Алакөлдегі он база мен қонақүй: бағасы, тамағы мен жағалау тазалығы
Көл жағасындағы көрікті демалыс орындары.
Алакөлде жазғы демалыс маусым ресми түрде басталды. Былтыр онда 1,8 миллионнан астам адам демалып, шипалы көл елдегі ең танымал туристік бағыттың бірі екенін тағы бір мәрте дәлелдеген. Демалыстың жайлы өтуі тек табиғатқа емес, қонақүй мен демалыс базасындағы қызмет сапасына да байланысты. Былтыр Алакөлдегі танымал курорттар мен демалыс орындарына шолу жасап едік. Биыл да жақсы деген он қонақүй мен базаны ұсынып отырмыз.
Оңтүстік жағалау (Жетісу облысы Ақши ауылы)
Premium Alakol
Бағасы: алты адамдық ECO HOUSE-ты бір тәулікке жалдау 95 000 теңгеден басталады.
Ағаштан жасалған он шақты эко-үйі бар бұл демалыс базасы үй ішімен баратындарға арналған. Жайлы, тыныш. Себебі база аймағында алкоголь ішуге, түнде ойын-сауыққа тыйым салынған. Ақысына үш мезгілдік тамақ кіреді. 2-6 адамдық үйлері мен жиһаздары жап-жаңа. Ауласында волейбол ойнайтын аумақ пен от жағатын жер бар. Көзірі — демалыс базасы жағалауға тиіп тұр.
Бұл демалыс базасы былтыр ашылған, іші жаңа, таза. Қызмет көрсету деңгейі ұнады, тамағы да дәмді. Ерекшелігі сол — алты адам сиятын эко-үй жалдап, кең жерде емін-еркін жүре бересің. Балаларға бассейн мен ойнайтын жер бар, нағыз отбасылық демалыс орны. Жағалауға жақын тұрғаны да ыңғайлы.
Afrikana Resort
Бағасы: күніне адам басына 19 500 теңгеден басталады.
Afrikana Resort — Ақши ауылындағы ірі демалыс базаларының бірі. Балаларды ойнататын аниматорлар бар, ал кешкі бағдарламада отбасылық дискотекалар мен жанды дауыстағы концерттер өтеді. Жағалаудың бірінші шебінде орналасқандықтан, көлдің салқын самалы есіп, толқын дауысы естіліп тұрады. Ауласында екі жылы бассейні мен балаларға арналған ойын алаңы бар. Айналасында ағаш көп, аумағы таза.
Аlakol relax
Бағасы: екі орындық нөмір күніне 36 000 теңгеден басталады.
Бағасына үш мезгіл тамағы мен пойызбен келетін қонақтарға тегін трансфер қызметі кіреді. Бөлмелерінің жиһазы мен төсек-орны жаңа, ішінде кондиционер мен душ бар. Демалыс орнының аумағында үлкенге де, кішіге де арналған бассейн, күн көзінен қорғалған үлкен ойын алаңы, батут пен монша бар. Балаларды ойнататын аниматорлар бар. Саяхатшылар мұндағы тамақтың сапасы мен қызметкерлердің қонақжайлығына дән риза.
2024 жылы Alakol Relax-та демалғанбыз. Тамақтары дәмді, базаның иелері жаз бойы сонда жүреді, сол себепті қызмет көрсетуі жақсы. Иесі жүрген позитив, ойындар, кешкі дискотека, кино ұйымдастырып жүреді. Идея айтсаңыз қуана қолдайды.
Villa Alakol
- Дереккөз: instagram.com/villa_alakol
Бағасы: екі адамдық бөлме күніне 80 000 теңге.
Ауласына пальма қойылған, шезлонг пен шатыры бірыңғай қызғылт түсті Villa Alakol-ді Барби әлеміндегі демалыс базасы ма деп қаласыз. Қатар тізілген ақшаңқай үйлерінің террасасы бар. Әдемі фотолар түсіргенге таптырмас жер. Ауласынан бассейн мен балалардың ойын алаңын көресіз. Балаларға іште де ойнайтын бөлме жасақталған. Базаның өзі жағалаудың бірінші шебінде тұр. Ойын-сауық бағдарламасында көбікті кештер бар. Бір өкініштісі, ақысына тамақ кірмейді. Сол маңдағы мейрамханадан не сырттан тамақтана аласыз.
