Cәтті әрі қауіпсіз саяхат: блогер Руслан Меделбектің 7 қағидасы

Саяхатқа жоспар құрып жатқанда баратын елдегі саяси, эпидемиологиялық ахуалды бір қарап алыңыз. Мысалы, мен былтыр Африка елдеріне бармақ болдым, бірақ эпидемиологиялық жағдайдың қиындауына байланысты жоспарымды өзгерткен едім. Егер сіз барған елде жаппай наразылық басталып кетсе, жағдай ушығып жатқан жерлерге бармаңыз. 

Сапарға шыққанда қажетті дәрі-дәрмекті алып алыңыз. Яғни жаныңызда шағын «дәрі қобдишасы» болғаны жөн. Дәріханадан тұмауға қарсы, ыстық көтерілгенде, бас, іш ауырғанда, аллергияға қарсы ішетін дәрілерді сатып алыңыз. Әрине, бұған қоса тамақты да талғап ішіңіз. Таныс емес әрі секемденген тағамға жоламаған жөн. Бұған қоса барар жеріңіз сақтандыру талап етсе де, етпесе де елден сақтандыру жасатып алыңыз. 20 мың теңгеге жасатқан сақтандыру шетелде ауырып қалсаңыз 20 мың доллар үнемдеуге көмектеседі. Қазақстаннан Nomad Insurance, London-Almaty компанияларынан сақтандыру аламын. Тайландта жүргенімде ақыл тісім ауырып, сақтандырудың көмегімен тісімді жұлдырған едім. London-Almaty компаниясы барлық шығынды төлеп берген. 

Барар елдегі Қазақстан елшілігінің мекенжайын, телефонын, жұмыс уақытын біліп алыңыз. Барар еліңізде елшілік жоқ болса, ең жақын елдегі елшілік жайлы ақпараттан хабардар болыңыз. Сапарыңыздың жоспарын елдегі құрбыңызға, туыстарыңызға айтып отырыңыз. Әдетте мен жақындарыма фото-видеолар жіберіп, қайда жүргенімді білдіріп отырамын. Ал саяхатта қайда барып, не көру керегін, қай жерде дәмді тағам барын Aviasales-тің «Ары-бері» іздеу жүйесінен қарап аламын. 

Егер Еуропа я Азияға турға шықсаңыз, бір сапарда бірнеше қала я бірнеше елге баратын болсаңыз, аз жүк алыңыз. Себебі 10-20 келі чемоданды қонақ үйден әуежайға я вокзалға сүйреп жүрген ыңғайсыз. Сондықтан күн жылыда саяхаттасаңыз, рюкзакқа киімдеріңізді және жуынатын заттарыңызды ғана салып алған дұрыс. Әрине, чемодан алмау керек деген қатып қалған қағида жоқ. Егер барар еліңізден көлік жалға алып, саяхаттаймын десеңіз, чемоданыңызға багаждан орын табылары сөзсіз. Сондықтан саяхатта жүк алып жүру жағын алдын ала ойластырған жөн. 

Саяхатта паспорт, құжаттар, ақша, банк картасы, телефонға сақ боламыз. Паспортымды арнайы целлофанға орап, рюкзағымдағы терең әрі мығым қалтаға саламын. Себебі аяқ асты жауын жауып я сөмкем су болса құжаттарым бүлінбеуі керек. Ақшаларды да бірнеше жерге бөліп салып қоямын. Құжаттарды, әмиянды, ақшаны жиі-жиі тексеріп тұрамын. Рюкзакты ешқашан қараусыз қалдырмаймын. Өз басым көшеде қолға жіп байлап «сәттілік шақыратындардан», көгершінге «жем беріңіз» дейтіндерден, қайырымдылық үшін қағазға қол қоюды ұсынатындардан аулақ жүремін. Олар әр әрекеті үшін кейін ақша талап етуі мүмкін. Ал ондай жағдай болып, ақша талап етсе, полицияға жүгінуге тырысамын.

Ақшамды әуежайда ауыстырмаймын, өйткені әуежайда курс төмен. Сондықтан ақша ауыстырарда Google арқылы нарықтағы курс бағамын тексеріп, соған байланысты ақша ауыстыратын жер тауып аламыз. Нарықтағы курсқа жақын тиімді жерден ауыстырсаңыз, желінбейсіз. Ақша ауыстыру үшін комиссия алмайтын жерлерді тапқаныңыз өзіңізге жақсы. 

Көшеде жүргенде фотоаппарат пен телефонға да сақ болған жөн. Тауға я теңізге экскурсияға шыққанда телефонымды су өтпейтін қорапқа салып аламын я мойныма іліп жүремін. Канар аралдарына мұхитқа шыққанда телефоным қолымнан суға түсіп кете жаздаған еді. Содан бері телефонымды мықтап ұстап, мойныма іліп алатын болдым. Жалғыз сапарлап жүрсеңіз өзіңіз сияқты саяхаттап жүрген жандардан, сенуге болатын адамдардан ғана фотоға түсіруді сұраңыз.