Берлинде тегін босандым: қазақ әйелінің перзентханада көргені
Жас ананың көргені мен неміс паспортын рәсімдеу.
Сәлем! Атым — Іңкәр, жасым 27-де. Берлинде тұрамын. Германияға 2016 жылы оқуға келдім. Бір жыл Хессен федералдық жеріндегі Марбург қаласында тұрдым. 2017-де Берлинге көштім. Былтыр осында қызымды босандым, биыл мамырда ол бірге толды. Бүгін мен Германиядағы босану жүйесі туралы айтып, тәжірибемді баяндап беремін.
Аяғым ауыр кезде Қазақстанға барып босану туралы ойлаған да жоқпын. Бірден Берлинде босанамын деп шештім. Медициналық сақтандыруым болғандықтан, бәрі тегін болатынын білдім. Оның үстіне, баламыздың осы елде өсетінін ескеріп, дәл осы жерде босанған дұрыс деп санадық.
Германияда тегін босану үшін қандай құжат керек?
Германияда босану үшін ең бастысы медициналық сақтандыру болуы керек. Онсыз босану өте қымбатқа түседі. Бұдан бөлек, тұруға ықтиярхат пен төлқұжат сұралды.
Берлинге көшкен кезде Techniker Krankenkasse деп аталатын мемлекеттік сақтандыру рәсімдегенмін. Студент кезімнен бері осы жүйеге қосылып алғанмын. Германияда мемлекеттік сақтандыру студенттер мен жұмыс істейтін адамдарға міндетті. Сондықтан босану кезінде кеткен барлық шығынды сақтандыру өтеді, өз қалтамнан ақша шығарған жоқпын.
Берлинде арнайы мемлекеттік перзентханалар жоқ. Босану бөлімдері кәдімгі ауруханалар жанында жұмыс істейді. Сақтандыру осы ауруханалардағы босану қызметін толық қамтиды.
Мен үйіме жақын орналасқан аурухананы таңдадым. Жаяу барсаң — 10 минут, көлікпен барсаң — 2–3 минуттық жер. Толғақ кезінде қаланың арғы шетіндегі ауруханаға жету қиын болар еді. Әрине, үлкенірек не басқа аурухананы таңдауға мүмкіндік бар. Бірақ менің ауруханам шағын болса да жайлы әрі сенімді көрінді. Оның үстіне, гинеколог дәрігерім де осы аурухананы ұсынды.
Неміс дәрігерлері аяғы ауыр әйелді қалай бақылайды?
Бұл сәби тұңғышым болғандықтан, Қазақстан перзентханаларымен салыстырып айта алмаймын. Дегенмен жүктілік кезіндегі медициналық бақылау жүйесі бір-біріне ұқсас сияқты көрінді.
Жүкті екенімді білген соң бірден гинекологқа жазылып, тіркелдім. Мұнда үлкен емханалар жоқ. Әр дәрігердің жеке кабинеті болады, оны «праксис» деп атайды. Сондықтан кез келген гинекологты таңдап, соның бақылауына тұруға болады.
Мен де пікірлерді қарап, үйіме жақын орналасқан дәрігерді таңдадым. Алғашқы айларда айына бір рет қабылдауға шақырды, кейінгі айларда екі апта сайын барып тұрдым. Әр барған сайын салмағым мен қан қысымымды өлшеді, зәр талдауын тапсырдым. Қан талдауын тоғыз ай ішінде бірнеше рет қана алды. Сақтандыру аясында үш рет УДЗ жасалды. Қандағы қант деңгейі де тексерілді.
Дәрігерлердің пациентке деген көзқарасы да өзгеше екен. Қазақстанда кейде жүктілікті ауру секілді қабылдап, көп нәрсеге шектеу қоятын жағдайлар кездеседі. Ал Берлиндегі дәрігерлерден ондайды байқамадым.
Мысалы, ұшақпен ұшу туралы сұрағанда, «Мен тыйым сала алмаймын, шешімді өзіңіз қабылдайсыз» деп жауап береді. Яғни, жауапкершілік пациенттің өзіне жүктеледі. Тіпті жүктіліктің соңғы кезеңінде ұшу үшін арнайы анықтама талап етілмейді. Әйел адам өзі біледі.
Хебамма деген кім және ол қалай көмектеседі?
Германиядағы ерекше қызметтердің бірі — хебамма. Хебамма — арнайы медициналық білімі мен лицензиясы бар акушер. Ол босануға дейін анамен кездесіп, босану процесін түсіндіреді, балаға қажет заттарды таңдауға көмектеседі және ата-аналарды алдын ала дайындайды.
