Үй ішімен шетелге шығарда қонақүйді қалай таңдаған дұрыс?
Еңбектеген балаға да, еңкейген қарияға да жайлы жер табуға көмектесеміз.
Үй ішімен демалысқа барған — қызығы да, шыжығы да көп шытырман. Балаларға — аквапарк, үлкен кісілерге — тып-тыныш жер, ал өзіңізге — қызық та жайлы демалыс керек. Бірақ үшеудің де үдесінен шығатын қонақүй тапқан әсте оңай емес. Қазақстандықтар ең көп баратын үш негізгі бағыт — Түркия, Египет пен Біріккен Араб Әмірліктерінің мысалында үй ішіне қонақүй таңдарда нені ескеру керегін талдап шықтық.
Түркия: All Inclusive отаны
Қазақстандықтар үшін Анталья, Кемер, Аланья, Бодрум мен Мармарис курорттары бұрыннан мінсіз жағажай демалысының символы іспетті. Ол бекер емес. Мұндағы «бәрі қосылған» жүйесі адамды артық әуре-сарсаңнан құтқарады. Бірақ ең қонақжай елдің өзінде де тур сатып алмас бұрын ескеру керек нәрселер бар.
Аймақтар ерекшелігі
Брондамас бұрын курорт туралы мұқият оқып шығыңыз. Мысалы, Белек — жағажайлары құмды қымбат демалыс орны, онда теңіз бірден тереңдеп кетпейді, бұл балаға өте жайлы. Аланьяда бюджеттік нұсқа көп, бірақ әуежайдан қонақүйге дейінгі жол ұзақ, үлкен кісілер шаршап қалуы мүмкін. Түнгі өмірі қайнаған Бодрум у-шу, ал әсем Мармаристе тау теңізге тиіп тұр, сол себепті жағажай құмды әрі ұсақ малта тасты. Мұндай жерде жүрген балаға да, қарт кісілерге де қиын.
Егер жағажайдағы демалыс керек десеңіз, жағалауда бірінші қатарда тұрған қонақүйлерді іздеңіз. Сонда аптап ыстықта сандалып жаяу жүрмей, теңізге топ ете қаласыз.
Тамағы мен балалар мәзірі
Түркияда жергілікті дәмханаларға көп ақша жұмсамас үшін All Inclusive не Ultra All Inclusive жүйесін алған тиімдірек. Жақсы деген отбасылық қонақүйлерде бөлек балалар үстелі болады. Онда дайын пюре, ботқа, буға піскен көкөністер мен сүт өнімдері тұрады. Ал ересектер тағамға бай түрік асханасымен танысады: жаңа піскен гөзлемеден бастап, көз алдыңызда мангалда пісетін кәуаптарға дейін — бәрін табасыз.
Балаларға ойын-сауық
Бала бір сағат болса да, өзімен-өзі жүріп ойнасыншы десеңіз, инфрақұрылымы дамыған қонақүй таңдаңыз. Аниматорлары, шағын ойын алаңдары не жеке аквапаркі бар нұсқаларды іздеңіз. Тек демалысыңыз мамыр не қазан айларына түссе, міндетті түрде жылытылатын бассейнінің бар-жоғын тексеріп алыңыз. Әйтпесе су салқын болып, шомыла алмай қалуыңыз мүмкін.
Египет: Қызыл теңіз бен бітпейтін жаз
Египет жұртты тұп-тұнық суымен, маржан рифтерімен және шығыс колоритімен баурайды. Бірақ үлкен отбасы боп ұшқалы жатсаңыз, Хургада мен Шарм-эш-Шейхке келгенде, жағажай мен инфрақұрылымға мейлінше мұқият болыңыз.
Понтон жақсы ма, құм ба?
Египет жағалауының бір кемшін тұсы — маржандар (кораллдар). Рифтерді қорғау үшін қонақүйлер ұзын понтондар салады, олардан судың бірден терең жеріне секіруге тура келеді. Кішкентай балалар мен суда еркін жүзе алмайтындарға бұл жайсыз, әрине. Қонақүйдің сипаттамасынан Sandy Beach (құмды жағажай) немесе Lagoon (лагуна) деген белгілерді іздеңіз. Балалы отбасыларға Хургаданы таңдаған дұрыс — ол жерде жағалау әдетте құмды келеді, ал суға кіре беріс таяз болады. Мұнда да қонақүйді жағалаудың бірінші қатарынан таңдаңыз, ары-бері жүріп шаршамайсыздар.
Желден қорғану
Египетте жыл бойы жаз болғанына қарамастан, қазаннан наурызға дейін мұнда қатты жел соғады. Егер сапарды осы уақытқа жоспарласаңыз, желсіз бұғаздардағы қонақүйлерді таңдаңыз. Шарм-эш-Шейхте Наама-Бей мен Хадаба бұғаздары суық желден жақсы жақсы қорғалған.
Қонақүй ерекшелігі
Аквапарк барлық дерлік қонақүйде бар, бірақ қыс айларында онда су жылытыла ма, жоқ па — нақтылап алыңыз. Жел өтінде суық бассейнге түскен бала мұрттай ұшады. Балалар алаңқайы, ойын бөлмесі мен бала күтуші қызметі бар-жоғын да біліп барыңыз. Үлкен кісілерге айналысатын шаруа керек: шығармашылық шеберлік сыныптары, йога не кешкі бағдарламалар өткізілетін қонақүйлерді іздеп көріңіз.
БАӘ: футуристік демалыс пен ойын-сауық
Әмірліктердегі демалыс Түркия мен Египеттегі демалыстан ерекше. Мұнда сервис жоғары деңгейде, бірақ қалалық инфрақұрылым мен тамақтану жүйесінің өзіндік ерекшеліктері бар, әмияныңыз да біраз жұқарып қалуы мүмкін.
