Жып-жылы Жаңа жыл: қыста қыдырып баратын жерлер
Қалауыңыз бен қалтаңызға сай келетін түрлі бағытты тізіп шықтық.
Жаңа жылды қалай қарсы алсаң, жылың да солай өтеді деген ырымға сенер болсаңыз, 2026 жылдың күнтізбесін саяхаттан бастаңыз. Пхукет жағажайында коктейль сіміріп, Санкт-Морицтің жоталарында шаңғы теуіп, Бурабайдың шипажайларында шынығып қайтқанға қалай қарайсыз? Ел ішінде демалсам дегендерге де, шетелге шығып қайтуға әзір оқырманға да осындай топтама жазып шықтық.
Жағажайдағы Жаңа жыл
Біле білсеңіз, Жаңа жылды жылы жерде де қарсы алуға болады. Қайда баруға болатынын қараңыз.
Тайланд
- Виза: 60 күн ішінде қайтсаңыз, алудың қажеті жоқ. Алдын ала TDAC электронды миграциялық картасын толтыру керек.
- Ауа температурасы: +26–32 °C.
Жергілікті халық Жаңа жылды сәуір айында — Сонгкран мерекесінде атап өтеді. Сондықтан 31 желтоқсандағы іс-шаралардың көбі туристерге арналған. Бұл кезде жағажайда кештер өтеді, теңіз жағасында от-шашу болып, қонақүйлер кешкі ас пен түрлі шоулар ұйымдастырады. Ең ауқымды кеш әдетте Пхукеттегі Патонг жағажайында өтеді. Теңіз жағасында үлкен би алаңы ашылады. Оған кіру билеті 32–48 еуро (19–29 мың теңге) тұрады. Жаңа жыл түні жақсы мейрамханада адам басына 100–250 еуро (60–150 мың теңге) кетеді.
Паттайя мен Пхукетке желтоқсан–қаңтарда барған жақсы. Теңіз жылы, жаңбыр сирек жауады. Ал Самуиде бұл уақытта жаңбырлы маусым, есесіне бағалар төменірек әрі туристер аз болады.
Мальдив аралдары
- Виза: 30 күнге дейін қайтсаңыз, қажет емес.
- Ауа температурасы: +28–32 °C.
Негізінен Мальдив аралдарында Жаңа жыл тойланбайды, бірақ туристерге арнайы іс-шаралар ұйымдастырылады. Кейбір саяхатшылар яхта жалдап, мерекені су үстінде қарсы алады. Тек аралдарда алкоголь сатуға тыйым салынғанын ескеріңіз, тіпті дьюти-фриден алған ішімдікті де алып кіруге болмайды. Ішімдік ішуге болатын жалғыз жер — жергілікті халық тұрмайтын, қонақүйлері бар жеке аралдар.
Қыдырып, көңіл көтеріп демалғанды ұнататындарға Ари атолы сөзсіз ұнайды: мұнда сүңгуге таптырмас маржан рифтері бар әрі осы маңда алып кит тәрізді акулалар мен скаттар жүзіп жүреді. Олардан қауіп жоқ, сондықтан Ариден ашық мұхитқа осы жануарлармен бірге жүзуге арналған турлар бар.
Доминикан Республикасы
- Виза: 30 күн ішінде қайтсаңыз, қажет емес.
- Ауа температурасы: +25–28 °C.
Доминиканаға ұшқан ұзақ, бірақ жол азабы сөзсіз ақталады: аппақ жағажайлар, жайлы климат, жылы әрі тынық теңіз бәрін ұмыттырып жібереді. Елдің ең ірі курортты қаласы — Пунта-Кана. Мұндағы жағажайлардың басым бөлігі тегін, таза әрі құмы сусылдақ.
Доминикана — (жол ұзақтығын ескермесек) балалармен демалғанға қолайлы бағыт. Пунта-Канада қонақүйлер теңізге өте жақын, ал кейбір қонақүйлерде толқынсыз, балаларға қауіпсіз арнайы риф жасалған. Ойын бөлмелері, балалар клубтары мен аквапарктер жақсы жұмыс істейді.
Куба
- Виза: алдын ала электронды виза рәсімдеу қажет.
- Желтоқсан–қаңтар айларындағы ауа райы: +25–28 °C.