Көлге тез жетесің. Жол жиегі тегіс, тротуар салынған. Базаның жалғыз кемшілігі — жолдама құнына тамақ кірмейді. Күнде бүгін тамақты қайдан ішеміз деп басың қатады. Аумағында мейрамхана бар, бірақ ол жерден үй ішіңмен күнде тамақ ішсең, біраз ақша кетеді. Сол себепті кейде ауылдағы өзге дәмханаларға баруға тура келді.
Albatros Alakol
Бағасы: күніне адам басына 12 000 теңгеден басталады.
Нөмірге емес, жатын орынға ақы алатын пансионат. Бағасына үш мезгіл тамақ қосылған. Балаларға күніне 6 000 теңге. Бөлмелерінде душ, кондиционер мен теледидар бар. Ауласында самалжайлар мен балаларға ойын алаңы қойылған. Айналасы көгалдандырылған. Бірінші шепте тұрмаса да, жағалауға жақын: 10 минутта жетесіз. Аз ақшаға демалғым келеді дегендерге ұнары сөзсіз.
Шығыс жағалау (Абай облысы Қабанбай ауылы)
Аlakol Love Resort
- Дереккөз: instagram.com/alakol.love
Бағасы: екі орындық нөмір тәулігіне 47 000 теңгеден басталады.
Бұл да жағалаудың бірінші шебінде тұрған ірі демалыс кешендерінің бірі. Аумағы кең, турист көп сыятындықтан жыл сайын мыңдаған адамды қабылдайды. Былтыр мұнда көлемі 500 шаршы метр болатын бассейн ашылған. Балаларға арналған бөлек бассейні де бар. Күн сайын аниматорлар жұмыс істейді, кешке көбікті шоу, ашық аспан астындағы кино көрсетілімдері мен концерттер өтеді. Бір өкініштісі, нөмір бағасына тек таңғы ас кіреді.
Үй ішімен демалғанға керемет жер, тап-таза. Былтыр осында демалдық. Аниматорлар күн кешке балаларды ойнатуға келеді. Тамағы жақсы, таңғы астары орташа. Тамағын сәл жақсартса, керемет болар еді. Айтпақшы, көп жерде Wi-Fi ұстай бермейді.
«В шоколаде»
Бағасы: күніне адам басына 15 000 теңгеден басталады.
Жағалаудың бірінші шебінде тұрмағанымен, көлден алыс емес — бес минуттық жерде. «В шоколаде» демалыс базасы биыл Алакөлдегі ең үлкен аквапарктердің бірін ашпақ. Сондықтан балалармен демалуды жоспарлағандарға ұнауы мүмкін. Бағасына үш мезгіл тамақ кіреді. Бөлмелерінде теледидар, душ, су жылытқыш пен кондиционер бар. Ауласында балаларға арналған шағын бассейн мен ойын алаңы жасалған.
Мұндағы демалыс бронь жасаған сәттен-ақ басталатындай әсер қалдырады. Қызметкерлердің сөйлесу мәдениеті мен қызмет көрсету деңгейі жоғары. Бөлмелері таза, іші заманауи. Отбасымен барсаңыз да, оңаша демалғыңыз келсе де, жайлы орта бар. Былтыр қызық бір жағдайға куә болдық: демалушылардың бірінің баласының туған күні екен. Ешкім сұрамаса да, әкімшілік қызметкерлері өздері аниматор киімдерін киіп шығып, баланы құттықтады. Осындай ұсақ дүниелер базаның атмосферасын ерекше етіп тұр.
Ramazan Plaza
Бағасы: стандарт бөлме күніне 8 000 теңгеден басталады.
