Жазда демалысқа барып-қайту: 15 керемет нұсқа
Суға шомылып, қала көшелерін аралап, тауға шыққысы келетін қазақстандықтарға арналған топтама.
Биыл жазда қайда демалуға болады? Таңдау көп, ал уақыт әрдайым тапшы. Іздегенге уақыт жоғалтпай-ақ қойыңыз: біз визасыз, теңіз жағасындағы әрі қалтаға салмақ салмайтын бағыттарды бір жерге жинап қойдық. Ешқандай күрделі маршруттар мен визаның жыры жоқ — тек жайлы, жеңіл әрі жағымды демалыс. Жағалауда отырып, теңіз өнімдерінен дәм татып, пальмалармен суретке түсіп, сторис салуға таптырмас жерлер.
Жазда виза алмай-ақ қайда демалуға баруға болады?
Құжат жинап бас қатырмай, бірден демалысқа кетіп қалғысы келетіндерге арналған.
Түркия
Қалай жетуге болады: Алматы, Астана, Атырау және Шымкенттен Ыстанбұл, Анкара, Анталия және өзге де қалаларға тікелей рейстер бар.
Түркия — керемет жағажайларымен аты шыққан ел. Мұнда әрі тыныш, әрі тамаша курорттар табылады. Маусым қызған шақта ауа температурасы +30–35 °C-қа дейін жетсе, Эгей мен Жерорта теңізінің суы +26–28 °C-қа дейін жылиды.
Ең танымал курорттар қатарында Анталия, Бодрум, Аланья мен Кемер бар. Егер турист көп жүретін жерлерден аулақ болғыңыз келсе, Сиде мен Кашқа назар аударыңыз — мұнда жағажайлар жайлы, қонақүйлер жақсы, ал бағалары қымбат емес. Табиғат пен тарихты ұнататындар үшін Каппадокияға бару міндетті — мұнда ежелгі үңгір храмдары мен ерекше жартасты ландшафттар бар. Белсенді демалысты қалайтындар үшін Ликия жолы — таптырмас бағыт. Бұл ежелгі қалаларды көркем айлақтармен байланыстыратын ең әдемі жаяу маршруттардың бірі.
Грузия
Қалай жетуге болады: Астана мен Алматыдан Тбилиси, Батуми және Кутаисиге тікелей рейстер бар.
Жазда мұнда теңізге шомылу, тауға серуендеу мен қаланы аралау сияқты демалыс түрлерін тоғыстыруға болады. Егер теңізге барғыңыз келсе, Қара теңіз жағалауындағы Батуми немесе Урекиді таңдаңыз. Шілде-тамыз айларында ауа температурасы +28–30 °C-қа дейін жылынады, судың температурасы — шамамен +25 °C. Батумиде жайлы, күтімі жақсы қиыршық тасты жағажайлар мен қонақүйлердің үлкен таңдауы бар, ал Урекиде денсаулыққа пайдалы қара магнитті құмды жағажайлар орналасқан.
Тарих пен баяу серуендеуді ұнататындарға Тбилиси ұнайды — мұнда күкірт моншалары, Нарикала қамалы мен жайлы аулалар бар. Тбилисиден Мцхетаға — көне астанаға немесе Телавиге — Кахетия өңіріндегі жүзім шаруашылығы дамыған, отбасылық шарап жасайтын орындар мен Кавказ таулары көрінетін қалаға барып қайтуға болады.
Черногория
Қалай жетуге болады: Астана мен Алматыдан Подгорицаға тікелей рейстер бар, ал Тиватқа Баку немесе Ыстанбұл арқылы бір рет ауысып отырып жетуге болады.