Кәнігі жиһангез болсаңыз да, Куба таңдай қақтырмай қоймайды. Бұл ел — сальса биінің, сигара мен ромның отаны. Кубаға туристер жайлы жағажай, тұнық теңіз бен елдің бірегей сәулеті үшін барады. Гавана көшелерінде серуендеп жүргенде құдды бір америкалық ескі фильмнің ортасында жүргендей сезінесіз: көшеде — ретро көліктер, ал қалада — түрлі-түсті де тапал үйлер тізіліп тұрады.
Кубаға келіп, Түркия не БАӘ-дің бесжұлдызды қонақүйіндегі жағдайды күтпеңіз. Ел туристерге қауіпсіз, бірақ сақтықта қорлық жоқ: құнды заттарды ішкі қалтаңызға салып, туристік аудандардан алыс кетпеген абзал.
Еуропадағы той-думан
Жаңа жылды аппақ қарсыз, шамдары жарқыраған шыршасыз елестете алмасаңыз, Еуропаға барғаныңыз жөн. Бірақ Еуропада негізгі мереке Рождество екенін, қызықтың бәрі 25 желтоқсанға дейін өтіп кететінін ескеріңіз. Бізге Еуропада тұратын бірнеше азамат ең әдемі ағаш ойыншықтарды қайдан алуға болатынын және нағыз глинтвейнді қайдан ішу керегін айтып берді.
Германия
- Виза: Шенген визасын рәсімдеу қажет.
- Желтоқсан–қаңтар айларындағы күн райы: 0–5 °C.
Қарашаның соңынан Рождество қарсаңына дейін елдің түкпір-түкпірінде ағаштан жасалған шағын дүңгіршектер қойылған мерекелік жәрмеңкелер өтеді. Кешкі серуенге, қолдан жасалған ойыншықтар алғанға немесе ыстық каштан мен неміс шұжығын жеп көргенге осы жерлер өте қолайлы. Дрезденде Германиядағы ең көне жәрмеңке өтеді, ал Мюнхен мен Берлинге барсаңыз, көше шоулары да өтіп, нағыз мерекеге куә боласыз.
Рождество — немістерге маңызы зор мереке, сондықтан бұл күнге арналған ұлттық тағамдары да бар. Міндетті түрде штолленнен (цукат пен құрғақ жемістер қосылған дәстүрлі кекс), лекбухеннен (бал қосылған пәріндік) дәм татып, сан түрлі глинтвейнді ішіп көріңіз.
Италия
- Виза: Шенген визасын рәсімдеу қажет.
- Желтоқсан–қаңтар айларындағы күн райы: +5–13 °C.
Италиядағы Жаңа жыл Германиядан өзгеше: мұнда қар жоқ, күн әлдеқайда жылы. Есесіне желтоқсан айында туристер азайып, қонақүй бағалары төмендейді. Итальяндар Жаңа жылды қалалардың орталық алаңдарында тойлайды — дауысы зор от-шашу келер жылдың зұлым рухтарын қуады деген наным бар.
Мерекелік дастарқанға жасымық қойылады: бұл ас — молшылық пен берекенің символы. Сонымен бірге котекино (шошқа етінен жасалған шұжық) және десертке панеттоне (құрғақ жемістері бар тәтті нан) қояды. Бәрін төл шарабы — просеккомен ішеді.
Финляндия
- Виза: Шенген визасын рәсімдеу қажет.
- Желтоқсан–қаңтар айларындағы күн райы: –4–16 °C.
Финляндия астанасы Хельсинкиде жыл сайын рождестволық жәрмеңкелер өтеді. Бұл — Еуропаның көп еліне тән дәстүр. Бірақ нағыз қысқы ертегіні көремін десеңіз, Лапландияға барған дұрыс. Фин аңыздары бойынша дәл осы жерде — Рованиеми қаласында — Йоулупукки (жергілікті тілде Санта-Клаус) тұрады. Мұнда Санта ауылын, оның резиденциясын, бұғылар фермасын, хаски-сафариді және әлемнің түкпір-түкпірінен келетін хаттарды қабылдайтын поштаны көруге болады. Ал өзіңіз жергілікті пошта бөлімшесінен жаңа жылдық ашықхат жіберіп, ерекше естелік етіп ала аласыз.
Финляндияда түнде солтүстік шұғыласын көруге болады. Ол үшін елді мекендерден алыстау, жарық шамы аз орындарға бару қажет. Рованиемиден 5–8 адамдық топ болып шығатын турлар бар. Дегенмен күн құбылмалы болғандықтан, гидтермен алдын ала хабарласқан жөн.
