Еуропаның бес елін автобуспен аралап шығайық. Ыңғайлы гид
Дайын маршрут.
Еуропада сегіз күнде көп шығындалмай бес елді автобуспен саяхаттап шығуға болады. 2018 жылы жазда Еуротур жасағанда Чехия, Словакия, Аустрия, Венгрия, Германияны автобуспен аралаған едім. Бұл маршруттағы бес ел бір-біріне шекаралас, сонысымен ыңғайлы.
Еуропада Flixbus, Eurolines, Student Agency компанияларының автобустары біраз қалаға барады. Бұл мақалада Flixbus автобустарының бағыттарын көрсетемін. Ыңғайыңызға қарай басқа да компанияларды таңдасаңыз болады.
Қазақстаннан бұл Еуротурды Венгриядан бастап, Германиядан аяқтаған жөн (керісінше жасасаңыз да болады). Себебі Шымкенттен Венгрияның Будапешт қаласына және Германияның Мюнхен қаласына Scat әуе компаниясының тікелей рейсі ұшады. Pegasus әуе компаниясы да Стамбул арқылы Будапештке де, Мюнхенге де ұшады. Ал бұл рейстерде арзан билеттерді Aviasales.kz сайтынан я қосымшасынан таба аласыз.
Еуротурдың маршруты
Cонымен Будапештке ұшып келдіңіз делік. Венгрия астанасын аралауға екі күн керек. Себебі қала Буда және Пешт деген екі бөліктен тұрады. Екі күнде қаланың негізгі жерлерін аралап, көріп үлгересіз.
Будапештті аралап болған соң Словакияның Братислава қаласына автобуспен шығамыз. Жол бар болғаны — 2,5 сағат. Будапешттен Братиславаға сағат сайын Flixbus автобустары жүреді. Билет 7–14 еуро (3700–7400 теңге) арасында.
Братиславаны аралауға толық бір күн жетеді. Ал Аустрия астанасы Вена қаласы Братиславаға тиіп тұр. Братислава мен Вена — әлемде бір-біріне ең жақын орналасқан астаналар. Екеуінің арасы автобуспен бар болғаны бір-бір жарым сағаттық жол. Таңғы және түнгі билеттер — 4 еуро (2100 теңге), түскі уақыттағы билеттер 7–10 еуроның (3700–5300 теңге) айналасында.
Вена қаласын жақсылап аралап шыққанға екі күн керек. Одан әрі Чехия астанасы Прага қаласына жолға шығасыз. Вена мен Праганың арасына автобус та, пойыз да жүреді. Бірақ автобус пойызға қарағанда арзан. Автобустың билеті 16-18 еуроның (8500–9500 теңге) арасында болады. Ал жол ұзақтығы 4 сағаттан сәл асады.
Праганы да толық көріп шығуға екі күн керек. Бұл қалада жеті жыл тұрып жатқан адам ретінде айтарым, Праганың атмосферасын сезіну үшін екі күннің өзі аздық етеді, дегенмен екі күн ішінде негізгі туристік орындарын аралап шыққанға мүмкіндік бар.
Осыдан соң Прагадан Германияның Мюнхен қаласына автобуспен жолға шығамыз. Билет құны — 20 еуро (10 500 теңге). Автобуспен шамамен бес сағат жүресіз.
Мюнхенді бір күнде аралап, ертеңінде Бавария аймағын, соның ішінде Нойшванштайн қамалын көріп қайтыңыз. Бұл қамалға Мюнхеннен турлар бар немесе өзіңіз пойызбен, автобуспен де жете аласыз. Мюнхен мен Нойшванштайн қамалына екі күн арнап, үшінші күні Қазақстанға ұшамыз.
Сонымен бұл сапардың маршруты былай болады: Будапешт (2 күн) – Братислава (1 күн) – Вена (2 күн) – Прага (2 күн) – Мюнхен (2 күн аралау, үшінші күні сапарымызды тәмамдап, елге жолға шығамыз).
Шығын қанша болады?
Наурыз-мамыр айында Еуропа жайнап тұрады, күн райы да қолайлы. Маусым-тамыз айларында қапырық болуы да мүмкін. Салқында қыдырғыңыз келсе, қыркүйек-қазанда келіңіз.
Scat компаниясының Шымкент – Будапешт – Мюнхен – Шымкент бағытындағы тікелей рейске барып-қайту ұшақ билеті 300 мың теңгеден басталады.
Бұған қоса, Pegasus Стамбул арқылы Еуропаға билеттерге жиі жеңілдік жариялайды. Сол кездері билетті 70-80 мың теңгеге алсаңыз болады. Билеттерге жеңілдіктерді біліп отырамын десеңіз, Aviasales.kz-тің телеграм-каналына жазылып алыңыз.
Жеңілдікпен сатылатын ыстық билеттер осында жарияланады.
Қалалар арасына автобуспен жүруге, Нойшванштайн қамалына баруға 110 еуро (65 000 теңге) кетеді.
Жатын орын Вена мен Мюнхенде қымбаттау болуы мүмкін. Ал Прага, Братислава, Будапештте арзан. Мәселен, Вена мен Мюнхенде бір күнге хостел таңғы асымен 30 еуродан (15 900 теңге), қонақ үй таңғы асымен 85 еуродан (45 000 теңге) басталады.
Прага, Будапешт, Братиславада бір күн қонғанға хостел таңғы асымен 15–30 еуроға (8 000–15 900 теңге), қонақ үй 40–50 еуроға (21 200–26 500 теңге) табуға болады.
Бұған қоса, тамақ, виза, сақтандыру, қалта шығындарыңызға 250–300 мың теңге алып алыңыз.
Сонымен жеңілдікпен сатылатын билет тауып алсаңыз, арзан хостелдерге жатсаңыз, онда бұл сапардың шығыны шамамен 800 мың теңге болады. Ал тікелей рейспен ұшып, қонақ үйлерге жатсаңыз, 1 миллионнан асатын ақша жұмсайсыз. Барлығы сапарды қалай жоспарлағаныңызға, қандай билет тапқаныңызға байланысты.
Еуропа елдеріне автобуспен қатынағанда шекарашылар құжат тексеруі мүмкін. Сондықтан құжатыңыз, визаңыз дұрыс болуға тиіс. Автобустарға багажыңызды салып жүре бересіз.