Адриатика теңізінің мөлдір суы, жағажайлар мен тарихқа толы көне қалалар — Черногория жазғы демалыс үшін тамаша бағыт. Жаз мезгілінде ауа температурасы шамамен +27–30 °C, ал судың температурасы +24–26 °C-қа дейін жетеді. Демалуға арналған ең танымал орындар — Будва, Котор және Тиват. Будва — теңізге шомылуға және Ескі қаланы аралауға ыңғайлы. Тарих пен тар көшелерді жақсы көретіндерге Котор ұнайды, ал Тиват яхта туризмін және ерекше сәулет өнерін бағалайтындарға арналған. Сондай-ақ Дурмитор ұлттық паркіне барып, таулы соқпақтармен серуендеп, Тара өзенінің каньонын көріп, рафтингпен айналысуға болады.
Жергілікті тағамдарды да байқап көріңіз — черногор кәуабы, грильде піскен балық пен дәстүрлі сорпалар. Мұндағы бағалар Адриатика жағалауындағы өзге елдермен салыстырғанда төмен.
БАӘ
Қалай жетуге болады: Астана, Алматы және Шымкенттен Дубай мен Абу-Дабиге тікелей рейстер бар.
БАӘ-дегі жаз — нағыз сынақ: ауа температурасы +45 °C-тан асып, ылғалдылық өте жоғары болады. Бірақ аптап ыстыққа дайын жандар үшін бұл — тиімді демалыс уақыты. Қонақүй, әуе билеттері мен экскурсиялар арзандайды. Мұндай ауа райында демалыс жоспарын тек салқын әрі жабық жерлерде құруға кеңес береміз — бассейні бар қонақүйлер, алып сауда орталықтары, мысалы, Dubai Mall немесе Dubai Aquarium сияқты орындарда салқын әрі жайлы болады.
Армения
Қалай жетуге болады: Абу-Даби арқылы бір рет ауысып отырып жетуге болады.
Арменияның жазы басқа курорттармен салыстырғанда жайлы өтеді — температура +30 °C шамасында, ал таулы өңірлерде ауа тіпті салқындау болады. Бұл мезгіл — табиғи саябақтарға, серуен мен жаяу жүріс үшін ең қолайлы уақыт. Мысалы, Гегаркуник аймағындағы әсем Севан көліне барып көруге болады. Тарихты сүйетіндер үшін Ереван қызықты болмақ. Мұнда музейлер мен көне ғимараттар көп, ал Гегард пен Хор Вирап монастырлерінен Арарат тауына керемет көрініс ашылады.
Армян тағамдарынан міндетті түрде дәм татып көріңіз: кәуап, хаш, долма, үй шарабы мен аты аңызға айналған «Арарат» коньягы.
Малайзия
Қалай жетуге болады: Алматыдан Куала-Лумпурға тікелей рейстер бар.
Малайзия — бәрін бір демалыста көргісі келетін жандарға арналған ел: мұнда жағажайлар да, ну ормандар да, ірі мегаполистер мен будда храмдары да бар. Оңтүстік-Шығыс Азияның басқа елдерімен салыстырғанда, жазда мұнда онша ыстық емес — шамамен +30 °C.
Демалысты Лангкави мен Пенанг сияқты әсем аралдарда өткізуге немесе ну ормандар мен таулы өңірлерге — мысалы, Кинабалу тауына баруға болады. Куала-Лумпурда заманауи қаланың ерекше атмосферасын сезініп, атақты Петронас мұнараларын көрген жөн. Ел ішінде саяхаттау да өте ыңғайлы: көлік жүйесі жақсы дамыған, тұрғын үй бағасы қолжетімді. Сонымен қатар, Малайзияға ұшақ билеттері көбіне Бали не Тайландқа қарағанда арзанырақ.
Жазда теңізде шомылуға қайда баруға болады?
Суға түсіп, күнге күйіп, жағажайда жатып демалғысы келетіндерге арналған.
Грекия
Қалай жетуге болады: Ыстанбұл, Доһа немесе Франкфурт арқылы бір немесе бірнеше рет ауысып отырып жетуге болады.
Виза: Шенген.
