Топ ете қалайық: биыл жазда Алматы, Астана мен Ташкенттен ұшатын тікелей рейстер
Ауысып мініп, әбігерге түспейсіз.
Биыл Қазақстанның маршрут картасы кеңейе түсті. Әсіресе оңтүстіктегі елдерге тікелей жеткізетін рейс саны артты. Сондықтан саяхат жоспарыңызды қайта қарауды ұсынамыз. Билетті Ташкенттен де қарай беріңіз. Aviasales.kz дерегінше, Ташкенттен біраз бағытқа билет Қазақстан қалаларынан әлдеқайда арзан шығады.
Бұл топтамада биыл жазда тікелей рейспен барып-қайтуға болатын жаңа бағыттарды түгендеп шықтық.
Ларнака: Жерорта теңізінің жазы
Қайдан ұшамыз: Алматы, Астана (2 және 4 маусымнан бастап Air Astana-ның тікелей рейстері)
Бұл — Кипрдегі көне қирандылар мен орта ғасырлық қамалдар шулы көшелер мен фламинго ұшып-қонған көлдерге ұласып жатқан ежелгі қала. Бұл — артық әуре-сарсаңсыз демалып қайтатын мінсіз еуропалық курорт: бәрі қарапайым, маңайы қауіпсіз және халқы қонақжай. Маусым айында Кипрде ауа райы тамаша: күндіз мұнда жайлы +29°C, ал +23°C теңіз суы бойыңды сергітеді; күзге дейін күн жаумайды. Ларнака Жерорта теңізі стиліндегі классикалық демалысымен баурайды: таверналарда шарап ішіп, асықпай түстеніп, жағажайдағы алаңсыз жатасыз.
Самарқанд: көне сәулет пен Джон Леджендтің концерті
Қайдан ұшамыз: Алматы, Астана (Qazaq Air)
Бұл — медресе қабырғаларындағы көздің жауын алатын көгілдір мозаика шайдай ашық аспанмен астасып жатқандай көрінетін ертегі қала. Самарқанд ұзақ демалыс күндері аяқ астынан саяхаттап барғанға өте ыңғайлы: тез-ақ ұшып жетесіз, мәдени ортаға оп-оңай бейімделіп, гастрономиялық рахатқа батасыз. Маусымның басында Самарқандта жаз басталады: күн +32°C шамасына жеткенімен, кешкісін салқын самал соғып тұрады. Мұнда биыл жазда барғанға тағы бір тамаша себеп: 8 маусымда дәл Регистан алаңында Джон Ледженд өнер көрсетпек, ал Silk Road Samarkand кешенінде бұл кезде арт-көрмелер қайнап жатады.
Ереван: қонақжай кавказдар мен Арарат көрінісі
Қайдан ұшамыз: Алматы (FlyOne Armenia), Ақтау (SCAT)
Армения астанасы Ереван — тарихта тіршілігі бір сәт те тоқтамаған ең көне қалалардың бірі. Ол Римнен отыз жас үлкен. Көпті баурайтын көзірі — қызғылт түсті жанартау туфынан салынған ғимараттары. Бұл нысандар кешкісін күн сәулесінен қып-қызыл реңкке боялып, қала орталығында алып шоқтар маздап тұрғандай көрінеді. Ереванға жұрт «Каскад» атты алып сәулет кешенін көріп, кешкі джаз клубтарын аралап, жергілікті тағамдардан дәм татуға және кавказ халқының меймандос пейіліне қанығып қайтуға барады. Ереванның жазы ғажап: маусымда күн шуақты, +29°C-қа дейін жылынады, ал базар сөрелері піскен өрікке толады. Ақтаудан тікелей ұшатын рейстің арқасында батысқазақстандықтар небәрі бірер сағатта осы бір ғажап қаладан бір-ақ шығады.
Ұлан-Батыр: иен дала мен Шыңғыс хан мұрасы
Қайдан ұшамыз: Астана (SCAT)
Моңғолия астанасы Ұлан-Батыр — заманауи зәулім мұнаралар мен ақ отау киіз үйлер қатар менмұндалап тұрған таңғажайып мекен. Мұнда ойын-сауық іздегендер емес, шексіз моңғол даласынан есіп тұрған азат рухты сезбекке ұшады. Шыңғыс ханның ат үстіндегі алып, қырық метрлік мүсініне соқпай кетпеңіз. Киіз үйде тұрып, атқа мінуге болатын Тэрэлж ұлттық паркі де зор естелік сыйлайды. Маусым — саяхаттап барғанға ең қолайлы мезгіл: дала құлпырып тұрады, күн райы шуақты, шамамен +23°C. Астанадан ұшатын рейс мәдениеті де, табиғаты да мүлде өзгеше бұл елге бірер сағатта-ақ жеткізеді.
