайға дайын болу үшін сәбимен ұшатын ананың сөмкесінде керектінің бәрі болғаны маңызды. Бортта ең қажет заттар тізімін ұсынамыз:

• Қосымша су-тамақ. Балаңыз ана сүтінен басқа тамақ ішетін кезге келсе, қоспа, езбе, снектер сияқты тіскебасар салып алыңыз. Ашыққанда жүрек жалғап алуға ыңғайлы. Бастысы, осыған дейін ішіп-жеп жүрген тамақ болуы керек. Ұшақта аллергия мен іш ауруынан сақтанған абзал.
• Қосымша киім. Бірнеше сағат ұшу — кішкентай балаға үлкен сынақ. Үстіне су төгіп алса, терлеп кетсе, киімін былғап алса, ауыстыратын бірнеше киім мен жөргектің сөмкеңізден табылғаны жақсы болады. 
• Жаңа ойыншық. Ұшаққа отырмай тұрып балаға көрсетпей жаңа ойыншық ала барыңыз — бір орында отырудан шаршаған баланы алаңдатуға ыңғайлы. Тісі шығып жатқан балаға тістейтін ойыншық алып шықсаңыз, мазасыздануының алдын аласыз.
• Жаялық. Киім ауыстыратын кезде баланың астына төсейтін, ұйықтап қалғанда жамылдыратын, емізген кезде бүркеп отыратын жаялығыңыздың болғаны жөн. 
• Ылғал майлық. Жөргек ауыстырғанда, тамақ ішкенде, тіпті ойнағанда керек нәрсе. 
• Дәрі-дәрмек. Ыстық түсіретін, аллергияны басатын, жарақатқа жағатын дәрі-дәрмектер мен жабыстырғыштарды алуды ұмытпаңыз. Жолда таптырмауы мүмкін.

Жөргекті қайда ауыстыра аламыз?

Бортта жөргек ауыстыру оңай емес. Арнайы жер қарастырылмаған, тек дәретхананың ішінде жылжымалы үстел бар — соны түсіріп, ауыстыруға болады. Сол себепті мейлінше ұшаққа отырмас бұрын баланың жөргегін әуежайда ауыстырып алған дұрыс.