Грекия — бұл тек әйгілі Миконос пен Санторини аралдары ғана емес, сонымен қатар онша танымал емес, бірақ өте әдемі демалатын жерлері де бар ел. Мысалы, Крит пен Родос аралдарында әрі халық көп шоғырланған жағажайларды, әрі тыныш, оқшау айлақтарды табуға болады. Ал арзан демалыс іздесеңіз, Лефкада немесе Пелопоннес аймақтарына назар аударыңыз: мұнда бағалар төмен, ал туристер саны аздау. Афина қаласында ежелгі Акрополь мен көне қирандыларды тамашалап қана қоймай, теңіз жағалауында да демалуға болады. Мысалы, таза суы мен көркем табиғатымен ерекшеленетін Астир-Блаф жағажайы немесе тыныш Вула жағажайы.
Грек тағамдары — бұл елге барудың тағы бір маңызды себебі. Мұнда міндетті түрде дәмін татып көру керек тағамдар: мусака (ет пен баклажан қосылған танымал бәліш), сувлаки (дәмдеуіштер қосылған еттен дайындалған кәуап) және фета ірімшігі мен зәйтүн қосылған грек салаты. Сыйлыққа немесе естелік ретінде жергілікті базарлар мен дүкендерден зәйтүн майын, лавр жапырағынан жасалған дүниелер мен дәстүрлі грек тәттілерін алуға болады.
Испания
Қалай жетуге болады: Ыстанбұл, Дубай немесе Франкфурт арқылы ауысып отырып жетуге болады.
Виза: Шенген.
Испания — бұл тек паэлья, Саграда-Фамилия мен Гаудидің өнері ғана емес, сонымен қатар жүздеген шақырым жағалау. Мұнда әркім өзіне ұнайтын жағажайды таба алады. Коста-Брава — теңізге құлайтын жартастар, айлақтар мен қарағайлы ормандармен әйгілі. Коста-Бланкада жағажайлар ұзын әрі құмды, балалармен демалуға да өте ыңғайлы. Ал Андалусия мен Коста-дель-Соль жағалауы — жағажай мен көне қалаларда серуендеуді қатар үйлестіргісі келетіндер үшін таптырмас мекен. Арал өмірін ұнататындарға Майорка мен Тенерифені ұсынамыз. Майорка — мөлдір көгілдір жағажайларымен әйгілі, ал Тенерифеде Атлант мұхитына шомылып, жанартауға көтерілуге болады.
Бағалар аймақ пен курорт түріне байланысты болады. Құрлықтағы қалаларда тұрғын үй мен тамақтану әдетте аралдарға қарағанда арзанырақ. Егер алдын ала брондасаңыз немесе жағажайдан сәл қашық орналасқан пәтер таңдасаңыз, теңіз жағасындағы апартаментті 70 еуроға (шамамен 40 мың теңге) табуға болады. Ал Барселона мен Марбелья сияқты танымал туристік қалаларда бағалар 120 еуродан (шамамен 69 мың теңге) басталады.
Вьетнам
Қалай жетуге болады: Алматыдан Нячанг пен Фукуокқа тікелей рейстер бар.
Виза: 30 күнге дейін визасыз.
Жазда Вьетнамның оңтүстігін таңдаған жөн — бұл маусымда мұнда құрғақ кезең. Мысалы, Нячанг — кең құмды жағажайлары, бағасы қолжетімді дәмханалары мен балғын теңіз тағамдарымен танымал курорт. Бұл қала классикалық жағажай демалысын қалайтындарға жарайды: шезлонг, массаж, коктейль — бәрі бар. Ал тыныштық пен оңаша демалысты ұнататындар үшін Фукуок аралы — таптырмас орын. Ол тропикалық ормандарымен және түрлі-түсті маржан рифтерімен әйгілі. Вьетнам — нағыз гурмандарға арналған ел. Мұнда дәмді тағамдар үшін мейрамхана іздеудің қажеті жоқ — ең керемет тағамдар көшеде дайындалады. Міндетті түрде фо бо (сиыр еті қосылған сорпа), ет пен көкөністер салынған вьетнамдық багет пен жұмыртқа қосылған кофені байқап көріңіз.