Сиань: Терракота әскері мен өркениет бесігі
Қайдан ұшамыз: Алматы (FlyArystan)
Сиань — қатардағы бір мегаполис емес, қытайлық он үш әулеттің көне астанасы әрі Ұлы Жібек жолының ресми бастау алған нүктесі саналады. Мұнда бүкіл әлемнің туристерін тартқан нысан — аңызға айналған Терракота әскері. Бірақ қалада өте жақсы сақталған зәулім бекініс қабырғасынан бастап, дәмді көше тағамдары бар ерекше Мұсылман кварталына дейін — неше түрлі бірегей орын бар. Маусымда Сианьда күн райы біршама ыстық, температура +33°C-қа дейін көтеріліп, ауа ылғалды болады. Бірақ бір бөтелке суыңызды ұстап, тарихи жерлерге ертерек барып-қайтыңыз. Ал кешкісін орталықтағы шамдары жарқыраған ескі көшелерде серуендеп қайтыңыз.
Шанхай: зәулім ғимараттар мен зулаған ырғақ
Қайдан ұшамыз: Алматы (Air Astana)
Қытайдың қаржы орталығы. Оны «Шығыстың Парижі» деп те атайды. Шанхайдың ерекшелігі — оның таңғажайып контрасында: Хуанпу өзенінің бір жағалауында XIX ғасырдың отаршылдық стильдегі зәулім үйлер тұрса, екінші бетінде футуристік нысандар бой көтерген. Жағажайда жататын демалысты мұнда ұмытыңыз: Шанхай — қаланың қайнаған тіршілігімен танысқанды, шексіз шопингіні және сяолунбао тұшпарасы сияқты гастрономиялық экспериментті жақсы көретіндерге арналған жер. Маусымда мұнда субтропикалық жаз басталады, ауа +30°C-қа дейін жылынады, бірақ мұхитқа жақын болғандықтан, ауа ылғал боп, жып-жылы нөсер жаңбыр себелеп тұрады.
Үрімжі: қар басқан шыңдар мен ұйғыр колориті
Қайдан ұшамыз: Ақтау (FlyArystan)
Үрімжі — әлемде мұхиттан ең қашық орналасқан қала. Шыңжаң-Ұйғыр автономиялық ауданының орталығы. Бұл — зәулім шыны ғимараттар мен халық құжынаған кварталдар қатар тұрған қала. Үрімжінің жүрегі — Халықаралық үлкен базар. Егер у-шудан шаршасаңыз, небәрі жарты сағаттық жерде Аспан көлі (Тяньчи) тұр — бұл қылқан жапырақты ну орман мен Тянь-Шаньның қарлы шыңдары қоршаған сұлу мұздық көлі. Қаланың өзінде маусымдағы күн райы өте жайлы: +25°C шамасында. Бірақ көл маңы салқын. Сондықтан жылы киім де ала барған жөн. Ақтаудан тіке ұшатын жаңа рейс — Қытайға саяхаттап қайтқанға тамаша сылтау.
Гуанчжоу: мегаполис пен әйгілі димсам
Қайдан ұшамыз: Астана (Air Astana)
Бұл — Кантон мен Інжу өзенінің атырауында тұрған, Қытайдың үшінші үлкен қаласы. Гуанчжоу — кантон асханасының отаны (аңызға айналған әлгі димсамдар осы жерден шыққан) әрі өзінің жасыл желегімен таңғалдыратын заманауи мегаполис. Мұнда саябақтар мен футуристік зәулім ғимараттар біртұтас экожүйеге айналған. Гуанчжоуға көбіне үлкен көрмелерді іздеген іскер туристер мен Азияны аралаймыз деп шыққан саяхатшылар барады. Қалада маусымда қапырық болады. Ара-тұра жаңбыр себелеп өтеді. Жеңілірек киініп, серуенді кешкі уақытқа жоспарлаңыз.
Варшава: еуропалық жаз бен ыңғайлы хаб
Қайдан ұшамыз: Астана, Алматы (LOT)
Польша астанасы — алып саябақтары, қызық интерактив мұражайлары, хипстерлік кофеханалары мен соғыстан кейін ескі сызбалар бойынша мұқият қалпына келтірілген Ескі қаласы бар жап-жасыл мегаполис. Оңтүстік Еуропаны аптап ыстық шыжғырып жатқанда, Польша маусымы +24°C жылылығымен қуантады. Бұл — қолыңызға кофе алып, серуендеп қайтқанға, Висла жағалауында пикник жасауға және велосипед тепкенге өте жайлы кез. Еуротур жоспарлап жүрсеңіз, Варшава сапарды бастағанға — таптырмас қала.
Рига: балтық романтикасы мен Юрмала жағажайлары
Қайдан ұшамыз: Ташкент (Uzbekistan Airways)
Латвия астанасы — ар-нуволық сәулет жәдігерлері қаз-қатар тізілген, әлі күнге дейін кофе мен қара бальзам иісі аңқыған тып-тыныш орта ғасырлық көшелері бар қала. Жазғы Рига — тұрғанға да, туриске де жайлы қала: электр пойызына мініп, небәрі 20 минутта Юрмаланың қарағайлы орман қоршаған құмды жағажайларынан бір-ақ шығасыз. Балтық жағалауында маусым айы жайлы, күн +23°C-қа дейін ғана ысып, теңіз аздап салқын боп тұрады. Даугава жағалауында серуендеп, көше кафелерінде ас ішіп, нағыз еуропалық демалыс дегеннің не екенін асықпай көріп қайтыңыз.