Швейцария
- Виза: Шенген визасын рәсімдеу қажет.
- Желтоқсан–қаңтар айларындағы күн райы: –5–+5 °C.
Жергілікті тұрғындардың да, туристердің де көбі Жаңа жылды Швейцария Альпілерінде қарсы алады. Зерматт, Давос, Вербье және Санкт-Мориц сияқты курорттарда шале жалдап, таңертең қарлы беткейге шыға аласыз. Бірақ Швейцарияның тауларында демалған жыл бойы қымбат, ал жаңа жыл түні бағалар тіптен қымбат болады. Мысалы, Санкт-Морицте 31 желтоқсаннан 1 қаңтарға бір түнге нөмір жалдау — кемінде 350 еуро (210 мың теңге).
Альпілерді көргіңіз келіп, бірақ Швейцарияны қымбатсынсаңыз, Аустрияның Тироль аймағын ұсынамыз. Мұнда күндізгі ски-пасс шамамен 80 еуро, ал жабдық жалдау 32 еуродан (20 мың теңгеден) басталады.
Үнемді Жаңа жыл
Көп шығындалғыңыз келмесе, визасыз баруға болатын мынадай елдер бар.
Грузия
- Виза: 365 күнге дейін қажет емес.
- Желтоқсан–қаңтар айларындағы күн райы: +6–10 °C.
Қыста Грузияда көбіне күншуақ әрі құрғақ болады, сондықтан Тбилисиде серуендеген ғажап. Ескі қаланың тар көшелерімен жүріп, фуникулёрге мініп, Мтацминда тауына көтеріліп, Нарикала бекінісінен қаланы биіктен тамашалап, серуеннен кейін жылыну үшін моншаға кіріп шығуға болады.
Шаңғышылар мен сноубордшыларға екі тау курорты бар: Гудаури және Бакуриани. Екеуі де маусымды желтоқсанда ашады. Сізге қарлы әрі тыныш атмосфера ұнаса, Боржомиға барған дұрыс. Мұнда қар жатады, бірақ күн Қазақстанға қарағанда жылы. Сонымен қатар қалың қылқанжапырақты ормандарда қыдырып, әйгілі минерал суы бар шипажайларда тынығып қайтыңыз.
Сербия
- Виза: 30 күн ішінде қайтсаңыз, қажет емес.
- Желтоқсан–қаңтар айларындағы күн райы: +2–7 °C.
Сербия — еуропалық мереке атмосферасын сезінсем дейтін, бірақ виза шаруасымен әуре болғысы келмейтін туристерге таптырмас ел. Оның үстіне сербиялықтардың жаңа жылды тойлау күнтізбесі Қазақстанмен сәйкес келеді әрі жұрт мерекені думандатып тойлайды.
Белградтың көне бөлігіне барып, әдемі көшелерінде серуендеп, Белград қамалы мен «Калемегдан» паркіне дейін жүріп өтіңіз. Қысқы Дунайдың көрінісі ғажап. 31 желтоқсанда Республика алаңында танымал сербиялық поп-орындаушылар өнер көрсетіп, от-шашу атылады. «Копаоник» немесе «Тара» ұлттық парктерінде тұмса табиғатты көріңіз. Сербияның бұл таулы аймақтарында қар жатады және шаңғы курорты жұмыс істейді.
Әзербайжан
- Виза: 90 күн ішінде қайтсаңыз, қажет емес.
- Желтоқсан–қаңтар айларындағы күн райы: +4–8 °C.
Бірер күн ғана шетелде демалып қайтқыңыз келсе, Әзербайжан — таптырмас бағыт. Бакуде Ичери-шехердің көне көшелерінде қыдырып, шағын музейлерді, антиквар дүкендерін аралап шығыңыз. Сосын ұзын жағалау бульварына түсіп, Әзербайжан кілем музейін көре аласыз. Ал «Кіші Венеция» каналдарында гондоламен серуендеуге болады.
Әзербайжанда Бакуден бірнеше жүз шақырым жерде орналасқан өзінің тау-шаңғы орталығы — Шахдаг бар. Бұл жерді Губа және Шеки сияқты көрші тарихи қалаларға жасалатын экскурсияларға кіріктіре саяхаттауға болады.
Қырғызстан
- Виза: 90 күнге дейін қажет емес. Жеке куәлікпен кіруге болады.