Мысыр
Қалай жетуге болады: Алматы мен Астанадан Шарм-эш-Шейхке тікелей рейстер бар. Ал Шымкенттен Каирге тура жетуге болады.
Виза: келген кезде әуежайда рәсімделеді.
Мысыр — бұл тек all inclusive жүйесі мен бірінші жағалау сызығындағы қонақүйлер ғана емес, сонымен қатар жазда жағажай демалысын ерекше бағдарламамен ұштастыруға болатын сирек бағыттардың бірі. Қызыл теңізде снорклинг пен дайвингке арналған тамаша жағдай жасалған: маржан рифтері жағадан алыс емес, ал су таңертең де жылы болады. Тарихты жақсы көретіндер үшін пирамидаларға, Луксорға және Патшалар алқабына экскурсиялар ұйымдастырылады. Сондай-ақ Ніл өзенімен круизге шығуға болады. Ал экзотиканы қалайтындарға шөл даладағы сафари немесе квадроциклмен серуен бар.
Мысырдың басты ерекшелігі — тұрақты климаты: жазда ыстық болса да, ауа құрғақ. Туристік инфрақұрылымы жақсы дамыған, ал бағалары қолжетімді деңгейде қалады. Сонымен қатар, мұнда дәмдеуіштері мол шығыс тағамдары, балғын теңіз өнімдері мен базардан алынатын жеміс шырындары жоғары бағаланады.
Кипр
Қалай жетуге болады: Ыстанбұл, Дубай немесе Доһа арқылы ауысып отырып жетуге болады.
Виза: Шенген.
Кипр — бұл қарама-қайшылықтарға толы арал. Таңды көне тарихи орындарды аралап бастауға болады, ал түске қарай жылы Жерорта теңізінде шомылып немесе ең таза жағажайлардың бірінде демалуға мүмкіндік бар. Көгілдір теңіз, жылы су мен жарқыраған күн — мұнда бәрі тынығу мен шабыт алуға арналған. Танымал курорттардан айырмашылығы — Кипрде ойын-сауық орталықтары көп емес. Көңілді түнгі өмірді қалайтындарға Айя-Напа, ал тыныш әрі жайлы демалысты ұнататындар үшін Протарас немесе Ларнака қолайлы. Кипр тағамдары да ерекше дәмімен қуантады: қуырып берілетін халуми ірімшігі, балғын долма, еттен жасалған кефтедес және түрлі мезе тағамдары — барлығы да ерекше. Бұл тағамдарның қасына ежелгі дәуірден бері өндіріліп келе жатқан жергілікті шараптан алдырыңыз.
Мальдив аралдары
Қалай жетуге болады: Ыстанбұл, Куала-Лумпур немесе Дубай арқылы ауысып отырып жетуге болады.
Виза: 30 күнге дейін визасыз.
Мальдив аралдарында жыл бойы демалуға болады, бірақ жаз мезгілінде мұнда ылғалды маусым басталады. Жаңбыр көбіне қысқа уақытқа жауады, әсіресе түнгі уақытта, ал ауа мен судың температурасы тұрақты түрде +28–30 °C шамасында болады. Бұл кезеңде туристер саны азаяды, ал қонақүй мен экскурсия бағалары төмендейді — жазғы демалыс әлдеқайда қолжетімді болады. Мұнда нағыз шытырманға толы демалыс ұйымдастыра аласыз: Ари атолы маңында киттермен бірге жүзу, балық аулап, жағалауда өзіңіз аулаған балықты қуырып жеу, мөлдір түбі бар қайықпен серуендеу. Суасты әлемін сүйетіндер үшін кез келген аралдың жанында снорклинг пен дайвинг бар. Ал романтикалық демалысты қалайтындар күн батқанда дельфиндермен круизге шыға алады. Оңашада демалғыңыз келсе, Маафуши мен Тодду аралдарына назар аударыңыз. Ал all inclusive жүйесін қалайтындар үшін курорттық резорттар — таптырмас таңдау.