Дұрыс әмірлікті таңдаймыз
Әмірліктер біріне-бірі ұқсамайды. Сондықтан нақты біреуін таңдар кезде, отбасыңызға не керегін анықтап алу керек. Дубай көңіл көтеретін демалыс іздегендерге ұнап жатады: мұнда ондаған ойын-сауық орталығы, Legoland пен Motiongate сияқты алып саябақтар бар. Әбу-Даби тыныш әрі премиум демалыс ұсынады, ондағы Саадият аралының ақ құмды жағажайлармен аты шыққан. Яс аралындағы қонақүйлерді таңдасаңыз, Hilton Yas Island, Lapita, LEGOLAND Resort пен басқа да орындарда тұру құнына Ferrari World не Warner Bros сынды саябақтарға билеттер де кіреді.
Қазақстандықтар үйренген «бәрі қосылған» форматына ең жақыны — Рас-эль-Хайма әмірлігі, мұнда аумағы ат шаптырым отбасылық курорт көп. Тыныштық пен тұмса табиғат керек десеңіз — Фуджейраға, ал шығыны аз демалыс іздесеңіз, Шарджаға аттаныңыз.
Трансфер мен тамақтану
Ақырында қала аумағындағы қонақүйді таңдасаңыз, жағажайға дейін тегін трансфер (Shuttle bus) бар-жоғын тексеріңіз. Ыстықта балалармен автобус күткен қиын, ал БАӘ-де такси әжептеуір қымбат.
Тамаққа келер болсақ, мұндағы қонақүйлердің көпшілігі тек таңғы ас (BB) не жартылай пансион (HB: таңғы және кешкі ас) негізінде жұмыс істейді. Қалалық мейрамханаларда бүкіл отбасымен тамақтанған қымбатқа түседі. Ақшаны үнемдеу үшін All Inclusive немесе Full Board (үш мезгіл тамақтану) концепциясы бар қонақүйлерді іздеңіз.
Депозит пен салық
БАӘ қонақүйлеріне орналасарда міндетті туристік салық төлейсіз. Оның көлемі қонақүйдің жұлдызды мәртебесіне және қанша күн түнейтініңізге байланысты. Әдетте бір бөлмеге тәулігіне 10-20 дирхам шығады.
Бұдан бөлек, жергілікті қонақүйлердің көпшілігі кірген кезде ірі көлемде депозит сұрайды. Бұл шығын қалтамды қағады десеңіз, депозит сомасын алдын ала есепке алыңыз не онсыз-ақ қабылдайтын қонақүй іздеңіз. Тіркелу кезінде қызметкерлерден мини-барды толық босатуды сұрап, кез келген қосымша қызметке қолма-қол ақшамен дәл сол жерде төлейтініңізді айтуға болады. Әдетте бұдан кейін қонақүйлер қонақтарды депозитсіз кіргізуге келіседі.
Қай елге қашан барған дұрыс?
Ел | Ең жайлы маусым | Ал мына кезде бармай-ақ қойған дұрыс | Неге? |
|---|---|---|---|
Түркия | мамыр–қазан (бассейн суы жылытылатын қонақүйлерге барсаңыз) | қараша–наурыз | күн суық болады, көп аквапарк жабық тұрады |
Египет | сәуір–маусым, қыркүйек–қараша | қазан–наурыз | жел соғады, су тастай боп тұрады |
БАӘ | қазан–сәуір | мамыр–қыркүйек | аптап ыстық (45°C-қа жетеді) |
Түркия
Ең жайлы маусым
мамыр–қазан (бассейн суы жылытылатын қонақүйлерге барсаңыз)
Ал мына кезде бармай-ақ қойған дұрыс
қараша–наурыз
Неге?
күн суық болады, көп аквапарк жабық тұрады
Египет
Ең жайлы маусым
сәуір–маусым, қыркүйек–қараша
Ал мына кезде бармай-ақ қойған дұрыс
қазан–наурыз
Неге?
жел соғады, су тастай боп тұрады
БАӘ
Ең жайлы маусым
қазан–сәуір
Ал мына кезде бармай-ақ қойған дұрыс
мамыр–қыркүйек
Неге?
аптап ыстық (45°C-қа жетеді)
Қонақүйді қалай таңдау керек?
- Street View режимін қосыңыз. Нөмір брондамас бұрын қонақүйді Google Maps-тен тауып, панорама режимінде оның айналасын «аралап» шығыңыз. Терезенің дәл астында созылып жатқан құрылыс не у-шу жол бар-жоғын тексеріңіз.
- Family Rooms нұсқасын таңдаңыз. Стандартты бөлме орнына екі бөлмелі нөмірді не отбасылық сьюттарды қарастырыңыз. Сонда сіздер бөлек, балалар бөлек ұйықтайды.
- Қажет жабдықтарды алдын ала сұраңыз. Ұшпас бұрын қонақүйге хат жазып, олар балалар арбасын, бесік не бөлмеге шәйнек бере ме, жоқ па деп нақтылап алыңыз.
- Қауіпсіздікті тексеріңіз. Қонақүй аумағында тәулік бойы жұмыс істейтін медпункттің бар-жоғын және ең жақын орналасқан ірі аурухананың қайда екенін біліп алыңыз.
- Пікірлерді сүзгіден өткізіңіз. TripAdvisor не Booking сайттарында пікірлерді оқығанда, міндетті түрде «Отбасымен барғандар» (Family travelers) сүзгісін таңдаңыз. Сонда ата-аналардың қонақүйдегі тазалық, шу деңгейі мен қызметкерлердің балаларға деген көзқарасы туралы шынайы пікірлерді оқи аласыз.