Ол босанғаннан кейін де үш ай бойы үйге келіп тұрады. Баланы шомылдыруға, киіндіруге көмектеседі, салмағы мен бойын өлшейді, дамуын бақылайды. Доулаға да, акушерге де ұқсайды. Оның қызметі де сақтандыру есебінен төленеді.
Бұл қызмет маған қатты ұнады. Біз ата-анамыз бен жақындарымыздан алыс жүргендіктен, бала күтімі бойынша кеңес беретін адамның болғаны көп көмектесті. Хебамма босанғанға дейін де, босанғаннан кейін де қолдау көрсетті. Мысалы, қызымды алғаш рет шомылдырғанда дәл сол кісінің көмегі тиді.
Хебаммадан жолым болды. Менің хебаммам босанған ауруханада да жұмыс істейтін болып шықты. Толғақ басталған күні оның ауысымына түстім. Қызым дүниеге келетін сәтте де жанымда болды.
Жалпы, хебамманы Қазақстандағы доула секілді босануға арнайы шақыруға болады, бірақ ол үшін қосымша ақы төленеді. Менің жағдайымда оған қажеттілік болмады.
Тіл мәселесіне келсек, дәрігерлермен еркін сөйлесу үшін неміс тілін білген дұрыс. Дегенмен көпшілігі ағылшын тілін де түсінеді. Сондықтан ағылшын білсеңіз, үлкен қиындық туындамайды. Ал екі тілді де білмесеңіз, түсінісу қиындауы мүмкін.
Маған босануға дайындық және босанғаннан кейінгі қалпына келу курстары да ерекше көрінді. Оларға жалғыз да, жұбайыңызбен бірге де қатысуға болады. Курстардың ақысы сақтандыруға кіреді.
Мен де осы курстан өттім. Жұбайыммен бірге қатысқымыз келген, бірақ орын жетпей қалды. Курста дұрыс тыныстау, толғақ кезінде қалай қимылдау керегін түсіндіреді. Кейін оның пайдасын көрдім.
Айтпақшы, босануға барарда үлкен сөмке жинаудың қажеті жоқ екен. Телефон қуаттағышы мен тәпішке алсаңыз жеткілікті. Балаға арналған жөргек пен киімнен бастап, анаға қажетті гигиеналық заттарға дейін — бәрін аурухана өзі береді.
Берлин перзентханасында босану
Толғақ басталған соң бірден ауруханаға бардым. Дәрігерлер жағдайымды бақылап, босанудың табиғи жолмен өтуіне мүмкіндік берді. Бастапқыда бәрі қалыпты көрінгенімен, кейін қызымның жатырда қолын басына қойып жатқанын анықтады. Сол себепті босану ұзаққа созылды.
Сол күні 05.05.2025 болғандықтан, жоспарлы кесарь тілігіне кезек өте көп екен. Көп адам әдемі күнге сәйкес келсін деп дәл сол күні босануды қалаған сияқты.
Ауырсынуды азайту үшін эпидуралды анестезия жасатты. Бірақ оның әсерін сезбедім. Кейін ауырсынуды басатын дәрі де берді. Нақты қандай препарат болғанын білмеймін, алайда ол да көмектеспеді.
Соңында баланы вакуум-экстракция арқылы алып шықты. Бақытымызға қарай, бәрі сәтті аяқталды. Қызымның да, менің де жағдайым жақсы болды.
Босануға дейінгі палата да, босану залы да өте жайлы екен. Қонақүйге ұқсайды деуге болады. Толғақ кезінде ауырсынуды жеңілдету үшін ваннаға түсуге мүмкіндік жасалған.
Қалай босанарыңызды өзіңіз таңдайсыз: тұрып, отырып, жатып немесе суда босануға болады.
Толғақ кезінде жанымда үнемі акушер болды. Ал дәрігерлер ара-арасында кіріп, жағдайымды бақылап отырды. Қызметкерлердің қарым-қатынасы қатты ұнады. Барлығы сыпайы, мейірімді, елгезек.
Қызымды дүниеге әкелер сәтте күйеуім де жанымда болды. Қолдау көрсетті, көңілімді аулауға тырысты. Бірақ босануға шамамен 20 минут қалғанда қатты қиналғанымды көргенін қаламадым. Сондықтан сыртқа шығып тұруын өтіндім. Сәби дүниеге келгеннен кейін дәрігерлер оны қайта шақырып, кіндігін кестірді.