Халал демалыс керек дегендерге арналған пансионат. Аумағында бассейн, караоке мен балалар ойын алаңы бар. Бөлмені тамақпен де, тамақсыз да жалдауға болады. Көлге дейін жаяу 10 минуттай жүру керек. Бірінші шепте тұрмағанымен, демалушыларға емдік балшыққа және танымал жағажайларға баратын трансфер қарастырылған.
ECO HOME ALAKOL HASSAK
Бағасы: адам басына тәулігіне 17 000 теңгеден басталады.
Бірнеше қабатты ағаштан салынған қонақүйі бар бұл база эко-үйлерімен ерекшеленеді. Бағасына үш мезгіл тамақ кіреді. Ауласында бассейн, балаларға арналған ойын алаңы мен үстел ойындары бар. Кешкі уақытта аниматорлар балаларды ойнатып, би кештері ұйымдастырылады. Жағалаудың бірінші шебінде орналасқан әрі бұл жақтың жағасы құмды болғандықтан, суға түскісі келетіндер көбіне осы жерді таңдайды.
Құрбыларым Алакөлде жеті жыл қатарынан демалып, бұл жердің ерекше екенін жиі айтатын. Солардың кеңесімен мен де ECO HOME HASSAK базасын алдын ала брондап бардым. Екі нөмір алдық, бағасы да қолайлы болды. Тамақтары дәмді, жемістер де жаңа піскен. Немерелерім ауладағы күнделікті бағдарламаларды қатты ұнатты. Биыл шілдеде тағы барсақ деп отырмыз.
«Парус»
Бағасы: тәулігіне адам басына 16 000 теңгеден басталады.
Ақысына үш мезгіл тамағы кіреді. Аумағында бассейні, ойын алаңы мен батут бар. Кешкі серуенге не таза ауада тынығып отыруға орындықтар қойылған, ауласы жинақы. Бірнеше адам боп келгендер нөмір жалдаса, бірнеше отбасы боп қонғандар коттедж не таунхаус жалға алады. Бұл демалыс базасы жағалаудың екінші шебінде, жаяу 10 минуттық жерде орналасқан.
Алакөлге қалай жетеміз?
Алакөл жазда туристер мекеніне айналады. Билеттер тез таусылып қалып жатады. Бірақ көлге жетудің бірнеше жолы бар.
Ұшақ
Алакөл жағалауына уақыт үнемдеп, жайлы жеткіңіз келсе, әуе жолын таңдаңыз. Астана мен Алматы қалаларынан Scat әуе компаниясы Үшарал мен Үржар бағыттары бойынша тұрақты рейстер ұшырады. Жол ұзақтығы небәрі 1–1,5 сағат, билет құны 15 000–20 000 теңге.
- Үшарал әуежайына қонған соң: Ақши ауылына дейін 50 минутта, ал Көктумаға 1 сағат 20 минутта жетіп алуға болады.
- Үржар әуежайына қонсаңыз: Шығыс жағалаудағы Қабанбай ауылына көлікпен 1,5 сағатта жетесіз.
Пойыз
Пойызбен жүргісі келетіндерге Алматыдан да, Астанадан да ыңғайлы нұсқалар бар.
- Алматыдан: «Алматы 2 — Достық» пойызымен жолға шығып, бірден Ақши немесе Көктума станцияларынан түсуге болады. 16-17 сағат жол жүресіз, ал билет 4500–7000 теңге тұрады.
- Астанадан: «Нұрлы жол — Достық» бағытындағы пойыз Ақши немесе Көктума станциясына дейін 22–23 сағат жүреді. Билет 9 500 теңге тұрады.
Автобус не көлік
- Автобус: Алматы мен Алакөл арасында арнайы жатын орындары бар жайлы автобустар күнде жүреді. Олар он сағаттың ішінде Ақши мен Көктума ауылдарына жеткізеді. Барып-келу құны — бір адамға 30 000 теңге.
- Өз көлігіңізбен немесе таксимен жете аласыз: көп жыл саяхатшыларды шаршатқан сапасыз жол былтыр жөндеуден өткен, теп-тегіс. Көлік айдап барғыңыз келмесе, InDrive не OLX платформалары арқылы Алакөлге қатынайтын такси жүргізушілерін оңай табуға болады.