Жазда көп ақша шығармай қайда демалуға болады?
Артық шығын шығармай шетелге барғысы келетіндерге арналған.
Қырғызстан
Қалай жетуге болады: Астана, Алматы және Ташкенттен Қырғызстанға тікелей рейстер бар. Сонымен қатар автобуспен, пойызбен немесе жеке көлікпен де баруға болады. Алматы мен Бішкектің арасы — бар болғаны 250 шақырым.
Егер жазда тауға, су жағасына барып, сонымен қатар үнемдегіңіз келсе, Қырғызстан — тамаша таңдау. Бұл жаққа қарай ертең-ақ жолға шығуға болады: виза қажет емес, жету оңай, ал жергілікті бағалар ең қарапайым бюджетке де сай келеді. Қырғызстанның ең басты байлығы — табиғаты. Жазда бұл жақта өте жайлы: салқын таулар, таза ауа, жасыл жайлаулар және аймақтың інжу-маржаны саналатын әйгілі Ыстықкөл. Көл үлкен әрі демалуға да, белсенді серуендеуге де қолайлы. Оңтүстік жағасы тыныш әрі табиғи қалпында қалған, ал солтүстік жағада инфрақұрылым жақсы дамыған: базарлар, дәмханалар, қолжетімді қонақүйлер бар.
Қонақүй бағасы тәулігіне шамамен 15 мың теңгеден басталады. Дәмханада түскі ас — 2 500 теңгеден. Тағамдар дәмді әрі таныс: жаңа піскен тандыр нан, лағман, самса, палау және базардағы балғын жемістер — бәрі де қолжетімді бағада.
Өзбекстан
Қалай жетуге болады: Астана мен Алматыдан Ташкентке тікелей рейстер бар. Сонымен қатар Қазақстанның оңтүстік қалаларынан жеке көлікпен баруға болады.
Өзбекстан — бұл тек медреселерді аралап, палау жеу емес, бірақ бұның бәрі бағдарламада міндетті түрде болуы тиіс. Бұл — Шығыстың сұлулығын көріп, өзімізге таныс мәдениетпен тереңірек танысу мүмкіндігі. Егер Өзбекстанға алғаш рет барсаңыз, сапарыңызды Самарқан мен Бұхарадан бастаңыз. Бұл — көне күмбездер мен кілем сататын шеберханалары бар, шағын көшелер бойымен қыдыруға ыңғайлы қалалар. Міндетті түрде шайханаға кіріп, палау, шурпа, қытырлақ нан, балғын жемістер мен көк шайға тапсырыс беріңіз. Ал егер ерекше әсер алғыңыз келсе, Қызылқұм шөліне жол тартыңыз — мұнда киіз үйлі лагерьлер бар. Қонақтар ашық аспан астында түней алады, от жағасында өзбек әндерін тыңдап, түйеге мінуге де болады.
Ел ішінде саяхаттау оңай әрі қолжетімді. Ташкент, Самарқан мен Бұхара арасында жылдам жүретін «Афросиаб» пойызы бар. Самарқаннан Бұхараға дейінгі жол билеті шамамен 5 000 теңгеден басталады.
Әзербайжан
Қалай жетуге болады: Астана мен Алматыдан Бакуге тікелей рейстер бар.
Әзербайжан — теңіз жағасында аса қымбат емес демалыс іздейтіндер үшін тамаша бағыт. Каспий теңізінің жағалауы бұл үшін өте қолайлы. Бильгях елдімекенінде жағажайда демалып, емдік минералды суларды байқап көруге болады. Загульба — туристер аз, тыныш әрі жайлы орын, ал Лянкяранда теңіз жағасындағы демалысты жасыл саябақтарда серуендеумен және жайлы дәмханаларға барумен үйлестіруге болады. Көпшілік туристер саяхатын ел астанасы — Бакуден бастайды. Мұнда міндетті түрде Ичеришехерге — тар көшелері, қорған қабырғалары мен Қыз мұнарасы бар Ескі қалаға барып көріңіз. Сондай-ақ кешкі уақытта ерекше жарықпен безендірілетін аты шулы Жалын мұнараларын да тамашалауды ұмытпаңыз.