Палатадағы жағдай
- DM, Rossmann және Lidl дүкендерінен сыйлықтар
- Д дәрумені
Әдетте босанған аналарды екі не төрт адамдық палатаға жатқызады. Бірақ біз жеке болғымыз келді. Сондықтан ақылы отбасылық палата алдық.
Үш күн бойы қасымда жолдасым болды. Палата бағасына тамақ та кірді. Алайда Германия ауруханаларындағы тамақ жағы ақсап тұр екен. Нан мен түрлі құрғақ тағамдар көп беріледі. Біз үйренгендей міндетті түрде ыстық сорпа деген атымен жоқ. Қалғанының бәріне көңілім толды.
Отбасылық палата алғанымызға өкінбедік. Оның ақысын өзіміз төледік. Сақтандыруға кірмейді. Палатаның құны күніне 150 еуро болды. Үш күнге барлығы 450 еуро жұмсадық.
Босанғаннан кейін ауруханада фотосессия ұйымдастырады. Нәрестенің алғашқы суреттерін түсіріп, бір фотосын өз сайттарына жариялайды. Қаласаңыз, қалған суреттерді сатып ала аласыз.
Ана мен балаға арналған дүкендер әр босанған келіншекке сыйлық қорабын береді. Оның ішінде крем, памперс, гигиеналық заттар және басқа да қажет дүниелер болады. Маған DM, Rossmann және Lidl дүкендерінен сыйлықтар келді.
Ауруханадан шыққан соң хебамма екі күнде бір рет келіп тұрды. Баланың жағдайын бақылап, сұрақтарыма жауап берді. Тіпті қажет кезде үйді жинастыруға да көмектесті. Біраз уақыттан кейін Қазақстаннан енем келді. Үйде қолғабыс қылатын адам барын білген соң хебамманың келуі сирей бастады.
Айтпақшы, балаларға арналған көптеген дәрі-дәрмек сақтандыру арқылы тегін беріледі. Қызу түсіретін дәрілерден бастап дәрумендерге дейін тегін алғанмын. Мысалы, D-Fluoretten дәруменін ауруханада жүргенде-ақ қолыма ұстатты.
Берлинде туған балаға құжат рәсімдеу
Германиядағы көп ауруханада құжат қабылдайтын бөлім жұмыс істейді. Бұл өте ыңғайлы. Қызымыз дүниеге келген соң туу туралы куәлікке қажетті құжаттарды ауруханадан шықпай-ақ тапсырдық.
Әдетте мына құжаттар қажет болады:
- ата-ананың төлқұжаты;
- неке куәлігі;
- ата-ананың туу туралы куәлігі (түпнұсқасы немесе апостиль қойылған нұсқасы);
- тұруға ықтиярхат;
- жергілікті тіркеу анықтамасы;
- өтініш.
Кейін қызымызға неміс төлқұжатын рәсімдедік. Өйткені әлі де Берлинде тұратынымыз белгілі еді және баламызды осы жерде өсіреміз деп жоспарладық. Германияда туған әр бала автоматты түрде азаматтық ала бермейді. Бұл мәселе ата-анасының мәртебесіне, елде қанша уақыт тұрғанына және басқа да талаптарға байланысты жеке қаралады.
Төлқұжат алу үшін елде туған баланың ата-анасының бірінде тұрақты тұру рұқсаты болуы керек екен. Менде тұрақты тұруға рұқсат бар. Күйеуім де сондай құжат рәсімдеп жатыр. Сондықтан қызымызға неміс төлқұжатын алу қиын болған жоқ.
Түйін
Ата-анамыз бен жақындарымыз алыста болды демесек, Германияда босанғаныма қуаныштымын. Жүктілік кезіндегі бақылауға да, босану кезінде көрсетілген қызметке де, кейінгі қолдауға да көңілім толды. Барлығы тиянақты ұйымдастырылған.
Германияда туу көрсеткіші төмен болғандықтан ба, әлде медициналық қызмет сапалы болғандықтан ба, жас аналарға ерекше көңіл бөлінеді. Мысалы, бір жасқа толмаған баласы бар аналарға арналған арнайы топтар жұмыс істейді. Олар Crawling Group деп аталады. Мұнда аналар балаларымен бірге түрлі дамыту жаттығуларын жасайды, тәжірибе алмасады, ортақ сұрақтарға жауап іздейді. Жалпы алғанда, Германияда босанған қатты ұнады.