- Желтоқсан–қаңтар айларындағы күн райы: –1–8 °C.
Жаңа жылды көп ақша құртпай, бірақ ерекше қарсы алғыңыз келсе, Қырғызстан — жақсы таңдау. Бішкекке емес, таулы аймақтарға барған дұрыс. Қаракөл қаласының маңында адам аз баратын, бірақ деңгейі әртүрлі трассалар бар шаңғы курорты жұмыс істейді. Фрирайд пен хелиски жасауға арналған жеке аймақтар да бар (яғни шаңғышыларды тікұшақпен таудың басына шығарып, ешкім тимеген қарлы беткейден сырғанай алады).
Таудағы серуеннен кейін «Ақ-Бермет» жылы бұлақтарына барып, қысқы Ыстықкөлдің көрінісіне тамсана отырып, жылы суға түсуге болады.
Ел ішінде
Жаңа жылды ерекше атап өткісі келетін адамға ел ішінде де баратын жер көп. Шаңғы тебетін тау да, тіршілік қайнаған мерекелік базар да табылады.
Бурабай
Мұндағы саф ауа, мұз құрсауындағы кең айдын мен қарағайлы ну орманды көргенде, «Мұзды өлке» мультфильмі еріксіз ойға оралады. Демалыста шаңғы курортына барып сырғанауға, коньки тебуге, атпен серуендеуге, балық аулауға, SPA-да демалуға немесе осының бәрін бір демалысқа сыйдырып жіберуге болады.
Айтпақшы, Санта-Клаустың ауылын көру үшін Финляндияға барудың қажеті жоқ. Бурабайда Аяз атаның өз резиденциясы бар.
Алматы облысы
Алматы облысының көзірі — таулар. Мереке күндерін дәл осы өңірде өткізген жақсы. Табиғат аясында үй жалдауға болады: Талғар шатқалындағы заманауи сауналы таун-хаус, Ақсайдағы тау көрінетін ыстық бассейнді вилла немесе қалаға жақын орналасқан сәнді Swissotel Alatau бар.
Сондай-ақ бір күндік хайкингке де шығуға болады: қыста Көлсай мен Қайыңдыға туристер жаздағыдай көп келмейді. Шонжының термал бұлақтарына барып, аязды күні ашық аспан астында жылы суға түсуге болады.
Катонқарағай
Бұл өңірдің жазы ғана емес, қысы да аса көрікті. Мұнда шаңғы тебуге, сноубордпен не тюбингпен сырғанауға болады. Өңірдегі ең үлкен курорт — «Алтай Альпілері»: мұнда адамның қабілетіне қарай 12 түрлі еңіс бар. Тебе алмаймын десеңіз, осындағы арнайы мектепте үйренуге болады.
Жаңа жылда денсаулыққа көңіл бөлгіңіз келсе, бұл аймақ ең дұрыс таңдау болмақ. «Изумрудный» санаторийінде 12-ден астам емдік шара бар, соның ішінде панто ваннасын да ұсынады. Мұндай ванна буын мен бұлшықет ауруларына жақсы.
Қысқаша айтқанда
- Теңіз жағасы. Жаңа жылды теңіз жағасында қарсы алғыңыз келсе, Тайланд, Мальдив аралдары, Вьетнам немесе БАӘ-ге тартып кетіңіз. Балалармен демалғанға Доминикана ыңғайлы, ал тәжірибелі саяхатшыларға Куба ұнайды.
- Рождестволық думан. Нағыз мерекенің атмосферасы Еуропада. Қолөнер бұйымдары мен дәмді тоқаштар сатылатын әдемі жәрмеңкелерді Германия мен Италиядан, ал қыстың тұмса табиғатын Швейцария мен Финляндиядан табасыз.
- Үнемді саяхат. Визаға уақыт не ақша жұмсағыңыз келмесе, Грузия, Әзербайжан не Сербия — таптырмас бағыт. Ал паспортыңыздың мерзімі өтіп кетсе, Қырғызстан мен Арменияға жеке куәлікпен-ақ кіруге болады.
- Қазақстан. Ел ішінде қыста да көретін жер көп. Тұмса табиғатта қысқы спорт Катонқарағай, Бурабай не Алматы облысындағы тау-шаңғы курорттарына — Shymbulak, «Ақбұлақ» немесе Oi Qaragay-ға баруға болады.