Әзербайжан тағамдары — бұл елге баруға тұрарлық жеке бір себеп. Міндетті түрде мына тағамдардың дәмін татып көріңіз: көк шөп немесе етпен қосып дайындалатын кутаб, шырынды кәуап, кепкен жемістер қосылған палау және жүзім жапырағына оралған долма.
Жазда қайда демалуға болады: жиі қойылатын сұрақтар
Жазғы демалысқа ең жақсы курортты қалай таңдауға болады?
Бәрі сіздің қалауыңызға байланысты! Егер бастысы теңіз бен жағажай болса, Түркия мен Мысыр — керемет таңдау. Мәдени саяхатқа қызықсаңыз, Грузия немесе Арменияны таңдауға болады. Ал ерекше әсер мен экзотика іздесеңіз, Мальдив аралдары немесе Вьетнамды қарастырыңыз.
Қай жағажайлар демалысқа ең қолайлы?
Түркия мен Мысыр жылы теңізі және жайлы жағажайларымен танымал. Ал ерекше дүние іздесеңіз, Черногория мен Кипр жағалауларына назар аударыңыз. Мұнда табиғат көріністерін тамашалап, тыныш атмосферада демалуға болады.
Жазда қалай үнемдеп демалуға болады?
Арзан демалыс үшін бәрін алдын ала брондап, туристер аз келетін кезеңдерді таңдаңыз. Сонымен қатар көршілес елдер — Өзбекстан, Қырғызстан немесе Әзербайжан — бағасы қолжетімді әрі жақсы бағыттар қатарында.
Егер мен аптап ыстықты ұнатпасам, бірақ жазда саяхаттағым келсе не істеу керек?
Ыстық ауа райы сізге қолайсыз болса, жазда климаты жұмсақ аймақтарды таңдаңыз. Мысалы, Грузия мен Арменияның таулы өңірлері немесе жазда ауа райы жайлы болатын Норвегия, Финляндия сияқты Солтүстік Еуропа елдері — тамаша таңдау.
Қазақстанда жазғы демалысқа қай жерлер қолайлы?
Қазақстанда жазда демалуға болатын әсем табиғаты бар мекендер көп. Балқаш, Алакөл немесе Бурабай көлдерінде шомылып, тынығуға болады. Ал белсенді демалыс үшін Шығыс Қазақстандағы Алтай таулары мен Тянь-Шаньдағы ұлттық парктер мен тау курорттары өте қолайлы.
Қандай елдерге Қазақстаннан жазда визасыз баруға болады?
ТМД елдеріне, мысалы, Ресей, Молдова немесе Тәжікстанға визасыз саяхаттауға болады. Ал жағажайда демалғыңыз келсе, Малайзия, Қытай, Тунис пен Сейшел аралдары — визасыз баратын керемет бағыттар қатарында.
Жазғы демалысқа қонақүйді қалай таңдауға болады?
Қонақүй таңдағанда ең алдымен пікірлерге, орналасқан жеріне және ыңғайлы қызметтердің болуына мән беріңіз. Егер көп уақытыңызды жағажайда немесе экскурсияларда өткізуді жоспарласаңыз, бағасына тамағы кіретін қонақүй таңдаған дұрыс. Қонақүйлерді іздеу үшін Aviasales қызметін пайдалануға болады.
Отбасылық демалысқа қандай курорттар қолайлы?
Түркия, Мысыр және Грекия — балалармен саяхаттауға ең ыңғайлы елдер. Бұл курорттарда балаларға арналған ойын-сауық мекемелері, клубтар және жайлы, тыныш теңіз жағажайлары бар.
Суретті салған — Маша Вахрушева.
